APENDIS C
Jan pou kondui on étid biblik èvè liv-la Ou pé ni tchè-kontan pou touttan !
Pou yo té fè liv-la Ou pé ni tchè-kontan pou touttan !, sa mandé fouyé, réfléchi é priyédyé onlo. Kifè, si ou vlé pwofité dè liv-lasa anplen é vin pli filé lè ou ka fè on étid èvè ou moun, sèvi èvè métòd-la ki ka suiv la.
Avan étid-la
1. Préparé-w byen. Réfléchi asi sa étidyan a-w bizwen, asi sitiyasyon a-y, asi jan i ka vwè léchòz. Éséyé vwè ki lidé i ké ni dimal a konprann oben i ké ni dimal a mèt an pratik. Gadévwè ki pati a ribrik-la « Ay gadé sa osi » ké itil pou-y, pou ou pé sa sèvi èvè-y sianka.
Pannan étid-la
2. Priyé lè zò ka koumansé étid-la é lè zò fin (sòf si étidyan-la ka di i vé pa).
3. Pa palé twòp. Rété asi sé lidé-la ki adan lèson-la é lésé étidyan a-w di sa i ka pansé.
4. Lè ou ka koumansé yonn adan sé 4 pati a liv-la, li ti fraz-la ki ka di sa nou ké vwè adan pati-lasa, é atiré atansyon a étidyan a-w asi tit a déotwa lèson.
5. Lè zò fin on pati a liv-la, sèvi èvè paj-la ki ka montré sa pou nou woutyenn adan pati-lasa, pou vwè sa étidyan a-w aprann.
6. Pou chak lèson :
Li sé paragraf-la.
Li tout vèwsé yo ka mandé-w « li ».
Si sa pé itil, li déotwa adan sélézòt vèwsé-la.
Si sa posib, gadé tout sé vidéo-la ki adan ribrik-la « An-nou fouyé pi fon ».
Fè on ti kozé asi tout sé kèsyon-la.
Atiré atansyon a étidyan a-w asi sé imaj-la ki adan ribrik-la « An-nou fouyé pi fon » é mandé-y fè on komantè anlè yo.
Sèvi èvè ti karé-la « On biten ou pé éséyé fè » pou édé étidyan a-w suiv pwogré i ka fè. Ou pé ankourajé-y fiksé-y òbjèktif-la yo ka pwopozé-y la, oben ondòt òbjèktif, oben lé dé.
Mandé étidyan a-w, lè i té ka préparé étid a-y, ki awtik oben ki vidéo adan ribrik-la « Ay gadé sa osi », i touvé a gou a-y.
Éséyé fè on lèson antyè chakfwa ou ka fè étid-la.
Apré étid-la
7. Kontinyé sonjé étidyan a-w. Mandé Jéova béni pwogré a-y é mandé-y sajès pou édé étidyan a-w pibyen.