Òktòb

Ès délè ou ni dimal a obéyi ? Sé sa ki rivé wa David. Sé pousa limenm mandé Jéova : « Fè-mwen anvi obéyi-w » (Sòm 51:12). Menmsi i té enmé Jéova, délè pou i té obéyi-y sa pa té mòl é sé menm biten-la pou nou osi. Poukwa sa ka rivé-nou ? Prèmyèwman, sé pas nou ni on mové tandans ki ka pousé-nou a pa kouté Bondyé. Sa ka fè pawti a éritaj-la Adan é Èv lésé ban nou la. Dézyèmman, sé pas toutlè Satan dèyè do an nou pou fè-nou ba Jéova do kon li i fè-y (2 Kor. 11:3). Twazyèmman, sé pas adan mond-la nou ka viv adan-y la, sé moun-la ni on létadèspri ki ka pousé-yo rèbélé-yo, on lèspri « ki ka aji konnyéla asi sé moun-la ki ka dézobéyi la » (Éféz. 2:2). Alò fò-nou travay rèd pou nou pé sa goumé èvè défo an nou é fò-nou goumé pou nou pa lésé Satan é mond a-y pran lanmen asi nou. Pou sa, nou ké kouté Jéova é sé moun-la i bay on otorité la. w23.10 6 § 1.

Ka mirak-la Jézi fè la lèwvwè i té Kana ka aprann-nou ? Ében, on bèl lèson asi limilité. Lèwvwè Jézi té ka fè on mirak, i pa té ka blagé sa. An réyalité, i pa jen té ka fè sa. Okontrè, i té ka aji èvè imilité. Lè i té ka fè on biten, i toujou té ka ba Pap’a-y glwa é i toujou té ka di kè sé té grasa Pap’a-y si i té ka rivé fè sa (Jan 5:19, 30 ; 8:28). Si nou ka imité Jézi é kè nou ka aji èvè imilité lèwvwè nou ka fè on biten, nou pé’é ay blagé sa ba dòt moun. Nou pa’a bat lèstonmak an nou. Olyé nou fè sa, an-nou ba Bondyé louwanj pas sé on Bondyé ki èstraòwdinè é nou kontan adoré-y toubònman (Jér. 9:23, 24). An-nou ba-y lonnè-la i mérité la, pas si nou ka rivé fè tout sé bon biten-la nou ka fè la, sé enki pas i ka édé-nou. Pa vré ? (1 Kor. 1:26-31). Lèwvwè nou ka fè moun alantou an nou dibyen, fò pa nou chèché a fè lézòt pòté-nou anlè pou sa, men okontrè, fò-nou aji èvè imilité. Jéova ka vwè sa nou ka fè é sa ni onlo valè pou-y. Nou pa bizwen plis ki sa (gadé osi Matyé 6:2-4 ; Ébr. 13:16). Nou pé sèten kè si nou ka imité Jézi é nou ka montré kè nou ni imilité, nou ké fè Jéova plézi (1 Pyè 5:6). w23.04 4 § 9 ; 5 § 11-12.

Jéova pousé lapòt Pòl maké on lèt ba sé krétyen-la é i ankourajé-yo a chèché entéré a lézòt. Kijan nou pé suiv konsèy-lasa adan lasanblé an nou ? Sé lè nou ka sonjé kè lézòt anvi bay on ti komantè osi menmjan ki nou. An-nou fè on ti réfléchi : lèwvwè ou ka fè on ti kozé èvè zanmi a-w, ès sé enki vou ki ka palé é sélézòt-la pa ni lokazyon di sa yo ka pansé ? Non, sèten ou pa’a fè sa ! Ou anvi sav sa yo ka pansé osi. Menmjan-la, lè nou k’ay réinyon, nou vé kè on maksimòm dè moun pawtisipé. An réyalité, si nou vé ankourajé frè é sè an nou, fò nou lésé-yo réponn osi pou yo montré jan yo ni fwa adan Jéova (1 Kor. 10:24). Alò fò-nou pran labitid fè dé komantè ki toukout. Konsa, on maksimòm dè moun ké pé réponn. É menm lèwvwè nou ka bay on répons ki kout, fò pa nou palé dè twòp lidé. Si lè ou ka bay on répons, ou ka palé dè tousa ki adan on paragraf, lézòt pé’é ni granzafè a di. w23.04 22-23 § 11-13.

Fò-nou sonjé jan sa enpòwtan kè nou kontinyé édé lézòt, siwtou lèwvwè nou ka préché ba yo. Lè nou ka préché, fò-nou adapté-nou. Nou ka préché ba moun ki ka sòti dè diféran koté asi latè é ki ka kwè diféran biten asi Bondyé. Lapòt Pòl té ka rivé adapté-y épi nenpòt kimoun. Ègzanp a-y pé aprann-nou onlo biten. Jézi té nonmé Pòl « apòt a sé nasyon-la » (Wom. 11:13). Kifè, Pòl préché ba sé Juif-la, ba sé Grèk-la, ba moun ki té fè onlo lékòl, ba moun ki pa té ni pon grad, ba dé gwo fonksyonnè é ba dé wa. Pou i té pé sa touché tchè a tout sé moun-lasa, i vin « tout kalté biten pou tout kalté moun » (1 Kor. 9:19-22). Lè i té ka palé ba on moun, i té ka pran tan gadé ola moun-lasa grandi, adan kibiten yo lévé-y é adan kibiten i ka kwè. I té ka tchenn kont dè tout sé biten-lasa pou éséyé ba moun-la i té ka palé èvè-y la anvi konnèt Bondyé. Nou osi, nou pé vin pi filé an prédikasyon si nou ka adapté-nou a sé moun-la é si nou ka éséyé vwè sa chakmoun nou ka jwenn bizwen. w23.07 23 § 11-12.

