Chalviré tout rézònman ki ka anpéché moun konnèt Bondyé !

1. Ki konsèy byen séryé Pòl ba sé krétyen wen la ?

« PA LÉSÉ mond-lasa aji anlè zòt ankò » (Wom. 12:2). Sé sa lapòt Pòl maké ba sé prèmyé krétyen-la. Men poukwa i ba-yo on konsèy séryé konsa, alòskè sété dé moun ki té ja ba Jéova vi a yo é ki anplis, té wen èvè lèspri sen ? (Wom. 1:7).

2-3. a) Ka Satan ka fè pou éséyé fè-nou ba Jéova do ? b) Ni sèwten rézònman ki byen fon andidan an nou. Kijan nou pé débarasé-nou dè yo ?

² Pòl té enkyèt : asiparé, sèwten krétyen té lésé rézònman danjéré a mond a Satan é filozofi a-y détenn asi yo (Éféz. 4:17-19). Sa pé rivé nenpòt kilès adan nou. Satan, ki sé dyé a mond-lasa, paré a fè nenpòt ki biten pou fè-nou ba Jéova do. I ka itilizé plizyè métòd. Pa ègzanp, si i ka vwè kè nou anvi vin on granjan dè moun adan mond-lasa, i ké itilizé sa kont nou. I pé menm sèvi èvè sèwten biten ki adan kilti an nou, édikasyon an nou, oben jan nou lévé pou fè-nou ni menm mantalité ki-y.

³ Ès sa vréman posib dè débarasé-nou dè sèwten rézònman ki byen fon andidan an nou ? (2 Kor. 10:4). Gadé sa Pòl réponn : « Nou ka chalviré rézònman é tout bayè ki ka anpéché moun konnèt Bondyé, é kèlkanswa lidé-la, nou ka mèt lanmen asi-y pou fè-y obéyi Kris » (2 Kor. 10:5). Mi sé konsa, grasa èd a Jéova, nou pé rivé korijé vyé mantalité an nou. Menmjan on médikaman pé anpéché on pwazon aji asi nou, menmjan-la osi Labib pé édé-nou goumé pou mond a Satan pa pwazonné-nou.

‘KONTINYÉ CHANJÉ MANTALITÉ A-W’

4. Pou onlo adan nou, ki chanjman fò-nou té fè lè nou vin asèpté lavérité ?

⁴ Réfléchi asi chanjman ou fè adan vi a-w lè ou vin konnèt ka Labib ka anségné é lè ou désidé sèvi Jéova. Onlo adan nou té oblijé lagé mové biten yo té ka fè (1 Kor. 6:9-11). A pa ti kontan nou kontan davwa Jéova édé-nou fè sé chanjman-lasa !

5. Dapré Women 12:2, ni 2 biten nou dwètèt fè. Kilès la ?

⁵ Men fo pa nou jen mèt an lidé an nou kè nou pa bizwen fè éfò ankò. Menmsi nou arété fè péché grav avan nou pran batèm, fò-nou kontinyé rété véyatif é évité tousa ki té’é pé menné-nou a woufè mové biten nou té ka fè avan. Kijan nou pé fè sa ? Pòl ka réponn : « Pa lésé mond-lasa aji anlè zòt ankò, men kontinyé chanjé mantalité a zòt pou transfòwmé-zòt » (Wom. 12:2). Savédi fò-nou fè 2 biten : 1) pa lésé mond-lasa détenn asi-nou ankò é 2) kontinyé chanjé mantalité an nou pou transfòwmé-nou.

