Gran Pwofésè an nou aprann-nou onlo biten

PARAN AN MWEN LÉSÉ ON BÈL ÈGZANP BAN MWEN

An 1957, paran an mwen kité Litali pou ay rété Kindersley, on vil ki ka touvé-y o Kanada. Tibwen tan apré, yo vin konnèt lavérité asi Jéova, é sa vin sa ki pli enpòwtan adan vi an nou. An ka sonjé kè lèwvwè an té timoun, an té ka pasé onlo tan ka préché èvè fanmi an mwen. Sé pousa an byen enmé di kè an koumansé sèwvis pyonyé anranfò lè an té ni 8 an. Men sé jé an mwen an ka fè !

Paran an mwen ban-mwen on bèl ègzanp. Yo pa té ni onlo lajan, magrésa yo fè onlo sakrifis pou Jéova. Pa ègzanp, an 1963, yo vann onlo biten yo té ni pou nou ay adan on lasanblé entèwnasyonal ki fèt a Pasadena an Kalifòwni. An 1972, nou pati pou nou té ay préché on koté ni moun ki sòti an Itali. Sé té an Kolonbi Britanik on réjyon ki ka touvé-y o Kanada, é fò nou té fè 1 000 kilomèt pou nou té ay la. Pap’an mwen té ka nétwayé é i té ka fè dé ti travo adan on magazen. Yo té vlé i monté an grad adan travay-la pou gangné plis lajan, men i té préféré mèt Jéova prèmyé douvan adan vi a-y.

Ègzanp a paran an mwen sé té prèmyé étap a fòwmasyon an mwen adan sèwvis a Jéova. Sa yo anségné-mwen sèvi-mwen pannan tout vi an mwen. Yo édé-mwen konprann kè si an ka chèché Wayòm-la an prèmyé, Jéova ké toujou pran swen an mwen (Mat. 6:33).

NOU KA KOUMANSÉ SÈVI JÉOVA APLENTAN

An 1980, an mayé èvè Debbie, on bèl ti sè ki té anvi fè plis pou Jéova. Konm nou té vlé vin pyonyé pèwmanan, Debbie pran sèwvis-la 3 mwa apré nou mayé. Apré on lanné mayé, nou ay rété ondòt koté pou soutyenn on ti lasanblé ki té bizwen pwoklamatè, é sé la an vin pyonyé.

Onlè, nou touvé-nou dékourajé é nou té anvi pati ondòt koté. Men avan nou fè sa, nou ay palé ba rèsponsab a siwkonskripsyon an nou. Frè-la palé ban nou franchman men i fè sa èvè onlo lanmou. Mi sa i di-nou : « Zò sav, pwoblèm a zòt sé kè zò ka konsantré-zòt enki asi sé difikilté-la zò ka jwenn la. Si zò ka chèché dé biten ki pozitif, zò ké touvé. » Sé ègzaktèman sa nou té bizwen tann (Sòm 141:5). Nou mèt konsèy-lasa an pratik tousuit é nou pa tadé pou nou vwè jan té ni onlo bon biten alantou an nou. Ni plizyè moun adan lasanblé-la ki té vlé fè plis pou Jéova. Pawmi yo té ni plizyè sè mari a yo pa té adan lavérité é té ni dé jenn. Sa aprann-nou onlo biten. Nou mété-nou ka chèché sa ki pozitif adan vi an nou, é lèwvwè biten-la té rèd, nou té ka fèfon asi Jéova (Mich. 7:7). Kifè, nou té ni tchè-kontan kon avan é sa ay myé ban nou.

Sé fòwmatè-la nou té ni la lè nou fè prèmyé Lékòl pou sé pyonyé-la té ja ay préché adan dòt péyi. Yo montré-nou déotwa foto é yo palé-nou dè sé difikilté-la é dè sé bénédisyon-la yo té jwenn la. Tousa ban-nou anvi vin misyonè. Kifè nou travay pou sa.

Pou nou préparé-nou pou atenn òbjèktif an nou, an 1984, nou désidé ay rété o Kébèk, on réjyon yo ka palé fwansé. Réjyon-lasa ka touvé-y a 4 000 kilomèt a la nou té ka rété la an Kolonbi Britanik. Fò nou té fè kò èvè on nouvo kilti é fò nou té aprann on nouvo lang. Ondòt difikilté nou jwenn sé kè souvantfwa lajan-la té kout. Kifè, pannan on tan, sé enki ponmditè nou té ka manjé maten midi é swa. Sé on agrikiltè ki té ka pèwmèt-nou ay adan jaden a-y pou nou rékòlté déotwa. Debbie té ka fè ponmditè an tout sòs ! Magré sé difikilté-lasa, nou té ka fè tousa nou té pé pou nou pa pèd jwa an nou. Anplisdisa, nou té ka vwè jan Jéova té ka pran swen an nou (Sòm 64:10).

