An-nou lésé la bonté dirijé vi an nou

LISAa palé dè sa ki ba-y anvi vin a lavérité. Mi sa i di : « Lè an vwè jan sé frè é sè a lasanblé-la té janti, sa touché-mwen toubònman. » On sè, non a-y sé Anne di tibwen menm biten-la. Mi sa i di : « Odépa, a pa sa sé Témwen-la té ka anségné ki ban-mwen anvi konnèt lavérité, men sé jantiyès a yo. » Konnyéla la, sé 2 sè-lasa enmé li Labib é yo enmé médité anlè-y osi, men odépa sa ki touché-yo plis, sé jantiyès a sé frè é sè la.

Kijan nou pé aji èvè jantiyès èvè moun ki alantou an nou pou nou ankourajé-yo ? An-nou vwè 2 mannyè nou pé fè sa. Prèmyèwman, lè nou ka palé é dézyèmman, lè nou ka aji. Aprésa, nou ké vwè èvè kimoun pou nou aji èvè jantiyès.

AN-NOU « PALÉ ÈVÈ ONLO BONTÉ »

An pwovèb chapit 31, yo ka palé dè on bon madanm ki ka « palé èvè onlo bonté » (Pwov. 31:26). I ka aji èvè jantiyès adan tousa i ka di é adan tousa i ka fè. Fò sé papa-la fè menm biten osi lèwvwè yo ka palé ba timoun a yo. Lamajorité a sé paran-la sav byen kè lè yo ka palé rèd ba timoun a yo, sa pé fè sé timoun-la ditò é yo pa oblijé tchenn kont dè sa paran a yo ka di-yo. Men pawkont, lèwvwè sé paran-la ka palé èvè jantiyès ba timoun a yo, sa ké pli fasil pou sé timoun-la kouté-yo é fè sa yo ka mandé-yo fè.

Ki zò ni timoun, ki zò pa ni timoun, ka zò pé fè pou aprann palé jantiman ? Nou ka touvé on ti lidé adan prèmyé pawti a Pwovèb 31:26. I ka di : « Lè i ka palé, i ka montré kè i ni sajès. » Sa vlé di kè fò pa nou palé nenpòt kijan é kè fò pa nou di nenpòt kibiten nonplis. Avan nou palé, sa té’é byen si nou té ka mandé-nou : « Ès sa an kay di la pé’é fè sé moun-la ki ka kouté-mwen la fè kòlè oben ès sa ké mèt lapé ? » (Pwov. 15:1). Wi, nou ka montré kè nou ni sajès lè nou ka réfléchi avan nou palé.

Mi sa ondòt vèwsé a Pwovèb ka di : « Pawòl moun ka di san réfléchi ka touvé-yo kon koudépé » (Pwov. 12:18). Sa nou ka di on moun é jan-la nou ka palé ba-y la pé fè-y mal, alò lè nou ka pran tan réfléchi asi sa, sa pé pousé-nou fè atansyon a sa nou ka di. Wi, lè nou ka fè éfò pou nou « palé èvè onlo bonté », nou pé ké palé on mannyè ki rèd é nou pé ké di ponmoun on biten pou nou fè-y mal (Éféz. 4:31, 32). Olyé nou palé on mannyè ki négatif, nou ké di dé biten ki janti, nou ké palé on mannyè ki pozitif é nou ké fè sa èvè onlo lanmou. É jistèman, Jéova ka ban-nou on bèl ègzanp adan domenn-lasa. Lèwvwè Éli té pè, Jéova rasiré-y é i sèvi èvè on zanj pou fè sa. Zanj-la palé èvè ‘on vwa kalm é i palé touba ba-y’ (1 Wa 19:12). Men lè nou ni bonté, sa vlé pa di kè sé yenki palé nou ka palé èvè jantiyès, men fò-nou montré sa adan aksyon an nou osi. Kijan nou pé fè sa ?

LÈ NOU KA AJI ÈVÈ BONTÉ, SA KA BA LÉZÒT BALAN

Nou ka imité Jéova lèwvwè nou ka palé èvè jantiyès é lèwvwè nou ka aji èvè jantiyès osi (Éféz. 4:32 ; 5:1, 2). Talè la nou palé dè Lisa, é i rakonté jan sé Témwen-la montré-yo janti èvè-y. Mi sa i di : « On jou, lèwvwè fanmi an nou té oblijé déménajé é kè nou pa té ni onlo tan pou fè sa, 2 fanmi adan lasanblé-la pozé déotwa jou konjé adan travay a yo, pou yo té pé sa édé-nou mèt zéfé an nou an kawton. A moman-lasa, an po’o menm té ka étidyé Labib ! » Lèfètkè yo montré-yo janti konsa èvè Lisa, sa ba-y anvi konnèt lavérité.

An koumansman a awtik-la nou palé dè Anne. Li osi té ni onlo rèkonésans pou sé Témwen-la pas yo aji èvè onlo jantiyès épi-y. Mi sa i ka di : « An té ni dimal a fè moun konfyans akòz dè jan sé moun-la ki té alantou an mwen la té ni labitid aji. » Mi sa i ka di apré : « Lèwvwè an jwenn sé Témwen-la, an pa té ka fè-yo konfyans nonplis. An mandé-mwen : “Men poukwa yo ka entérésé-yo a mwen ?” Men lè an vwè jan moun-la ki té ka étidyé Labib èvè mwen la té janti, an koumansé fè-y konfyans. » Ki bon biten sa pòté ? Mi sa i ka di : « Tibwen tan apré, an koumansé konsantré-mwen asi sa an té ka aprann adan étid an mwen. »

On biten nou ka rèmawké, sé kè, sé lèwvwè Lisa é Anne vwè kijan sé frè é sè la té janti é kijan yo té ni lanmou, kè sa touché-yo toubònman é kè sa ba-yo balan pou aprann konnèt Jéova. Lèfètkè sé frè é sè la té janti, sé sa ki édé Lisa é Anne ni konfyans an Jéova é ni konfyans an pèp a-y.

