An-nou lésé Bondyé gidé-nou lè nou ka pran désizyon anrapò èvè alkòl

SÈTEN ou kontan sé bèl kado-la Jéova ka fè-w la é sèten ou ni onlo rèkonésans pou-y, davwa i ka pèwmèt-vou chwazi kijan ou ké sèvi èvè sé kado-lasa. Dapré Labib, diven-la sé on kado ki ka vin dè Bondyé. Dayè mi sa i ka di : « Pen-la fèt pou ba moun tchè-kontan é diven-la ka fè vi a moun vin bèl » (Ékl. 10:19 ; Sòm 104:15). Pétèt ou konnèt moun ki ni pwoblèm pas yo ni dimal a métrizé-yo lèwvwè yo ka bwè alkòl. Anplisdisa, toupatou asi latè chakmoun ni lidé a yo ki ta yo asi alkòl é yo ni labitid a yo osi. Alò lèwvwè on krétyen ka désidé kijan i ké sèvi èvè kado-lasa, ki prensip ki dwètèt gidé-y ?

Lèwvwè nou ka pran désizyon, fò-nou suiv sé konsèy-la Bondyé ka ban-nou la olyé nou kouté sa moun alantou an nou ka di. Si nou ka fè sa, nou ké ni tchè-kontan é vi an nou ké bèl.

Pétèt zò ja rèmawké kè toupatou asi latè ni moun ki ka bwè onlo alkòl é yo ka fè sa toutlè. Sèwten moun ka bwè alkòl pou yo santi-yo byen é ni dòt moun aprézan ki ka bwè alkòl pou oubliyé pwoblèm a yo. É ni dòt koté ankò, ni sèwten moun ki ka bwè onlo onlo alkòl pou montré moun ka yo ka pézé.

Kréyatè-la ki plen lanmou, ka ba sé krétyen-la konsèy ki plen sajès. Pa ègzanp, i ka avèti-nou kè si on moun ka bwè twòp, i pé ni gwo pwoblèm. Pwovèb 23:29-35 ka èspliké an ki léta on moun yé lè i sou é ki pwoblèm i ka trapéa. Daniel, on ansyen ki ka viv an Éwòp, ka èspliké kijan i té ka viv avan i koumansé sèvi Jéova : « An té ka bwè onlo alkòl é akòz dè sa, an pran onpakèt mové désizyon. An viv dé biten ki fè-mwen soufè toubònman é jous aprézan lè an ka sonjé sa ki rivé-mwen, an ka soufè toujou. »

Kijan nou pé pran désizyon ki plen sajès anrapò èvè alkòl, é ka nou pé fè pou nou pa trapé pwoblèm ki ka rivé moun ki ka bwè twòp ? Mi solisyon-la : fò-nou lésé sa Bondyé ka pansé gidonné-nou kèlkèswa désizyon-la nou ka pran la é kèlkèswa biten-la nou ka fè la.

An-nou ègzaminé sa Labib ka di anrapò èvè alkòl, é an-nou vwè pou ki rézon sèwten moun ka bwè alkòl.

PRENSIP A LABIB

Labib pa ka entèwdi moun bwè alkòl. Dayè, limenm ka di kè lè ou ka bwè tibwen diven sa pé fè-w dibyen. Mi sa i ka di : « Manjé manjé a-w èvè jwa é bwè diven a-w èvè tchè-kontan » (Ékl. 9:7). Dépawfwa Jézi ni lokazyon bwè diven, é dòt sèwvitè a Jéova ki té fidèl fè sa osi (Mat. 26:27-29 ; Lik 7:34 ; 1 Tim. 5:23).

Pawòl a Bondyé pa ka entèwdi moun bwè alkòl, men sa i ka kondanné sé lè on moun ka bwè pou sou. Mi sa i ka di on mannyè ki klè : « Pa bwè diven pou sou » (Éféz. 5:18). I ka avèti-nou kè « moun ki bwasonè […] pé ké érité wayòm a Bondyé » (1 Kor. 6:10). Tousa pou di kè lè on moun ka bwè pou sou oben lè i ka bwè adépasé, Jéova ka kondanné sé biten-lasa. Alò olyé nou fè kon moun alantou an nou ka fè, nou vlé fè sa ki ka fè Bondyé plézi.

Sèwten moun ka pansé kè yo pé bwè onpakèt alkòl é kè yo pé’é sou. Men lè on moun ka aji konsa, sa danjéré toubònman. Pawòl a Bondyé ka di on mannyè ki klè kè lèwvwè on moun pé pa rété san bwè alkòl, sa pé pousé-y fè dé biten ki grav é sa pé détwi lanmityé a-y èvè Jéova (Tit 2:3 ; Pwov. 20:1). Anplisdisa Jézi di kè lè on moun ka « bwè twòp », sa pé anpéché-y rantré adan nouvo mond-la (Lik 21:34-36). Alò, ka ki pé édé on frè oben on sè pou i pa pri adan zatrap-lasa ?

