BIBLIYOTÈK ANLÈ ENTÈWNÈT a Lawatchtower
Lawatchtower
BIBLIYOTÈK ANLÈ ENTÈWNÈT
Kréyòl Gwadloup
ò
  • ò
  • Ò
  • È
  • É
  • LABIB
  • PIBLIKASYON
  • RÉINYON
  • w21 sèptanm p. 26-31
  • Lè on moun nou enmé ka lagé Jéova

Pa ni pon vidéo disponib pou sa ou chwazi la.

Èskizé, ni on pwoblèm, pa ni mwayen gadé vidéo-la.

  • Lè on moun nou enmé ka lagé Jéova
  • Tou dè Gad la ka bay lavwa asi Wayòm a Jéova (pou étidyé) 2021
  • Soutit
  • Asi menm sijé-la
  • PA DI KÈ SÉ FÒT A-W
  • KA OU PÉ FÈ POU FWA A-W RÉTÉ SOLID
  • SA LASANBLÉ-LA PÉ FÈ
  • PA PÈD ÈSPWA É KONTINYÉ FÈ JÉOVA KONFYANS
  • Lanmou an nou pou Jéova lontan pli fò ki lanmou pou fanmi an nou
    Vi é ministè a on krétyen—Kayé pou réinyon-la, 2020
  • Nou ka montré nou ni lanmou lè nou ka soutyenn disiplin a Jéova
    Vi é ministè a on krétyen—Kayé pou réinyon-la, 2020
Tou dè Gad la ka bay lavwa asi Wayòm a Jéova (pou étidyé) 2021
w21 sèptanm p. 26-31

AWTIK POU ÉTIDYÉ 39

Lè on moun nou enmé ka lagé Jéova

« A pa onsèl fwa yo fè-y lapenn » (SÒM 78:40).

KANTIK 102 « Venons en aide aux faibles »

ON TI LIDÉ ASI SA NOU KAY VWÈa

1. Ka sèwten moun ka rèsanti lèwvwè yo èskominyé on moun yo enmé ?

ÈS YO èskominyé on moun kè ou enmé ? Si sé sa, pétèt kè sé on biten ki rèd toubònman pou-w ! Mi sa on sè non a-y sé Hildab ka rakonté : « Sa té ka fè 41 an nou té mayé lèwvwè mari an mwen vin mò. Mésyé sa té rèd ! Men an pa jen konpranndèdi an té’é viv on biten ki té pi rèd ki sa ankò. É sé sa ki rivé lèwvwè gason an mwen lagé lavérité é lésé madanm a-y é timoun a-y. Tala té rèd menm ! »

On papa ka kité kaz a-y èvè valiz a-y an men a-y. Manman-la ka séré 2 timoun a-y an bra a-y pannan yo ka pléré.

Lè on moun an fanmi an nou ka lagé lavérité, Jéova sav jan sa ka fè-nou mald (gadé sé paragraf 2 é 3 la).

2-3. Dapré Sòm 78:40, 41, ka Jéova ka rèsanti lè on sèwvitè a-y ka lagé-y ?

2 Sé zanj-la ka fè pawti a fanmi a Jéova. Ès ou ja imajiné jan sa dwèt fè-y lapenn lè sèwten adan yo lagé-y ? (Jid 6). É sé Izraélit-la aprézan ? Sé té pèp a Bondyé é i té enmé-yo fò, men yo ba-y do a plizyè rèpriz. Ou ka imajiné jan sa fè-y mal ! (li Sòm 78:40, 41). Menmjan-la, lè on moun nou enmé ka lagé Jéova, sa ka fè-y lapenn toubònman osi. Ou pé sèten kè i ka konprann sa ou ka rèsanti é kè i ké fè sa ki fo pou ankourajé-w é pou soutyenn-vou.

3 Adan awtik-lasa, nou ké vwè ka nou pé fè pou Jéova pé sa édé-nou siwvwè yo èskominyé on moun an fanmi an nou. Nou ké vwè osi ka nou pé fè pou édé frè é sè an nou ki ka jwenn sitiyasyon-lasa adan lasanblé-la. Pou nou koumansé, an-nou vwè ki mové lidé fò pa nou lésé rantré an tèt an nou.

