Ès ou paré pou ba Jéova vi a-w ?

1-2. Ka pou on moun fè avan i pran lèbatèm ?

PANNAN sé 5 dènyé lanné-la ki pasé la, ni pliski on milyon moun ki pran lèbatèm é ki vin Témwen a Jéova. Onlo adan yo vin konnèt lavérité dépi lèwvwè yo té « toupiti » kon Timoté (2 Tim. 3:14, 15). Ni sa ki té ja granmoun lè yo vin konnèt lavérité. É ni sa ki té ja ni on bèl laj. Pa ègzanp, ni kèlkè lanné dè sa, on madanm ki té ka étidyé Labib pran lèbatèm alòskè i té ja ni 97 an !

² Si ou ka étidyé Labib èvè sé Témwen a Jéova la oben si sé paran a-w ki Témwen a Jéova, ès ou ni lidé pran lèbatèm ? Sé on bèl òbjèktif toubònman ! Men avan ou pran lèbatèm, fò ou ba Jéova vi a-w. Awtik-lasa ké èspliké ka sa vé di lè on moun ka ba Jéova vi a-y. I ké édé-w vwè osi poukwa fò pa ou ézité ba Jéova vi a-w é pran lèbatèm si ou ja paré.

LÈ ON MOUN KA BA JÉOVA VI A-Y, KA SA VLÉ DI ?

3. Bay déotwa ègzanp a moun ki ba Jéova vi a yo.

³ An tan a Labib, lè on moun té ka ba Jéova vi a-y, sa té vé di kè yo té chwazi-y pou fè on travay èspésyal. Sé Izraélit-la té ka fè pawti a on nasyon ki té ta Jéova. Men ni sèwten moun adan nasyon-lasa ki té ba Jéova vi a yo on mannyè èspésyal. Pa ègzanp, Aawon té ni on maré-tèt asi tèt a-y é douvan maré-tèt-lasa té ni on plak anlò. Plak anlò lasa ‘té ka montré kè Bondyé té mété-y apa’ pou fè on travay èspésyal, kivédi pou i té gran prèt a nasyon a Izrayèl (Lév. 8:9). Sé Naziréyen-la osi sé té dé moun ki té ba Jéova vi a yo on mannyè èspésyal. Mo ébré la nazir » kè yo tradui la é ki bay « naziréyen » vé di « sila yo mèt apa la » oben « sila ki ba Jéova vi a-y la ». Fò sé naziréyen-la té suiv sèwten biten kè Lwa a Moyiz té ka mandé-yo fè (Nonb 6:2-8).

4. a) Lè ou ka ba Jéova vi a-w, ka ki ka vin pi enpòwtan adan vi a-w ? b) Ka sa vlé di ‘rènyé-w voumenm a-w’ ? (gadé imaj-la osi).

⁴ Lèwvwè ou ka désidé ba Jéova vi a-w, ou ka chwazi vin disip a Jézikris é ou ka chwazi dè mèt volonté a Jéova prèmyé douvan adan vi a-w. Ka sa ké chanjé ba-w ? Mi sa Jézi di : « Si on moun vlé suiv-mwen, fò i rènyé-y limenm a-y » (Mat. 16:24). Èksprésyon grèk-la yo tradui la é ki bay « fò i rènyé-y limenm a-y » pé vé di osi kè « moun-lasa pa’a viv pou-y menm ankò ». Alò si ou ka ba Jéova vi a-w, fò ou ké mèt tousa ki pa annakò èvè volonté a-y akoté (2 Kor. 5:14, 15). Pa ègzanp, fò ou ké rèfizé fè « sa lachè ka pwodui » kon péché sèksyèl (Gal. 5:19-21 ; 1 Kor. 6:18). Ès sa ké fè vi a-w vin pi rèd ? Awa. Si ou enmé Jéova é si ou sèten kè sa i ka mandé-w fè sé pou byen a-w, vi a-w pé’é vin pi rèd (Sòm 119:97 ; Iz. 48:17, 18). Mi sa on frè non a-y sé Nicholas ka di asi sa : « Ou pé vwè prensip a Jéova kon bawo a on lajòl ki la pou anpéché-w fè sa ou vlé oben ou pé vwè-yo kon bawo a kaj a on liyon ki la pou pwotéjé-w. »

5. a) Kijan on moun ka ba Jéova vi a-y ? b) Ki diférans ki ni ant lè on moun ka ba Jéova vi a-y é lè i ka pran lèbatèm ? (gadé imaj-la osi).