On jou, alòskè nou pa té ka atann-nou, yo kriyé-nou pou nou vin travay an Bétèl a Lèkanada. Konm nou té sòti ranpli on dèmann pou fè Lékòl a Galaad, nou té an 2 lidé. Men nou aksèpté kanmenm. Lè nou rivé an Bétèl-la, nou mandé on frè ki ka fè pawti a Komité a filyal la ka nou dwètèt fè si yo ka envité-nou Galaad. Frè-lasa sé té Kenneth Little. Mi sa i réponn-nou : « Nou ké vwè sa lè moman-la ké rivé. »

Sé sa ki rivé on simenn apré. Yo envité-nou Galaad. Alò fò nou té désidé ka nou ka fè. Mi sa frè Little di-nou : « Zò sav, kèlkèswa sa zò chwazi fè, onlè, zò ké di kè a pa sa pou zò té chwazi. Ki zò ay Galaad ki zò rété an Bétèl-la Jéova ké béni-zòt. Yonn pa pibon ki lòt. » Nou désidé ay fè Lékòl a Galaad. Pi tan té ka pasé, é pi nou té ka vwè kè frè Little té ni rézon. Noumenm nou di frè é sè menm biten-la lèwvwè yo té vé fè plis pou Jéova é kè yo té ka touvé-yo douvan diféran chwa.

NOU KA VIN MISYONÈ

A pa ti kontan nou té kontan fè pawti a 83^èm klas a Galaad ! Nou té ka suiv sé kouw-la a Brouklin on koté ki ka touvé-y Nouyòk. Adan klas-lasa, nou té a 24 zélèv. Nou koumansé an avril 1987. Sé frè-la ki té ka fòwmé-nou sé té frè Ulysses Glass é frè Jack Redford, men té ni dòt ankò. Nou trapé diplòm an nou lè 6 sèptanm 1987. Nou pa menm vwè a ki moman sé 5 mwa-la pasé. Yo voyé-nou préché an Ayiti èvè on frè é madanm a-y. Non a yo sé té John é Marie Goode.

An 1962, gouvènman-la oblijé sé dènyé misyonè-la sòti an Ayiti. Dépi sa, yo poto’o voyé pon misyonè an péyi-la. Twa simenn apré nou rèsèvwa diplòm an nou, nou rivé an Ayiti. Nou té on koté ki té fon an montangn-la. Lasanblé-la nou té adan-y la té ni enki 35 pwoklamatè. Nou té jenn, nou pa té ni onlo èkspéryans é nou té tousèl adan kaz a sé misyonè-la. Sé moun-la an téritwa-la té maléré é onlo adan yo pa té sav li. Pannan nou té la, siklòn pasé asi péyi-la, koumansé ni vyolans akòz dè pwoblèm politik, ni moun ki éséyé déchouké gouvènman-la, é té ni gawoulé.

Frè é sè Ayiti té ni onlo kouraj é yo té ni onlo jwa. Sa aprann-nou tèlman biten ! Onlo adan yo té ka pran bon gaz, men yo té enmé Jéova é yo té enmé préché. On sè ki té ja ni on bèl laj é ki pa té sav li té konnèt apépré 150 vèwsé patchè. Lè nou té ka vwè sitiyasyon a péyi-la, sa té ka ban-nou plis balan pou fè sé moun-la konnèt kè sé enki wayòm a Bondyé ki ké réglé pwoblèm asi latè. Pawmi sé moun-la nou étidyé èvè yo la, ni sa ki vin pyonyé pèwmanan, ni sa ki vin pyonyé èspésyal, oben ki vin ansyen. Nou kontan sa toubònman !

Pannan an té Ayiti, an ni lokazyon fè plizyè ti kozé asi Labib èvè on jennboug kè légliz a sé Mòwmon-la té voyé préché. Plizyè lanné apré, i voyé on lèt ban mwen ki siwprann-mwen. Mi sa i té ka di : « An k’ay pran lèbatèm adan lasanblé-la ki ka vin la ! Aprésa an té’é byen anvi viré Ayiti é vin pyonyé èspésyal menm koté-la an té ka préché la lè an té Mòwmon. » É sé sa ki fèt. Li é madanm a-y vin pyonyé èspésyal é yo rété la pannan plizyè lanné.