PA DI KÈ SÉ FÒT A-W

4. Lèwvwè timoun a yo ka lagé Jéova, ka onlo paran ka rèsanti ?

4 Lèwvwè tifi a yo oben tigason a yo ka lagé Jéova, sèwten paran ka mèt an tèt a yo kè yo pa fè asé pou édé timoun a yo kontinyé sèvi Jéova. Lè yo èskominyé gason a Luke, mi sa i rèkonnèt : « An té ka di kè si sa rivé sé fòt an mwen. An jous té ka fè vyé rèv, é dépawfwa, an té ka pléré tèlman an té dézèspéré. » Elizabeth osi viv on sitiyasyon kon tala. Souvantfwa, i té ka di an tchè a-y : « An pa on bon manman é an pa fè asé pou édé timoun an mwen konnèt Jéova. »

5. Lèwvwè on moun ka lagé Jéova, sé fòt a kimoun ?

5 On biten pou nou pa jen oubliyé, sé kè Jéova fè-nou on bèl kado toubònman : nou lib dè chwazi sa nou vé fè. Kifè, nou pé chwazi sèvi Bondyé men nou pé désidé osi kè nou vé pa sèvi-y. Ni sèwten paran ki pa ba timoun a yo on bèl ègzanp men sé timoun-la désidé kè yo ké sèvi Jéova é kè yo ké rété fidèl a-y. Ni dòt paran aprézan ki fè tousa yo té pé pou fè timoun a yo enmé Jéova men apapousa sé timoun-la kontinyé sèvi Jéova. Anfinaldikont, sé chakmoun ki ka désidé si i ké sèvi Jéova (Joz. 24:15). Alò léparan, si zò ka soufè é kè zò ka di kè sé fòt a zòt si timoun a zòt lagé Jéova, woté sa an lèspri a zòt !

6. Ka on timoun ka rèsanti lèwvwè pap’a-y oben manman-y ka lagé Jéova ?

6 Dépawfwa, sé on manman oben on papa ki ka lagé lavérité, é défwa, i ka jous lésé fanmi a-y (Sòm 27:10). Sa pé fè sé timoun-la soufè toubònman pas manman-yo oben pap’a-yo sé on ègzanp pou yo. Yo èskominyé papa Esther é mi sa i ka rakonté : « An té ka pléré onlo pas an rann-mwen kont kè non sèlman papa pa té bon zanmi èvè Jéova ankò, men i té désidé ba Jéova do. An enmé pap’an-mwen, kifè, lèwvwè yo èskominyé-y, an té toujou enkyèt pou-y. Sa té ka angwasé-mwen bon angwasé la ! »

7. Lèwvwè fanmi a on jenn lagé lavérité, ka Jéova ka rèsanti pou jenn-lasa ?

7 Jenn an nou, si yo èskominyé manman-zòt oben pap’a-zòt, fò zò sav kè sa ka fè-nou lapenn toubònman, pas nou sé frè é sè a zòt. É zò pé sèten kè Jéova ka konprann tousa zò ka rèsanti. I enmé-zòt é i kontan vwè kè zò ka tchenbé ! Tout frè é sè a zòt adan lasanblé-la ka rèsanti menm biten-la osi. On biten pou zò pa jen oubliyé sé kè a pa fòt a zòt si manman-zòt oben pap’a-zòt lagé lavérité ! Kon nou sòti vwè-y, Jéova ban-noutout dwa chwazi sa nou vé fè. É lèwvwè on moun ba Jéova vi a-y é kè i pran lèbatèm, sé-y ki ka ‘pòté chaj a-y’ (Gal. 6:5).

8. Ka fanmi a on moun ki èskominyé pé fè toupannan i ka atann kè moun-lasa viré ? (gadé ti karé-la « Wouvin an 2 bra a Jéova »).

8 Si yo èskominyé on moun kè ou enmé, sa toutafè nòwmal kè ou èspéré kè on jou, i wouvin an 2 bra a Jéova. Toupannan ou ka atann kè i viré, ka ou pé fè ? Fè tousa ou pé pou fwa a-w rété solid. Konsa, sa ké ba sélézòt moun-la ki an fanmi a-w la on bèl ègzanp é pétèt kè sa ké édé moun-la ki èskominyé la osi. Sa ké ba-w fòs osi pou ou pé sa andiré. Alò, ka ou pé fè pou fwa a-w rété solid ?

Wouvin an 2 bra a Jéova

On bèwjé ka pòté on timouton an bra a-y èvè onlo tandrès.