AN-NOU IMITÉ BONDYÉ É AN-NOU AJI ÈVÈ JANTIYÈS ÉPI LÉZÒT

Pou sèwten moun sa pi fasil dè palé ba lézòt èvè jantiyès oben dè souri ba-yo parapòt a koté-la yo grandi la oben parapòt a édikasyon a yo. Sa bèl lè on moun ka aji konsa pas sé konsa yo lévé-y oben pas sé konsa pèwsonalité a-y yé. Men si sé yenki sé biten-lasa ki ka pousé-nou aji konsa, sa pé vlé di kè nou pa ka imité Bondyé (gadé Akt 28:2).

Vré bonté-la ka vin dè Bondyé é i ka fè pawti dè fwi a lèspri sen a-y (Gal. 5:22, 23). Donk, pou nou pé sa aji èvè kalité-lasa, fò-nou lésé lèspri sen a Bondyé aji asi mantalité an nou é asi jan nou ka aji. Lè nou ké fè sa, nou ké montré kè nou ka imité Jéova é Jézi. Menmjan ki Jézi, nou ka fè tousa nou pé pou nou montré lézòt kè yo ni valè pou nou. Konsa, nou ké montré kè sé pas nou enmé Jéova é pas nou enmé pwochen an nou kè nou ka aji èvè bonté. Si nou fè sa, pli tan ké ka pasé é pli nou ké aji èvè bonté pas sé an tchè an nou sa ké ka sòti é sa ké ka fè Bondyé plézi.

ÈVÈ KIMOUN POU NOU AJI ÈVÈ BONTÉ ?

Lèwvwè nou ka aji épi bonté èvè moun ki janti èvè nou é èvè moun nou konnèt, sa toutafè nòwmal (2 Sam. 2:6). Nou ka fè sa pas nou ni rèkonésans pou yo (Kol. 3:15). Men vinvwè kè nou ka tonbé asi on moun é kè pou nou, moun lasa pa’a mérité kè nou aji èvè jantiyès épi-y. Ka nou ka fè ?

An-nou fè on ti réfléchi asi sa : Lè sé pou aji èvè bonté épi moun, pa ni ponmoun ki ka fè sa pibyen ki Jéova, é sa ki maké adan Pawòl a-y ka montré-nou kijan pou nou aji èvè kalité-lasa é jan sa enpòwtan toubònman. Adan Lézékriti grèk, nou ka touvé èksprésyon-la « bonté-la kè nou pa mérité la » bon enpé fwa. Kijan Bondyé ka aji èvè bonté épi nou ?

An-nou fè on ti réfléchi asi sa : Jéova ja aji épi bonté èvè milyon é milyon moun lèwvwè i ba-yo tousa yo té bizwen pou viv (Mat. 5:45). An réyalité, avan menm nou té konnèt Jéova, i té ja ka aji èvè bonté épi nou (Éféz. 2:4, 5, 8). Pa ègzanp, i ba limanité sa i té ni dè méyè. I sakrifyé sèl Gason-la i té ni la pou nou. Lapòt Pòl di konsa kè i péyé ranson-la « parapòt a on gran gran favè i ka fè-nou é kè nou pa menm mérité » (Éféz. 1:7). Anplisdisa, menmsi nou ka fè érè é kè nou ka fè Jéova lapenn, i ka kontinyé gidé-nou é i ka kontinyé anségné-nou. Sa i ka anségné-nou é pawòl a-y ka touvé-yo kon « on ti lapli » (Dét. 32:2). Jéova ja aji èvè bonté épi nou toubònman é nou pé’é jan pé rann-li tousa. Nou sav byen osi kè si Jéova pa té ka aji épi nou èvè on bonté nou pa menm mérité, nou pa té’é ni pon èspwa pou dèmen (gadé 1 Pyè 1:13).

On biten nou sèten sé kè konm Jéova ka aji èvè bonté épi nou sa ka fè-nou enmé-y pli fò é sa ka ban-nou anvi imité-y. Sé pousa, olyé nou aji èvè bonté enki èvè sèwten moun, fò-nou fè kon Jéova, fò-nou pran labitid aji èvè bonté épi toutmoun (1 Tés. 5:15). Lèwvwè nou toujou ka aji èvè bonté sé konsi nou ka limé on ti difé lèwvwè ni bon fwadi. Nou ka ba fanmi an nou bon fòs é nou ka fè frè é sè an nou, kolèg travay an nou, kanmarad lékòl an nou oben vwazen an nou dibyen.

Éséyé vwè kimoun adan fanmi a-w oben kimoun adan lasanblé a-w ki té’é byen bizwen yo di-y on biten ki janti pou ankourajé-y é kimoun ki té’é byen bizwen yo fè on biten ki janti ba-y pou fè-y dibyen. Pétèt kè adan lasanblé a-w, ni on moun ki bizwen yo fè on ti biten an kaz-la ba-y oben ki bizwen kè yo okipé dè jaden a-y oben ki bizwen kè yo fè dé ti kous ba-y. Pétèt osi kè ou pé jwenn on moun an prédikasyon ki bizwen kè yo édé-y, é ou té’é pé fè on biten itil pou-y.

An-nou imité Jéova é an-nou fè ansòt pou nou toujou palé é pou nou toujou aji èvè « onlo bonté » !