LÈSON 8

Sèvi èvè ègzanp pou anségné

Matyé 13:34, 35

SA POU-W FÈ : Anségné plibyen grasa ègzanp senp ki ka touché tchè a moun é ki ka aprann-yo dé biten enpòwtan.

Chwazi ègzanp ki senp. Kon Jézi, sèvi èvè dé ti biten tousenp pou èspliké dé biten enpòwtan, é sèvi èvè dé biten fasil pou èspliké dé biten ki rèd a konprann. Pa bay détay ki pa nésésè é ki ka konpliké ègzanp-la. Asiré-w kè ègzanp-la ka korèsponn èvè lidé-la ou vlé èspliké la, pou pon détay initil pa fè moun ki ka kouté-w pèd fil a sa ou ka di.

Entérésé-w a sa ki ka pasé. Pran tan gadé ka i ni alantou a-w, étidyé piblikasyon a lòwganizasyon é kouté dé anségnan ki ni èkspéryans. Pannan ou ka fè sa, maké sé ègzanp-la ou pé itilizé la pou vin pli filé adan ansègnman a-w. Mété-yo on koté pou plita.
Sonjé sé moun-la ki kay kouté-w la. Chwazi ègzanp ki anrapò èvè sa yo ka fè é ki ka entérésé-yo. Pa pran ègzanp ki ké jenné sé moun-la é ki ké choké-yo nonplis.
Pa oubliyé lidé prensipal la. Sèvi èvè ègzanp pou èspliké sé lidé prensipal la, plito ki sé ti détay-la. Fò pa moun-la sonjé ègzanp-la tousèl, men fò i sonjé sa i aprann grasa ègzanp-la.