Mi sa on manman ka di :« Yo èskominyé gason an mwen é sa Izayi 55:7 ka di, sé sa an té’é swété pou-y. Mi sa vèwsé-lasa ka di : “Fò i wouvin owa Jéova, é i ké pran penn a-y, fò i wouvin owa Bondyé an nou, pas i ké padoné anplen.” » Si ou lagé Jéova, pi ou ké viré bonnè owa-y, pi ou ké ni tchè-kontan. Lè nou ka gadé sa ki ka pasé adan mond-lasa, nou ka rann-nou kont kè Awmagédon toupré rivé é nou pa ni pon dout asi sa. Anplisdisa, nou pé pèd vi an nou a nenpòt ki moman. Pa oubliyé : jòdla ou la dèmen ou pa la (Jak 4:13, 14).

Mi sa bwochi-la Reviens à Jéhovahc ka di : « Si ou ka fè éfò pou viré an 2 bra a Jéova, ou pé sèten kè i ké soutyenn-vou. I ké édé-w rivé about a sa ki ka fè-w pè, i ké édé-w padoné moun ki fè-w ditò, i ké trankilizé lèspri a-w é i ké ba-w on konsyans ki nèt. Sèten sa ké ba-w anvi woukoumansé sèvi Jéova èvè frè é sè a-w » (1 Pyè 2:25).

c Sé Témwen a Jéova ki ka pwodui bwochi-lasa é ou ké touvé-y asi jw.org an plizyè lang.

KA OU PÉ FÈ POU FWA A-W RÉTÉ SOLID

9. Ka ki pé édé-nou pou fwa an nou rété solid ? (gadé ti karé-la « Déotwa vèwsé ki ka ba on moun fòs lè yo èskominyé on moun i enmé »).

9 Fè tousa ou pé pou ou kontinyé ni on fwa ki solid. Sa enpòwtan kè ou kontinyé fè sa pou vou, men sa enpòwtan kè ou édé fanmi a-w osi kontinyé ni on fwa ki solid. Men kijan ou pé fè sa ? Si ou ka pran labitid li Pawòl a Bondyé é médité anlè-y, é si ou ka kontinyé vin an réinyon, Jéova ké ba-w fòs. An-nou palé dè Joanna. Pap’a-y é sè a-y lagé Jéova. Mi sa i ka èspliké : « Lè an ka li Labib é kè an ka li istwa a moun kon Abigayil, Èstè, Jòb, Jozèf oben Jézi, sa ka trankilizé-mwen. Ègzanp a yo ka ankourajé-mwen é sa ka édé-mwen rété pozitif. É lè an ka kouté chanson an nou, sa ka fan’an dibyen osi. »

Déotwa vèwsé ki ka ba on moun fòs lè yo èskominyé on moun i enmé

  • Sòm 30:10

  • Sòm 34:4, 6, 18, 19

  • Sòm 39:12

  • Sòm 61:1, 2

  • Sòm 94:17-19

  • Éfézyen 3:20

  • Filipyen 4:6, 7

10. Kijan Sòm 32:6-8 ka édé-nou lèwvwè nou ka santi-nou tris ?

10 Di Jéova tousa ki ka enkyété-w. Lè ou ka santi-w tris, priyé, priyé é priyé ankò. Sipliyé Pap’an-nou ki plen lanmou é mandé-y édé-w vwè sitiyasyon-la kon li i ka vwè-y. Mandé-y osi pou i pé sa « fè-w konnèt ki chimen pou-w pran » (li Sòm 32:6-8). Sé vré sa pé rèd toubònman pou-w dè di Jéova sa ou ka rèsanti vréman, men ou pé sèten kè i ka konprann ègzaktèman sa ou ka rèsanti. I enmé-w onlo menm, é i ka mandé-w di-y sa ou ni anfon a tchè a-w (Ègz. 34:6 ; Sòm 62:7, 8).

11. Dapré Ébré 12:11, lè Jéova ka korijé on moun, poukwa fò-nou fè-y konfyans ? (gadé ti karé-la « Lè yo ka èskominyé on moun : on dispozisyon ki ka montré kè Jéova enmé-nou »).