⁵ Kijan ou pé ba Jéova vi a-w ? Pou ba Jéova vi a-w, ou ka priyé-y pou fè-y on pwomès. Ou ka pwomèt-li kè sé-y tousèl ou ké adoré é kè ou ké toujou fè volonté a-y pasé prèmyé douvan an vi a-w. Anfèt, ou ka pwomèt-li kè ou ké kontinyé enmé-y « èvè tout tchè a-w, èvè tout nanm a-w, èvè tout entélijans a-w é èvè tout fòs a-w » (Mawk 12:30). Lèwvwè ou ka ba Jéova vi a-w, a pa kon lè ou ka pran lèbatèm pas lè ou ka pran lèbatèm, ou ka montré toutmoun kè ou ba Jéova vi a-w. Alòskè lè ou ka ba Jéova vi a-w, sé on biten ou ka fè lè ou tousèl a-w é ki ka konsèwné enki vou é Jéova. Pwomès-lasa a pa nenpòt ki pwomès, sé on pwomès ki enpòwtan toubònman. É ou vé fè tousa ou pé pou tchenn a mo a-w é sé sa Jéova vé osi (Ékl. 5:4, 5).

POUKWA FÒ OU BA JÉOVA VI A-W ?

6. Ka ki ka ba on moun anvi ba Jéova vi a-y ?

⁶ Prèmyé biten ki ka fè-w ba Jéova vi a-w sé lanmou-la ou ni pou-y la. Lanmou-lasa pa bazé enki asi sa ou ka rèsanti pou Jéova. Men ou vin enmé Jéova fò, davwa ou aprann dé biten asi-y é asi pwojé a-y é davwa ou vin ni on « konésans ki ègzak » (Kol. 1:9). Lè ou étidyé Labib, sa fè-w sèten kè 1) Jéova ka ègzisté, 2) Bib-la sé Pawòl a-y é 3) i ka sèvi èvè òwganizasyon a-y pou fè volonté a-y.

7. Ka on moun dwèt fè avan i ba Bondyé vi a-y ?

⁷ On moun ki ka ba Jéova vi a-y, sé on moun ki dwèt konnèt byen sé ansègnman fondal la ki adan Bib-la é ki ka viv annakò èvè sé prensip-la ki adan-y la. I ka fè tousa i pé pou palé dè sa i aprann èvè dòt moun (Mat. 28:19, 20). Lanmou a-y pou Jéova vin pi fò é i anvi adoré enki li. Ès sé ka a-w ? Si ou enmé Jéova èvè tout tchè a-w, ou pé’é ba Jéova vi a-w é pran lèbatèm pou fè moun-la ou ka étidyé èvè-y la oben paran a-w plézi oben ou pé’é fè sa pou fè kon zanmi a-w nonplis.

8. Lè on moun ka ba Jéova vi a-y, sa lyanné èvè rèkonésans-la i ni pou-y la. Kijansa ? (Sòm 116:12-14).

⁸ Lè ou ka réfléchi asi tout sé biten-la Jéova ja fè ba-w la, ou ka ni onlo rèkonésans pou-y é ou ka anvi ba-y vi a-w (li Sòm 116:12-14). Labib ka di kè sé Jéova ki ka bay « tout bèl don é tout kado pawfè » (Jak 1:17). Pi bèl kado-la Jéova ban-nou la, sé vi a Gason a-y Jézi. Sonjé sa : grasa ranson-la, ou pé vin bon bon zanmi èvè Jéova é ou pé ni laposibilté dè viv pou touttan (1 Jan 4:9, 10, 19). Lè Jéova bay vi a Gason a-y, pa ni pi bèl biten i té pé fè pou montré-nou lanmou a-y. Alò pou montré Jéova jan ou ni rèkonésans pou-y é pou tousa i ja fè ba-w, pli bèl biten ou pé fè sé ba-y vi a-w (Dét. 16:17 ; 2 Kor. 5:15). Ou ka touvé lidé-lasa adan liv-la Ou pé ni tchè-kontan pou touttan ! adan pwen 4 a lèson 46 la. Adan lèson-lasa, ni on vidéo ki ka diré 3 minit é tèm a-y sé Fò-nou fè Bondyé onpakèt kado.

ÈS OU PARÉ ?

