AWTIK POU ÉTIDYÉ 28
KANTIK 123 Fidèlement soumis à l’ordre théocratique
Ès ou kapab rèkonnèt ka ki lavérité ?
« Kenbé rèd, maré ren a zòt èvè senti a lavérité » (ÉFÉZ. 6:14).
ON TI LIDÉ ASI SA NOU KAY VWÈ
Jéova anségné-nou lavérité men Satan é sé moun-la ki kont nou la ka simé onpakèt manti. Ka pou nou fè pou nou pa pran yonn pou lòt ? Sé sa nou ké ègzaminé.
1. Ka ou ka rèsanti difètkè ou konnèt lavérité ?
NOU ki ka sèvi Jéova, nou enmé vérité-la nou ka touvé adan Bib-la. Fwa an nou bazé asi vérité-lasa (Wom. 10:17). Nou sèten kè Jéova mèt lasanblé-la si pyé pou i kon « on poto-mitan ki ka soutyenn lavérité » (1 Tim. 3:15). É nou ka soumèt-nou èvè tchè-kontan douvan ‘séla ki ka dirijé-nou la’, pas yo ka èspliké-nou sé vérité-la ki adan Bib-la é pas yo ka ban-nou konsèy ki annakò èvè sa Bondyé vé (Ébr. 13:17).
2. Dapré sa Jak 5:19 ka di, ka ki pé rivé-nou menmsi nou ja aksèpté lavérité ?
2 Men, menmsi nou aksèpté lavérité é kè nou ka rèkonnèt kè nou bizwen suiv dirèksyon-la Jéova ka ban-nou la grasa òwganizasyon a-y, nou pé rivé a pèd chimen (li Jak 5:19). Sa pou nou pa jen oubliyé sé kè sa Satan vé, sé kè nou arété fè Labib konfyans é kè nou arété fè dirèksyon-la òwganizasyon-la ka ban-nou la konfyans (Éféz. 4:14).
3. Poukwa sa enpòwtan kè nou toujou obéyi a sé vérité-la ki an Bib-la ? (Éfézyen 6:13, 14).
3 (Li Éfézyen 6:13, 14.) Talè, Dyab-la ké fè onpakèt manti monté-é-désann pou monté tèt a moun ki asi tout latè pou yo viré kont Jéova (Rév. 16:13, 14). Anplisdisa, nou pé sèten kè pi tan ké pasé, é pi i ké pòté mannèv pou kouyonné sèwvitè a Jéova (Rév. 12:9). Alò sa enpòwtan kè nou aprann rèkonnèt ka ki lavérité é ka ki on manti é sa enpòwtan osi kè nou obéyi a sé vérité-la ki an Bib-la (Wom. 6:17 ; 1 Pyè 1:22). Sé si nou ka fè sa, nou ké rivé pasé gwo tribilasyon-la vivan !
4. Ka nou ké vwè adan awtik-lasa ?
4 Adan awtik-lasa, nou ké palé dè 2 kalité nou bizwen ni pou nou rivé rèkonnèt vérité-la ki adan Bib-la é pou nou aksèpté suiv dirèksyon-la é sé konsèy-la òwganizasyon a Jéova ka ban nou la. Aprésa, nou ké palé dè 3 biten pou nou fè si nou vé rété byen chouké adan lavérité.
KI KALITÉ NOU BIZWEN NI POU NOU RÈKONNÈT KA KI LAVÉRITÉ
5. Lè nou ka krenn Jéova, sa ka édé-nou rèkonnèt ka ki lavérité. Kijansa ?
5 Krenn Jéova. Lèwvwè ou ka krenn Jéova, tèlman ou enmé-y ou pé’é jen fè ayen ki té’é pé fè-y lapenn. Konm nou ka krenn Jéova, é konm nou anvi fè-y plézi, nou anvi konnèt ka ki byen é ka ki mal é nou anvi konnèt osi ka ki on vérité é ka ki on manti (Pwov. 2:3-6 ; Ébr. 5:14). Men fò-nou fè atansyon pou nou pa krenn lézòm plis ki nou enmé Jéova. Si nou ka fè sa, sé moun nou ka fè plézi, é pli souvan ki rarman, lè nou ka fè moun plézi, nou ka fè Jéova lapenn.
