« Kontinyé suiv Jézi » apré batèm a-w

1-2. Lèwvwè ou ka pran lèbatèm, ki bénédisyon ou ka risivwè ?

LÈWVWÈ on moun ka pran lèbatèm i ka rantré adan fanmi a Jéova é a pa ti kontan moun-lasa ka kontan. Aprézan i ni on bèl lonnè toubònman : i bon bon zanmi èvè Jéova. É sèten i dakò èvè sé pawòl-lasa David maké adan on Sòm : « Tchè-kontan pou moun-la ou ka chwazi la é kè ou ka fè vin owa a-w pou i pé sa rété an lakou a-w ! » (Sòm 65:4).

² A pa nenpòt kimoun Jéova ka aksèpté adan lakou a-y. Kon nou vwè-y simenn pasé, i ka vin bon zanmi èvè moun ki ka montré kè yo anvi vin bon zanmi èvè-y (Jak 4:8). Lè ou ka ba Jéova vi a-w é kè ou ka pran lèbatèm, ou ka vin ni on lyannaj èspésyal èvè Bondyé. Ou pé sèten kè aprésa, i ké ‘dévidé on bénédisyon asi-w joustan pa manké-w ayen’ (Mal. 3:10 ; Jér. 17:7, 8).

3. Ki rèsponsabilité on moun ki ba Jéova vi a-y é ki pran lèbatèm ni ? (Éklézyas 5:4, 5).

³ On biten ki sèten sé kè lè ou ka pran lèbatèm sé koumansé ou ka koumansé sèvi Jéova. Alèla, fò ou fè tousa ou pé pou viv annakò èvè pwomès-la ou fè la, menm lè ou ka touvé-w douvan on tantasyon oben on éprèv (li Éklézyas 5:4, 5). Davwa ou sé on disip a Jézi, fò ou suiv ègzanp a-y é fò ou fè tousa ou pé pou suiv komandman a-y osi (Mat. 28:19, 20 ; 1 Pyè 2:21). É sé sa awtik-lasa ké édé-w fè.

« KONTINYÉ SUIV JÉZI » MAGRÉ ÉPRÈV É TANTASYON OU KA JWENN

4. Lè Jézi di kè disip a-y té’é ni a pòté « poto-siplis » a yo, ka i té vlé di ojis ? (Lik 9:23).

⁴ Pa mèt an tèt a-w kè apré batèm a-w ou pé’é jwenn pon pwoblèm ankò. An réyalité, Jézi di kè chak disip a-y ké ni a pòté « poto-siplis » a-y. Anplisdisa, i di kè yo ké ni a fè sa « chak jou a vi » a yo (li Lik 9:23). Ès Jézi té vé di kè disip a-y té’é soufè akontinyé ? A pa sa menm i té vé di. Anfèt, i té vé fè disip a-y konprann kè a pa bénédisyon tousèl yo té’é jwenn, men yo té’é jwenn éprèv osi. Sèwten adan sé éprèv-lasa té’é rèd toubònman (2 Tim. 3:12).

5. Jézi pwomèt kè moun ki ka fè sakrifis ké jwenn bénédisyon. Ki bénédisyon ésa ?

⁵ Pétèt ni moun an fanmi a-w ki ja tigonné-w pas ou désidé sèvi Jéova. Oben pétèt ou désidé gangné mwens lajan é achté mwens biten pou mèt Wayòm-la prèmyé douvan adan vi a-w (Mat. 6:33). Si sé sa, ou pé sèten kè Jéova sav tousa ou ja fè pou-y (Ébr. 6:10). Jézi ni lokazyon di : « Pa ni ponmoun ki kité kaz, frè, sè, manman, papa, timoun, oben jaden, parapòt an mwen é parapòt a bon nouvèl-la, pou i pa risivwè, dépi konnyéla, san fwa plis kaz, frè, sè, manman, timoun é jaden, èvè pèwsékisyon osi, é pou i pa ni lavi étèwnèl adan mond-la ki ka vin la » (Mawk 10:29, 30). Sèten ou ja vwè sé pawòl-lasa an 2 zyé a-w. Tout sé bénédisyon-la ou risivwè la lontan pi bèl ki nenpòt ki sakrifis ou ja fè (Sòm 37:4).