Lèwvwè on moun ni dousè, a pa fèb moun-lasa fèb. Okontrè sé fò i fò. É sé vré, pou on moun rété kalm adan on sitiyasyon ki difisil, fò i fò an tèt a-y. Ladousè ka fè pawti a « fwi a lèspri » a Bondyé (Gal. 5:22, 23). Dépawfwa, yo pé sèvi èvè mo grèk la yo tradui la é ki bay « dousè » pou palé dè on chouval ki té sovaj é ki vin dous alèla. Imajiné sa : odépa, i pa té ka lésé ponmoun mannyé-y men aprézan, i ka lésé toutmoun monté asi do a-y. Chouval-lasa vin dous men apapousa i pa fò kon avan. É nou, kijan nou pé vin dé moun ki dous é ki fò anmenmtan ? Nou pé pa fè sa noumenm an nou. Pou nou rivé fè sa, fò-nou mandé Jéova ban-nou lèspri sen a-y é fò-nou priyé-y pou i édé-nou ni bèl kalité-lasa. Ni onlo Témwen ki vin dé moun ki dous. Alèla, lèwvwè on moun ka chèché-yo tren, yo ka réyaji èvè onlo dousè é lè dòt moun ka vwè sa, sa ka édé-yo vwè kè Témwen a Jéova sé dé bon moun (2 Tim. 2:24, 25). w23.09 15 § 3.

Lapòt Jan vwè on vizyon ki té èstraòwdinè toubònman. I vwè 24 ansyen ka adoré Jéova an syèl-la. Yo té ka ba Jéova louwanj é yo té ka di kè Jéova « mérité rèsèvwa glwa-la é lonnè-la é puisans-la » (Rév. 4:10, 11). Sé zanj-la ki fidèl la osi ni onlo rézon pou yo ba Jéova louwanj é pou yo onoré-y. Yo ka viv an syèl-la èvè-y é yo aprann konnèt-li byen. Yo ka vwè sé bèl kalité-la i ni la lè yo ka gadé tousa i ka fè. É lè yo ka vwè jan i ka aji, sa ka ba-yo anvi ba-y louwanj (Jòb 38:4-7). Nou osi, lè nou ka priyé Jéova nou vlé ba-y louwanj. Nou vlé di-y tousa nou enmé é kè nou ka touvé bèl adan pèwsonalité a-y. Lèwvwè ou ka li é lèwvwè ou ka étidyé Labib, éséyé vwè ki kalité Jéova ni. Kilès adan yo ki ka atiré-w plis ? (Jòb 37:23 ; Wom. 11:33). Di-y sa lè ou ka priyé-y é èspliké-y poukwa sa ka touché-w konsa. Nou pé ba Jéova louwanj osi pou sa i ka fè pou nou é pou sa i ka fè pou tout frè é sè an nou ki asi latè (1 Sam. 2:1, 2). w23.05 3-4 § 6-7.

An 1919, Gran Babilòn-la pèd pouvwa-la i té ni la asi pèp a Bondyé, é sé lanné-lasa osi on « èsklav fidèl é prévwayan » vwè jou. Èsklav-lasa koumansé travay pou édé moun ki sensè maché asi « Chimen-la ki sakré la », ki té toufré wouvè (Mat. 24:45-47 ; Iz. 35:8). Travay-la moun té koumansé fè la pou préparé « Chimen-la ki sakré la » an tan lontan, édé moun ki koumansé maché asi chimen-lasa aprann plis biten asi Jéova é asi pwojé a-y (Pwov. 4:18). Anplisdisa, yo té pé suiv sé prensip-la Jéova ka ban-nou la adan vi a yo. Sèten yo té’é ni chanjman a fè men Jéova pa mandé-yo fè sé chanjman-lasa tousuit. I édé-yo pwogrésé piti-a-piti. A pa ti kontan nou ké kontan lèwvwè tousa nou ké ka fè ké fè Jéova plézi ! Pou on chimen rété bèl, fò-yo okipé dè-y toutlè. Dépi 1919, yo ka okipé-yo dè « Chimen-la ki sakré la ». Konsa, sa ka pèwmèt on maksimòm dè moun kité Gran Babilòn-la pou vin asi chimen-lasa. w23.05 17 § 15-16.

Sé frè a Komité santral la menm ka fòwmé sé asistan a sé diféran komité-la ki anba rèsponsabilité a yo. Dépi aprézan, sé asistan-lasa ja ka fè onlo biten adan òwganizasyon a Jéova. Grasa fòwmasyon-la yo ka risivwè la, dèmen yo ké paré pou kontinyé pran swen a mouton a Jézikris. Lèwvwè gwo tribilasyon-la ké toupré fin, é kè sé dènyé wen-la ké monté an syèl-la, vré adorasyon-la ké kontinyé asi latè. Davwa Jézikri ké ka dirijé, sèwvitè a Bondyé ké kontinyé adoré-y. Nou sav kè a moman-lasa, on gwoup nasyon kè Labib ka kriyé Gòg dè Magòg ké ataké pèp a Bondyé (Ézék. 38:18-20). Yo ké ataké-nou men sa pé ké diré lontan é sa yo ké fè la ké échwé. Yo pé’é pé anpéché pèp a Bondyé adoré Jéova. Asiré pa pétèt, Jéova ké sové sèwvitè a-y. Adan on vizyon, lapòt Jan vwè ‘gran foulmoun-la’ kivédi sélézòt mouton-la Jézikri ni la. Labib ka di kè ‘gran foulmoun-lasa sòti anba gwo tribilasyon-la’ (Rév. 7:9, 14). Donk Jéova ké pwotéjé sélézòt mouton-la é nou pa ni pon dout asi sa. w24.02 5-6 § 13-14.

