An-nou montré frè é sè an nou ki ja ni on bèl laj kè yo ni onlo valè

1-2. a) Dapré Pwovèb 16:31, kijan pou nou vwè frè é sè an nou ki ni on bèl laj ? b) A ki kèsyon nou ké réponn adan awtik-lasa ?

O ZÉTAZINI, ni on pawk, é adan pawk-lasa ou ka touvé onlo dyaman atè-la. Konm yo pa’a kléré kon sé pyè-la ki asi sé bijou-la, moun pé rivé a maché asi yo san menm yo rann-yo kont. É poutan, sé on trézò ki anba pyé a yo.

² Frè é sè an nou kon sé dyaman-lasa. Yo sé dé trézò ki ni onlo valè. Pawòl a Bondyé ka konparé sé chivé blan la yo ni la èvè on kouwòn (li Pwovèb 16:31 ; 20:29). Men si nou pa’a fè atansyon, nou pé pasé owa sé trézò-lasa san menm nou vwè-yo. Adan lasanblé-la, lèwvwè sé frè é sè-la ka rann-yo kont kè sé frè é sè-la ki ja ni on bèl laj la ni onlo valè, yo ka touvé on biten ki ni plis valè ki lò. Adan awtik-lasa, nou ké réponn a 3 kèsyon : Poukwa Jéova ka di kè sé frè é sè-la ki ni on bèl laj la sé dé trézò ? Ki plas Jéova ka ba-yo adan òwganizasyon a-y ? Ka nou pé fè pou ègzanp a yo pé sa itil pou nou ?

POUKWA FRÈ É SÈ AN NOU KI JA NI ON BÈL LAJ É KI FIDÈL SÉ DÉ TRÉZÒ POU JÉOVA

3. Dapré sa Sòm 92:12-15 ka di, poukwa frè é sè an nou ki ja ni on bèl laj é ki fidèl ni onlo valè pou Jéova ?

³ Frè é sè an nou ki ni on bèl laj é ki fidèl ni onlo valè pou Jéova. Jéova pa’a gadé kè yo ja pran laj men sa i ka vwè sé ki jan dè moun yo yé vréman. I ka gadé bèl kalité a yo é i fyèw dè yo. Konm frè é sè an nou ja ni on bèl laj, yo ni onlo sajès. É lèwvwè Jéova ka vwè-yo ka pawtajé sajès-lasa èvè sé jenn-la, a pa ti kontan i ka kontan ! (Jòb 12:12 ; Pwov. 1:1-4). Lè Jéova ka vwè jan yo ka andiré, i kontan yo toubònman (Mal. 3:16). Apapoudi kè yo pa trapé pwoblèm adan vi a yo men fwa a yo toujou rété solid. Pi tan-la ka pasé é pi yo ni fwa adan bèl èspwa-la Jéova ban-nou la. É Jéova enmé-yo pas yo ka kontinyé palé dè non a-y ‘magré yo ja ni on bèl laj’ (li Sòm 92:12-15).

4. Ka ki pé ankourajé frè é sè an nou ki ja ni on bèl laj ?

⁴ Si laj-la ka bat-vou, ou pé sèten kè Jéova ka sonjé tout bèl travay-la kè ou fè la lè ou té pi jenn (Ébr. 6:10). Ou té ka pòté bon mannèv an prédikasyon é sa té ka fè Pap’an nou ki an syèl-la plézi. Ou andiré onlo éprèv é défwa sa té rèd toubònman. Ou toujou té ka mèt prensip a Labib an pratik adan vi a-w kèlkèswa sa yo té ka ba-w fè adan òwganizasyon a Jéova. Ou té ka fè-y èvè tout tchè a-w. Anplisdisa, ou fòwmé onlo frè é sè é ou soutyenn sé pyonyé-la onlo. Ou pé sèten kè Jéova enmé-w onlo pas ou fidèl. I pwomèt kè « i pé’é lagé pon sèwvitè a-y ki fidèl » ! (Sòm 37:28). Anplisdisa, mi sa i ka pwomèt osi : « Jiskatan chivé a zòt vin blan, an ké soutyenn-zòt » (Iz. 46:4). Menmsi ou ja ni on bèl laj, pa mèt an tèt a-w kè ou pa ni plas a-w adan òwganizasyon a Jéova. Ou ni onlo valè !