6. Poukwa fò ou kontinyé goumé èvè « sa chè-la anvi » apré batèm a-w ?

⁶ Apré batèm a-w, fò ou kontinyé goumé èvè « sa chè-la anvi » (1 Jan 2:16). Anfèt, fò pa sa étoné-w pas ou enpawfè, alò menmsi on pran lèbatèm ou ké fè péché toujou. É sa pé rivé kè dépawfwa ou ka santi-w kon lapòt Pòl. Mi sa i maké : « Anfon a tchè an mwen, an vréman enmé lwa a Bondyé, men andidan kò an mwen ni ondòt lwa ki ka fè lagè èvè lwa-la ki an lèspri an mwen la é ki ka menné-mwen anba jouk a lwa a péché-la ki an kò an mwen la » (Wom. 7:22, 23). Pétèt fò ou ké kontinyé goumé èvè mové lanvi. Si sa ka dékourajé-w, sonjé pwomès-la ou fè la lè ou ba Jéova vi a-w. Ou ké ni plis fòs pou ou pa lésé tantasyon-la pran lanmen asi-w. Anfèt, pwomès-la ou fè la ké édé-w tchenbé douvan tantasyon. Kijansa ?

7. Lèfètkè ou ba Jéova vi a-w, sa ké édé-w rété fidèl a-y. Kijansa ?

⁷ Lè ou ka ba Jéova vi a-w, ou ka rènyé-w voumenm a-w. Sa vé di kè dépi on biten pa’a fè Jéova plézi, ki sé on biten ou anvi fè ki sé on òbjèktif ou té’é ni, ou pa’a kouri dèyè sa ankò (Mat. 16:24). Kifè, lè ou ké jwenn on éprèv, ou pé’é bizwen mandé-w ka pou-w fè. Ou ké ja chwazi kè ou ké rété fidèl a Jéova. Ou ké byen désidé a fè sa ki ka fè-y plézi. Ou ké fè menm biten ki Jòb. Magré sé gwo éprèv-la i jwenn la, i rété doubout pikan é mi sa i di : « An pé’é lagé fidélité an mwen ! » (Jòb 27:5).

8. Lè ou ka sonjé sa ou té di Jéova jou-la ou té ba-y vi a-w la, kijan sé pé édé-w lè ou ka jwenn tantasyon ?

⁸ Si ou ka sonjé sa ou té di Jéova jou-la ou té ba-y vi a-w la, sa ké ba-w fòs pou ou pé sa tchenbé lè ou ké jwenn tantasyon. Pa ègzanp, ès ou ké mèt-vou ka fè on moun ki mayé zyédou ? Awa ! Piskè ou té ja pwomèt Jéova kè ou pé’é jen fè on biten i hay. Si dépi lèwvwè on lidé ki pa pwòp ka vin an lèspri a-w ou ka pòté mannèv pou woté-y, i pé’é pran rasin andidan a-w, kifè ou pé’é ni a goumé pou raché-y apré. Konsa ou ké ba « chimen a sé méchan-la [...] do » (Pwov. 4:14, 15).

9. Lè ou ka sonjé kè ou di Jéova kè ou ba-y vi a-w, sa ka édé-w a mèt sèwvis a-w pou Jéova prèmyé douvan an vi a-w. Kijansa ?

⁹ É si yo ka pwopozé-w on travay ki ka anpéché-w pran réinyon a-w chak simenn ? Avan menm yo pwopozé-w on biten konsa, ou ké ja sav ka pou-w fè. Kifè ou pé’é bizwen pran tèt a-w pou éséyé sòti adan on sitiyasyon ki ka anpéché-w mèt Jéova prèmyé douvan. Si ou ka sonjé ègzanp a Jézi, ou ké byen désidé a fè Pap’a-w plézi pas ou ba-y vi a-w. Kon Jézi, ou pé’é fè ni yonn ni dé, ou ké mèt tousa Jéova hay akoté (Mat. 4:10 ; Jan 8:29).

10. Kijan Jéova ké édé-w pou-w kontinyé suiv Jézi apré batèm a-w ?

¹⁰ Lè ou byen gadé, sé éprèv-la é sé tantasyon-la ou ka jwenn la ka ba-w lokazyon montré jan ou byen désidé a ‘kontinyé suiv Jézi’. É toupannan ou ka fè sa, ou pé sèten kè Jéova ké édé-w. Mi sa Labib ka di : « Bondyé fidèl, é i pé ké jen lésé on tantasyon zò ka sibi ay pli lwen ki sa zò pé sipòté, men lè tantasyon-la ké rivé, i ké wouvè on pòt ba zòt, pou zò pé sa sipòté-y » (1 Kor. 10:13).