Ka nou pé fè pou lèspri sen aji asi nou ? An-nou mandé Jéova ban-nou-y, an-nou étidyé Pawòl a-y kè yo maké grasa lèspri-lasa é an-nou pòté bon mannèv adan òwganizasyon a-y kè i ka dirijé èvè lèspri sen a-y. Konsa, nou ké pé ni ‘fwi a lèspri-lasa’ andidan an nou (Gal. 5:22, 23). Pou Jéova ba on moun lèspri sen a-y, fò moun-lasa fè éfò pou i ni enki biten ki pwòp an lèspri a-y é fò i aji on mannyè ki pwòp osi. Si on moun ka lésé dé lidé ki pa pwòp vin an lèspri a-y é kè olyé i woté sa an lèspri a-y i ka lésé sa fè-y fè on mové biten, Jéova pé’é kontinyé ba-y lèspri sen a-y (1 Tés. 4:7, 8). Anplisdisa, pou Jéova kontinyé ban-nou lèspri sen a-y, fò pa nou « méprizé sé pwofési-la » (1 Tés. 5:20). Adan vèwsé-lasa, lè yo ka palé dè pwofési, sé pou palé dè tout sé mésaj-la Jéova ka ban-nou la grasa lèspri sen. Pawmi sé mésaj-lasa, nou ka touvé mésaj-la ki ka konsèwné jou a jijman-la é ki ka montré kè jou-lasa toupré rivé. Nou pa’a mèt an lèspri an nou kè a pa aprézan Awmagédon ké rivé é kè nou ké ni tan mò avan i rivé. Okontrè, nou vlé toujou sonjé jou-lasa é toujou mèt an lèspri an nou ké i ka vin. Pou sa, nou ka fè éfò pou nou fè dé bon biten é nou ka « aji on mannyè ki ka montré kè [nou] enmé Bondyé » (2 Pyè 3:11, 12). w23.06 12 § 13-14.

Imajiné kè on imaj ki ni pòwnografi adan ka enki parèt asi on aparèy élèktronik an nou. Ka pou nou fè ? Ében fò-nou arété gadé-y tousuit. Nou ké rivé fè sa pi fasilman siwvwè nou ka sonjé kè sa ki ni plis valè adan vi an nou, sé lanmityé an nou èvè Jéova. Délè osi, nou pé tonbé asi sèwten imaj ki pa ni pòwnografi adan men ki pé mèt dé lidé ki pa pwòp adan lèspri an nou. Poukwa fò-nou mèt sé imaj-lasa akoté osi ? Pas pa menm imajiné nou vé pa imajiné-nou ka fè on péché sèksyèl (Mat. 5:28, 29). David sé on ansyen ki ka viv an Tayland. Mi sa i ka di : « Lèwvwè sa ka rivé-mwen, an ka di-mwen : “Menmsi imaj-lasa pa ni pòwnografi adan, ès Jéova té’é kontan siwvwè an té ka gadé-y ?” Lè an ka rézonné konsa, sa ka édé-mwen aji èvè sajès. » Si nou pè fè on biten ki té’é pé fè Bondyé lapenn, sa ké édé-nou aji èvè sajès. Lè on moun ka krenn Bondyé, i ka « koumansé ni sajès ». w23.06 23 § 12-13.

Pétèt kè ‘sé pyès-la ki pi fon la’ sé sé lasanblé-la. Pannan gwo tribilasyon-la, Jéova ka pwomèt-nou kè i ké pwotéjé-nou siwvwè nou ka kontinyé sèvi-y èvè frè é sè an nou. Sé pousa, si sé enki sipòté nou ka sipòté on frè oben on sè, men kè an réyalité nou pa enmé-y, sa pa ka sifi. Fò-nou fè éfò pou nou enmé-y èvè tout tchè an nou dépi konnyéla. Si nou pa’a fè sa, nou pé rivé a pèd vi an nou ! Lèwvwè « gran jou a Jéova » ké rivé, limanité ké soufè toubònman (Sof. 1:14, 15). Sèwvitè a Jéova ké jwenn éprèv osi. Men si nou, nou ka préparé-nou dépi konnyéla, nou ké rivé rété kalm é nou ké pé édé lézòt osi. Nou ké andiré tout sé difikilté-la nou ké jwenn la. Nou ké fè tousa nou pé pou édé frè é sè an nou. Pousa, nou ké aji èvè konpasyon épi yo é nou ké édé-yo ni sa yo bizwen pou viv. Nou ké rété bon bon zanmi èvè yo osi pas piti-a-piti nou fè éfò pou nou enmé-yo. Alò Jéova ké rékonpansé-nou é i ké ban-nou lavi étèwnèl. É adan mond-la nou ké ka viv adan-y la, nou pé’é sonjé sé éprèv-la é sé katastwòf-la ankò (Iz. 65:17). w23.07 7 § 16-17.