POU JÉOVA, YO NI PLAS A YO ADAN ÒWGANIZASYON A-Y

5. Ka fò frè é sè an nou ki ja ni on bèl laj mèt fon an tèt a yo ?

⁵ Sé vré, pétèt kè frè é sè an nou ki ja ni on bèl laj pé pa fè tousa yo té ka fè avan. Men ni on pwovèb kréyòl ki ka di : « Vyé kannari ka fè bon soup ». Sa vé di kè yo pé aprann-nou onlo biten. Pi frè é sè an nou ka pran laj, pi yo ni èkspéryans é pi yo pé pòté bon biten pou lasanblé-la. É dayè, Jéova ka kontinyé itilizé-yo pou fè diféran biten. É sé sa nou ké vwè èvè déotwa ègzanp a moun ki viv an tan lontan é èvè déotwa ègzanp a moun ki ka viv a épòk an nou.

6-7. Labib ka palé dè onlo sèwvitè a Jéova ki té ja ni on bèl laj é ki té fidèl. Bay déotwa ègzanp.

⁶ Adan Labib, nou ka touvé onlo bèl ègzanp a moun ki té fidèl, é ki kontinyé sèvi Jéova èvè tout tchè a yo menmsi yo té ja ni on bèl laj. Pa ègzanp, Moyiz té ni 80 lanné apépré lè i vin pwofèt a Jéova é lèwvwè Jéova chwazi-y pou dirijé nasyon a Izrayèl. Pétèt Danyèl té ja ni pliski 90 an é i té pwofèt a Jéova toujou. É pétèt kè lapòt Jan té ni 90 an apépré lè Jéova fè-y maké liv a Larévélasyon.

⁷ Ni onlo sèwvitè a Jéova ki té ja ni on bèl laj é ki té fidèl, é adan Labib, yo pa’a palé tèlman dè yo. Men apapousa Jéova pa té ka vwè-yo. Dayè, Jéova jous rékonpansé-yo pas yo té fidèl. Pa ègzanp, Siméon sé on boug ki té ‘jis é ki té ka krenn Bondyé’, é Labib pa’a palé onlo dè-y. Men poutan, Jéova té konnèt-li é i ba-y on bèl privilèj toubònman piskè i pèwmèt-li vwè Jézi é i pèwmèt-li anonsé on pwofési anrapò èvè Jézi é manman-y (Lik 2:22, 25-35). Aprézan, an-nou palé dè Àn, on madanm ki té pwofèt. I té vèv é i té ni 84 an men i té ‘toujou an tanp-la’, sé pousa Jéova rékonpansé-y é i pèwmèt-li vwè Jézi. Siméon é Àn té ni onlo valè pou Jéova (Lik 2:36-38).

8-9. Ki bèl travay sé sè-la ki pèd mari a yo la ka kontinyé fè adan lasanblé-la ?

⁸ A épòk an nou, Jéova ni onlo sèwvitè ki fidèl é ki ni on bèl laj, é yo sé dé bèl ègzanp pou sé frè é sè-la ki pi jenn la. An-nou palé dè ègzanp a sè Lois Didur. I vin pyonyé èspésyal o Kanada, alòskè i té ni yenki 21 an. Aprésa, yo nonmé mari a-y rèsponsab a siwkonskripsyon. Yo rété adan siwkonskripsyon-la pannan kèlkè lanné. Aprésa, yo voyé-yo travay o Kanada adan Bétèl-la. É yo rété la plis ki 20 an. Lois té ni 58 an lèwvwè yo mandé-yo si yo té pé ay travay adan Bétèl a Likrèn. Men, ès yo aksèpté ? Oben, ès yo di kè yo ja two vyé pou yo ay sèvi adan ondòt péyi ? Ében yo aksèpté ay travay an Bétèl-la é yo nonmé John an Komité a filyal-la. 7 an apré, John mò é Lois désidé rété an Bétèl-la. Jòdijou, Lois ni 81 an é i ka pòté bon mannèv adan Bétèl-la toujou. Fanmi a Bétèl a Likrèn enmé-y toubònman.

⁹ Dépawfwa, ni sèwten sè kon Lois, mari a yo té ni rèsponsabilité é pou sèwten adan yo, lèwvwè mari-la ka mò, yo pa’a gè ka sonjé-yo ankò. Men a pa paskè yo pèd mari a yo kè yo pa ni valè pou Jéova. Lèwvwè on sè ka soutyenn mari a-y pannan onpakèt lanné, Jéova kontan toubònman. É lèwvwè i ka kontinyé rété fidèl a Jéova menm lè mari a-y ja mò, pa menm palé ! (1 Tim. 5:3). Anplisdisa, yo ka fè tousa yo pé pou ankourajé sé frè é sè-la ki pi jenn la.