KA OU PÉ FÈ POU OU KONTINYÉ SUIV JÉZI

11. Nou pé suiv Jézi diféran mannyè. Bay yonn adan sé pi bèl la (gadé imaj-la osi).

¹¹ Jézi té ka suiv Pap’a-y èvè tout tchè a-y, é pou i té kontinyé rété kon bag é dwèt èvè Pap’a-y, i té ka priyé-y (Lik 6:12). Menmjan-la, pou ou pé sa kontinyé suiv Jézi apré batèm a-w, on biten ou pé fè sé kontinyé fè dé biten ki ké édé-w rété bon bon zanmi èvè Jéova. Mi sa Labib ka di : « Kèlkanswa kantité pwogré nou ja fè, an-nou kontinyé maché annòd adan menm dirèksyon-la » (Filip. 3:16). Délè ou pé tann kè sèwten frè é sè òwganizé-yo pou yo pé sa fè plis pou Jéova. Pétèt ni sa adan yo ki fè Lékòl pou évanjélizatè a Wayòm-la oben ni sa ki ay dé koté ka manké pwoklamatè. Si sitiyasyon a-w ka pèwmèt-vou, sa té’é byen si ou té ka chèché a atenn sé òbjèktif-lasa. Sèwvitè a Jéova ka chèché tout mwayen ki ni pou yo toujou fè plis ba-y (Akt 16:9). Men vinvwè ou pé pa fè sé biten-lasa konnyéla. Ka pou ou fè ? Pa mèt an tèt a-w kè ou pa ni pon valè. Sa ki pi enpòwtan pou on krétyen sé kè i kontinyé andiré (Mat. 10:22). On biten pou-w pa jen oubliyé sé kè lè Jéova ka vwè kè ou ka fè tousa ou pé pou sèvi-y kèlkèswa sitiyasyon a-w, a pa ti kontan i ka kontan. Sé on bon mwayen pou montré kè ou ka kontinyé suiv Jézi apré batèm a-w (Sòm 26:1).

12-13. Si ou ka rann-vou kont kè ou pa ni menm balan ki avan pou-w sèvi Jéova, ka pou-w fè ? (1 Korentyen 9:16, 17 ; gadé ti karé-la « Rété adan kous-la » osi).

¹² Vinvwè ou ka santi kè priyè a-w pa’a sòti an fon a tchè a-w, kè ou ka préché pou préché men ou pa’a pran plézi adan sa ankò, oben kè lè ou ka li Labib sa pa entérésan kon avan, ka pou-w fè ? Si sa ka rivé-w apré batèm a-w, pa mèt an tèt a-w kè Jéova pa ka ba-w lèspri sen a-y ankò. Davwa nou enpawfè, sa nou ka rèsanti pé chanjé toutlè. Si ou ka santi kè ou ka koumansé pèd balan a-w, pran tan réfléchi asi ègzanp a lapòt Pòl. I toujou té ka éséyé imité Jézi, men limenm té ka rann-li kont kè délè i pa té tèlman anvi fè sa (li 1 Korentyen 9:16, 17). Mi sa i di : « Si an ka fè-y pas an oblijé fè-y, ki an vé ki an vé pa sé on rèsponsabilité yo ban-mwen. » Savédi kè Pòl té byen désidé a kontinyé travay pou Bondyé menmsi délè i pa té gè anvi fè sa.

¹³ Kon lapòt Pòl, pa fèfon enki asi sa ou ka rèsanti pou pran on désizyon pas nou enpawfè. Fò ou byen désidé a fè sa ki byen menmsi ou pa tèlman anvi fè sa. Si ou kontinyé fè sa ki byen, ou ké vwè, piti-a-piti, ou pé’é rèsanti menm biten-la ankò. On biten ki sèten, sé kè si ou ka kontinyé fè dé biten pou ou rété bon zanmi èvè Jéova apré batèm a-w, sa ké édé-w kontinyé suiv Jézi. É lè frè é sè a-w ké vwè éfò ou ka fè pou sèvi Jéova akontinyé, sa ké ba-yo bon fòs (1 Tés. 5:11).

