Zò té vlé sav...

Adan 1 Timoté 5:21 yo ka palé dè « sé zanj-la Bondyé chwazi la », kimoun yo yé ?

Mi sa lapòt Pòl maké ba Timoté ki té ansyen kon limenm : « An ka ba-w sé lòd èspésyal lasa douvan Bondyé, Jézikris é sé zanj-la Bondyé chwazi la : « Suiv sé enstriksyon-lasa byen, san jijé moun alavans é san fè préférans » (1 Tim. 5:21).

Pou koumansé, an-nou gadé ka èksprésyon-la « sé zanj-la Bondyé chwazi la » pa vlé di. Si i ni on biten ki sèten, sé kè a pa sé 144 000 la, pas lè Pòl ékri Timoté, rézirèksyon a sé krétyen wen la ki pou fèt an syèl-la poto’o koumansé. Sé apòt-la é sélézòt krétyen wen la poto’o vin dé kréyati èspirityèl. Kifè lè Pòl palé dè « sé zanj-la Bondyé chwazi la », a pa té dè yo i té ka palé (1 Kor. 15:50-54 ; 1 Tés. 4:13-17 ; 1 Jan 3:2).

A pa sé zanj-la ki dézobéyi Bondyé a épòk a délij-la nonplis. Sé zanj-lasa pran pawti a Satan, yo vin dé démon é yo vin lènmi a Jézi (Jén. 6:2 ; Lik 8:30, 31 ; 2 Pyè. 2:4). Talè, Jézi ké jété-yo adan on tou ki pa ni fon pannan 1 000 lan, é aprésa i ké détwi-yo anmenmtan ki Dyab-la (Jid 6 ; Rév. 20:1-3, 10).

Donk lè Pòl ka palé dè « sé zanj-la Bondyé chwazi la », i ka palé dè zanj ki fidèl a Bondyé é a Jézikris.

Ni milyé é milyé zanj ki fidèl (Ébr. 12:22, 23). I ka sanmsa Bondyé pa ka itilizé-yotout pou fè menm biten-la a menm moman-la (Rév. 14:17, 18). Pa ègzanp, i mandé onsèl zanj tchouyé 185 000 sòlda Asiriyen (2 Wa 19:35). Pétèt on kantité zanj ké ni misyon-lasa : « tout moun ki ka fè lézòt tribiché é ki ka fè mové biten, yo ké woté-yo an wayòm a [Jézi] » (Mat. 13:39-41). Pétèt ni dòt ki ké « sanblé séla i chwazi la » an syèl-la (Mat. 24:31). É i ké ba dòt lòd ‘pwotéjé-nou kèlkèswa koté nou k’ay’ (Sòm 91:11 ; Mat. 18:10 ; konparé èvè sa ki maké adan Matyé 4:11 ; Lik 22:43).

Nou ka tou konprann kè lè 1 Timoté 5:21 ka palé dè « sé zanj-la Bondyé chwazi la », i ka palé dè zanj ki rèsèvwa on rèsponsabilité èspésyal ki lyanné èvè pèp a Bondyé. Adan kontèks-la, Pòl bay dé konsèy plen sajès. I di kè sé ansyen-la mérité rèspé a frè é sè a lasanblé-la. I maké osi kè dè koté a yo fò sé ansyen-la asimé rèsponsabilité a yo « san jijé moun alavans é san fè préférans ». É fò pa yo pran pon désizyon ni jijé ponmoun san yo réfléchi oséryé avan. Aprésa, Pòl ba sé ansyen-la on bon rézon dè suiv konsèy a-y. I di kè sé ansyen-la ka aji « douvan Bondyé, Jézikris é sé zanj-la Bondyé chwazi la ». Dapré sa nou vwè, sèwten zanj ka rèsèvwa rèsponsabilité anrapò èvè sèwvitè a Bondyé, kon pa ègzanp pwotéjé lasanblé-la, dirijé travay a prédikasyon-la é pawtajé sa yo obsèwvé èvè Jéova (Mat. 18:10 ; Rév. 14:6).