10. Ki bèl ègzanp Tony ka ban-nou ?

¹⁰ Défwa, fanmi a sèwten frè é sè ki ni on bèl laj ka mèt-yo on koté pou yo pran swen a yo. Men menmsi yo adan sé koté-lasa, yo ni onlo valè toubònman. An-nou pran ègzanp a Tony ki ka rété on koté konsa konnyéla la. I pran lèbatèm an Pennsilvani o Zétazini an out 1942 é i té ni 20 an. Tibwen tan apré i pran batèm a-y, yo mandé-y ay lawmé, men konm i pa té dakò, yo mété-y lajòl pannan 2 an-é-dèmi. Li é madanm a-y Hilda lévé 2 timoun adan lavérité. Dépi Tony té adan lavérité, yo té ja nonmé-y siwvéyan-prézidan adan 3 lasanblé diféran (sé konsa yo té ka kriyé koòwdinatè a komité a sé ansyen-la avan) é lèwvwè té ni on lasanblé a siwkonskripsyon, sé-y ki té ka okipé dè sa. I té k’ay adan on lajòl pou fè étid a sèwten prizonyé é i té ka fè sé réinyon-la osi adan lajòl-la. Jòdijou, Tony ni 98 an, men i pa’a mèt an tèt a-y kè i pa bizwen fè éfò ankò kon avan. Okontrè, i ka pòté bon mannèv pou sèvi Jéova é i ka kolaboré èvè sé frè é sè-la ki an lasanblé-la !

11. Lèwvwè nou konnèt frè é sè ki ka viv on koté yo ka pran swen a yo, kijan nou pé montré-yo kè yo ni valè pou nou ?

¹¹ Lèwvwè nou konnèt frè é sè ki ka viv on koté yo ka pran swen a moun ki ja ni on bèl laj, kijan nou pé montré-yo kè yo ni valè pou nou ? Ében, lèwvwè sa posib, sé ansyen-la pé òwganizé-yo pou sé frè é sè-lasa pran réinyon a yo é pou yo pé sa préché osi. Men nou osi nou ni wòl an nou a jouwé. Pa ègzanp, nou pé rann-yo vizit, oben si sa pa posib pétèt kè nou té’é pé palé èvè yo asi Entèwnèt. Sa enpòwtan kè nou montré sé frè é sè-lasa kè yo ni onlo valè pas byen défwa, yo lwen a lasanblé a yo. Dépawfwa, lèwvwè nou ka palé èvè yo, ni sa ki on tijan jenné pou palé dè vi a yo oben pou palé dè sa yo ka rèsanti. Pétèt kè si nou pozé-yo sèwten kèsyon é kè nou pran tan kouté sa yo ka di-nou, sa ké pi fasil pou yo dè rakonté-nou tousa yo ja viv adan òwganizasyon a Jéova.

12. Ka nou pé touvé adan lasanblé an nou ?

¹² Pétèt kè adan lasanblé an nou, sèwten frè é sè ki ja ni on bèl laj sé dé bèl trézò toubònman é nou pa menm sav sa. An-nou palé dè Harriette, on sè ki té fidèl é ki té ka viv o New Jersey o Zétazini. Apré i rété pannan plizyè lanné adan menm lasanblé-la, i déménajé pou ay viv aka fi a-y. I touvé-y adan on nouvo lasanblé é moun a lasanblé a-y pran tan pou aprann konnèt-li. É ka yo dékouvè ? On bèl trézò toubònman. Harriette rakonté-yo sa i viv lèwvwè i té ka préché adan lézanné 1920. Sa ankourajé-yo toubònman. An tan-lasa, i toujou té ka maché èvè on bwòs-a-dan asi-y pas yo té pé mété-y lajòl a nenpòt ki moman. É sé sa ki fèt. Pas an 1933, i fè 2 koud lajòl é i rété on simenn a chakfwa. Menmsi mari a-y pa té Témwen, lèwvwè Harriette té lajòl, i toujou té ka soutyenn-li é i té ka okipé dè 3 timoun a yo. Vréman, nou pé di kè frè é sè ki ni on bèl laj é ki fidèl kon Harriette ni onlo valè toubònman !