11 Soutyenn désizyon a sé ansyen-la. Lè sé ansyen-la ka èskominyé on moun, yo ka fè sa pas sé Jéova ki mèt dispozisyon-lasa anplas. Lè Jéova ka korijé on moun ki péché, i ka fè-y pas i enmé-y. I ka fè sa pou édé moun-la é pou édé tout lasanblé-la osi (li Ébré 12:11). Dépawfwa, sa pé rivé kè sèwten moun adan lasanblé-la ka kritiké jan-la sé ansyen-la réglé pwoblèm-la. Men pli souvan ki rarman, sé moun-lasa pa’a di tout sé mové biten-la moun-la fè la. Men fò-nou sonjé kè lè on biten konsa ka fèt, nou pa ni tout sé détay-la. Sé ansyen-la ka fè éfò pou mèt sé prensip-la ki an Bib-la an pratik é yo ka fè éfò pou jijé « pou Jéova » osi. Fò pa nou ni pon dout asi sa ! (2 Kron. 19:6).

Lè yo ka èskominyé on moun : on dispozisyon ki ka montré kè Jéova enmé-nou

Poukwa nou pé di kè lè yo ka èskominyé on moun sé on dispozisyon ki ka montré kè Jéova enmé-nou ?

  1. 1. Sé ansyen-la ka fè tousa yo pé pou édé on moun ki fè on péché ki grav. Yo ka fè sa pas yo enmé moun-lasa. Yo ka èskominyé on moun sèlman si i fè on péché ki grav é kè i vé pa rèpanti-y (Ébr. 12:7, 9-11).

  2. 2. Lè yo ka èskominyé on moun, sa ka pwotéjé lasanblé-la. Lèwvwè on moun péché é kè i vé pa rèpanti-y, i ka touvé-y kon on moun ki trapé on maladi é pou i pa ba dòt moun maladi-lasa, fò-yo mèt moun-lasa apa (1 Kor. 5:6, 7, 11-13).

  3. 3. Lè yo ka èskominyé on moun, sa pé édé-y rèpanti-y. Onlo moun rann-yo kont kè yo fè on péché ki grav lè yo èskominyé-yo, é aprésa, yo fin pa viré an 2 bra a Jéova (Lik 15:11-24).

  4. 4. Lè on moun ki fè on péché ki grav ka rèpanti-y é ka viré an 2 bra a Jéova, ni onlo jwa an syèl-la é tout lasanblé-la ka kontan pas i viré (Lik 15:7).

12. On frè é madanm a-y koupé lépon èvè gason a yo pou soutyenn dispozisyon a Jéova. Ki byenfé sa pwokiré-yo ?

12 Si yo èskominyé on moun an fanmi a-w, ou pé édé moun-lasa wouvin an 2 bra a Jéova si ou ka soutyenn désizyon-la sé ansyen-la pran la. Talè la nou palé dè Elizabeth. Gason a-y té ja grannonm lèwvwè yo èskominyé-y. Mi sa i ka di : « Sa té rèd pou mwen pas fò an té koupé lépon èvè-y. Men lèwvwè i wouvin a Jéova, limenm di kè yo té èskominyé-y pas i té mérité sa. Aprésa, i di kè sa i rivé-y la sèvi-y lèson. Sa montré-mwen kè lè Jéova ka korijé on moun, i toujou ni rézon. » Mi sa Mark, mari a-y, ka ajouté : « Kèlkè tan apré, gason an nou di-mwen kè si i wouvin an 2 bra a Jéova, sé siwtou pas nou té fè ègzaktèman sa Jéova té di-nou fè. A pa ti kontan an kontan Jéova édé-nou obéyi. »

13. Ki biten ki pé fè-w dibyen ?

13 Palé èvè déotwa zanmi ki pé konprann sa ou ka rèsanti. Sèwten frè é sè ki byen doubout adan lavérité pé édé-w pou ou pa pèd èspwa. Éséyé pasé tibwen tan èvè yo (Pwov. 12:25 ; 17:17). Talè la nou palé dè Joanna, mi sa i ka di : « Anfon a tchè an mwen, an té ka santi-mwen tousèl. Men an té ni déotwa bon zanmi é an té ka fè-yo konfyans. Lèwvwè an palé èvè yo, sa fè-mwen dibyen toubònman. » Men vinvwè ni sèwten moun adan lasanblé-la ki ka di-w dé biten ki ka fè-w pi mal ankò, ka pou ou fè ?