MANDÉ-W POUKWA OU KA BWÈ

Si ou ka lésé kilti a-w aji asi désizyon ou ka pran, kon pa ègzanp lè ou ka bwè alkòl, sa pé vin danjéré. Fò on krétyen chèché a fè Jéova plézi adan tout domenn a vi a-y. Mi sa Labib ka ankourajé-nou fè : « Ki nou ka manjé, ki nou ka bwè, oben kèlkanswa sa nou ka fè, an-nou fè tout biten pou glwa a Bondyé » (1 Kor. 10:31). Mi déotwa kèsyon é déotwa prensip a Labib ki ké édé-w réfléchi asi sa ki ka pousé-w bwè é asi sé labitid-la ou ni la :

Ès an ka bwè pou lézòt pa fè jé èvè mwen ? Mi sa nou ka li an Ègzòd 23:2 : « Fò pa ou suiv foul-la. » Adan vèwsé-lasa, Jéova té entèwdi sé Izraélit-la imité sé moun-la ki pa té ka adoré-y la. É sé on bon konsèy pou sé krétyen-la ki ka viv jòdila osi. Si nou ka lésé sa moun ki alantou an nou ka pansé anrapò èvè alkòl é sa yo ka fè adan domenn-lasa détenn asi nou, piti-a-piti, nou ké lagé prensip a Jéova é nou ké jous fin pa lagé Jéova (Wom. 12:2).

Ès an ka bwè alkòl pou montré lézòt sa an ka pézé ? Adan sèwten kilti, pou lamajorité a sé moun-la, lè on moun ka bwè onlo alkòl é kè i ka fè sa toutlè sa toutafè nòwmal (1 Pyè 4:3). Men gadé sa 1 Korentyen 16:13 ka ankourajé-nou fè : « Rété véyatif, tchenbé rèd adan lafwa, pran kouraj, vin fò. » Men èskè lè on moun ka bwè alkòl, sa ka édé-y montré jan i fò vréman ? Awa, anponjan ! Lè on moun ka bwè alkòl, sa pé anpéché-y rézonné byen konm i fo é pran bon désizyon. Alò, lè on moun ka bwè onlo alkòl, sa vé pa di kè sé on moun ki fò men sa ka montré kè moun-lasa, sé on moun ki sòt. Izayi 28:7 ka èspliké kè lèwvwè alkòl ka fè on moun pèd lakat, i ka fin pa bigidi é i ka tonbé.

Fòs-la nou bizwen la pou nou pé sa fè sa ki byen ka vin dè Jéova, é lèwvwè on moun ni fòs-lasa, ‘i ka rété véyatif é i ka tchenbé rèd adan lafwa’ (Sòm 18:32). Pou on krétyen rivé fè sa, fò i fè atansyon pou i pa lésé pon biten anpéché-y rété bon bon zanmi èvè Jéova é fò i byen désidé a ba sé biten-lasa gran lè a yo. Jézi té bon bon zanmi èvè Jéova é onlo moun té ka rèspèkté-y pas i té ni onlo kouraj é i té byen désidé a fè sa ki byen.

Ès alkòl-la pé édé-mwen oubliyé pwoblèm an mwen poudèbon ? Mi sa yonn adan sé misyé-la ki maké sé sòm-la di : « Lè an santi an té ka néyé anba sa ki té ka enkyété-mwen, ou [Jéova] konsolé-mwen é ou trankilizé-mwen » (Sòm 94:19). Si ou ni on biten asi tchè a-w é kè sa two lou ba-w, konté asi Jéova. Sé li ki ké konsolé-w. Alkòl-la pé’é fè ayen ba-w. Pa ègzanp, ou pé priyé Jéova pli souvan. Ni sèwten moun ki ka di kè on biten ki ka édé-yo, sé lèwvwè yo k’ay chèché konsèy owa on zanmi a yo adan lasanblé-la ki byen doubout adan lavérité. An réyalité, lèwvwè nou ka bwè pou swadizan oubliyé pwoblèm an nou, nou pa ni menm balan-la pou fè sa ki byen (Ozé 4:11). Talè la nou palé dè Daniel. Mi sa i ka admèt : « An té angwasé é an té ka santi-mwen koupab. Alò, an mèt-mwen ka bwè alkòl pou an té santi-mwen pibyen, men sé pi mové sa vin pi mové. An pa té ni pon zanmi ankò é mwenmenm pa té ni pon rèspé pou mwen ankò. » Kijan Daniel fè pou woté kò a-y adan sitiyasyon-lasa ? Mi sa i ka di ankò : « An fin pa konprann kè sa an té bizwen a pa té alkòl-la men sé té Jéova. An gadé laréyalité anfas é an rivé about a tout pwoblèm an mwen. » Fò pa nou oubliyé kè Jéova toujou paré pou konsolé-nou menmsi pou nou pa ni pon solisyon (Filip. 4:6, 7 ; 1 Pyè 5:7).

