Ka sé rèlijyon-la ké divini ?

1. Ès tout sé rèlijyon-la bon ?

Adan tout rèlijyon, ni moun ki sensè, kivédi yo vréman anvi fè Bondyé plézi. Bon nouvèl-la, sé kè Bondyé ka vwè-yo é kè i ka sousyé-y dè yo. Malérèzman, onlo moun ka sèvi èvè larèlijyon pou yo fè dé biten ki mové (2 Korentyen 4:3, 4 ; 11:13-15). Lè ou ka gadé jounal, yo ka montré-w ni rèlijyon ki ka jouwé on wòl adan masak a popilasyon, aksyon téworis, lagè, men osi adan mové trètman é vyòl timoun ka sibi. Moun ki ka kwè an Bondyé é ki vréman sensè ka touvé sa tris toubòlman ! (Li Matyé 24:3-5, 11, 12).

Bon rèlijyon-la ka glorifyé Bondyé, men sé fo rèlijyon-la ka fè dé biten ki pa ka fè-y plézi. Yo ka anségné dé biten ki pa adan Labib. Pa ègzanp, yo ka manti asi Bondyé é yo pa ka di lavérité asi lémò. Men Jéova vlé toutmoun konnèt lavérité asi-y (Li Ézékyèl 18:4 ; 1 Timoté 2:3-5).

2. Ka ki kay rivé sé rèlijyon-la ?

Érèzman, pa ni mwayen kouyonné Bondyé. I sav byen ni dé rèlijyon ki ka di yo enmé-y alòskè an réyalité sé mond a Satan yo enmé (Jak 4:4). Tout sé fo rèlijyon-la ka fòwmé sa yo ka kriyé adan Labib « Gran Babilòn-la ». Poukwa ? Pas apré Délij-la, fo-rèlijyon-la sòti adan on vil non a-y sété Babilòn. Talè, Bondyé ké détwi on mannyè sibit tout rèlijyon ki ka tronpé moun é ki ka fè-yo soufè (Li Révélasyon 17:1, 2, 5, 16, 17 ; 18:8).

Jéova pa ka oubliyé moun sensè ki tibwen toupatou adan sé fo rèlijyon-la, kèlkèswa la yo yé asi latè. Padavwa i ka anségné-yo lavérité, i ka rasanblé-yo adan vré rèlijyon-la (Li Miché 4:2, 5).

3. Ka sé moun-la ki sensè la dwètèt fè ?

Jéova ka sousyé-y dè moun ki enmé sa ki byen é ki enmé lavérité. I ka di-yo pòté mannèv pou yo sòti adan tout rèlijyon ki pa bon. On moun ki enmé Bondyé paré a chanjé pou fè-y plézi (Li Révélasyon 18:4).

O prèmyé syèk, moun ki té sensè té tou kontan tann sé bon nouvèl-la lézapòt té ka préché la. Grasa Jéova, yo dékouvè ké yo té pé viv ondòt mannyè, ki té ka mèt plis jwa an tchè a yo, ki té ka ba vi a yo on sans é ki té ka ba-yo on lèspwa pou dèmen. Lè yo tann sé bon nouvèl-lasa, yo ba Bondyé prèmyé plas an vi a yo. Jan-la yo réyaji la, sé on bèl ègzanp pou noutout jòdila (Li 1 Tésalonisyen 1:8, 9 ; 2:13).

Sèwvitè a Jéova ka fè onsèl fanmi. Lè on moun lésé on rèlijyon ki pa bon, Jéova kontan risivwè-y an fanmi a-y. Pou vou osi, bra a Jéova gran wouvè ! Si ou aksèpté envitasyon a-y, ou ké vin zanmi a-y, ou ké adan on fanmi ki plen lanmou é ou ké pé ni lavi étèwnèl (Li Mawk 10:29, 30 ; 2 Korentyen 6:17, 18).

4. Kijan Jéova ké rann toutmoun kontan asi latè ?

Talè, Bondyé ké détwi tout rèlijyon ki pa bon, é sé on bon nouvèl ! Grasa sa, ponmoun asi latè pé ké soufè ankò. Pé ké ni pon fo rèlijyon pou menné moun asi on chimen ki pa bon. A moman-lasa, ki an syèl-la ki asi latè, toutmoun ké adoré sèl vré Bondyé-la adan linité (Li Révélasyon 18:20, 21 ; 21:3, 4).