9. Si on moun po’o paré pou ba Jéova vi a-y, ka fò pa i fè ?

⁹ Pétèt ou ka santi kè ou po’o paré pou ba Jéova vi a-w é pou pran lèbatèm. Pétèt kè fò ou ké fè sèwten chanjman adan vi a-w pou ou pé sa viv annakò èvè sa Jéova ka mandé. Pétèt osi kè ou ké bizwen plis tan pou konsolidé fwa a-w (Kol. 2:6, 7). Dé moun pa oblijé pwogrésé menmjan-la é 2 jenn pa oblijé ba Jéova vi a yo é pran lèbatèm a menm laj-la. Alò éséyé vwè ki chanjman ou ni a fè é gadé ka ou pé fè pou fè sé chanjman-lasa, men pa konparé-w èvè lézòt (Gal. 6:4, 5).

10. Si ou ka santi kè ou po’o paré pou ba Jéova vi a-w é pou pran lèbatèm, ka pou-w fè ? (gadé ti karé-la « Pou moun ki lévé adan lavérité » osi).

¹⁰ Si ou ka santi kè ou po’o paré pou ba Jéova vi a-w, kontinyé travay pou ou atenn bèl òbjèktif-lasa. Priyé Jéova é mandé-w édé-w a fè tout sélézòt chanjman-la ou ni a fè la adan vi a-w (Fil. 2:13 ; 3:16). Ou pé sèten i ké kouté-w é i ké réponn-vou (1 Jan 5:14).

POUKWA SÈWTEN MOUN AN DÉ LIDÉ

11. Kijan Jéova ké édé-nou pou nou pé sa rété fidèl a-y ?

¹¹ Ni sèwten moun ki paré pou ba Jéova vi a yo é pou pran lèbatèm é poutan yo ka ézité. Pétèt yo ka di an tchè a yo : « Vinvwè an pran lèbatèm é kè aprésa an fè on péché ki grav, yo ké èskominyé-mwen. » Si vou osi sa ka fè-w pè, ou pé sèten kè Jéova ké ba-w tousa ou bizwen pou-w ‘maché on mannyè ki ka onoré-y é ki ka fè-y vréman plézi’ (Kol. 1:10). Anplisdisa i ké ba-w fòs pou ou pé sa fè sa ki byen. I ja édé onlo moun fè sa (1 Kor. 10:13). Dayè, sé tibwen pousa osi kè yo pa ka èskominyé tèlman moun. Asirésèten, Jéova ka édé-nou pou nou pé sa rété fidèl a-y.

12. Ka ki ké édé-w pou pa fè on péché ki grav ?

¹² Davwa nou enpawfè, noutout pé anvi fè dé biten ki pa bon (Jak 1:14). Kanmenmsa, lèwvwè on tantasyon ka vin touvé-w ou pé chwazi sa ou ké fè. Anfinaldikont sé vou ki ka désidé jan ou ké menné vi a-w. Onlo moun ka di kè nou pé pa métrizé sa nou ka rèsanti é sa nou ka fè men a pa vré. Ou pé aprann métrizé mové lanvi ou pé ni. É menmsi délè sé mové lidé-lasa ka wouvin, ou pa oblijé lésé-yo pran lanmen asi-w. Pousa priyé Jéova touléjou, pran labitid étidyé Pawòl a-y, ay réinyon é palé dè sa ou ka aprann èvè dòt moun. Konsa, sa ké ba-w fòs pou tchenn a mo a-w. É pa jen oubliyé kè Jéova ké édé-w fè sa osi (Gal. 5:16).

13. Ki bèl ègzanp Jozèf ka ban-nou ?

¹³ Si ou ja désidé alavans kijan ou ké réyaji siwvwè ou ka jwenn on tantasyon, ou ké rèspèkté pwomès-la ou fè Jéova la pi fasilman. Sé konsa onlo moun ki viv an tan a Labib fè é poutan yo osi yo té enpawfè. An-nou palé dè Jozèf. Madanm a Pitifa té ka éséyé fè bas èvè-y é madanm-la pa té ka lagé-y menm. Lè Jozèf touvé-y douvan pwoblèm-lasa, tousuit i té sav kijan pou i té réyaji. Bib-la ka di kè chakfwa madanm-la té ka vin dèyè do a-y « i té ka rèfizé » é mi sa i té ka di-y : « Kijan ou vlé an fè on mové biten konsa é an péché kont Bondyé ? » (Jén. 39: 8-10). Sa ka montré kè a pa lè madanm a Pitifa vin tanté Jozèf kè Jozèf gadé pou vwè ka i té’é réponn. I té ja réfléchi asi sa dépi avan sa fèt. Kifè, lè i vin touvé-y adan sitiyasyon-lasa, i té sav kijan pou i té aji.

