Jéova fè-mwen dé bèl ti siwpriz é i anségné-mwen onlo biten enpòwtan

Paran an mwen té ka rété an Èstoni men pannan 2^èm Gè mondyal la, yo kité péyi-lasa pou ay rété an Almagn. É sé la an fèt. Aprésa, yo mèt-yo ka ranjé tout biten a yo pou pati o Kanada. Prèmyé koté nou rété o Kanada sé té owa Ottawa. Nou té ka rété adan on pyès ki té adan on poulayé é yo té pasé lacho adan-y. Nou té maléré toubònman, men omwen, nou té ni zé pou manjé toulématen.

On jou, 2 Témwen a Jéova li Révélasyon 21:3, 4 ba manman-mwen. Lèwvwè manman tann sa ki té maké adan pasaj-lasa, i mèt pléré atè tèlman sa touché-y. Papa é manman mèt-yo ka étidyé, adan on batzyé yo pwogrésé é yo pran lèbatèm.

Anglé a paran an mwen pa té ka monté mòn, men yo pran étid a Labib a yo oséryé menm. Près toulésanmdi, pap’an mwen té ka menné-mwen é ti sè an mwen, Sylvia, an prédikasyon. I té ka fè sa menmsi i té pasé tout lannuit-la ka travay adan on lizin a nikèl ki té ka touvé-y a Sudbury (an Ontario). É chak simenn, nou té ka étidyé Tou dè Gad la an fanmi. Manman é papa aprann-mwen enmé Jéova. Sé pousa, an 1956, an désidé ba Jéova vi an mwen. An té ni 10 zan. Lè an ka sonjé jan paran an mwen té enmé Jéova, sa ka ban’an fòs pou an kontinyé sèvi-y.

Lèwvwè an lagé lékòl, an arété mèt Jéova prèmyé douvan adan vi an mwen. Pou mwen, si an té ka vin pyonyé, an pa té’é pé gangné asé lajan pou mwen vwayajé tout koté asi latè. Sé té rèv an mwen dépi an té toupiti. An touvé on travay alaradyo é sé mwen ki té ka pasé mizik. A pa ti enmé an té enmé travay-lasa ! Men pwoblèm-la sé kè an té ka touvé-mwen ka frékanté moun ki pa té enmé Jéova. É anplisdisa konm an té ka travay lèswa, souvantfwa an té ka raté réinyon an mwen. Konm an té fòwmé konsyans an mwen grasa sé prensip-la ki an Bib-la, anfinaldikont, konsyans an mwen pousé-mwen fè sèwten chanjman.

Aprésa an ay rété Oshawa, an Ontario. Sé la an jwenn Ray Norman èvè sè a-y Lesli é dòt pyonyé ankò. Yotout entérésé-yo a mwen. Lè an vwè jan yo té ni tchè-kontan, sa fè-mwen réfléchi asi vi an mwen. Yo ankourajé-mwen a vin pyonyé, é sé sa an fè an sèptanm 1966. An té ka santi-mwen byen, é an té enmé jan-la an té ka viv la. Men, vi an mwen té kay chanjé bout-pou-bout…

LÈ JÉOVA KA PWOPOZÉ-W FÈ ON BITEN, ÉSÉYÉ FÈ-Y

Lèwvwè an té o lisé, an té ranpli on dèmann pou ay travay adan Bétèl a Lèkanada. Bétèl-lasa té Toronto. Kèlkè tan apré, toupannan an té pyonyé, yo envité-mwen pou an té vin travay adan Bétèl-la pannan 4 an. Men pwoblèm-la sé kè an té ja ka touvé Lesli agou an mwen é an té pè kè siwvwè an té k’ay an Bétèl-la an pa té’é jen wouvwè-y ankò. Alò an priyé Jéova pannan on bon moman pou palé-y dè sa é an wouvè tchè an mwen ba-y. Aprésa, an aksèpté ay an Bétèl-la men tchè an mwen té ka fann pas fò an té di Lesli adyé.