6. Konm sé 10 èspyon izraélit la té pè moun, sa fè-yo di dé biten ki pa té vré. Kijansa ?
6 Si nou ka krenn Jéova men kè nou pi pè sé moun-la ki alantou an nou la, nou pé mèt-nou ka kwè dé biten ki pa annakò èvè sé vérité-la Jéova ka ban-nou la. An-nou palé dè sé 12 èspyon-la ki té pati pou ay vwè péyi-la Jéova té pwomèt sé Izraélit-la. Youtout té enmé Jéova é yo té ka fè-y konfyans. Men ni 10 adan yo ki trapé lafrous douvan sé Kananéyen-la, kifè yo arété kouté Jéova. Alò mi sa yo di sélézòt Izraélit-la : « Nou pé pa ay goumé èvè pèp-lasa, pas i pi fò ki nou » (Nonb 13:27-31). Sé vré kè si nou ka bazé-nou asi sa nou ka vwè an 2 zyé an nou, nou ké di kè sé Kananéyen-la té lontan pi fò ki sé Izraélit-la. Men pou on moun di kè sé Izraélit-la pa té’é jen gangné sé Kananéyen-la, moun-lasa pa’a sonjé Jéova. Sé 10 èspyon-la té dwèt sonjé ka Jéova té ka mandé sé Izraélit-la fè. Yo té dwèt sonjé osi sa Jéova té sòti fè pou yo. Siwvwè yo té pran tan fè sa, yo té’é vwè byen kè sé Kananéyen-la sé ti afè koté Jéova. Jéova sé Bondyé toupuisan la. Joziyé é Kalèb pa rézonné kon sélézòt èspyon-la ki pa té ni fwa an Jéova. Yo, yo té vé fè Jéova plézi. Mi sa yo di pèp-la : « Si nou ka fè Jéova plézi, asirésèten i ké fè-nou rantré adan péyi-lasa é i ké ban-nou-y » (Nonb 14:6-9).
7. Ka pou nou fè pou nou krenn Jéova plis ankò ? (gadé imaj-la osi).
7 Pou nou pé sa krenn Bondyé plis ankò, fò-nou chèché a fè-y plézi chakfwa nou ka pran on désizyon (Sòm 16:8). Lèwvwè ou ka li sé istwa-la ki an Bib-la, mi sa pou mandé-w : « Si sé mwen ki té adan sitiyasyon-lasa, ki désizyon an té’é pran ? » Pa ègzanp, imajiné kè ou té pawmi sé moun-la ki té ka kouté sé 10 èspyon-la rakonté kè sé Izraélit-la pa té’é jen pé pran péyi a Kanaan. Ès ou té’é kwè-yo é ès ou té’é lésé lapè pran lanmen asi-w ? Oben menmsi ou pè, ès ou té’é kontinyé montré Jéova kè ou enmé-y é kè ou anvi fè-y plézi ? Tout on jénérasyon a moun ki té adan pèp a Izrayèl pa rivé rèkonnèt kè Joziyé é Kalèb té ka di lavérité. É anfinaldikont, akòz dè sa, Jéova pa lésé-yo rantré adan péyi-la i té pwomèt-yo la (Nonb 14:10, 22, 23).
Kimoun ou té’é kwè ? (gadé paragraf 7 la).