Souvantfwa, lèwvwè yo ka palé dè moun ki té fidèl a Bondyé adan Labib, yo ka di kè sé dé moun ki té ni bon fòs. Men a pa toutlè yo té ka santi-yo fò. Pa ègzanp, délè wa David té ka santi-y fò kon on montangn, men délè i té ka santi-y fèb é i té pè (Sòm 30:7). Kanta Sanson, lèwvwè lèspri a Jéova té ka aji asi-y, i té ni onlo onlo fòs toubònman. Men poutan, i té sav kè si a pa Bondyé ki té ka ba-y fòs-lasa, i té’é vin fèb é i té’é kon nenpòt kimoun (Jij 14:5, 6 ; 16:17). Sé Jéova ki té ka ba sèwvitè a-y ki té fidèl fòs-lasa. Lapòt Pòl osi té sav kè fòs-la i té ni la, sé Jéova ki té ka ba-y li (2 Kor. 12:9, 10). I pa té ni on bon santé (Gal. 4:13, 14). Anplisdisa, délè i té ni dimal a fè sa ki byen (Wom. 7:18, 19). Dépawfwa, i té enkyèt toubònman é i té pè pou dèmen (2 Kor. 1:8, 9). Poutan lè i té fèb, sé a moman-lasa i té ni bon fòs. Poukwa nou ka di sa ? Pas Jéova té ka ba-y fòs-la i té bizwen la pou andiré sé pwoblèm-la i té ka jwenn la. w23.10 12 § 1-2.

Si ou mèt an tèt a-w kè ou pa vo ayen, sonjé sé Jéova limenm ki atiré-w owa a-y (Jan 6:44). I ka vwè bèl kalité kè ou ni é kè pétèt voumenm pa’a vwè, é i sav kimoun ou yé vréman (2 Kron. 6:30). Alò ou pé kwè-y a san pou san lè i ka di kè ou ni onlo valè pou-y (1 Jan 3:19, 20). Avan yo té konnèt lavérité, sèwten adan nou fè dé biten ki pa té bon, kifè, jousalè, yo ka santi-yo koupab (1 Pyè 4:3). Tin dòt, menmsi yo ka sèvi Jéova fidèlman, fò yo goumé èvè défo yo ni. É-w menm, ès dépawfwa ou ka kwè ou pa’a mérité padon a Jéova ? Si sé sa, a pa-w tousèl, onlo sèwvitè a Jéova ki té ka sèvi-y fidèlman té ka pansé menm biten. Pa ègzanp, lapòt Pòl ni lokazyon di « pòv boug ki an yé » pou palé dè-y é dè défo a-y (Wom. 7:24). Sé vré, i rèpanti-y dè péché a-y é i pran lèbatèm. Men, magrésa i té ka di kè ‘pawmi sé apòt-la sé-y ki té pli piti’ é ‘sé-y ki té prèmyé pawmi moun ki péché’ (1 Kor. 15:9 ; 1 Tim. 1:15). w24.03 27 § 5-6.

Sé mové désizyon-la wa Joas pran la ka montré-nou kè sa enpòwtan kè nou chwazi zanmi ki enmé Jéova é ki vé fè-y plézi. Zanmi konsa ké édé-nou fè bon biten. Men nou pa oblijé ni zanmi ki ni menm laj ki nou. Joas té lontan pli piti ki Joad, men sa pa anpéché-yo vin bon bon zanmi. Alò, lè ou ka sonjé zanmi a-w, mi sa pou-w mandé-w : « Èskè zanmi an mwen ka édé-mwen konsolidé fwa an mwen ? Ès yo ka ankourajé-mwen pou mwen pé sa rèspèkté prensip a Jéova ? Ès yo enmé palé dè Jéova é dè sé bèl vérité-la ki an Bib-la ? Ès yo ka rèspèkté prensip a Jéova ? Ès yo toujou ka di-mwen sa an anvi tann oben ès yo ka pran kouraj a yo a 2 men pou ban-mwen on bon konsèy lè sa nésésè ? » (Pwov. 27:5, 6, 17). Konfèdmanti, si zanmi a-w pa enmé Jéova, ou pa bizwen-yo. Pawkont, si zanmi a-w enmé Jéova, pa lagé-yo ; sé dé bon zanmi pou-w (Pwov. 13:20). w23.09 9-10 § 6-7.

Alfa-la, sé prèmyé lèt a lalfabé grèk la, é oméga-la, sé dènyé-la. Lèwvwè Jéova ka di konsa kè i sé ‘Alfa-la é kè i sé Oméga-la’, sé pou montré kè lèwvwè i ka koumansé on biten i toujou k’ay an bout a-y. Apré Jéova té kréyé Adan é Èv, i di-yo konsa : « Fè timoun, é miltipliyé-zòt ; ranpli latè, é dominé asi-y » (Jén. 1:28). A moman-lasa, sé konsi Jéova té di « Alfa ». I té sav ègzaktèman sa i té vé fè : on jou, i té’é fè tout latè touné an paradi, i té’é plen-y èvè désandan a Adan é Èv, yotout té’é pawfè é yotout té’é ka kouté-y. Jou-la sa ké fèt la sé ké konsi Jéova ké di « Oméga ». Anplisdisa, lèwvwè Jéova fin kréyé syèl-la, tè-la é tousa ki anlè a-y, Jéova bay on garanti. I chwazi jou-lasa pou i réyalizé pwojé a-y pou limanité. Lè i di kè sétyèm jou-la sakré, sé on garanti i bay, pas sé konsi i té di kè tout pwojé a-y ké réyalizé a san pou san lè sétyèm jou-lasa ké fin (Jén. 2:1-3). w23.11 5 § 13-14.

