Kontinyé vwè travay a prédikasyon-la on mannyè ki pozitif

1. Ki ègzanp Jézi ba disip a-y, é kijan yo suiv ègzanp-lasa ? (gadé imaj-la ki anlè po a jounal-la).

LÈ JÉZI té asi latè, i toujou kontinyé préché é i pa jen mèt an tèt a-y kè ponmoun pé’é kouté-y. I vlé kè tout sé krétyen-la fè menm biten-la (Jan 4:35, 36). Lè Jézi té èvè sé disip-la, yo té ka pòté bon mannèv an prédikasyon (Lik 10:1, 5-11, 17). Men lè yo arété Jézi é yo tchouyé-y, sé disip-la vin touvé-yo dékourajé é yo pa té anvi préché ankò (Jan 16:32). Apré i résisité, Jézi di-yo mèt prédikasyon-la prèmyé douvan an vi a yo. Sé disip-la suiv konsèy a Jézi piskè apré i monté an syèl-la, tèlman sé disip-la té préché, lènmi a yo pa té kontan é mi sa yo di-yo : « Zò simé ansègnman a zòt la toupatou a Jérizalèm ! » (Akt 5:28).

2. Ka i ka montré kè Jéova ka béni travay a prédikasyon-la ?

² Lè sé prèmyé krétyen-la té ka préché, Jézi té ka gidé-yo é Jéova té ka béni travay-la yo té ka fè la. Kifè, onpakèt moun vin krétyen. Pa ègzanp, an 33 a épòk an nou, jou a Lapannkòt, ni apépré 3 000 moun ki pran lèbatèm (Akt 2:41). É aprésa, a pa tibwen moun ki vin disip a Jézi ! (Akt 6:7). Men pi bèl la té dèyè piskè Jézi té anonsé kè pannan dènyé jou a sistèm-lasa, té’é ni plis moun ankò ki té’é vin krétyen grasa travay a prédikasyon-la (Jan 14:12 ; Akt 1:8).

3-4. Poukwa sèwten pwoklamatè ka touvé prédikasyon-la difisil é ka nou ké vwè adan awtik-lasa ?

³ Noutout ka fè éfò pou nou rété pozitif lè nou ka préché. Men fò-nou rèkonnèt kè adan sèwten péyi sa pi fasil a fè. Poukwa nou ka di sa ? Paskè adan sé péyi-lasa, tèlman ni moun ki anvi étidyé Labib, yo ka oblijé enskri non a yo asi on lis é yo ka atann tou a yo rivé pou on Témwen pé sa fè étid a yo. Pawkont, adan dòt péyi a pa konsa sa ka pasé menm menm menm ! Déja, sé moun-la pa’a gè akaz a yo men anplisdisa, lè ou rivé jwenn on moun akaz a-y, byensouvan, sa Labib ka di pa’a gè entérésé-y.

⁴ Si la ou ka viv la, prédikasyon-la rèd, sèten sé konsèy-la ki adan awtik-lasa ké édé-w. Nou ké vwè ka sèwten pwoklamatè ka fè pou yo rivé préché ba plis moun. É nou ké vwè poukwa nou pé rété pozitif, kèlkèswa jan sé moun-la ka réyaji lè nou ka préché pou yo.

LÈ SÉ MOUN-LA PA AKAZ A YO

5. Ki difikilté onlo pwoklamatè ka jwenn ?

⁵ Ni onlo Témwen ki ni dimal a touvé sé moun-la akaz a yo. É pi nou k’ay, pi sé moun-la pa la. Sèwten pwoklamatè ka préché dé koté ni onlo batiman é onlo lotisman. Byensouvan, pou ou rantré adan sé batiman-la, fò ou fè on kòd é pou ou rantré adan sé lotisman-la, fò ou pasé pa on vijil. É délè, si a pa on moun ki ka rété la ki envité-w, gawdyen-la pé’é jen lésé-w rantré. Adan dòt péyi, ou pé préché dè kaz-an-kaz alèz a-w, men pwoblèm-la sé kè sé moun-la pa’a gè akaz a yo. Ni dòt pwoklamatè ki ka rété lakanpagn é la yo yé la, pa ni onlo moun é pa ni onlo kaz. Défwa, yo oblijé fè plizyè kilomèt pou yo ay owa on moun é yo pa menm sèten touvé-y la ! Si nou ka préché adan on téritwa kon séla, fò pa nou dékourajé. Ka nou pé fè pou rivé about a sé difikilté-la nou sòti vwè la ?