14. Poukwa « fò yonn kontinyé sipòté lòt é fò yonn kontinyé padoné lòt volontyé » ?

14 Fò-nou ni pasyans èvè frè é sè an nou. Yotout pa oblijé réyaji byen konm i fo (Jak 3:2). Alò, fò pa sa étoné-w si sèwten moun pa sav ka pou yo di-w oben si yo ka di-w dé biten ki ka fè-w mal. Yo pa’a fè sa pa èspré ! Pa oubliyé konsèy-la Pòl ka ban-nou la. Mi sa i ka di : « Menmsi on moun ni on rézon dè plenn-li dè ondòt moun, fò yonn kontinyé sipòté lòt é fò yonn kontinyé padoné lòt volontyé » (Kol. 3:13). Yo èskominyé on moun an fanmi a on sè, é mi sa i ka èspliké : « Frè é sè an mwen té vlé fan’an dibyen, men dépawfwa, sa yo té ka di-mwen la té ka fan’an mal. Men Jéova édé-mwen padoné-yo. » Konnyéla, an-nou vwè ka lasanblé-la pé fè pou édé fanmi a on moun yo èskominyé é ki ka kontinyé rété fidèl a Jéova.

SA LASANBLÉ-LA PÉ FÈ

15. Kijan nou pé édé fanmi a on moun yo sòti èskominyé ?

15 Fò ou janti èvè fanmi a on moun yo èskominyé é fò ou montré-yo kè ou enmé-yo. Lèwvwè yo èskominyé frè a Miriam, i té on ti jan pè ay réinyon. Mi sa i ka di : « An té pè tann sa sé frè é sè-la té’é di. Men an rann-mwen kont kè sa an té ka viv té ka fè onlo frè é sè lapenn. Yo pa jen malpalé frè an mwen, kifè, grasa yo an pa jen santi-mwen tousèl. » Mi sa ondòt sè ka di : « Lèwvwè yo èskominyé gason an nou, ni onlo zanmi ki vin konsolé-nou. Ni sèwten ki di-nou kè yo pa té sav ka pou yo té di-nou men yo pléré èvè nou é yo ékri dé ti mo ban-nou. Tousa yo fè la fè-nou dibyen toubònman. »

16. Kijan lasanblé-la pé kontinyé édé fanmi a on moun yo èskominyé ?

16 An-nou kontinyé ankourajé fanmi a moun yo èskominyé é ki ka kontinyé sèvi Jéova. Sé a moman-lasa kè yo bizwen kè nou montré-yo kè nou enmé-yo é kè nou ankourajé-yo (Ébr. 10:24, 25). Défwa, ni sèwten adan yo ki ni lenprésyon kè sèwten moun adan lasanblé-la vé pa frékanté-yo ankò konsi sé yo yo té èskominyé. Fò pa nou janmé lésé sa rivé ! Ni sèwten jenn, paran a yo lagé Jéova. Sé jenn-lasa bizwen kè yo ankourajé-yo é kè yo félisité-yo toubònman. An-nou palé dè on sè non a-y sé Maria. Yo èskominyé mari a-y, mari-la pati é i lésé-y tousèl èvè timoun a-y. Mi sa i ka rakonté : « An ni déotwa zanmi ki té ka vin akaz, yo té ka fè manjé pou nou é yo té ka édé-mwen fè étid familyal la. Yo té ka konprann doulè an mwen é yo té ka pléré èvè mwen. É lèwvwè sèwten moun té ka di dé biten ki pa vré asi mwen, yo té ka pran défans an mwen. Sa té ka fè-mwen dibyen toubònman. » (Wom. 12:13, 15).

Manman-la èvè 2 timoun a-y é yo ka akéyi 2 ansyen ki vin vwè-yo akaz a yo.

Lè sé frè é sè-la ka édé fanmi a moun yo èskominyé, sa ka montré fanmi-lasa kè lasanblé-la enmé-ye (gadé paragraf 17 la).

17. Ka sé ansyen-la pé fè pou konsolé sé frè é sè-la ki ka soufè adan lasanblé-la ?

17 Frè an nou ki ansyen adan lasanblé-la, pwofité dè tout lokazyon zò ni pou zò pé sa ankourajé séla ki ka kontinyé sèvi Jéova magré yo ni on moun ki èskominyé adan fanmi a yo. Sé zòt an prèmyé Jéova ka mandé pou konsolé-yo (1 Tés. 5:14). Pran on ti tan pou palé èvè yo avan é apré sé réinyon-la. Pasé vwè-yo akaz a yo é priyé pou yo. Pran on ti tan pou préché èvè yo é dè tanzantan envité-yo adan étid familyal a zòt. Sa enpòwtan toubònman kè sé ansyen-la pran swen a ti mouton a Jéova ki ka soufè. Fò-yo aji èvè konpasyon épi yo é fò-yo montré-yo kè yo enmé-yo (1 Tés. 2:7, 8).

