Sa Jéova fè pou nou pa touvé-nou anba jouk a péché-la ankò

1-2. a) Lè nou ka palé dè péché, dè kibiten nou vlé palé ojis é kijan nou pé goumé èvè-y ? (gadé nòt-la « Pou nou byen konprann » osi). b) Dè kibiten nou ké palé adan awtik-lasa é adan sélézòt awtik-la ki adan Tou dè Gad lasa ? (gadé nòt-la ki adan paj 32 la osi, tit a-y sé « Pou moun ki ka li piblikasyon an nou »).

JÉOVA enmé-w. Ès ou té’é enmé sav ki fòs a lanmou-lasa ? Pou ou pé sa ni on ti lidé asi sa, ou pé chèché a konnèt ka Jéova fè pou woté-w anba jouk a péché-la é anba jouk a lanmò. Péché-laa ka touvé-y kon lènmi kè ou pé pa rivé gangné tousèl a-w. Chakjou Bondyé fè jou, noutout ka fè péché, é sé parapòt a péché-la noutout ka mò (Wom. 5:12). Men Jéova ka ban-nou on garanti : i ké woté-nou anba péché-la é anba lanmò. Nou pé sèten dè sa.

² Sa ka fè 6 000 an apépré Jéova ka édé lézimen goumé èvè péché-la. Poukwa i ka fè sa ? Sé pas i enmé-nou. Dépi jou-la i kréyé 1^é misyé-la é 1^é madanm-la, i enmé-nou. Sé pousa i ka pòté bon mannèv konsa pou édé-nou lè nou ka péché. I sav kè sé akòz dè péché-la si nou ka mò, é i vé pa ponmoun pèd vi a-y. Okontrè, i vé nou viv pou touttan (Wom. 6:23). É sé sa i vé pou vou osi. Adan awtik-lasa, nou ké réponn a 3 kèsyon : 1) Ka Jéova fè pou ba moun ki ka fè péché on èspwa ? 2) An tan lontan, kijan moun ki enpawfè rivé fè Jéova plézi ? 3) Ka Jézi fè pou woté-nou anba péché-la ?

KI BÈL ÈSPWA JÉOVA KA BA MOUN KI KA FÈ PÉCHÉ ?

3. Kijan Adan é Èv touvé-yo anba jouk a péché-la ?

³ Lè Jéova fè 1^é misyé-la é 1^é madanm-la, Adan é Èv, i té vé yo ni tchè-kontan. I ba-yo on bèl ti koté pou yo rété é i fè-yo on bèl ti kado : i mayé-yo. I ba-yo osi on travay a fè ki té entérésan toubònman. Fò yo té plen latè èvè pitit a yo, é fò yo té fè toutlatè vin on paradi kon Jadendédèn-la. Onsèl biten Jéova té défann-yo fè. I avèti-yo é i di-yo kè siwvwè yo pa té ka kouté, é kè yo té ka ba-y do, yo té’é mò. Nou ja konnèt sa ki pasé apré. On zanj méchan ki pa té enmé ni lézimen ni Bondyé pousé Adan é Èv pa kouté Bondyé é malérèzman sé sa menm yo fè. Olyé yo té fè Pap’a-yo ki té enmé-yo konfyans, yo té préféré péché pito. Jéova té ja avèti-yo. Konmdi-konmfèt, jou-la yo péché la, yo koumansé vin vyé é yo fin pa mò (Jén. 1:28, 29 ; 2:8, 9, 16-18 ; 3:1-6, 17-19, 24 ; 5:5).

4. Poukwa Jéova hay péché-la é poukwa i ka édé-nou vin zanmi èvè-y ? (Women 8:20, 21).

⁴ Si Jéova mèt istwa-lasa adan Pawòl a-y, sé pou nou konprann on biten enpòwtan. Sa ka édé-nou konprann poukwa Jéova hay péché-la konsa. Péché-la ka anpéché-nou rété bon zanmi èvè Jéova é i ka menné-nou a lanmò (Iz. 59:2). Satan hay Jéova é i hay lézimen osi. Sé pousa i fè tousa i té pé pou Adan é Èv té péché, é jousalè sé sa i ka fè èvè lézimen. Pétèt kè lè Adan é Èv péché, Satan dwèt konpranndèdi i té réyisi mèt baton an wou a Jéova anrapò èvè pwojé a-y pou lézimen. Men i pa té ka imajiné jan Jéova enmé-nou. Jéova pa té’é jen chanjé pwojé-la i té ni la pou pitit a Adan é Èv. Davwa i enmé lézimen, i fè ansòt pou i ba-yo on èspwa onfwamenm (li Women 8:20, 21). I té sav kè ni sèwten adan yo ki té’é enmé-y é ki té’é chèché èd a-y pou goumé èvè péché-la. Konm i sé Pap’a yo é Kréyatè a yo, i fè ansòt pou yo pé sa vin zanmi a-y é pou i woté-yo anba péché-la é anba lanmò. Kijan i fè sa ?