6. Ki lèson nou pé aprann dè ègzanp-la Jézi pran la adan Matyé 12:43-45 ?

⁶ Lè Pòl palé dè chanjman, i pa té ka palé enki dè chanjé sa moun ka vwè. I té ka palé dè sa nou yé andidan an nou, dè chak ti-détay a sa nou yé (gadé karé-la « Transfòwmé oben dégizé ? »). Fò-nou chanjé mantalité an nou, santiman an nou é lanvi an nou. Alò, fò chakmoun mandé-y : « Ès sé chanjman-la an ka fè la pou imité Jézi ka konsèwné enki sa moun ka vwè, oben ès an ka chanjé sa ki an lèspri an mwen é sa ki an fon a tchè an mwen vréman ? » Sé dé biten ki vréman diféran. Sèlon Matyé 12:43-45, Jézi ban-nou on ègzanp pou montré-nou sa nou dwètèt fè pou transfòwmé-nou vréman (li-y). I ka aprann-nou on vérité enpòwtan grasa ègzanp-lasa : apatoudi woté mové lidé an lèspri an nou ; fò-nou ranplasé-yo èvè lidé ka fè Bondyé plézi.

‘KONTINYÉ LÉSÉ MANTALITÉ-LA KI KA DIRIJÉ-W LA CHANJÉ POU I VIN NÈF’

7. Kijan nou pé chanjé sa nou yé andidan an nou ?

⁷ Men ès sa vréman posib dè chanjé sa nou yé andidan an nou ? Mi sa Labib ka réponn : « Fò zò kontinyé lésé mantalité-la ki ka dirijé-zòt la chanjé pou i vin nèf, é fò-zò mèt nouvo pèwsonalité-la asi zòt, on pèwsonalité kè Bondyé kréyé sèlon volonté a-y é ki annakò èvè vré jistis-la é vré fidélité-la » (Éféz. 4:23, 24). Donk, sa posib dè chanjé sa nou yé andidan an nou, men sa pa vlé di kè sa fasil. Fo pa nou enki kontanté-nou dè débarasé-nou dè mové lanvi é arété fè mové biten. Fò-nou chanjé « mantalité-la ki ka dirijé-[nou] la ». Savédi fò-nou chanjé lanvi an nou, jan nou ka aji é sa ki ka pousé-nou aji. Pou rivé fè sa, fò-nou kontinyé fè éfò.

8-9. Kijan ègzanp a on frè ka montré-nou kè sa enpòwtan dè chanjé sa nou yé andidan an nou ?

⁸ An-nou pran ègzanp a on frè ki té vyolan dan lèpasé. I arété bwè é i arété goumé, kifè i té pé pran lèbatèm. Sa lésé on bèl témwagnaj la i té ka rété la. Men on jouswa, tibwen tan apré batèm a-y, i jwenn on difikilté kè i pa té ka atann. On boug-sou rivé douvan pòt a-y é i chèché-y tren pou fè-y goumé èvè-y. Odépa, frè an nou rivé tchenbé. I pa goumé èvè boug-la. Men lè misyé-la mété-y ka jiré Jéova, frè an nou pa pran sa menm. I sòti akaz a-y é i ba misyé-la bon kou. Ka ki té pwoblèm a frè-la ? Menmsi sa i té étidyé an Bib-la té ja édé-y pou i pa anvi goumé, i potoko réyisi chanjé mantalité-la ki ka dirijé-y la. Kivédi, i pa té chanjé sa i té yé vréman.

⁹ Men frè-la pa lagé (Pwov. 24:16). Grasa èd a sé ansyen-la, i kontinyé fè pwogré. I fin pa fè sa ki fo pou vin on ansyen. Men on jouswa, andéwò a Sal di Wayòm la, i jwenn on éprèv ki té ka sanm tala i té jwenn la détwa lanné avan. On boug-sou té kay varé ondòt ansyen. Kijan frè an nou réyaji ? Èvè onlo dousè é onlo imilité, i palé ba boug-sou la é i édé-y kalmé-y. Konm boug-la té ka bigidi an lari-la, frè-la édé-y rantré akaz a-y. Men ka ki té pasé menm ? Frè an nou té chanjé mantalité-la ki ka dirijé-y la. I vin on moun ki té ni imilité vréman, on moun ki ka chèché lapé. É sa ba Jéova glwa.

