On nouvo moun adan Komité santral la

LÈ 24 JANVYÉ 2018, on mèwkrèdi maten, fanmi a Bétèl a Lézétazini é a Kanada aprann on bon nouvèl : yo nonmé frè Kenneth Cook adan Komité santral a Témwen a Jéova.

Frè Cook lévé Pennsilvani, o Zétazini. I vin konnèt lavérité grasa on kanmarad-lékòl pannan i té ka fin lisé a-y, é i pran batèm lè 7 jen 1980. I koumansé sèwvis pyonyé pèwmanan lè 1^é sèptanm 1982. Apré i pasé dé lanné adan sèwvis-lasa, lè 12 òktòb 1984, yo envité-y adan Bétèl a Wòlkil.

Aprésa, pannan 25 lanné, frè Cook pasé adan diféran sèwvis. Yo voyé-y adan sèwvis-la yo ka enprimé sé piblikasyon-la é adan sèwvis-la yo ka jéré fonksyònman a Bétèl-la. An 1996, i mayé èvè Jamie, é Jamie vin jwenn-li an Bétèl a Wòlkil. An désanm 2009, yo voyé frè é sè Cook sèvi adan Sant a ansègnman a Témwen a Jéova, a Patèwsòn. Adan sant-lasa, frè Cook té adan on sèwvis ki ka okipé dè lèt yo ka rèsèvwa adan Bétèl-la. Apré, frè é sè Cook rètouné on timoman adan Bétèl a Wòlkil. É an avril 2016, yo voyé-yo Bwouklin a Nouyòk. Apré senk mwa, yo rantré adan biwo mondyal la, a Wòrwik. An janvyé 2017, yo nonmé frè Cook asistan a Komité a rédaksyon a Komité santral la.