8. Fò-nou fè éfò pou nou travay on kalité. Ki kalité ésa é poukwa fò-nou fè sa ?
8 Fò-nou ni imilité. Jéova ka fè ansòt pou moun ki ni imilité konnèt vérité-la (Mat. 11:25). Nou té bizwen ni imilité pou nou té aksèpté kè yo édé-nou konprann sé vérité-la ki an Bib-la (Akt 8:30, 31). Men fò-nou véyé-nou pou lòwgèy pa pran lanmen asi nou. Pas siwvwè nou lésé sa rivé-nou, nou pé rivé a kwè kè sa nou ka pansé ni menm valè ki sé prensip-la ki an Bib-la oben ki dirèksyon-la òwganizasyon a Jéova ka ban-nou la.
9. Ka nou pé fè pou nou kontinyé aji èvè imilité ?
9 Pou nou kontinyé aji èvè imilité, fò nou sonjé jan nou toupiti parapòt a Jéova (Sòm 8:3, 4). On biten nou pé fè osi, sé mandé Jéova édé-nou pou nou aji èvè plis imilité é pou nou vin on moun ki toujou paré a aprann plis biten. Jéova ka sèvi èvè Pawòl a-y é èvè òwganizasyon a-y pou fè-nou sav ka i ka pansé. I ké édé-nou pou nou ba sa i ka pansé plis valè ki sa nou nou ka pansé. Lè ou ka li Bib-la, éséyé chèché adan pasaj-la ka ki ka montré kè Jéova enmé moun ki ni imilité é kè i hay moun ki ni òwgèy é ki ka akwè-yo. É si yo ka ba-w on rèsponsabilité adan lasanblé-la é kè parapòt a sa, moun ka rèmawké-w, sé a moman-lasa pou ou kontinyé ni imilité.
KIJAN NOU PÉ TCHENBÉ LAVÉRITÉ É FÈ ANSÒT POU NOU PA JEN LAGÉ-Y
10. Èvè kimoun Jéova sèvi pou di pèp a-y ka pou i té fè é pou i té ba-y on dirèksyon ?
10 Toujou fè òwganizasyon a Jéova konfyans lè i ka ban-nou on dirèksyon. An tan lontan an Izrayèl, Jéova sèvi èvè Moyiz é èvè Joziyé pou di pèp a-y ka i té vé yo fè (Joz. 1:16, 17). Lèwvwè sé Izraélit-la té ka rèkonnèt kè sé Bondyé ki té chwazi Moyiz é Joziyé pou rèprézanté-y, zafè a pèp-la té ka maché. Plizyè syèk apré, lè yo fòwmé lasanblé-la, sé sé 12 apòt-la Jéova té ka itilizé pou dirijé lasanblé-la (Akt 8:14, 15). Aprésa, dòt ansyen ki té Jérizalèm vin fè pawti a gwoup-lasa. Konm sé lasanblé-la té ka suiv dirèksyon-la sé nonm fidèl lasa té ka ba-yo, « sé lasanblé-la té ka kontinyé vin pli solid adan lafwa é jou apré jou yo té ka kontinyé gwosi » (Akt 16:4, 5). Jòdila osi, lèwvwè nou ka suiv dirèksyon-la òwganizasyon a Jéova ka ban-nou la, Jéova ka béni-nou. Men ka Jéova té’é rèsanti siwvwè nou té ka rèfizé soumèt-nou douvan sé moun-la i chwazi la pou dirijé-nou ? Pou réponn a kèsyon-lasa, an-nou gadé sa ki pasé lèwvwè sé Izraélit-la té an chimen pou ay adan Péyi-la Bondyé té pwomèt-yo la.
11. Jéova té chwazi Moyiz pou i té gidonné pèp a-y, men ni moun an pèp-la ki pa té dakò èvè sa. Ka ki rivé sé moun-lasa ? (gadé imaj-la osi).