5. Apré Adan é Èv péché, ki èspwa Jéova ba limanité ? (Jénèz 3:15).

⁵ (Li Jénèz 3:15.) Tousuit apré Adan é Èv péché, Jéova di kè i ké détwi Satan é sa ba limanité on èspwa. Bondyé anonsé kè on « pitit a pitit » a Adan té’é sové limanité. Pitit-lasa té’é krazé Satan é i té’é réglé tout pwoblèm Satan mèt asi latè dépi an Jadendédèn-la (1 Jan 3:8). Men avan sa fèt, Satan té’é blésé pitit-lasa é pitit-lasa té’é fin pa mò. Sa té’é fann tchè a Jéova. Men Jéova té’é paré a soufè é i té’é lésé pitit-lasa soufè osi pou woté limanité anba jouk a péché-la é anba jouk a lanmò.

KIJAN MOUN KI PÉCHÉ É KI TÉ KA VIV AN TAN A LABIB RIVÉ FÈ JEOVA PLÉZI ?

6. Ka Noé, Abèl é dòt moun fidèl fè pou vin zanmi a Jéova ?

⁶ Piti-a-piti, Jéova montré kè moun ki ka fè péché pé vin zanmi a-y. Abèl, 2^èm gason a Adan é Èv, sé té prèmyé moun asi latè ki té ni fwa adan Jéova apré sa ki pasé adan Jadendédèn-la. Konm i té enmé Jéova, kè i té ka chèché a fè-y plézi é a vin zanmi a-y, i fè on sakrifis ba-y. Abèl té bèwjé alò i tchouyé déotwa timouton i té ni la pou ba Jéova. Kijan Jéova réyaji lè i vwè sa ? I « aksèpté Abèl é ofrann-la i fè la » (Jén. 4:4). Aprésa, dòt moun ki té enmé-y é ki té ka fè-y konfyans, kon Noé pa ègzanp, fè sakrifis ba-y é i aksèpté sé sakrifis-lasa (Jén. 8:20, 21). Davwa Jéova aksèpté sakrifis a yo, i montré kè magré péché yo ka fè, lézimen pé fè-y plézi é vin zanmi a-yb.

7. Abraam té dakò pou sakrifyé gason a-y. Ka sa ka montré-nou ?

⁷ Jéova mandé Abraam, on nonm ki té ni onlo fwa, fè on biten ki té rèd toubònman. I mandé-y sakrifyé gason a-y, Izaak. Mésyé, sèten pa té ni pon biten ki té’é pé raché tchè a Abraam plis ki sa. Men i fè tousa Bondyé té mandé-y fè. É lèwgadé, pannan i té kay tchouyé gason-la, Jéova anpéché-y fè sa. Jéova té sav jan tchè a Abraam té’é sengné si i té tchouyé gason a-y. Ègzanp-lasa ka montré-nou ka Jéova té’é fè apré. I té’é dakò pou sakrifyé Gason-la i té pi enmé la. A pa ti enmé Jéova enmé lézimen ! (Jén. 22:1-18).

8. Ka Lwa-la ka édé-nou konprann ? (Lévitik 4:27-29 ; 17:11).

⁸ Lè Jéova ba sé Israélit-la Lwa-la, i mandé-yo sakrifyé zannimo pou i pé sa padonné péché a yo (li Lévitik 4:27-29 ; 17:11). Sé sakrifis-lasa té ka montré kè Jéova té’é fè on pi gwo sakrifis ankò, on sakrifis ki té’é woté-nou anba jouk a péché-la poudèbon. Jéova mandé pwofèt a-y maké dé biten anrapò èvè pitit-la i té pwomèt la, kivédi pwòp Gason a-y. Sé pwofèt-la èspliké kè gason-lasa té’é soufè é i té’é mò. Yo té’é tchouyé-y kon lèwvwè yo ka sakrifyé on timouton (Iz. 53:1-12). Ou ka imajiné ? Jéova té kay sakrifyé Gason a-y kè i té enmé pou woté-nou anba péché-la é anba lanmò, é i fè sa pou vou osi !