Pou on moun té sòti Babilòn pou rivé Israèl, sa té ka pran 4 mwa apépré. A pa té on vwayaj ki té fasil, men Jéova té pwomèt sé Juif-la kè i té’é fè tousa ki té’é pé anpéché-yo viré adan péyi a yo disparèt. Sé Juif fidèl la té sav kè si yo té ka viré an Israèl, sé sakrifis-la yo té’é fè la pa té’é ayen parapòt a tout sé bénédisyon-la yo té’é trapé la. Pli bèl bénédisyon yo té’é ni té’é konsèwné adorasyon-la yo té’é ba Jéova la. A Babilòn, pa té ni pon tanp pou adoré Jéova. Pa té ni lotèl pou yo té pé sa ofè sé sakrifis-la Lwa a Moyiz té ka mandé-yo fè la, é pa té ni pon prèt nonplis pou yo té pé sa ofè sé sakrifis-lasa. Anplisdisa, adan vil-lasa, té ni plis moun ki té ka adoré sé fo-dyé-la ki moun ki té ka rèspèkté Jéova é prensip a-y. Sé pousa ni plizyè milyé Juif ki té ka krenn Jéova ki té présé viré an Israèl pou yo té pé sa woumèt vré adorasyon-la anplas. w23.05 14-15 § 3-4.

Nou bizwen lèspri sen a Bondyé pou nou kontinyé maché « kon timoun a limyè ». Poukisa ? Pas pou nou rété pwòp adan on mond ki pa pwòp, sa pa fasil ditou-ditou (1 Tés. 4:3-5, 7, 8). Lèspri sen pé édé-nou lagé létadèspri a mond-lasa, kon pa ègzanp filozofi é lidé ki pa annakò èvè sa Bondyé ka pansé. Lèspri sen pé fè-nou pwodui osi « tout kalté bonté é jistis » (Éféz. 5:9). On biten nou pé fè pou nou ni lèspri sen, sé priyé. Jézi di kè Jéova té’é « ba séla ki ka mandé-y la lèspri sen » (Lik 11:13). Ondòt biten nou pé fè pou nou ni lèspri sen, sé ba Jéova louwanj pannan réinyon an nou (Éféz. 5:19, 20). Lèspri sen a-y ké aji anlè nou pou édé-nou viv on mannyè ki ka fè-y plézi. w24.03 23-24 § 13-15.

Ès ou bizwen ni plis pasyans ? Si sé sa, ou pé priyé pou sa. Lapasyans sé on kalité ki ka fè pawti a fwi a lèspri sen a Bondyé (Gal. 5:22, 23). Alò, fò-nou mandé Bondyé ban-nou lèspri sen a-y é édé-nou fè éfò pou nou pé sa ni fwi a lèspri sen a-y. Si nou ka jwenn on sitiyasyon ki ka mèt pasyans an nou a léprèv, fò-nou « kontinyé mandé » Jéova lèspri sen a-y pou nou pé sa ni kalité-lasa (Lik 11:13). Anplisdisa, nou pé mandé Jéova édé-nou vwè sitiyasyon-la kon li i ka vwè-y. É apré nou priyé Jéova, nou ké fè tousa nou pé pou nou ni pasyans touléjou Bondyé fè jou. Si nou ka kontinyé priyé pou nou ni pasyans é si nou ka fè éfò pou aji èvè pasyans, Jéova ké édé-nou ni plis pasyans é i ké fè sa menmsi avan, nou pa té ni kalité-lasa. Sé on bon biten osi lè nou ka médité asi ègzanp a moun ki adan Labib é ki té ni pasyans. Adan Labib, nou ka touvé onlo ègzanp a moun ki té ni pasyans. Si nou ka pran on ti tan pou médité asi sé ègzanp-lasa, nou pé aprann kijan pou nou aji èvè pasyans. w23.08 22 § 10-11.

Jézi ba lapòt Pyè lagaranti kè Jéova té’é soutyenn-li. Apré Jéova té résisité Jézi, Jézi woufè on mirak pou i té pèwmèt lapòt Pyè é dòt apòt ankò péché onlo onlo pwason (Jan 21:4-6). Sèten mirak-lasa rasiré Pyè é sa montré-y kè Jéova té’é pé pran swen a-y san pon pwoblèm. É pétèt sa fè-y sonjé sa Jézi té di asi Jéova lèwvwè i té di-y kè Jéova té’é ba moun ki ka ‘chèché wayòm a Bondyé an prèmyé’ tousa yo té’é bizwen (Mat. 6:33). Sa ba Pyè balan pou i té mèt prédikasyon-la prèmyé douvan an vi a-y olyé i té mèt antrèpriz a pèch a-y prèmyé douvan. Lèwvwè jou a Lapannkòt 33 rivé, i préché èvè onlo kouraj é grasa sa, milyé é milyé moun aksèpté bon nouvèl-la (Akt 2:14, 37-41). Aprésa, i édé sé Samariten-la é sé moun-la ki pa té juif la aprann konnèt Jézi é suiv-li osi (Akt 8:14-17 ; 10:44-48). On biten ki sèten, Jéova sèvi èvè Pyè pou édé tout kalté moun vin adan lasanblé-la. w23.09 20 § 1 ; 23 § 11.