10. Poukwa fò-nou fè éfò pou chanjé sa nou yé andidan an nou ?

¹⁰ Sé chanjman-lasa pa ka enki fèt fap-fap konsa. Pétèt fò-nou ké fè « tousa [nou] pé » pannan bon enpé lanné (2 Pyè 1:5). Apatoudi konnèt lavérité dépi plizyè lanné. Fò-nou fè tousa nou pé pou chanjé sa nou yé andidan an nou. Plizyè biten pé édé-nou fè sa. An-nou vwè déotwa adan yo.

KIJAN NOU PÉ CHANJÉ MANTALITÉ-LA KI KA DIRIJÉ-NOU LA

11. Kijan lapriyè ka édé-nou chanjé mantalité-la ki ka dirijé-nou la ?

¹¹ Prèmyèwman, sa nésésè kè nou priyé. Kon David, mi sa fò-nou mandé Jéova : « Fè tchè an mwen vin pwòp, o Bondyé, é mèt on lèspri nèf andidan an mwen, on lèspri ki ké fè-mwen rété fidèl » (Sòm 51:10). Fò-nou rèkonnèt kè sa enpòwtan kè nou chanjé mantalité-la ki ka dirijé-nou la. Aprésa, fò-nou mandé Jéova édé-nou. Poukwa nou pé sèten kè Jéova ké édé-nou chanjé ? An tan a Ézékyèl, sé Izraélit-la té wòs. Magrésa, Jéova fè-yo bèl pwomès-lasa ki té kay ankourajé-yo : « An ké fè tchè a yo fè onsèl é an ké mèt on nouvo lèspri andidan a yo ; [...] an ké ba-yo on tchè ki sansib [kivédi on tchè ka kouté konsèy a Bondyé] » (Ézék. 11:19 ; nòt). Jéova té vréman vlé édé sé Izraélit-la chanjé, é i vlé édé-nou osi.

12-13. a) Dapré sa Sòm 119:59 ka di, asi ki biten fò-nou pran tan réfléchi ? b) Ki kèsyon fò-nou pozé-nou ?

¹² Dézyèmman, fò-nou pran tan réfléchi. Nou ka rantré an nannan a Pawòl a Bondyé chak jou lè nou ka li-y séryèzman. Men fò-nou pran tan réfléchi asi sa nou ka li osi, pou nou vwè ka ki mérité chanjé andidan an nou, ki sé adan pansé an nou oben adan santiman an nou (li Sòm 119:59 ; Ébr. 4:12 ; Jak 1:25). Fò-nou mandé-nou si on filozofi a lézòm pa ka détenn asi nou. Fò-nou onèt é rèkonnèt sa ki pa kay adan nou. Aprésa, fò-nou travay rèd pou woté-y.

¹³ Pa ègzanp, ou pé pozé-w kèsyon-lasa : « Ès ni tibwen jalouzi andidan tchè an mwen ? » (1 Pyè 2:1). « Ès an ka santi-mwen méyè ki lézòt akòz dè jan an lévé, dè diplòm an ni oben akòz dè kont an bank an mwen ? » (Pwov. 16:5). « Èskè, pou mwen, moun ki pa ni otan biten ki mwen oben ki sòti ondòt koté ni mwens valè ki mwen ? » (Jak 2:2-4). « Èskè sa mond a Satan ka pwopozé ka atiré-mwen ? » (1 Jan 2:15-17). « Ès an enmé anmizé-mwen èvè anmizman ki ni sèks oben vyolans adan ? » (Sòm 97:10 ; 101:3 ; Amòs 5:15). Sa ou ké réponn a sé kèsyon-lasa ké édé-w sav adan ki domenn ou mérité fè pwogré. Si nou chanjé tout vyé rézònman ki byen fon andidan an nou, nou ké fè Pap’an nou ki an syèl-la plézi (Sòm 19:14).