PA PÈD ÈSPWA É KONTINYÉ FÈ JÉOVA KONFYANS

18. Dapré 2 Pyè 3:9, lè on moun arété sèvi-y, ka Bondyé anvi moun-lasa fè ?

18 Jéova « vé pa ponmoun détwi, men i vé kè toutmoun rivé rèpanti » (li 2 Pyè 3:9). Menmsi on moun fè on péché ki grav, pou Jéova, vi a-y ni onlo valè. Enn gadé : pou woté-nou anba jouk a péché-la é anba jouk a lanmò sa kouté-y chè pas i bay vi a pwòp Gason a-y an ranson magré i té enmé-y fò ! Èvè konpasyon, Jéova ka fè tousa i pé pou édé sé moun-la ki péché la viré owa a-y. I ka èspéré kè yo ké wouvin an 2 bra a-y é sé sa ègzanp a gason-la ki té pèd la ka montré-nou (Lik 15:11-32). Onlo moun ki té lagé Jéova wouvin kèlkè tan apré an bra a Pap’a yo ki an syèl-la é ki enmé-yo é frè é sè a yo adan lasanblé-la té kontan akéyi-yo. Talè la nou palé dè Elizabeth. I té kontan toubònman lèwvwè gason a-y wouvin a lavérité. Péryòd-lasa pa té fasil, men lè i ka sonjé sa, mi sa i ka di : « An ni onlo rèkonésans pou tout sé frè é sè-la ki ankourajé-mwen la mwen pa té pèd èspwa. »

19. Poukwa nou pé toujou fè Jéova konfyans ?

19 Nou pé fè Jéova konfyans a san pou san. I pé’é jen mandé-nou fè on biten ki ké fè-nou ditò. Sé on Papa ki donan é i ni onlo konpasyon. I enmé moun ki enmé-y é ki ka sèvi-y. Kèlkèswa difikilté-la ou ka jwenn la, ou pé sèten i pé’é janmé lagé-w (Ébr. 13:5, 6). Sé sa Mark nou palé dè-y talè la ka di : « Lèwvwè nou jwenn difikilté, Jéova pa jen lagé-nou. I toujou édé-nou. » Jéova ké kontinyé ba-w « puisans-la ki ka dépasé sa ki nòwmal » (2 Kor. 4:7). Wi, ou pé rété fidèl menmsi on moun an fanmi a-w lagé lavérité. Ou pé kontinyé èspéré osi kè moun-lasa ké viré an 2 bra a Jéova.

KA SÉ VÈWSÉ-LASA APRANN-VOU ?

  • Sòm 78:40, 41.

  • Sòm 32:6-8.

  • Ébré 12:11.

KANTIK 44 Prière du petit

a Lè on moun nou enmé ka lagé Jéova, sa ka fè-nou lapenn toubònman. Adan awtik-lasa nou ké vwè ka Jéova ka rèsanti lè on moun ka lagé-y. Nou ké vwè osi ka moun a fanmi a moun-la yo èskominyé la pé fè pou yo pé sa andiré é pou yo pé sa kontinyé ni on fwa ki solid. É pou fin, nou ké palé dè sa toutmoun an lasanblé-la pé fè pou konsolé é pou soutyenn fanmi a moun-lasa.

b Yo chanjé sèwten non.

d SA NOU KA VWÈ ASI SÉ IMAJ-LA : On frè lagé Jéova é i lésé madanm a-y é timoun a-y. Fanmi a-y ka soufè bon soufè la.

e SA NOU KA VWÈ ASI SÉ IMAJ-LA : 2 ansyen k’ay aka on fanmi pou ankourajé-yo.

    Piblikasyon an kréyòl Gwadloup (2015-2025)
    Dékonèkté-w
    Konèkté-w
    • Kréyòl Gwadloup
    • Pawtajé
    • Sa ou préféré
    • Copyright © 2025 Watch Tower Bible and Tract Society of Pennsylvania
    • Règ pou itilizé sit-la
    • Règ asi sa ki konfidansyèl
    • Réglaj pou sa ki konfidansyèl
    • JW.ORG
    • Konèkté-w
    Pawtajé