Apépré 2 an apré sé Babilonyen-la té détwi Jérizalèm, Nabikodonozò, wa a Babilòn, chouboulé toubònman akòz dè on rèv i fè. Adan rèv-lasa, i vwè on gwo manman èstati. I ka mandé sé nonm-la ki saj la di-y ka i révé é èspliké-y ka rèv-lasa vé di. I ka di-yo osi kè siwvwè yo pa ka rivé fè sa, i kay tchouyé-yotout (Dan. 2:3-5). Danyèl té pawmi sé nonm-lasa, kifè, fò i té pòté mannèv pas vi a-y é vi a dòt moun té andanjé. Alò, « i ay vwè wa-la é i mandé-y ba-y tibwen tan pou i pé sa di-y ka rèv a-y vé di » (Dan. 2:16). Lè Danyèl fè sa, i montré jan i té ni kouraj é jan i té ni fwa an Jéova. Poukwa nou ka di sa ? Pas adan Labib, pa ni ayen ki ka montré kè Danyèl té ja èspliké on rèv avan sa. Men an-nou wouvin asi istwa an nou. I ka mandé zanmi a-y « priyé Bondyé-la ki an syèl-la pou i fè-yo mizérikòd anrapò èvè sèkré-lasa » (Dan. 2:18). Jéova ka réponn a priyè a yo. Grasa-y Danyèl ka rivé èspliké Nabikodonozò ka rèv-la i té fè la té vé di. Sé konsa Danyèl é zanmi a-y pa mò. w23.08 3 § 4.

Toujou sonjé byenfé kè lapasyans ka pwokiré-w. Lè nou ni pasyans, lèspri an nou pi trankil é nou pi kalm. Sa pé édé-nou santi-nou byen an tèt an nou é sa pé édé-nou ni on pibon santé osi. Nou ka antann-nou pibyen èvè lézòt é nou ka travay pou lasanblé an nou rété anpé. Pa ègzanp, si on moun ka chèché-nou tren é kè nou pa’a fè kòlè fasilman, sitiyasyon-la pé ké vin pi mové (Sòm 37:8, gadé nòt-la an fransé ; Pwov. 14:29). Men sa ki pi enpòwtan, sé kè nou ka imité Pap’an nou ki an syèl-la é nou ka vin pibon zanmi èvè-y. Lapasyans sé on bèl kalité toubònman é i ka fè-noutout dibyen ! Pou nou aji èvè pasyans, a pa toutlè sa fasil. Men Jéova pé édé-nou pou nou kontinyé ni kalité-lasa. É toupannan nou ka atann nouvo mond-la, nou pé sèten kè « Jéova ka voyé zyé asi moun ki ka krenn-li, asi moun ki ka konté asi lanmou fidèl la i ni la » (Sòm 33:18). Alò, fò-nou byen désidé a kontinyé ni pasyans. w23.08 22 § 7 ; 25 § 16-17.

Jak di kè si sé konsa on moun ka aji é kè i ka di kè i ni lafwa, sa i ka fè ka montré toutmoun kè sa pa vré (Jak 2:1-5, 9). I palé osi dè on moun ki ka vwè kè on frè oben on sè « pa ni lenj é [...] pa ni on dèkwa pou manjé », men i pa’a fè ayen pou édé-y. Menmsi moun-lasa ka di i ni lafwa, fwa a-y pa’a sèvi ayen pas i pa ni aksyon ki k’ay èvè-y (Jak 2:14-16). Jak palé dè ègzanp a Raab pou èspliké kè sa i fè montré kè i té on moun ki té ni fwa (Jak 2:25, 26). Raab té tann palé dè Jéova é i té rann-li kont kè Jéova té èvè sé Israélit-la (Joz. 2:9-11). On jou, i ni lokazyon fè on biten ki montré jan i té ni fwa. I pwotéjé 2 Israélit ki té vin véyé sa ki té ka pasé adan péyi-la la i té ka rété la. Menmjan ki Abraam, konm i té ni fwa, Jéova konsidéré kè i sé on moun ki jis menmsi i pa té pawfè é kè a pa té on Israélit nonplis. Ègzanp a-y ka montré jan sa enpòwtan kè nou fè dé biten ki ka montré kè nou ni lafwa. w23.12 5-6 § 12-13.

Konm nou sé dé krétyen, nou pa ka kontanté-nou dè konprann enki biten ki tousenp adan Labib. Nou anvi konprann sa Labib ka di « menm lè sé dé biten a Bondyé ki fon », é sa posib grasa lèspri sen a-y (1 Kor. 2:9, 10). Lè ou ka étidyé Labib tousèl a-w, ou té’é pé ègzaminé on sijé ki pé édé-w vin pi bon zanmi èvè Jéova. Ka ou ka di ? Pa ègzanp, ou té’é pé chèché a vwè kijan Jéova montré sèwvitè a-y ki té ka viv an tan a Labib kè i té enmé-yo. Sa ké montré-w kè Jéova enmé-w vou osi. Ou té’é pé chèché a konprann osi kijan Jéova té vé sé Israélit-la adoré-y é konparé sa èvè jan nou ka adoré-y jòdijou. Oben pétèt ou té’é pé étidyé sé pwofési-la Jézi réyalizé la lèwvwè i té asi latè. Ou pé sèvi èvè Index des publications des Témoins de Jéhovah oben èvè Guide de recherche pour les Témoins de Jéhovah pou étidyé sé sijé-lasa. Siwvwè ou ka pran tan étidyé Bib-la é kè ou k’ay an nannan a-y, sa pé konsolidé fwa a-w é sa pé édé-w « touvé konésans a Bondyé » (Pwov. 2:4, 5). w23.10 18-19 § 3-5.