11 Toupannan sé Izraélit-la té an chimen pou ay adan Péyi-la Bondyé té pwomèt-yo la, sèwten nonm ki té ni gwo rèsponsabilité ba Moyiz do. Jéova té chwazi Moyiz pou i té gidonné pèp a-y, men yo pa té dakò èvè sa. Mi sa yo té ka di : « Tout sé moun-la ki adan pèp-la sé dé moun ki sen, [a pa enki Moyiz], yotout sen, é Jéova anmitan a yo » (Nonb 16:1-3). Menmsi « tout sé moun-la ki adan pèp-la » té sen pou Jéova, sé Moyiz i té chwazi pou gidonné pèp a-y (Nonb 16:28). Lèwvwè sé rèbèl-la mèt-yo ka kritiké Moyiz, an réyalité, sé Jéova yo té ka kritiké. Yo pa té ka sousyé-yo dè sa Jéova té vlé, men sèl biten ki té ka entérésé-yo, sé sa yo yo té vé. Yo té ka chèché a ni plis pouvwa é yo té vlé moun pòté-yo anlè. Jéova tchouyé touséla ki té an tèt a sé rèbèl-lasa, é i tchouyé onpakèt dòt Izraélit ki té ka soutyenn-yo osi (Nonb 16:30-35, 41, 49). Nou pé sèten kè sé menm biten jòdijou. Jéova pa dakò èvè moun ki ka dérèspèkté disposizyon òwganizasyon a-y ka pran.
Kimoun ou té’é soutyenn ? (gadé paragraf 11 la).
12. Poukwa nou pé kontinyé fè òwganizasyon a Jéova konfyans ?
12 Nou pé kontinyé fè òwganizasyon a Jéova konfyans. Lè Jéova ka fè sé frè-la ki antèt a òwganizasyon-la vwè kè fò-nou chanjé mannyè nou té ka konprann on ansègnman oben kè fò-nou òwganizé aktivité an nou ondòt jan, yo ka fè-y san pèd tan (Pwov. 4:18). Yo ka aji konsa pas sa ki pi enpòwtan pou yo, sé fè Jéova plézi. Lè yo ka pran on désizyon osi, yo ka fè tousa yo pé pou yo toujou bazé désizyon-lasa asi Labib pas sé li pou tout sèwvitè a Jéova suiv.
13. Ki biten pou nou kontinyé suiv ?
13 « Kontinyé suiv sé bon pawòl-la » (2 Tim. 1:13). Lè yo ka palé dè « sé bon pawòl-la », sé pou palé dè tousa Jézi anségné é dè tout sé ansègnman-la nou ka touvé adan Bib-la (Jan 17:17). Tout kwayans an nou bazé asi sé ansègnman-lasa. Òwganizasyon a Jéova montré-nou kijan nou pé tchenbé vérité-la é fè ansòt pou nou pa jen lagé-y. Toutotan nou ké kontinyé fè sa, Jéova ké béni-nou.
14. Kijan sèwten krétyen arété « suiv sé bon pawòl-la » ?
14 Si nou arété « suiv sé bon pawòl-la », ka ki pé rivé-nou ? An-nou palé dè sa ki fèt o 1é syèk. Sèwten krétyen té ka di kè jou a Jéova té rivé é yo té ka fè sé pawòl-lasa monté-é-désann adan lasanblé-la. Pétèt yo té ka simé sé pawòl-lasa, akòz dè on lèt kè lapòt Pòl té maké swadizan. San menm yo vérifyé si sa té vré, sèwten krétyen Tésalonik pran sa pou lajan-kontan é yo jous ay répété sa ba dòt moun. Si yo té sonjé sa lapòt Pòl té anségné-yo lè i té èvè yo, yo pa té’é lésé moun kouyonné-yo (2 Tés. 2:1-5). Sé pousa Pòl té di-yo kè fò pa yo té kwè tousa yo té ka tann. É pou yo pa woufè menm érè-la, mi sa i di an fen a 2è lèt a-y : « Mi konsa an ka di bonjou, mwen Pòl, an ka maké sa èvè pwòp men an mwen ; sé grasa sa zò ké rèkonnèt chak sé lèt-la an maké la ; sé konsa an ka ékri. » (2 Tés. 3:17).