NOU K’AY AN ÉWÒP É APRÉSA NOU K’AY AN AFRIK

Rivé onlè, sé frè é sè la té pé préché adan on pawti a Léwòp pi fasilman. Alò, an 1992, yo voyé-nou préché an Slovéni adan on vil non a-y sé Ljubljana. Vil-lasa pa té tèlman lwen koté-la fanmi an mwen té ka rété la avan yo pati an Itali. Té ni lagè toujou adan sèwten réjyon ki té ka fè pawti a Layougòslavi avan. An tan-lasa, sé filyal a diféran péyi ki té ka okipé dè prédikasyon-la adan réjyon-lasa. Pawmi yo, té ni filyal a Lakroasi ki té ka touvé-y Zagrèb, é filyal a Lasèrbi ki té ka touvé-y Bèlgrad. Men aprésa chak péyi té kay ni Bétèl a-y ki ta-y.

Fò nou té aprann on nouvo lang é on nouvo kilti. Souvantfwa sé moun-la ki té ka rété la té ka di-nou kè sa rèd pou aprann palé lang a yo. É sé té vré a yo. Sé frè é sè la té paré a adapté-yo kèlkèswa chanjman lòwganizasyon té ka fè. Lè nou vwè sa, é lè nou vwè jan Jéova té ka béni-yo, sa touché-nou. Nou vwè osi jan Jéova ka réglé on pwoblèm èvè onlo lanmou é kè i ka fè sa a moman-la ki fo la. Sa nou té ja ni lokazyon aprann avan, sa sèvi-nou onlo lè nou rivé Slovéni. É an Slovéni nou aprann onlo dòt biten ankò.

Men dòt chanjman té ka vin dèyè. An lan 2000, yo voyé-nou an Kòtdivwa, on péyi ki ka touvé-y a Lwès a Lafrik. Aprésa, an novanm 2002, yo fè-nou ay an Syéra Léòn pas la nou té yé la té ni lagè. An Syéra Léòn menm, yo té ka pran on ti souf pas pannan 11 an sé lagè ki té ni la. A pa ti tris nou té tris nou té kité Lakòtdivwa présé-présé konsa ! Men sa nou té aprann édé-nou pa pèd jwa an nou.

Nou té ka konsantré-nou asi sé moun-la ki té anvi konnèt lavérité é asi frè é sè an nou. Magré té ni lagè adan péyi a yo pannan plizyè lanné, yo andiré é yo té ni onlo lanmou. Sé vré yo pa té ni granzafè, men yonn té ka pawtajé sa i té ni èvè lòt. On jou, on sè ba Debbie déotwa lenj. Odépa Debbie té jenné pran sé lenj-la. Men sè-la ensisté é mi sa i di-y : « Lè té ni lagè, frè é sè a dòt péyi édé-nou. Alèla sé nou pou édé lézòt. » Sé frè é sè la ki an Syéra Léòn ban-nou on bèl ègzanp é nou di-nou kè fò nou kontinyé imité-yo.

Finalman, nou viré an Kòtdivwa men konm té ni pwoblèm politik adan péyi-la, sé vyolans-la woukoumansé. Alò an novanm 2004, yo fè-nou pran élikòptè pou menné-nou ondòt koté. Nou pa té pé pran granzafè. Sé on sak tousèl nouchak té ni. Yo menné-nou la sé militè a lawmé fwansé la té ka rété la. Sé la nou pasé lannuit é nou dòmi atèla. Lèlandèmen-la, yo menné-nou an Suis. Lè nou rivé an Bétèl-la i té ja minui. Men magrésa té ni moun pou akéyi-nou bra gran ouvè. Té ni sé frè a Komité a filyal la, sé frè-la ki té fòwmatè adan sa yo té ka kriyé École de formation ministérielle é madanm a yo. Yo pran-nou an bra a yo, yo ban-nou on ti manjé tou cho é bon tibwen chokola suis ! Lè nou vwè sa, sa touché tchè an nou.

Yo voyé-nou o Gana men a pa té pou lontan. Aprésa, nou viré an Kòtdivwa lèwvwè biten-la vin on ti jan pi kalm. Sé vré kè lèfètkè yo déplasé-nou konsa é kè délè fò nou té chapé dòt koté, sa angwasé-nou onlo. Men frè é sè an nou té tèlman janti èvè nou kifè sa édé-nou andiré. Sé vré, sa toutafè nòwmal kè ni lanmou adan pèp a Jéova, men mwen é Debbie nou ka ba lanmou-lasa tout valè a-y. Nou rann-nou kont kè tout sé difikilté-la nou té jwenn la, sé fòwmé sa té ka fòwmé-nou.

O MWAYEN-ORIYAN

An 2006, biwo mondyal la voyé on lèt ban nou pou di-nou kè yo té ka voyé-nou o Mwayen-Oriyan ! Nou té kay viv dòt biten ankò. Fò nou té aprann dòt lang é fò nou té aprann fè kò èvè dòt kilti. Adan sé péyi-lasa, té ni onlo pwoblèm akòz dè politik é dè rèlijyon, men nou té ni onlo dòt biten pou nou té aprann. Sa nou té enmé adan sé lasanblé-la, sé kè té ni frè é sè ki té sòti diféran koté é ki té ka palé tout kalté lang. Nou ni lokazyon vwè jan nou soudé lèwvwè nou ka suiv sa òwganizasyon a Jéova ka mandé-nou fè. É lè nou té ka vwè jan sé frè é sè la té ka andiré èvè onlo kouraj lè fanmi a yo, kanmarad-lékòl a yo, kolèg-travay a yo oben vwazen a yo té ka lévé kont yo, nou té èstèbèkwè.