Mo-la lapòt Pyè sèvi èvè-y la é ki bay « fò toubònman » vé di « wouvè tout grandè a-y ». 2^èm mòso a vèwsé-la, li, ka montré kijan nou ké aji lèwvwè nou ni on lanmou ki fò toubònman pou frè é sè an nou. Lanmou-lasa ké édé-nou kouvè péché a frè é sè an nou. Sé konsidiré lanmou an nou té on mòso twèl ki ni lastik adan kè nou ka kenbé èvè 2 men an nou é kè nou ka wouvè tout grandè a-y. Nou ka halé chak koté a twèl-la pou kouvè péché a moun. Men a pa on ti péché oben dé ti péché tousèl i ka kouvè men i ka kouvè « onpakèt péché ». Adan vèwsé-lasa, lè yo ka sèvi èvè lèmo « kouvè », sé pou di padonné. Menmjan on mòso twèl pé kouvè on tach, sé konsa lanmou an nou ka kouvè défo a frè é sè an nou é érè a yo. Fò lanmou-la nou ni la pou frè é sè an nou pousé-nou a padonné-yo, é fò-nou fè sa menm lèwvwè sa difisil toubònman (Kol. 3:13). Lè nou ka rivé fè sa, sa ka montré kè nou enmé frè é sè an nou onlo toubònman é kè nou vé fè Jéova plézi. w23.11 11-12 § 13-15.

Lè wa Jozyas vin ni 26 an, i koumansé ranjé Tanp-la pou fè-y vin nèf. Pannan sé travo-la, yo touvé ‘liv a Lwa a Jéova kè Jéova té ba Moyiz pou pèp-la’. Lèwvwè wa-la tann sa liv-lasa té ka di, i fè chanjman tousuit pou i té pé sa apliké sa ki té maké adan Lwa-la (2 Kron. 34:14, 19-21). Ès ou té’é byen enmé li Labib chakjou ? Si sé sa ou ja ka fè, ès ou enmé fè sa ? Lè ou ka touvé déotwa vèwsé ki itil ba-w, ka ou ka fè pou-w sonjé-yo ? Lè Jozyas té ni 39 an apépré, i fè on gwo érè é i pèd vi a-y akòz dè sa. Olyé i té mandé Jéova ka pou i té fè, i suiv pwòp lidé a-y (2 Kron. 35:20-25). Ka sa ka aprann-nou ? Ki nou jenn, ki nou ja ni on bèl laj é kèlkèswa kantité tan nou ka étidyé Labib, fò-nou toujou chèché a sav ka Jéova ka pansé adan tèl oben tèl sitiyasyon. Pou nou rivé fè sa, fò-nou mandé-y gidonné-nou, fò-nou étidyé Pawòl a-y é fò-nou ay chèché konsèy owa frè é sè ki byen doubout adan lavérité. Konsa nou ké pi fasil a maché dwèt ki a fè chimen kochi é nou ké rivé a ni tchè-kontan pli fasilman (Jak 1:25). w23.09 12 § 15-16.

Labib ka palé dè onlo madanm ki té enmé Jéova é ki té ka sèvi-y. Sé madanm-lasa té « kapab métrizé-yo adan sa yo [té] ni labitid fè » é yo té « fidèl an tout biten » (1 Tim 3:11). Sé jennsè-la pé suiv osi ègzanp a sè ki byen doubout adan lavérité adan lasanblé a yo é ki pé aprann-yo onlo biten. Jennsè, ès zò konnèt sè ki byen doubout adan lavérité kè zò té’é pé imité ? Pran tan gadé bèl kalité a yo. Aprésa, réfléchi pou vwè kijan zò té’é pé montré kè zò ni sé kalité-lasa osi. Pou suiv ègzanp a Jézi, sa enpòwtan kè nou ni imilité. On madanm ki ni imilité ni on bèl lanmityé èvè Jéova é i ka antann-li byen èvè lézòt. Pa ègzanp, on madanm ki enmé Jéova é ki ni imilité ka suiv sa ki maké adan 1 Korentyen 11:3. Adan vèwsé-lasa, Jéova ka di kimoun i mèt pou dirijé lasanblé-la é kimoun i mèt pou dirijé fanmi-la. w23.12 18-19 § 3-5.

Fò on bon mari enmé madanm a-y, fò i ba-y sa i bizwen, fò i sé méyè zanmi a-y é fò i édé-y rété toupré Jéova.Si ou kapab réfléchi, kè ou ka rèspèkté sé madanm-la é kè yo pé fè-w konfyans, sa ké édé-w vin on bon mari. É vinvwè on jou ou ni timoun ? Sèten ou ké anvi vin on bon papa ! Ka Jéova pé aprann-vou adan domenn-lasa ? (Éféz. 6:4). Pa ègzanp, Jéova di Jézi kè i té enmé-y é kè i té fyèw dè-y (Mat. 3:17). Asirésèten, on bon papa sav di timoun a-y kè i enmé-yo é i ka félisité-yo chakfwa yo ka fè on bon biten. Sé papa-la ka imité Jéova lè yo ka fè tousa yo pé pou édé gason a yo é fi a yo vin dé krétyen ki byen doubout adan lavérité. On biten ki pé édé-w préparé-w pou sianka ou ka mayé é kè ou ka vin ni timoun, sé lèwvwè ou ka montré fanmi a-w é lasanblé a-w jan yo ni onlo valè ba-w (Jan 15:9). w23.12 28-29 § 17-18.