Lè an té an Bétèl-la, an travay adan sèwvis-la ki ka okipé dè lenj a sé bétélit-la é aprésa antankè sèkrétè. Pannansitan, yo nonmé Lesli pyonyé èspésyal a Gatineau, o Kébèk. Souvantfwa, an té ka mandé-mwen kijan sa té ka pasé ba-y é ès an té pran bon désizyon-la. Lèwgadé, ni on biten ki fèt, é sé té yonn adan sé pi bèl siwpriz-la an ja ni la adan vi an mwen. Yo envité Ray, frè a Lesli, vin sèvi adan Bétèl-la. Nou touvé-nou adan menm chanm-la ! Sé konsa an réyisi wouvwè Lesli. Nou mayé dènyé jou-la an fè an Bétèl-la. Sé té lè 27 févriyé 1971, sa té ka fè 4 an jou pou jou kè an té rantré an Bétèl-la.

Yo voyé-mwen èvè Lesli adan on lasanblé ki té ka touvé-y o Kébèk. Sé té on lasanblé ki té fransé. Kèlkè lanné apré, yo pwopozé-mwen vin rèsponsab a siwkonskripsyon. Lè yo pwopozé-mwen sa, sa siwprann-mwen pas an té ni yenki 28 an. An té ka pansé kè an té two jenn é kè an pa té ni asé èkspéryans. Men lèwvwè an sonjé sa Jérémi 1:7, 8 ka di, sa ankourajé-mwen. Lesli dè koté a-y té ja fè plizyè aksidan a vwati é i té ni pwoblèm pou dòmi. Alò lè nou sonjé tousa, nou di-nou kè siwvwè an té ka vin rèsponsab a siwkonskripsyon, sa pa té’é fasil pou nou. Men mi sa Lesli di : « Si Jéova ka mandé-nou fè on biten, ès fò pa nou éséyé fè-y ? » Alò nou aksèpté é pannan 17 an nou rété adan sèwvis a siwkonskripsyon-la.

Lè an té rèsponsab a siwkonskripsyon, vi an mwen té byen ranpli é délè an pa té ka rivé touvé asé tan pou Lesli. Ni on biten pou an té aprann fè. On lendi, granbonnè maten, on moun sonné akaz. Lè an wouvè pòt-la pa té ni ponmoun. Sèl biten an vwè sé on ti pannyé. Adan-y té ni on nap, déotwa fwi, fwomaj, bagèt, on boutèy diven, déotwa vè èvè on ti papyé. Pa té ni non a ponmoun maké asi ti papyé-lasa men mi sa yo té maké anlè-y : « Menné madanm a-w pikniké. » Jou-lasa té ni bèl botan, solèy-la té ka kléré. Men an fè Lesli konprann kè an té ni plizyè diskou a préparé é kè an pa té ni tan pousa. I té ka konprann men i té tibwen tris kanmenm. Lèwvwè an sizé dèyè biwo an mwen, konsyans an mwen koumansé bat-mwen. An sonjé Éfézyen 5:25, 28. Ès Jéova pa té ka sèvi èvè sé vèwsé-lasa pou ankourajé-mwen a tchenn kont dè sa madanm an mwen té ka rèsanti ? An priyé, é an di Lesli : « An-nou ay ! » I té tèlman kontan ! Nou ay owa on rivyè. Ti koté-lasa té bèl menm. Nou wouvè nap-la atè-la é nou pasé yonn adan sé pi bèl jouné-la nou ja pasé la ansanm. É anplisdisa, an réyisi préparé sé diskou-la an té ni a fè la.

Yo voyé-nou vizité onpakèt siwkonskripsyon ki té ka koumansé dépi la Colombie-Britannique é ki té ka rivé jis a Terre-Neuve. É adan yochak nou té ni tchè-kontan toubònman. An té anvi vwayajé é mi sé sa ki té ka fèt ! An té ja réfléchi pou nou fè lékòl a Galaad men an pa té anvi yo voyé-nou adan on péyi an pa konnèt. An pa té ka pansé kè on moun kon mwen té pé vin misyonè. Anplisdisa, an té pè kè yo voyé-nou adan on péyi an Afrik ki ni lagè oben ki ni maladi. An té byen la an té yé la.