6. Poukwa nou pé di kè travay a on pwoklamatè é travay a on péchè ka sanm onlo ?

⁶ Jézi di kè lè ou ka préché bon nouvèl-la ou ka fè prèskè menm travay ki on péchè (Mawk 1:17). Défwa, on péchè pé rété plizyè jou san i pran ayen. Men i pa’a dékourajé, i ka éséyé dòt biten. Swa i k’ay péché a ondòt lè, swa i k’ay péché ondòt koté oben i ka mété-y ka péché ondòt jan. Ében sé pwoklamatè-la osi pé chanjé sèwten biten adan fason yo ka préché. An-nou vwè ka yo pé fè.

7. Ki rézilta nou pé rivé a ni si nou pa’a préché a menm lè-la touttan ?

⁷ Éséyé préché a ondòt moman. Si nou ay préché lè nou pi fasil a touvé sé moun-la akaz a yo, rézilta-la ké pibon pas antoutjan, fò on moun rantré akaz a-y onlè ! Ni onlo frè é sè ki ka préché laprémidi oben lèswa pas sé a moman-lasa yo ka touvé plis moun akaz a yo. É koté sé lè-lasa, sé moun-la trankil trankil a yo é yo pi fasil a kouté-w. Oben pétèt ou pé éséyé fè menm biten ki on ansyen non a-y sé David. I ka èspliké-nou kè lèwvwè i fè inèdtan oben dézèdtan adan on téritwa, li é moun-la ki ka préché èvè-y la ka viré fè sé pòt-la ki té fèmé lab. É mi sa i ka di : « On biten ki ka étoné-mwen toubònman, sé kantité moun ki ka akaz a yo lèwvwè nou viré ! »

8. Lè nou ka préché, kijan nou pé mèt sa Éklézyas 11:6 ka di an pratik ?

⁸ Fò pa nou jen arété préché. Awtik-lasa bazé asi on vèwsé é sé sa vèwsé-lasa ka ankourajé-nou fè (li Éklézyas 11:6). Nou palé dè David talè la é li, i pa jen dékourajé. Adan téritwa a-y ni on kaz, pòt a-y té toujou fèmé. Men David viré a plizyè rèpriz é i fin pa tonbé asi on moun ki té ka rété an kaz-lasa. É misyé-la pa té pé pi dakò ki sa pou yo palé dè mésaj-la ki an Bib-la ! Anplisdisa, mi sa i di : « Sa ka fè 8 an an ka rété kotésit, é sé prèmyé fwa an ka vwè on Témwen a Jéova douvan pòt an mwen. » Mi sa David ka ajouté : « An rann-mwen kont kè lè ou rété lontan ka monté é désann avan ou jwenn on moun akaz a-y, byensouvan, moun-lasa ka aksèpté mésaj-la nou ka préché la. »

9. Ka sèwten pwoklamatè fè pou yo té préché ba sèwten moun kè yo té ni dimal a jwenn akaz a yo ?

⁹ Éséyé préché ondòt koté. Ni dé moun ou pa’a touvé akaz a yo menm. Alò ni sèwten pwoklamatè ki ka fè on éfò pou préché ondòt koté. Pa ègzanp, si adan téritwa a yo ni onlo gran batiman é kè ou pa ni dwa préché adan sé batiman-lasa, yo k’ay préché an lari-la oben yo ka fè prézantwa. Konsa, sé pwoklamatè-la ka pé palé ba sé moun-la ki ka viv adan sé batiman-la é si ou vwè a pa té sa, pétèt kè yo pa té’é jen ni lokazyon préché pou sé moun-lasa. Ni onlo pwoklamatè ki rèmawké kè lè ou ka préché adan on pawk, asi on mawché oben on koté ni plen magazen, sé moun-la ka kozé èvè-w pi fasilman é yo pi fasil a pran on piblikasyon an men a-w. Mi sa Floiran, on frè ki rèsponsab a siwkonskripsyon an Bolivi ka èspliké : « Nou k’ay préché asi sé mawché-la oben owa sé magazen-la, antrè inè-d-laprémidi é twazè-d-laprémidi pas sé a moman-lasa sé vandè-la ka ni mwens travay. An jénéral, nou ka fè dé bèl ti kozé èvè yo é ni sa ki jous ka koumansé étidyé Labib èvè nou. »