13. Adan òwganizasyon an nou, nou ni frè é sè ki ni on bèl laj. Ki valè yo ni pou nou ?

¹³ Frè é sè an nou ki ja ni on bèl laj ni onlo valè pou Jéova é onlo valè pou òwganizasyon a-y pas sé dé moun ki ja vwè jan Jéova béni òwganizasyon a-y, é jan Jéova ja aji an vi a yo. Sé vré, yo fè érè men sa aprann-yo onlo biten. Lèwvwè nou ka vwè-yo, nou pé di kè sajès ka koulé kon dlo asi yo (Pwov. 18:4). Alò, an-nou pwofité dè bèl èkspéryans a yo. Siwvwè nou pran on ti tan pou aprann konnèt-yo, fwa an nou ké vin pi fò é yo ké aprann-nou onlo biten.

SA FRÈ É SÈ AN NOU PÉ APRANN-NOU

14. Détéwonòm 32:7 ka ankourajé sé frè é sè-la ki pi jenn la fè on biten. Ki biten ésa ?

¹⁴ Fò pa nou atann kè frè é sè an nou ki ja ni on bèl laj vin palé èvè nou, fò-nou ay palé èvè yo (li Détéwonòm 32:7). Pétèt kè yo pa’a byen vwè klè ankò, kè yo pé pa maché vit kon avan é kè lè yo ka palé, vwa-la pa gè ka sòti byen kon avan. Men yo ka fè tousa yo pé pou fè Jéova plézi. Kifè, pou Jéova yo ni on ‘bèl répitasyon’ (Ékl. 7:1). Alò, an-nou sonjé pou kibiten Jéova enmé-yo é an-nou kontinyé ba-yo valè. An-nou fè kon Élizé. Dènyé jou-la Éli pasé la èvè Élizé, Élizé fè ansòt pou rété èvè-y. A 3 rèpriz, mi sa Élizé di-y : « An pé’é lagé-w » (2 Wa 2:2, 4, 6).

15. Ki kèsyon nou té’é pé pozé frè é sè an nou ki ni on bèl laj ?

¹⁵ Nou ké montré frè é sè an nou ki ja ni on bèl laj kè yo ni onlo valè pou nou si nou ka pozé-yo dé ti kèsyon pou konnèt-yo pibyen. Men nou ké fè sa jantiman (Pwov. 1:5 ; 20:5 ; 1 Tim. 5:1, 2). Pa ègzanp, nou pé mandé-yo : « Lè ou té pli jenn, kijan ou té sèten kè ou té adan lavérité ? Ka ou viv ki fè-w vin pibon zanmi èvè Jéova ? Ka ki édé-w sèvi Jéova èvè tchè-kontan tout vi a-w ? » (1 Tim. 6:6-8). Aprésa, lèwvwè yo ka rakonté-nou istwa a yo, fò nou pran tan kouté-yo.

16. Lèwvwè frè é sè ki ja ni on bèl laj ka palé èvè frè é sè ki pi jenn, ka sa ka pòté dè bon pou yo ?

¹⁶ Si ou ka pran tan kozé èvè on frè oben on sè ki ja ni on bèl laj, sa ka fè-zòt toulédé dibyen (Wom. 1:12). Vou, ou ké rann-vou kont kè Jéova ka béni sèwvitè a-y ki fidèl, é frè-la oben sè-la ki ja ni bèl laj la ké vwè jan lézòt enmé-y. Ou pé sèten kè i ké kontan rakonté-w jan Jéova ja béni-y an vi a-y.

17. Poukwa pi tan ka pasé é pi on moun ki ja ni on ti laj ka vin bèl ?

¹⁷ Lè nou jenn, nou bèl men èvè laj-la, piti-a-piti sa ka disparèt. Men pou Jéova, pi on sèwvitè a-y ka pran laj é pi i ka vin bèl (1 Tés. 1:2, 3). Poukwa nou ka di sa ? Pas pi tan-la ka pasé, pi i ka lésé lèspri sen a Jéova aji anlè-y pou i pé sa ni dé bèl kalité. Sé pousa, fò nou aprann konnèt frè é sè an nou é fò nou ba-yo onlo valè. É si nou fè sa, nou ké rann-nou kont kè yo ni plis valè ki lò !

18. Ka nou ké vwè adan awtik-la ki ka vin la ?

¹⁸ Adan lasanblé-la ni frè é sè ki pi jenn, men ni frè é sè ki ja ni on bèl laj osi. Lè yonn ka montré lòt kè i enmé-y, sa ka fè lasanblé-la dibyen. Adan awtik-la ki ka vin la, nou ké vwè kijan frè é sè an nou ki ja ni on bèl laj pé montré frè é sè ki pi jenn kè yo enmé-yo.