ONDÒT SIWPRIZ : YO KA VOYÉ-NOU AN ÈSTONI, AN LÉTONI É AN LITYANI

An 1992, yo wouba sé Témwen a Jéova la dwa préché an piblik adan sèwten péyi ki té ka fè pawti a Linyon sovyétik avan. Yo mandé-nou si nou té’é dakò pou ay an Èstoni antankè misyonè. Nou pa té ka atann-nou a sa menm, men nou priyé Jéova pou nou palé-y dè sa. Kou-lasa ankò, nou di-nou : « Si Jéova ka mandé-nou fè on biten, ès fò pa nou éséyé fè-y ? » Alò nou di-yo dakò, é an tchè an mwen an té ka di : « Omwen, a pa an Afrik nou k’ay ! »

Onfwa-onfwa, nou mèt-nou ka aprann palé èstonyen. Kèlkè mwa apré, yo mandé-mwen si an té pé vizité on siwkonskripsyon. Adan siwkonskripsyon-lasa té ni 46 lasanblé é gwoup. É pou nou té pé sa ay adan tout siwkonskripsyon-la fò-nou té ay an Èstoni, an Létoni é an Lityani é fò-nou té ay adan on vil non a-y sé Kaliningrad, ki ka touvé-y an Risi. Alò fò-nou té aprann palé léton, lityanyen é Ris. Sa pa té senp. Men lèwvwè sé frè é sè la té ka vwè jan nou té ka fè éfò, sa té ka touché-yo é yo té ka édé-nou. An 1999, yo wouvè on Bétèl an Èstoni é yo mèt-mwen adan Komité a filyal-la. An té kontan kolaboré èvè Toomas Edur, Lembit Reile, é Tommi Kauko.

Nou rankontré onlo Témwen a Jéova yo té chayé an Sibéri. Magré tout sé abominasyon-la yo sibi la lè yo té lajòl, é magré tout tan-la yo rété lwen a fanmi a yo, yo pa jen vin égri. Yo té ni tchè-kontan é yo té ka préché èvè bon balan. Sa aprann-nou kè menmsi nou ka jwenn dé bout-rèd, nou pé andiré é nou pé ni tchè-kontan.

Nou travay rèd pannan plizyè lanné é nou pa pran asé tan pou pozé kò an nou. Alò on gwo fatig tonbé asi Lesli. Nou pa konprann tousuit kè dèyè do a sa té ni on maladi yo ka kriyé fibromyalgie. Alò nou té ka réfléchi pou vwè si nou pa té ka viré o Kanada. É lèwvwè yo envité-nou Patterson o Zétazini pou nou té fè on fòwmasyon, an di-mwen kè nou pa té’é pé menm. Men nou palé Jéova dè sa adan priyè an nou é finalman nou aksèpté ay. É Jéova béni-nou piskè sé lèwvwè nou rivé Patterson kè yo swangné Lesli. Kifè, nou rivé woupran travay-la nou té ka fè la ba Jéova.

ONDÒT SIWPRIZ ANKÒ : YO KA VOYÉ-NOU ONDÒT KOTÉ

On jou swa, an 2008, alòskè nou té viré an Èstoni, an rèsèvwa on koudfil. Sé té biwo mondyal la é yo mandé-nou ès nou té’é dakò pou ay préché o Kongo. Mésyé, tchè an mwen manké arété ! Anplisdisa fò an té ba-yo on répons lèlandèmen-la menm. Odépa, an pa di Lesli ayen pas an té sav kè sa té’é anpéché-y dòmi. Men, sé mwen ki pa dòmi. Lè an té ka sonjé kè sé an Afrik yo té k’ay voyé-nou, sa té ka enkyété-mwen toubònman. Alò, an priyé Jéova tout lannuit pou di-y sa an té ka rèsanti.