« KONTINYÉ VÉRIFYÉ KI JAN DÈ MOUN KÈ ZÒTMENM YÉ »

14. Asi ki biten pou-w pran labitid réfléchi é poukwa fò ou fè sa ? (2 Korentyen 13:5).

¹⁴ Si menm apré batèm a-w ou ka analizé-w é kè sa ka vin on labitid ba-w, sa ké pwokiré-w onlo byenfé (li 2 Korentyen 13:5). Pa ègzanp, sèten ou ka priyé, ou ka li Bib a-w, ou ka étidyé tousèl a-w, ou k’ay an réinyon é ou k’ay préché. Men ès ou ka rivé fè sa toutlè ? Sa té’é byen si dè tanzantan ou té ka gadé si ou ka fè sa byen konm i fo. Lè ou ka fè sé biten-lasa, sé adoré ou ka adoré Jéova, alò fè ansòt pou tout sé biten-lasa mèt plis jwa an tchè a-w ankò é kè sa pwokiré-w plis byenfé ankò. Pousa, mi sa pou-w mandé-w : « Lè fò-mwen èspliké on moun dé vérité ki fondal adan Bib-la, ès an ka rivé fè-y byen konm i fo ? Ka pou an fè pou an préché èvè plis jwa ? Lè an ka priyé, ès an ka di Jéova dé biten byen prési é ès sa ka montré kè an ka fè fon asi-y a san pou san ? Ès an k’ay réinyon chak simenn ? Kijan an pé fè ansòt pou an pi konsantré asi sa yo ka di an réinyon é ka an pé fè pou lè an bay on ti komantè sa ankourajé frè é sè an mwen plis ? »

15-16. On frè touvé-y douvan on tantasyon é i kenbé. Ka sa ka aprann-vou ?

¹⁵ Sa té’é byen kè ou analizé-w franchman pou vwè ki biten ou ni a travay. Sé sa on frè non a-y sé Robert fè. Mi sa i ka rakonté : « An té ni apépré 20 an é an té ka travay. On jou on fi ki té ka travay èvè mwen vin vwè-mwen apré travay-la é i envité-mwen akaz a-y. I di-mwen kè nou té’é tousèl é kè nou té’é pasé on bon moman. Odépa an enn di-y on biten men an pa èspliké-y vréman poukwa an pa té vlé. » Robert pa lésé tantasyon-la pran lanmen asi-y é sé on bon biten. Men pita, i sonjé sa ki té pasé é i rann-li kont kè i té pé jéré sitiyasyon-la ondòt jan. I ka di : « An pa réyaji kon Jozèf réyaji lèwvwè madanm a Pitifa té dèyè do a-y. An té two mòl é an pa réyaji tousuit (Jén. 39:7-9). Anfèt, lèwvwè an konstaté kijan an té ni dimal a rèfizé, sa siwprann-mwen. Sa ki pasé édé-mwen vwè kè an té bizwen konsolidé lanmityé an mwen èvè Jéova. »

¹⁶ Pétèt kè si ou éséyé pran on ti tan pou analizé-w menmjan ki Robert, sa té’é fè-w dibyen. Menm lè ou pa lésé on tantasyon pran lanmen asi-w, mi sa pou mandé-w : « Konmen tan an pran avan an té di non ? » Si ou ka rann-vou kont kè ou té pé fè myé ki sa, pa lésé sa dékourajé-w. Okontrè, ou pé kontan pas ou vwè ki biten ou ni a travay. Palé Jéova dè sé biten-lasa, é fè sa ki fo pou ou ni plis balan pou fè sa Jéova ka mandé (Sòm 139:23, 24).

17. Robert rété fidèl a Jéova. Kijan sa aji asi non a Jéova ?

¹⁷ Ègzanp a Robert pé aprann-nou ondòt biten ankò. Mi sa i ka di : « Lè an di kolèg an mwen non, i rété é i di-mwen : “Poo, ou pa tonbé an zatrap-la !” Alò an mandé-y ka i té vlé di pa la. I di-mwen kè i ni on zanmi ki té Témwen avan ki di-y kè tout sé jenn Témwen la ka fè onlo biten anba fè-y é kè si yo ka touvé on lokazyon pou fè on mové biten é kè ponmoun pa suiv sa, yo ké fè-y. Alò i di zanmi a-y kè i té’é éséyé pyéjé-mwen pou vwè si an té konsa osi. Zò ka imajiné, an ba non a Jéova lonnè ! A pa ti kontan an té kontan ! »

18. Ka ou byen désidé a fè ? (gadé ti karé-la « Dé awtik kè ou ké touvé agou a-w »).

¹⁸ Lè ou ka ba Jéova vi a-w é kè ou ka pran lèbatèm, ou ka montré kè sa ki pi enpòwtan ba-w sé kè non a Jéova vin sen. Ou pé sèten kè i sav ki éprèv é ki tantasyon ou ka jwenn. I ké béni sé éfò-la ou ka fè la pou rété fidèl a-y. É ou pé sèten kè grasa lèspri sen a-y, i ké ba-w fòs pou-w rivé fè sa (Lik 11:11-13). Grasa èd a-y, ou ké pé kontinyé suiv Jézi apré batèm a-w.