15. Lè ni enfòwmasyon ki ka monté-é-désann é kè yo ka sanmsa yo vré, kijan nou pé pwotéjé-nou ? Bay on ègzanp (gadé sé imaj-la osi).
15 Ka sé pawòl-la Pòl maké ba sé Tésalonisyen-la ka aprann-nou ? Lèwvwè nou ka tann moun ka palé dè on biten ki pa annakò èvè sa Labib ka di, oben kè nou ka tann on biten ki ka fè-w mèt men si tèt, fò-nou aji èvè sajès. On jou, adan sa yo té ka kriyé Linyon sovyétik avan, lenmi an nou ba frè an nou on lèt ki té ka vin dè biwo mondyal la swadizan. Lèt-lasa té ka di sé frè-la kè fò-yo té mèt-yo apa parapòt a òwganizasyon a Jéova é kè fò-yo té mèt pwòp òwganizasyon a yo si pyé. Lè ou té ka gadé lèt-lasa, ou pa té’é jen di kè a pa té sé frè a biwo mondyal la ki té voyé-y. Men sé frè-la pa pri adan zatrap-lasa, pas sa lèt-la té ka di-yo la pa té annakò èvè sa yo té aprann adan Bib-la. Jòdijou osi, lènmi an nou pé sèvi èvè dé biten kon Entèwnèt é sé rézo sosyo la pou yo éséyé kouyonné-nou é pou yo mèt divizyon adan pèp a Bondyé. Alò olyé nou ‘lésé sé biten-lasa chouboulé-nou é fè-nou pèd bon jijman an nou’, an-nou pwotéjé-nou é an-nou mandé-nou si sa yo ka di la oben sa yo maké la annakò èvè sa nou aprann adan Bib-la (2 Tés. 2:2 ; 1 Jan 4:1).
Menmsi ou ni lenprésyon sèwten enfòwmasyon vré, pa enki pran sa pou lajan-kontana (gadé paragraf 15 la).
16. Dapré Women 16:17, 18, ka pou nou fè siwvwè sèwten moun ka lagé lavérité ?
16 Rété soudé èvè moun ki fidèl a Jéova. Jéova vé sèwvitè a-y ini lè yo ka adoré-y. Nou ké rété ini toutotan nou ka tchenbé vérité-la é kè nou pa ka lagé-y. Séla ki ka lagé vérité-la ka divizé lasanblé-la. Sé pousa Bondyé ka di-nou « ba-yo gran lè a yo ». Sinon, noumenm an nou osi, nou pé rivé a lagé lavérité (li Women 16:17, 18).
17. Poukwa sa enpòwtan kè nou rivé rèkonnèt ka ki lavérité é kè nou pa jen lagé-y ?
17 Si nou kapab rèkonnèt lavérité é kè nou pa ka lagé-y, nou ké rété bon bon zanmi èvè Jéova é fwa an nou ké rété solid (Éféz. 4:15, 16). Nou pé’é lésé ni sé fo-ansègnman-la, ni sé manti-la Satan ka simé la kouyonné-nou nonplis. É nou ké rété anba zèl a Jéova pannan gwo tribilasyon-la. Alò, pa jen lagé lavérité, konsa ‘Bondyé a lapé la ké èvè-w’ (Filip. 4:8, 9).
KANTIK 122 Soyons fermes, inébranlables !
a SA NOU KA VWÈ ASI IMAJ-LA : Asi imaj-la, yo rèprézanté sé frè-la ki té ka viv an tan a Linyon sovyétik. Yo rèsèvwa on lèt é i té ka sanmsa i té ka vin dè biwo mondyal la, men sé lènmi an nou ki té voyé-y. A épòk an nou, délè lènmi an nou ka sèvi èvè Entèwnèt pou fè enfòwmasyon asi òwganizasyon a Jéova monté-é-désann alòskè sé manti yo ka manti.