10. Èvè ki métòd ou pé sèvi pou rivé jwenn sé moun-la ?

¹⁰ Éséyé préché ondòt jan. Asipozé ou ja éséyé jwenn on moun akaz a-y plizyè fwa. Ou ja pasé lèmaten, lèmidi, lèswa men i pa jen la. Ès ni dòt biten ou pé fè pou rivé préché ba-y ? Mi sa Katarína ka di : « Lè an pa’a rivé jwenn on moun akaz a-y, an ka voyé on lèt ba-y. Konsa, an ka èspliké-y sa an té’é di-y si an té jwenn-li akaz a-y. » Ka sa ka montré-nou ? Ében, fò-nou préché ondòt jan pou éséyé jwenn chakmoun ki an téritwa an nou. Si nou fè sa, nou ké montré kè nou ka sèvi Bondyé afon.

LÈ SÉ MOUN-LA PA’A KOUTÉ

11. Poukwa sèwten moun pa’a ba mésaj-la nou ka préché la pon valè ?

¹¹ Pou sèwten moun, mésaj-la nou ka préché la sé biten ankouyonnad. Pou yo, yo pa bizwen Labib é yo pa bizwen Bondyé nonplis. Yo pa’a kwè an Bondyé pas yo ka di kè si i té ka ègzisté pa té’é ni tousa soufrans asi latè. É yo pa’a ba Labib pon valè pas onlo chèf a rèlijyon ki ka suiv sa Labib ka di swadizan, ka fè enpé biten ki pa bon. Ni dòt moun, sèl biten ki an tèt a yo sé travay a yo, fanmi a yo, pwoblèm a yo é yo pa’a vwè ka Labib ké pé fè pou yo. Men ni mwayen nou kontinyé préché èvè onlo jwa an tchè an nou menmsi sé moun-la pa’a ba mésaj-la nou ka préché la pon enpòwtans. Kijansa ?

12. Si nou ka fè sa ki maké an Filipyen 2:4, ki bon rézilta nou ké ni ?

¹² Lè ou ka préché ba on moun, montré-y kè ou ka sousyé-w dè-y. Ni onlo moun ki pa té ka ba mésaj-la nou ka préché la pon valè men ki aksèpté bon nouvèl-la apré, pas ni on pwoklamatè ki fè-yo santi kè i té ka sousyé-y dè yo (li Filipyen 2:4). Talè la nou palé dè David. Mi sa i ka èspliké : « Si on moun di-nou kè sa pa ka entérésé-y, nou ka mèt Bib an nou é piblikasyon an nou an sak an nou é nou ka di-y jantiman : “Nou té’é byen kontan si ou té ka di-nou poukwa sa pa ka entérésé-w.” » Lè ou anvi édé on moun, i ka santi sa. Pétèt kè i pé’é sonjé sa ou di-y men sèten i pé’é jen oubliyé jan-la ou fè èvè-y la. Menmsi sèwten moun ka rèfizé kouté mésaj-la, fò yo vwè asi figi an nou é asi konpòwtèman an nou kè nou ka sousyé-nou dè yo vréman.