14. Lèwvwè on mové biten ké tanté-w, ka ki ké édé-w pou-w pa lésé sa pran lanmen asi-w ?

¹⁴ Jozèf montré kè i té byen désidé a fè sa ki byen. Kijan ou pé imité-y ? Ében sé lè ou ka désidé dépi konnyéla ka ou ké fè lèwvwè ou ké touvé-w douvan on tantasyon. Dépi ou ka touvé-w douvan on biten Jéova hay, aprann di non tousuit é fè éfò pou pa menm sonjé sé biten-lasa ankò (Sòm 97:10 ; 119:165). Konsa lèwvwè ou ké jwenn on tantasyon, ou ké pé aji san pèd tan. Ou ké sav ègzaktèman ka pou-w fè, pas ou té ja réfléchi asi sa avan.

15. Kijan on moun pé montré kè i ka « chèché [Jéova] vréman » ? (Ébré 11:6).

¹⁵ Pétèt ou sav kè ou adan lavérité é ou vé sèvi Jéova èvè tout tchè a-w, men ou pa’a santi-w kè ou paré pou ba Jéova vi a-w é pou pran lèbatèm. Si sé ka a-w, ou pé fè kon wa David. Ou pé sipliyé Jéova. Mi sa ou pé di-y : « O Bondyé, ègzaminé-mwen pou ou pé sa konnèt sa ki an tchè an mwen. Ègzaminé-mwen, pou ou pé sa konnèt sa ki ka trakasé-mwen. Gadé pou ou vwè si i ni on biten ki pa bon andidan mwen, é menné-mwen asi chimen a létèwnité » (Sòm 139:23, 24). Jéova ka béni moun ki ka « chèché-y vréman ». Òbjèktif a-w, sé ba Jéova vi a-w é pran lèbatèm. É ou ké montré Jéova kè ou ka chèché-y vréman si ou ka fè éfò pou atenn òbjèktif-lasa (li Ébré 11:6).

KONTINYÉ VIN PI BON ZANMI ÈVÈ JÉOVA

16-17. Kijan Jéova pé fè on moun ki grandi adan lavérité vin owa a-y ? (Jan 6:44).

¹⁶ Jézi ni lokazyon di kè ponmoun pé pa vin disip a-y si Jéova pa ka atiré-y (li Jan 6:44). Mi on bèl biten mi ! Pran on ti tan pou réfléchi asi sa é gadé pou vwè kijan sa ka konsèwné-w. Lèwvwè Jéova ka fè on moun vin owa a-y, i ka vwè on biten ki bon andidan moun-lasa. Pou-y, moun-lasa sé « byen èspésyal a-y » kivédi on byen « ki ni onlo valè » (Dét. 7:6 ; nòt an fransé). Ében sé konsa Jéova ka vwè-w osi.

¹⁷ Men pétèt ou sé on jenn é manman-w é pap’a-w Témwen a Jéova. É pétèt ou ni lenprésyon kè ou ka suiv paran a-w é kè a pa Jéova ki fè-w vin owa a-y. Men Labib ka di : « Rapwoché-zòt dè Bondyé, é i ké rapwoché-y dè zòt » (Jak 4:8 ; 1 Kron. 28:9). Lè ou ka rapwoché-w dè Bondyé é kè sé voumenm a-w ki pran pwòp désizyon a-w, i ka rapwoché-y dè-w osi. Jéova pa’a vwè-w enki kon timoun a entèl. I ka atiré chakmoun owa a-y yonn pa yonn é sé sa i ka fè osi pou moun fanmi a yo Témwen a Jéova. Alò lèwvwè on moun ki grandi adan lavérité ka désidé rapwoché-y dè Jéova, Jéova ka fè ègzaktèman sa ki maké an Jak 4:8 (konparé èvè sa ki maké an 2 Tésalonisyen 2:13).

18. Ka nou ké vwè adan awtik-la ki ka vin la ? (Sòm 40:8).

¹⁸ Lèwvwè ou ka ba Jéova vi a-w é kè ou ka pran lèbatèm, sé imité ou ka imité mantalité a Jézi. I aksèpté volontyé fè tousa Pap’a-y té ka mandé-y fè (li Sòm 40:8 ; Ébr. 10:7). Adan awtik-la ki ka vin la, nou ké vwè ka ki ké édé-w kontinyé sèvi Jéova é rété fidèl apré ou pran lèbatèm.