Lèlandèmen-la an di Lesli ola yo té ka pwopozé-nou alé. Alò mi sa nou di-nou : « Jéova ka pwopozé-nou ay an Afrik. Kijan nou pé di kè nou pé’é rivé é kè nou pé’é enmé koté-lasa siwvwè nou pa ka éséyé ? » Kifè, apré nou rété 16 an an Èstoni, nou pati pou nou ay Kinchasa, o Kongo. Adan Bétèl-la té ni on bèl ti jaden é ou té ka santi-w anpé. Pawmi sé prèmyé biten-la Lesli mèt asi masonn a chanm an nou, té ni on kat kè i té ni dépi lèwvwè nou té kité Lèkanada. Mi sa ou té pé li asi-y : « Fò ou ni tchè-kontan kèlkèswa koté-la ou yé la. » Dèstan nou fè konésans èvè sé frè é sè la, nou étidyé Labib èvè moun, é nou travay antankè misyonè adan péyi-lasa, nou vin ni plis jwa ankò adan sa nou té ka fè pou Jéova. Aprésa, nou ni lokazyon ay vizité filyal a 13 péyi an Afrik é sé té on bèl lonnè toubònman. Sé konsa nou fè konésans èvè onlo moun. Chak sé moun-lasa té diféran men yo té ni onlo bèl kalité. Odépa an té pè ay an Afrik, men aprésa an pa té pé pi kontan ki sa. Nou di Jéova mèsi kè i voyé-nou an Afrik.

O Kongo, yo ban-nou manjé dé biten nou pa jen imajiné nou té’é pé manjé. Men lè nou vwè jan sé frè é sè la té ka aprésyé ti biten a yo, sa ban-nou anvi gouté é nou pa règrété sa.

Nou vwayajé a lès a péyi-la pou nou té ay ankourajé frè é sè an nou é pou nou té ba-yo sa yo té bizwen. Sé koté-la yo té ka viv la, té ni enpé moun awmé ki té ka ataké sé vilaj-la é yo té ka fè sé madanm-la é sé timoun-la bon abominasyon. Lamajorité a sé frè é sè la ki té adan sé vilaj-lasa té maléré. Men, yo té ka kwè fò adan larézirèksyon, yo té enmé Jéova onlo toubònman é yo té vé rété fidèl a òwganizasyon a-y. Lè nou vwè sa, sa touché-nou onlo menm. Ègzanp a yo fè-nou sonjé pou ki rézon nou té ka sèvi Jéova é sa konsolidé fwa an nou. Sèwten adan sé frè-la té pèd kaz a yo é tousa yo té planté pou manjé. Sa fè-nou sonjé kè adan on batzyé nou pé pèd tousa nou ni é kè sa ki pi enpòwtan sé lanmityé an nou èvè Jéova. Magré tout sé éprèv-la sé frè é sè la té ka jwenn la, ou pa gè té ka tann-yo ka plenn-yo. Bèl létadèspri a yo ban-nou bon fòs pou nou fasadé èvè difikilté nou ka jwenn é pou nou andiré lèwvwè kò-la pa bon.

YO KA VOYÉ-NOU AN AZI

Ondòt siwpriz ankò té ka atann-nou. Yo mandé-nou ay travay adan Bétèl a Ong Kong. Nou pa jen imajiné on jou nou té’é viv an Azi ! Men lè nou vwè jan Jéova okipé dè nou èvè onlo lanmou tout sélézòt koté-la yo té voyé-nou la, nou aksèpté envitasyon-la. An 2013, nou lésé frè é sè an nou é tout sé bèl biten-la ou ka touvé an Afrik. Dlo monté an zyé an nou. Lè nou pati nou pa té menm sav sa ki té ka atann-nou.