An 2012, nou ay adan lasanblé èspésyal la ki fèt a Tel Aviv, an Israèl. Dépi Lapannkòt 33, sé prèmyé fwa té ni tousa moun ki ka fè pawti a pèp a Jéova ki té ka sanblé koté-lasa. A pa ti bèl sa té bèl !

Pannan nou té o Mwayen-Oriyan, yo voyé-nou adan on péyi sé frè é sè la pa té pé adoré Jéova kon yo vlé akòz dè gouvènman-la. Nou menné piblikasyon ba yo, nou préché èvè yo é nou ay adan plizyè lasanblé siwkonskripsyon ki pa té ni onlo moun adan. Toupatou té ni sòlda ki té ni zam é té ni dé koté yo té ka kontwolé papyé a moun. Men nou té ka santi-nou ansékirité pas nou té ka pran prékosyon an nou é nou té ka déplasé èvè sé frè é sè la.

NOU KA WOUVIRÉ AN AFRIK

An 2013, yo voyé-nou fè on biten ki té vréman diféran dè sa nou té ja fè la. Nou ay an Bétèl a Kongo ki ka touvé-y an vil a Kinshasa. Péyi-lasa gran toubònman é i vréman bèl. Malérèzman ni onlo moun ki maléré, é souvantfwa ni lagè. Odépa nou té ka di-nou : « Sa ké ay. Nou ja konnèt Lafrik. » Men nou té ni onlo biten a aprann toujou. Pa ègzanp, fò nou té aprann kijan pou nou déplasé lè fò nou té ay dé koté ki pa té ni wout é ki pa té ni pon. Men nou té pé konsantré-nou asi onlo biten pozitif. Magré yo pa té ni onlo lajan, sé frè é sè la té ka andiré é yo pa té ka pèd jwa a yo. Yo té enmé préché, é yo té ka fè onlo éfò pou ay réinyon é pou ay lasanblé. Nou vwè an 2 zyé an nou kè té ni dèplizanplis moun ki té ka aprann konnèt lavérité. É sa té ka fèt enki pas Jéova té ka soutyenn prédikasyon-la é pas i té ka béni-y. Sé lanné-la nou pasé la o Kongo aprann-nou onlo biten enpòwtan. Anplisdisa, zanmi an nou ki o Kongo vin fanmi an nou.

An 2017, yo voyé-nou an Afrik di Sid. Sé prèmyé fwa nou té ka travay adan on gran Bétèl konsa. Jous travay-la yo ban-nou fè la sé prèmyé fwa nou té ka fè-y. La osi nou té ni onlo biten pou nou aprann, men sé biten-la nou té aprann la sé koté-la yo té voyé-nou la avan, sa édé-nou onlo. Sé frè é sè la ki ka andiré dépi 20 an, 30 an, 40 an oben plis ki sa ankò, nou enmé-yo toubònman. É a pa ti bèl sa bèl lè ou ka vwè jan toutmoun an fanmi a Bétèl-la ka travay ansanm-ansanm, alòskè yo pa ni menm ras-la é kè yo ka sòti dé koté ki diféran ! Jéova ka béni sèwvitè a-y é grasa-y, yo ka viv anpé. É si i ka fè sa, sé pas yo ka mèt nouvo pèwsonalité-la asi yo, é kè yo ka mèt sa Labib ka di an pratik.

Pannan tout sé lanné-la ki pasé la, yo voyé-nou onlo koté diféran é sa té entérésan toubònman. Mwen é Debbie, nou fè kò èvè dòt kilti é nou aprann dòt lang. Sa pa té toujou fasil, men nou santi jan Jéova sèvi èvè òwganizasyon a-y é èvè sé frè é sè la, pou montré-nou i enmé-nou (Sòm 144:2). Tout sé biten-la nou aprann la adan sèwvis aplentan la pèwmèt-nou pwogrésé.

An ni onlo rèkonésans pou édikasyon-la fanmi an mwen ban-mwen la. An ni onlo rèkonésans osi pou madanm an mwen ki soutyenn-mwen, é pou frè é sè an mwen toupatou asi latè, ki lésé on bèl ègzanp ban-nou. Mwen é Debbie nou vlé kontinyé fè douvan, é nou vlé kontinyé aprann èvè Gran Pwofésè an nou.