13. Si ou vé sé moun-la touvé mésaj-la entérésan, ka ou pé fè ?

¹³ Pou montré on moun kè nou anvi édé-y, nou pé fè ondòt biten ankò : nou pé palé-y dè biten ki ka entérésé-y é ki ké itil pou-y. Pa ègzanp, imajiné kè ou rèmawké kè ni timoun ki ka viv an kaz-la. Pétèt kè sé paran-la té’é byen kontan si ou té ka palé-yo dè sa Labib ka di pou édé-yo lévé timoun a yo oben pou vi a fanmi a yo vin pi bèl. É si ou ka konstaté kè on moun mèt on alawm oben on kaméra akaz a-y, pétèt ou pé palé-y dè tout pakèt krim-la ki ka fèt la. Ou pé di-y osi kè, toupatou si latè, moun ka viv enkyèt akòz dè sa. Aprésa, pétèt kè moun-la ké byen kontan si ou montré-y kè onlè, pon krim pé’é fèt asi latè ankò. Men kèlkanswa, chakfwa on moun dakò pou fè on ti kozé èvè-w, éséyé fè-y konprann kè sé konsèy-la ki an Bib-la pé édé-y. Talè la, nou palé dè Katarína. Mi sa i ka di : « An pa jen ka oubliyé jan Labib édé-mwen. Grasa-y, vi an mwen vin pi bèl. » Kifè, lè sè-lasa ka préché, ou ka santi kè i konnèt sa i ka di pas i ka palé dè sa limenm a-y viv.

14. Sèlon sa ki maké an Pwovèb 27:17, lè 2 moun ka préché ansanm, kijan yonn pé édé lòt ?

¹⁴ Fè dòt pwoklamatè édé-w. O 1^é syèk, Pòl montré Timoté kijan pou i préché é kijan pou i anségné osi. É i di Timoté montré frè é sè a-y sèvi èvè sé métòd-lasa (1 Kor. 4:17). Alò, an-nou imité Timoté. Si adan lasanblé an nou, ni déotwa frè é sè ki ni onlo èkspéryans, nou pé préché èvè yo pas sa ké édé-nou pwogrésé (li Pwovèb 27:17). An-nou pran ka a on frè non a-y sé Shawn. Onlè, frè-lasa té ka préché adan on téritwa ki ka touvé-y lakanpagn é lamajorité a sé moun-la té ka di-y kè yo byen adan rèlijyon a yo é kè yo pa bizen ayen dòt. Ka Shawn fè pou i pa té pèd jwa a-y ? Mi sa i ka di : « Dépi an té pé, an té ka òwganizé-mwen mwen préché èvè on moun. Chakfwa nou té sòti owa on moun, yonn té ka ba lòt konsèy pou vwè ka nou té’é pé fè pou préché pibyen. Pa ègzanp, chakfwa, nou té rivé fè on ti kozé èvè on moun, nou té ka pran on tan pou analizé kijan sa pasé. Aprésa, nou té ka éséyé vwè ka nou té’é pé fè pou réponn pibyen sianka nou touvé-nou adan menm sitiyasyon-la ondòt fwa. »

15. Poukwa fò-nou priyé Bondyé lè nou ka préché ?

¹⁵ Priyé Jéova pou i pé sa édé-w. Chakfwa ou ka préché, priyé Jéova é mandé-y édé-w. Si Jéova pa té ka ban-nou lèspri sen a-y, nou pa té’é pé fè ayen (Sòm 127:1 ; Lik 11:13). Lè ou ka mandé Jéova édé-w, di-y sa ou té vé ègzaktèman. Pa ègzanp, di-y gidé-w pou ou tonbé asi on moun ki ni on tchè ki sensè é ki anvi kouté mésaj-la. Apré, aji annakò èvè priyè a-w kivédi préché ba toutmoun ou ka jwenn.

16. Poukwa fò on pwoklamatè étidyé tousèl a-y ?

¹⁶ Pran on tan pou étidyé tousèl a-w. Labib ka di-nou kè fò nou ‘vérifyé noumenm ka ki volonté a Bondyé, on volonté ki bon, ki konm i fo é ki pawfè’ (Wom. 12:2). Lè nou ka étidyé, nou ka vin konnèt Bondyé pibyen. Kifè, lè nou ka préché ba on moun, i ka rann-li kont kè nou ka kwè a san pou san adan sa nou ka di-y. Mi sa Katarína ka di ankò : « Pa ni lontan dè sa, an rann-mwen kont kè an pa té ka kwè asé fò adan sèwten vérité enpòwtan. Kifè, an pran tan an mwen mwen té étidyé sèwten prèv ki ka montré kè ni on Kréyatè, kè Labib sé Pawòl a Bondyé é kè Bondyé ni on òwganizasyon asi latè. » Katarína konstaté kè davwa i ka étidyé tousèl a-y, fwa a-y ka vin pi solid. É konnyéla, lè i ka préché, tchè a-y ka pi kontan ankò.