Menmsi nou sé sèwvitè a Jéova, nou ka jwenn difikilté é nou ka tonbé malad kon toutmoun. Anplisdisa, délè fò-nou andiré osi pas moun ki hay Témwen a Jéova ka mèt baton an wou an nou oben yo ka pèwsékité-nou. Jéova pa ka anpéché-nou jwenn éprèv kon séla. Men, i pwomèt-nou kè i ké édé-nou (Iz. 41:10). Grasa sa i ka fè pou édé-nou, nou pé ni tchè-kontan, nou pé pran dé bon désizyon é nou pé rété fidèl a-y menm lèwvwè nou ka jwenn éprèv ki rèd toubònman. Jéova pwomèt kè i ké ban-nou sa Labib ka kriyé « lapé ki ka vin dè Bondyé » (Filip. 4:6, 7). Lè ou ka santi-w anpé konsa, lèspri a-w trankil davwa ou bon zanmi èvè Jéova. Lapé ki ka vin dè Bondyé « ka dépasé tousa on moun pé konprann ». Sa lontan pi byen ki tousa nou té’é pé imajiné. Pétèt kè on jou ou priyé Jéova èvè tout tchè a-w é lèwgadé ou enn santi-w anpé é voumenm a-w pa konprann. Ében sé sa yo ka kriyé « lapé ki ka vin dè Bondyé ». w24.01 20 § 2 ; 21 § 4.

Davwa sèwvitè a Bondyé enmé-y, sa ka ba-yo balan pou louwé non a-y èvè tout tchè a yo. Wa David té sav kè lè i té ka louwé non a Jéova, sé té konsi i té ka louwé Jéova. Lèwvwè nou ka tann non a Jéova, sa ka fè-nou sonjé kijan dè moun i yé, tout sé bèl kalité-la i ni la, é tout sé biten èstraòwdinè la i fè la. Pou David non a Bondyé té sen. Alò i té vé montré kè i té ni onlo rèspé pou non-lasa é i té vé louwé non-lasa osi. I té vé fè sa ‘èvè tousa ki andidan a-y’, kivédi èvè tout tchè a-y. Sé Lévit-la lésé on bèl ègzanp pou nou adan domenn-lasa osi. Èvè onlo imilité, yo rèkonnèt kè non a Bondyé ki sen mérité tèlman louwanj, kè kèlkèswa louwanj-la yo té’é ba-y la, pa té’é ni asé (Néém. 9:5). Konm yo té ni imilité é kè yo té sensè lèwvwè yo té ka ba Jéova louwanj, nou pé sèten sa fè Jéova plézi. w24.02 9 § 6.

Lèwvwè ou pa ka rivé atenn òbjèktif a-w, vwè sa kon on lokazyon pou ou aprann on biten. Jéova pé’é jen di kè ou sé on féba pas ou pa rivé atenn on òbjèktif ki té two fò pou-w (2 Kor. 8:12). Sonjé tousa ou ja rivé fè. Labib ka di kè « Bondyé pa enjis pou oubliyé sa zò fè » (Ébr. 6:10). Alò nou nonplis, fò pa nou oubliyé sa. Réfléchi asi tousa ou ja fè : pétèt kè alèla ou bon bon zanmi èvè Jéova, kè ou koumansé palé dè-y èvè moun ki alantou a-w oben kè ou pran lèbatèm. Menmjan ou rivé pwogrésé pou ou té pé sa atenn sèwten òbjèktif èspirityèl ou té ni, sé menmjan-la osi, ou pé kontinyé pwogrésé pou ou atenn òbjèktif-la ou ni la alèla. Èvè èd a Jéova, ou pé rivé atenn òbjèktif a-w. Vou osi ou ké ni tchè-kontan si ou ka gadé pou vwè kijan Jéova ka édé-w é ka béni-w toupannan ou ka éséyé atenn on òbjèktif pou vin pi bon zanmi èvè-y (2 Kor. 4:7). Si ou pa lagé, ou ké jwenn onlo bénédisyon é yo ké pi bèl ki séla ou ja ni la (Gal. 6:9). w23.05 31 § 16-18.

Lè Jéova enmé on moun, i ka montré moun-lasa kè i kontan-y é i ka pran plézi fè sa. Jéova ni lokazyon di Gason a-y Jézi kè i té enmé-y é kè i té ka fè-y plézi é i fè sa a 2 rèpriz (Mat. 3:17 ; 17:5). Ès ou té’é enmé tann Jéova di-w kè i kontan-w ? Ou pé ké tann on vwa sòti an syèl pou palé ba-w, men Jéova ka palé ba-w pa mwayen a Pawòl a-y Labib. Ou pé ‘tann-li’ ka di-w kè i kontan-w lè ou ka li sa Jézi di adan Lézévanjil. Jézi té ka imité pèwsonalité a Pap’a-y on mannyè ki pawfè. Kifè, plizyè fwa, i ni lokazyon di disip a-y ki té fidèl kè i té enmé-yo é kè i té kontan-yo menmsi yo té enpawfè. Lè ou ka li an Bib-la sa Jézi di disip a-y, sé konsi Jéova ka di-w sé pawòl-lasa (Jan 15:9, 15). Alò vinvwè ou jwenn on bout-rèd, ès sa vé di kè ou pèd favè a Jéova ? Awa, fò ou vwè sa pito kon on lokazyon dè montré-y kè ou enmé-y fò é kè ou ka fè-y konfyans (Jak 1:12). w24.03 28 § 10-11.