14. Poukwa sa enpòwtan toubònman kè nou chwazi zanmi an nou byen ?

¹⁴ Twazyèmman, fò-nou chwazi zanmi an nou byen. Menmsi nou pa’a rann-nou kont dè sa, zanmi an nou ka détenn onlo anlè nou (Pwov. 13:20). Ki sé adan travay an nou, ki sé lékòl, nou lantouré èvè moun ki pa’a édé-nou pansé on mannyè ka fè Jéova plézi. Men sé adan réinyon krétyèn an nou kè nou pé touvé méyé zanmi ki tini. Sé réinyon-lasa ka ankourajé-nou ni « lanmou » é « fè sa ki bèl » (Ébr. 10:24, 25 ; nòt).

‘VIN SOLID ADAN LAFWA’

15-16. Kijan Satan ka éséyé chanjé mantalité an nou ?

¹⁵ Pa jen oubliyé sa : Satan byen désidé a chanjé mantalité an nou. I ka itilizé toutkalté rézònman ki ni pou anpéché sé vérité biblik la aji asi nou.

¹⁶ I ka kontinyé itilizé menm kèsyon-la i té pozé Èv la adan Jadendédèn-la : « Ès vréman Bondyé di kè [...] ? » (Jén. 3:1). Adan mond-la Satan ka dirijé la, byensouvan nou ka tann moun ka pozé kèsyon ki pé fè-nou ni dout asi kwayans an nou. Pa ègzanp : « Èskè Bondyé vréman hay lè madanm ka mayé èvè madanm, oben misyé ka mayé èvè misyé ? Ès i vréman ka défann-zòt fété Nwèl é anivèwsè ? Ès Dyé a zòt vréman ka anpéché-zòt pran san ? Ès on Bondyé ki plen lanmou vréman vlé ou mèt zanmi a-w é fanmi a-w ki èskominyé akoté ? »

17. Lè yo ka pozé-nou kèsyon pou fè-nou ni dout asi kwayans an nou, ka fò-nou fè ? É dapré Kolosyen 2:6, 7, ki éfé sa ké ni asi nou ?

¹⁷ Fò-nou sèten dè sa nou ka kwè. Si nou pa’a chèché répons a sèwten kèsyon ki enpòwtan, nou pé rivé a douté onlo dè kwayans an nou. Sé dout-lasa pé fin pa fè-nou ni fo-rézònman é détui fwa an nou. Alò, ka nou dwètèt fè ? Labib ka mandé-nou chanjé mantalité an nou, « konsa [nou] ké pé vérifyé [noumenm] ka ki volonté a Bondyé : on volonté ki bon, ki konm i fo é ki pawfè » (Wom. 12:2). Si nou ka étidyé Labib jou apré jou, nou ké pé vérifyé noumenm an nou kè sa Labib ka di sé vérité. Nou ké ni konfyans kè prensip a Jéova toujou jis. Menmjan ki on pyébwa ki ni rasin ki byen solid, nou osi, rasin an nou ké byen fon ; nou ké vin « solid adan lafwa » (li Kolosyen 2:6, 7).

18. Ka ki ké édé-nou goumé pou nou pa lésé vyé mantalité a mond a Satan détenn asi nou ?

¹⁸ Ponmoun pé pa fòwtifyé fwa a-w an plas a-w. Alò, kontinyé ‘lésé mantalité-la ki ka dirijé-w la chanjé pou i vin nèf’. Priyé touttan ; mété jounou atè é mandé Jéova édé-w grasa lèsprisen a-y. Pran tan réfléchi séryèzman ; kontinyé ègzaminé pansé a-w é sa ki ka pousé-w a aji. Chwazi zanmi a-w byen ; fè ansòt pou lantouré-w yenki èvè moun ki ké édé-w chanjé mantalité a-w. Konsa, ou pé ké lésé vyé mantalité a mond a Satan détenn asi-w é ou ‘ké chalviré rézònman é tout bayè ki ka anpéché moun konnèt Bondyé’ (2 Kor. 10:5).