LÈSON 10
Kijan ou pé rèkonnèt vré rèlijyon-la ?
1. Ès sé onsèl vré rèlijyon ki ni ?
« Véyé-w èvè sé fo pwofèt-la » (MATYÉ 7:15).
Jézi aprann disip a-y onsèl rèlijyon, vré rèlijyon-la. I di kè i kon on chimen ki ka menné a lavi étèwnèl é kè « pa ni onlo moun ka touvé-y » (Matyé 7:14). Bondyé ka aksepté yenki rèlijyon-la ki ka bazé-y anlè vérité-la ki adan Pawòl a-y. Tout vré adoratè a Bondyé ka kwè adan menm biten-la (Li Jan 4:23, 24 ; 14:6 ; Éfézyen 4:4, 5).
Gadé vidéo-la Ès Bondyé ka aksèpté tout sé rèlijyon-la ?
2. Ka Jézi di anrapò èvè lé swadizan krétyen ?
« Douvan moun, yo ka di yo konnèt Bondyé, men aksyon a yo ka montré yo pa èvè-y » (TIT 1:16).
Jézi té di disip a-y kè dé fo pwofèt té’é détouné rèlijyon-la i té anségné-yo la. Sé fo pwofèt-lasa ka ba-w lenprésyon yo sé dé moun ki ka sèvi Bondyé. É Légliz a yo ka di yo krétyen. Men ni mwayen rèkonnèt sé fo krétyen-lasa. Sé sèlman vré rèlijyon-la ki ka pwodui vré krétyen. É nou pé rèkonnèt sé vré krétyen-la grasa bèl kalité a yo é grasa sa yo ka fè (Li Matyé 7:13-23).
3. Kijan ou pé rèkonnèt vré sèwvitè a Bondyé ?
Mi senk biten ki ké pèwmèt-vou rèkonnèt-yo :
Vré sèwvitè a Bondyé ka rèspèkté Labib. Pou yo, sé Pawòl a Bondyé. Yo ka fè onlo éfò pou suiv prensip ki maké adan-y. Donk, vré rèlijyon-la diféran dè sé rèlijyon-la ki ka bazé-yo anlè lidé a lézòm (Matyé 15:7-9). Vré sèwvitè a Bondyé pa ka fè lèkontrè a sa yo ka anségné (Li Jan 17:17 ; 2 Timoté 3:16, 17).
Vré disip a Jézi ka onoré non a Bondyé, Jéova. Jézi onoré non a Bondyé lè i fè moun konnèt non-lasa. I édé lézòm konnèt Bondyé é i aprann-yo priyé pou non a Bondyé vin sen (Matyé 6:9). La ou ka rété la, ki rèlijyon ka fè moun konnèt non a Bondyé ? (Li Jan 17:26 ; Women 10:13, 14).
Sé vré krétyen-la ka préché wayòm a Bondyé. Bondyé voyé Jézi asi latè pou préché bon nouvèl a Wayòm-la. Wayòm-lasa, sé sèl èspwa pou lézimen. Jézi palé dè-y jiskatan i mò (Lik 4:43 ; 8:1 ; 23:42, 43). I di kè disip a-y osi té ké préché wayòm-lasa. Ès on moun ja vin owa a-w pou palé-w dè wayòm a Bondyé ? Sèlon vou, an ki rèlijyon moun-lasa yé ? (Li Matyé 24:14).
Vré disip a Jézi pa ka mélanjé-yo adan mond méchan lasa. Kijan ou pé rèkonnèt-yo ? Yo pa ka fè politik, é yo pa ka mélé-yo adan pon kalté boulvès ki ni la yo ka viv la (Jan 17:16 ; 18:36). Non sèlman sa, men yo pa ka lésé mantalité a moun ki an mond-lasa détenn asi yo é yo pa ka pran vyé mès a yo nonplis (Li Jak 4:4).
Sé vré krétyen-la ni on lanmou èstraòwdinè yonn pou lòt. Grasa Pawòl a Bondyé, yo ka aprann rèspèkté moun a tout péyi. Pli souvan ki rarman, sé rèlijyon-la ki pa bon la ka fè onlo biten pou soutyenn lagè, men vré sèwvitè a Bondyé ka rèfizé fè sa (Miché 4:1-3). Byen okontrè, yo pa pè sèvi anplen èvè tan a yo é èvè sa yo ni pou édé é pou ankourajé lézòt (Li Jan 13:34, 35 ; 1 Jan 4:20).
4. Sèlon vou, bon rèlijyon-la sé kilès ?
Ki rèlijyon ka bazé tout ansègnman a-y asi Pawòl a Bondyé ? Ki rèlijyon ka onoré non a Bondyé ? Ki rèlijyon ka préché kè wayòm a Bondyé sé sèl èspwa ki ni pou lézimen ? Moun a ki rèlijyon ka manifèsté vré lanmou-la é pa ka fè lagè ? Ka ou ka pansé ? (Li 1 Jan 3:10-12).