POUKWA FÒ NOU RÉTÉ POZITIF

17. Lè Jézi té ka préché, i toujou rété pozitif. Poukwa ?

¹⁷ Jézi toujou rété pozitif é i kontinyé préché menmsi sèwten moun pa té ka ba mésaj a-y pon enpòwtans. Poukwa ? Pas i té sav kè sé moun-la bizwen konnèt lavérité. Alò, i fè tousa i té pé pou on maksimòm dè moun tann mésaj a Wayòm-la. Jézi té sav osi kè ni sèwten moun ki pa té’é aksèpté mésaj-la tousuit men ki té’é fin pa aksèpté-y plita. Dayè pou yonn, sé konsa sa pasé an fanmi a-y. I rété 3 an ka préché men pon frè a-y pa vin disip a-y (Jan 7:5). É poutan, apré i résisité, yo vin krétyen (Akt 1:14).

18. Poukwa nou ka kontinyé préché ?

¹⁸ Nou pa sav kimoun ki ké vin on sèwvitè a Jéova. Ni sèwten moun ki ké pran onlo tan avan yo fin pa aksèpté mésaj-la nou ka préché la. É menmsi ou vwè on moun vé pa kouté-nou konnyéla la, si nou ni on bon konduit é kè nou ka rété pozitif, pétèt kè on jou, i ké sèvi Jéova (1 Pyè 2:12).

19. Dapré sa ki maké an 1 Korentyen 3:6, 7, ka pou nou pa jen oubliyé ?

¹⁹ Toupannan nou ka planté é nou ka wouzé, fò pa nou oubliyé kè sé Bondyé ki ka fè sé grenn a vérité-la pousé an tchè a sé moun-la (li 1 Korentyen 3:6, 7). Mi sa Getahun, on frè ki ka viv an Étyopi, ka di : « Pannan plis ki 20 an, sé mwen tousèl ki té Témwen koté-la an ka rété la. Men jòdijou, nou a 14 pwoklamatè é ni 13 ki batizé. Madanm an mwen é 3 timoun an mwen, Témwen a Jéova. Chakfwa ni réinyon, ni apépré 32 moun ki ka vin. » Getahun kontan davwa i kontinyé préché. I pran pasyans èvè sé moun-la é piti-a-piti, Jéova fè-yo vin adan òwganizasyon a-y (Jan 6:44).

20. An ki sans nou pé di kè nou adan on ékip ki k’ay sové moun ?

²⁰ Jéova ka ba vi a chakmoun onlo valè. Sé pousa i ka pòté bon mannèv pou i fè moun ki sòti toupatou si latè rantré adan òwganizasyon a-y avan lafen rivé. É i ka ban-nou on bèl privilèj piskè i ka pèwmèt-nou kolaboré èvè Gason a-y pou fè travay-lasa (Ajé 2:7). Lè nou ka préché, sé konsi nou adan on ékip ki k’ay sové moun ki òbò on bato ki ka koulé. Menmsi sé yenki déotwa moun tousèl nou sové, nou pé di kè tout ékip-la pòté bon mannèv. Ében pou travay a prédikasyon-la sé menm biten. Nou pa sav konmen moun ka rété pou nou woté an mond a Satan. Men pou pé sa sové-yo, Jéova pé sèvi èvè nenpòt adan nou. Mi sa Andreas, on frè ki an Bolivi, ka di : « An sav kè a chakfwa on moun ka aksèpté lavérité é ka pran lèbatèm, sé paskè onlo moun travay ansanm pou yo té édé-y. » Alò, an-nou kontinyé rété pozitif lè nou ka préché. Jéova ké béni-nou é lè nou ké ka préché, sa ké mèt onlo jwa an tchè an nou.