Dé nouvo frè adan Komité santral la

LÈ 5 ÒKTÒB 2024, yo bay on enfòwmasyon èspésyal pannan lasanblé jénéral la : konnyéla, frè Jody Jedele é frè Jacob Rumph ka fè pawti a Komité santral a Témwen a Jéova. Sa ja ka fè bon enpé lanné sé 2 frè-lasa ki fidèl ka sèvi Jéova.

Frè Jedele fèt o Missouri, o Zétazini é fanmi a-y lévé-y adan lavérité. La yo té ka rété la pa té ni onlo Témwen a Jéova. Kifè, i ni lokazyon jwenn onlo frè é sè ki té ka sòti diféran koté é ki té vin pou bay on pal adan prédikasyon-la. Lè i vwè jan yonn té enmé lòt é jan sé frè é sè lasa té soudé, sa touché-y. I pran lèbatèm lè 15 òktòb 1983. I té enmé préché onlo é apré i fin lékòl a-y i vin pyonyé pèwmanan an sèptanm 1989.

Lèwvwè frè Jedele té jenntiboug, paran a-y té ka menné-y, li èvè tisè a-y, vizité Bétèl-la. Sa ba sé timoun-la anvi ay travay an Bétèl-la, é sé sa yo toulédé fin pa fè. Frè Jedele rivé an Bétèl a Wallkill an sèptanm 1990. I koumansé travay adan sèwvis-la ki ka nétwayé Bétèl-la, é aprésa i travay adan sèwvis-la ki ka pran swen a santé a sé bétélit-la.

An tan-lasa koumansé ni onlo lasanblé èspagnòl toupré Bétèl-la, é yo té bizwen frè adan sé lasanblé-lasa. Kifè frè Jedele ay adan yonn adan sé lasanblé-lasa é i aprann palé èspagnòl. Tibwen tan apré, i jwenn on sè non a-y sé té Damaris ki té pyonyé adan menm siwkonskripsyon-la. Yo mayé, é Damaris vin jwenn-li an Bétèl-la.

An 2005 yo kité Bétèl-la pou yo té ay pran swen a fanmi a yo. Pannan péryòd-lasa yo té pyonyé pèwmanan. Frè Jedele ni lokazyon fè lékòl ba sé pyonyé-la adan 4 ou 5 Lékòl pou sé pyonyé-la. Aprésa i té adan on komité pou fè lyannaj èvè sé lopital-la, é i fè pawti a sa yo té ka kriyé avan on comité de construction régional.

An 2013, yo mandé frè é sè Jedele viré an Bétèl-la pou bay on pal adan pwojé a konstriksyon a Warwick. Aprésa yo ay travay a Patterson é a Wallkill. Frè Jedele travay o LDC é adan sèwvis-la ki ka bay enfòwmasyon anrapò èvè sé lopital-la. An maws 2023, i vin asistan a Komité pou sèwvis-la. Lè i ka sonjé sé diféran biten-la yo ba-y fè la, mi sa i ka di : « Délè, lè yo ka ba-w fè on nouvo biten sa pé fè-w pè. Men sé a moman-lasa pou-w fèfon asi Jéova, pas i ka édé-w fè sa i ka mandé-w fè. »

Frè Rumph fèt an Kalifòwni, o Zétazini. Lè i té piti, manman-y arété préché é i arété ay réinyon. Men manman-la fè éfò pou aprann-li sé vérité-la ki an Bib-la. Anplisdisa chak lanné i té k’ay aka mami a-y ki té Témwen a Jéova. Mami a-y ba-y anvi konnèt plis biten asi Labib é lè i té ni 13 an i mandé pou ni on étid. I pran lèbatèm lè 27 sèptanm 1992. Manman-y woukoumansé préché é i woukoumansé ay réinyon osi. Pap’a-y é frè é sè a-y koumansé pwogrésé é yo pran lèbatèm.

Lè frè Rumph té jenn, i ni lokazyon vwè jan on moun ni tchè-kontan lè i pyonyé. Sé pousa lè i fin lékòl a-y, i vin pyonyé an sèptanm 1995. An lan 2000, i pati an Ékwatè, on koté té ka manké pwoklamatè. Sé la i jwenn Inga, on sè ki té pyonyé é ki sòti o Kanada. Yo mayé, é aprésa yo ay soutyenn on gwoup ki té ni déotwa pwoklamatè adan. Alèla ti gwoup-lasa vin on lasanblé.

Onlè, yo nonmé frè Rumph é madanm a-y pyonyé èspésyal. Aprésa frè Rumph vin rèsponsab a siwkonskripsyon. An 2011 yo envité-yo adan 132^èm klas a Galaad. Apré yo ba-yo diplòm a yo, yo voyé-yo adan diféran péyi é yo fè diféran biten. Pa ègzanp yo ay an Bétèl-la, yo vin misyonè é frè-la vin rèsponsab a siwkonskripsyon. Frè Rumph vin fòwmatè adan lékòl pou évanjélizatè a Wayòm-la.

Akòz dè pandémi a Covid-19 la, frè é sè Rumph rantré o Zétazini. Yo mandé-yo ay adan Bétèl a Wallkill, é yo fòwmé frè Rumph pou i travay adan biwo-la ki ka jéré prédikasyon-la. Men finalman yo wouvoyé-yo adan filyal a Lékwatè, é frè Rumph fè pawti a Komité a filyal-la. An 2023 yo voyé-yo a Warwick. An janvyé 2024, frè Rumph vin asistan a Komité pou sèwvis-la. Lèwvwè i ka sonjé tout sé biten-la yo ba-y fè la, mi sa i ka di : « A pa parapòt a koté-la ou ka travay la kè travay a-w èspésyal, men sé parapòt a sé moun-la ki ka travay èvè-w la. »

Sé frè-lasa ka travay rèd é nou ka aprésyé travay-lasa toubònman. Nou ka « kontinyé enmé dé nonm kon [yo] èvè onlo tandrès » (Filip. 2:29).