Si délè ou ka bwè alkòl, pétèt ou té’é pé analizé sé labitid-la ou ni la adan domenn-lasa. Pou sa, ou té’é pé pozé-w sé 3 kèsyon-lasa : « Ès on moun an fanmi an mwen oben on bon zanmi an mwen di-mwen kè sa ka enkyété-y lè i ka vwè kantité alkòl an ka bwè ? » Si sa ja rivé-w, pétèt kè sa vé di kè ou pran on mové labitid é kè ou pa rann-vou kont dè sa. « Ès an ka bwè plis ki avan ? » Si sé sa, fè atansyon pas menmsi pou lè moman ou pé arété bwè lè ou vlé, pétèt lè ou ké vé arété ou ké rann-vou kont kè ou pa’a rivé. « Ès an ni dimal a rété déotwa jou san bwè alkòl ? » Si sé ka a-w, sa pé vé di kè bwè alkòl vin on labitid pou-w é pétèt kè ou ké bizwen kè on moun ki ka travay adan domenn-lasa édé-w pou-w rivé about a pwoblèm-lasa.

Sèwten krétyen désidé pa bwè pa menm onsèl gout alkòl akòz dè tout sé déga-la sa pé fè la. Ni dòt ki pa’a bwè pas lèwvwè on biten ni alkòl adan, yo pa enmé gou a-y. Si adan lantouraj a-w ni on moun ki pran on désizyon konsa, sa té’é vréman janti si ou té ka rèspèkté chwa a-y san kritiké-y.

Si ou chwazi bwè alkòl, pétèt sa té’é saj si ou té ka désidé ki kantité alkòl ou ké bwè. Pa ègzanp, pétèt ou ké désidé bwè tibwen alkòl onsèl fwa adan simenn-la oben enki lèwvwè ou ka manjé. Oben pétèt ou ké désidé kè ou pé’é bwè toutkalté alkòl. Pa ègzanp, ou ké pran diven oben byè men ou pé’é pran on alkòl ki fò menmsi sé tibwen yo mèt adan on ji. Antouka, siwvwè ou ja réfléchi alavans a sa ou ké fè adan domenn-lasa, ou ké pé montré-w rézonab pi fasilman. Lèwvwè on krétyen ki byen doubout adan lavérité pran on désizyon adan domenn-lasa é kè i ka fè tousa i pé pou suiv désizyon-lasa, fò pa i santi-y jenné parapòt a sa lézòt ka pansé dè-y.

Lèwvwè nou ka pran on désizyon anrapò èvè alkòl, fò-nou tchenn kont dè sa lézòt ké rèsanti osi. Mi sa nou ka li an Women 14:21 : « Vométan ou pa manjé vyann, ou pa bwè diven, é ou pa fè ayen ki pé fè frè a-w tribiché. » Kijan ou pé suiv konsèy-lasa ? Fò ou aji èvè lanmou. Si ou ka pansé kè lè ou ké bwè alkòl sa ké choké on moun, a moman-lasa, menmsi ou ni dwa bwè, sèten ou ké préféré pa bwè pas ou ni lanmou pou moun-lasa. Lè ou ka fè sa, ou ka montré kè sa lézòt ka rèsanti ni onlo enpòwtans pou-w kivédi ou ka fè entéré a yo pasé avan ta-w (1 Kor. 10:24).

Anplisdisa, gouvènman-la pé mèt sèwten lwa anrapò èvè alkòl anplas. On krétyen ké suiv sé lwa-lasa. Pa ègzanp, gouvènman-la pé désidé a ki laj on moun pé koumansé bwè oben i pé entèwdi moun bwè si yo kay kondui oben si yo kay sèvi èvè sèwten machin (Wom. 13:1-5).

Jéova ka ofè-nou onlo onlo kado, é lè i ka lésé-nou chwazi kijan nou ké sèvi èvè sé kado-lasa, sé on bèl lonnè i ka fè-nou. Sa valab osi lè nou ka désidé ka nou ké bwè é ka nou ké manjé. Jéova ka ban-nou dwa chwazi sa nou ké fè é nou kontan sa toubònman. Alò, an-nou fè tousa nou pé pou désizyon an nou fè Pap’an nou ki an syèl-la plézi.