Lè nou ay viv a Ong kong, sa té diféran toubònman dè sa nou té konnèt pas vil-lasa té plen èvè moun ki té ka sòti tibwen toupatou asi latè. Pou nou té aprann palé chinwa sa pa té senp. Men sa ki byen sé kè sé frè é sè la akéyi-nou èvè onlo chalè é nou té enmé sé manjé-la yo té ka manjé la. Aktivité-la koumansé pran bon balan adan Bétèl-la, kifè fò-yo té agrandi-y. Men pwoblèm-la sé kè koté-la Bétèl-la té yé la, sé batiman-la té ka kouté dè plizanpli chè. Alò Komité santral la pran on désizyon ki té plen sajès. Yo désidé kè yo té’é vann lamajorité a sé batiman-la nou té adan yo la. Kèlkè tan apré, an 2015, yo voyé-nou an Koré di Sid é jous aprézan sé la nou yé. Nou ka touvé-nou ka aprann palé koréyen é lang-lasa pa mòl ditou-ditou. Men sa ki ka ankourajé-nou, sé kè sé frè é sè la ka vwè jan nou ka pwogrésé é yo pa’a manké di-nou sa, menmsi nou sav kè nou po’o rivé an bout a jaden a Étyenn.

SA NOU APRANN

Lè ou k’ay ondòt koté, sa pa toujou fasil pou ou touvé dé nouvo zanmi, men nou rann-nou kont kè lè ou ka pran douvan pou envité lézòt, ou ka aprann konnèt-yo pi vit. Nou rann-nou kont osi kè adan tout sé péyi-la nou ay la, sé frè é sè la pa tèlman diféran. Sé enki déotwa ti biten ki ka chanjé. Jan-la Jéova kréyé-nou la èstraòwdinè menm. I kréyé-nou pou nou kapab wouvè tchè an nou é pou nou kapab enmé onlo onlo moun (2 Kor. 6:11).

Anplisdisa, on biten nou konprann sé kè fò-nou aksèpté sé moun-la jan yo yé. Sé konsa Jéova ka fè osi. É fò-nou toujou chèché a vwè kijan Jéova ka montré-nou kè i enmé-nou é kè i ka gidé-nou. Chakfwa moral an nou té a zéro oben kè nou té ka mandé-nou si lézòt té enmé-nou, nou té ka wouli sé ti kat-la oben sé ti lèt-la zanmi an nou té voyé ban nou la é sa té ka ankourajé-nou. Sa nou sèten, sé kè Jéova réponn a priyè an nou é i fè dé biten pou rasiré-nou é pou ban-nou fòs.

Tout tan-la ki pasé la, mwen é Lesli, nou aprann jan sa enpòwtan kè yonn pran tan pou lòt, kèlkèswa kantité biten nou ni a fè. Nou rivé konprann osi kè adan lavi, fò ou sav ri lèwvwè ou ka fè érè, siwtou lèwvwè ou ka éséyé aprann palé ondòt lang. É touléswa, nou ka éséyé sonjé on bon biten ki rivé-nou pou nou di Jéova mèsi pou sa.

An pé’é manti ba zòt, an pa jen konpranndèdi kè an té’é pé vin misyonè oben kè an té’é pé viv adan on péyi an pa konnèt. Men, an rann-mwen kont kè lèwvwè Jéova ka soutyenn-vou, ou ka rivé fè onlo biten é an té kontan viv sa. Sa ka fan’an sonjé sé pawòl-la Jérémi té di la : « Ou kouyonné-mwen, o Jéova » (Jér. 20:7). É sé vré ! I fè-nou onlo bèl ti siwpriz é i vidé onpakèt bénédisyon asi nou. Sa té èstraòwdinè toubònman. I jous fè-mwen vwayajé an aviyon, é an té anvi fè sa dépi toupiti. Nou a-y tèlman koté ! Menm lèwvwè an té timoun an pa jen imajiné kè an té’é ay tousa koté. Nou vizité filyal ki té tibwen toupatou asi latè. É chakfwa nou té k’ay on koté, Lesli toujou té ka soutyenn-mwen é i té ni on bèl létadèspri. A pa ti enmé an té enmé sa !

Nou pa jen ka oubliyé pou kimoun é poukwa nou ka fè tout sé biten-la nou ka fè la. Sé bénédisyon-la nou ka jwenn jòdila ka ban-nou on ti lidé asi jan nou ké adoumanman lèwvwè nou ké ka viv pou touttan. A moman-lasa, Jéova ké ‘wouvè men a-y é kè i ké rasazyé anvi a tousa ki ka viv’ (Sòm 145:16).