Ès ou ka sonjé ?

Ès ou pa pèd on may adan sé Tou dè Gad la ki sòti an 2022 la ? Si sé sa, gadé si ou ka rivé réponn a sé kèsyon-lasa :

Lè nou ka pasé tan èvè Jéova, lè nou ka kouté-y é lè nou ka sonjé-y, ki byenfé sa ka pwokiré-nou ?

Nou ké pran pibon désizyon, nou ké anségné pibyen, fwa an nou ké vin pi solid é nou ké enmé Jéova pi fò (w22.01, p. 30-31).

Lè nou ka aprann fè Jéova é moun ki ni rèsponsabilité adan òwganizasyon a-y konfyans, kijan sa ka édé-nou ?

Sé alè pou nou montré Jéova kè nou ka fè-y konfyans lè i ka aji é nou ké fè sa si nou ka suiv dirèksyon-la sé ansyen-la ka ban-nou la é si nou ka aksèpté sé désizyon-la yo ka pran la olyé nou bougonné oben olyé nou kritiké-yo. Konsa, pannan gwo tribilasyon-la, lè yo ké mandé-nou fè dé biten kè nou ké touvé on ti jan bizaw oben ki pé ké lojik pou nou, nou ké obéyi pi fasilman (w22.02, p. 4-6).

On zanj palé Zakari dè ‘fil-a-plon-la ki té an men a Zorobabèl [gouvènè-la]’. Ka i té vlé di pa la ? (Zak. 4:8-10).

Vizyon-lasa té ka ba pèp a Bondyé lagaranti kè yo té’é fin konstwi Tanp-la yo té ka konstwi la é kè menmsi Tanp-lasa té senp, i té’é agou a tchè a Jéova (w22.03, p. 16-17).

Kijan nou pé bay ‘on bèl ègzanp lè nou ka palé’ ? (1 Tim. 4:12).

Nou pé fè sa lè nou ka palé èvè onlo jantiyès é èvè rèspé lè nou an prédikasyon, lè nou ka chanté èvè tout tchè an nou, lè nou ka bay dé bèl ti komantè lè nou réinyon, lè nou ka di lavérité, lè nou ka konsolidé fwa a frè é sè an nou é lè nou ka fè ansòt pou pon mové pawòl ki pé fè lézòt ditò pa sòti an bouch an nou (w22.04, p. 6-9).

An Danyèl chapit 7, yo ka palé dè sèwten biten anrapò èvè 4 bèt (oben wayòm). Poukwa an Révélasyon 13:1, 2, nou ka touvé tout sé biten-lasa adan onsèl bèt ?

Bèt-la yo ka palé la an Révélasyon 13 pa ka rèprézanté onsèl wayòm kon Wòm pa ègzanp men i ka rèprézanté tout sé puisans politik la ki dirijé limanité (w22.05, p. 9).

Ni on bèl mannyè nou pé montré Jéova kè nou ni konfyans adan jistis a-y. Kilès ?

Si on moun ka jiré-nou oben si on moun ka fè-nou ditò, an-nou éséyé pa fè kòlè, an-nou woté tout ti tras a rankin nou pé ni an tchè an nou é an-nou lésé tout biten-la an men a Jéova. I ké woté tout sé déga-la péché-la fè la (w22.06, p. 10-11).

Lèwvwè on frè ka priyé pannan on réinyon a lasanblé-la, ka pou i sonjé ?

Lè i bizwen konséyé frè é sè a-y é lè i ni déotwa enfòwmasyon pou ba lasanblé-la, fò pa i sèvi èvè priyè-la pou fè sa. Anplisdisa, lè i ka priyé, i pa oblijé « palé onlo », siwtou lèwvwè sé an koumansman a réinyon-la (Mat. 6:7) (w22.07, p. 24-25).

Moun « ki té ni labitid fè mové biten » ké ni « on rézirèksyon pou on jijman ». Ka sa vé di ? (Jan 5:29).

Yo pé’é jijé-yo on mannyè ki négatif parapòt a sa yo té fè avan yo té mò. Bondyé ké chèché a vwè ki létadèspri yo ni é ki atitid yo ni apré rézirèksyon a yo (w22.09, p. 18).

An sèptanm 1922, J. Rutherford di on biten adan on lasanblé pou ba toutmoun balan. Ki biten ésa ?

Pannan i té adan on lasanblé a Cedar Point, an Ohio, o Zétazini, mi sa i di : « Wi Wa-la ka gouvèné ! Fò-zòt ay di toutmoun sa. Alò, fò-zò anonsé, anonsé, anonsé Wa-la é Wayòm a-y ! » (w22.10, p. 3-5).

An Izayi chapit 30, Jéova ka sèvi èvè 3 biten pou édé-nou andiré. Ki biten ésa ?

Chapit-lasa ka montré-nou kè Jéova 1) ka kouté é kè i ka réponn a priyè an nou, 2) ka gidonné-nou é 3) ka béni-nou dépi aprézan é ké béni-nou talè osi (w22.11, p. 9).

Poukwa nou pé di kè sé pawòl-la nou ka touvé an Sòm 37:10, 11, 29 réyalizé an tan lontan é kè yo ké réyalizé plita osi ?

Sé pawòl-la David di la ka montré byen kijan sé moun-la té ka viv alèz a yo an Izrayèl, kon sa té ka fèt an tan a wa Salomon pa ègzanp. Men lè Jézi sèvi èvè vèwsé 11 la, sé té pou palé dè on paradi ki té pou vin plita (Mat. 5:5 ; Lik 23:43) (w22.12, p. 8-10, 14).