KA JÉZI FÈ POU WOTÉ-NOU ANBA JOUK A PÉCHÉ-LA ?

9. Ka Jan Lèbatis di anrapò èvè Jézi ? (Ébré 9:22 ; 10:1-4, 12).

⁹ O 1^é syèk, lèwvwè Jan Lèbatis vwè Jézi, mi sa i di : « Gadé : Timouton a Bondyé ki ka woté péché a mond-la ! » (Jan 1:29). Sé pawòl-la i di la té ka montré kè Jézi sé té pitit-la Jéova té pwomèt la. Sé-y ki té’é sakrifyé vi a-y. Anfinaldikont, pitit-la Jéova té voyé la parèt pou woté limanité anba jouk a péché-la poudèbon (li Ébré 9:22 ; 10:1-4, 12).

10. Jézi di kè i té vin pou édé moun ki ka menné on vyé vi. Kijan i montré sa ?

¹⁰ Jézi té ka édé toutmoun, men moun i té ka édé menm, sé moun ki té ka santi-yo tris parapòt a péché yo té ka fè. I mandé-yo si yo té anvi vin disip a-y. I té sav kè si moun ka soufè, sé akòz dè péché-la. Sé pousa lè té ni moun ki té ka fè péché é kè toutmoun té sav sa, i té ka pòté bon mannèv pou édé-yo. On jou, mi sa Jézi èspliké : « Moun ki byen pòtan pa bizwen dòktè, men sé moun ki malad ki bizwen dòktè. » É èvè ègzanp-lasa, mi sa i èspliké : « An pa vin mandé moun ki jis rèpanti-yo, men an vin mandé moun ki ka menné on vyé vi rèpanti-yo » (Mat. 9:12, 13). Ès sé vréman sa i fè ? Asiré pa pétèt ! Lè on madanm lavé pyé a Jézi èvè dlo ki té ka sòti an zyé a-y, Jézi palé ba-y jantiman é i padonné péché a-y (Lik 7:37-50). I anségné Samaritèn-la dé vérité enpòwtan menmsi i té sav kè madanm-lasa té ni on vyé vi (Jan 4:7, 17-19, 25, 26). Moun ka mò akòz dè péché-la. Men Bondyé jous ba Jézi pouvwa pou résisité ki madanm ki misyé, ki timoun (Mat. 11:5).

11. Poukwa moun té ka santi-yo alèz èvè Jézi alòskè yo té ka fè péché ?

¹¹ Nou ka konprann poukwa moun ki té ka fè péché si péché té anvi vin owa Jézi. Yo té ka santi-yo alèz a yo èvè-y (Lik 15:1, 2). I té ka konprann sa yo té ka rèsanti é i té janti èvè yo. I té ka félisité-yochak pas yo té ni fwa adan-y (Lik 19:1-10). I té ni mizérikòd kon Pap’a-y (Jan 14:9). Adan jan-la i té ka palé la é adan jan-la i té ka aji la, i montré jan Pap’a-y té ni konpasyon é jan i té ni mizérikòd. I montré osi jan i enmé limanité é jan i vé édé-yo. Jézi ba moun anvi chanjé é vin disip a-y alòskè yo té ka fè péché (Lik 5:27, 28).

12. Ka Jézi aprann-nou anrapò èvè mò a-y ?

¹² Jézi té sav sa ki té ka atann-li. A pa onsèl fwa i di disip a-y kè yo té kay trayi-y é kè yo té kay kloué-y asi on poto (Mat. 17:22 ; 20:18, 19). I té sav osi kè grasa sakrifis-la i té kay fè la, i té’é woté péché-la adan mond-la, kon Jan é sé pwofèt-la té anonsé. É i èspliké kè dèstan i té’é sakrifyé vi a-y, i ‘té’é fè tout kalté moun vin owa a-y’ (Jan 12:32). Moun ki ka fè péché té’é pé fè Jéova plézi siwvwè yo té ni fwa an Jézi, é siwvwè yo té ka suiv komandman a-y. Si yo té ka fè sa, sa té’é ‘wòté-yo anba jouk a péché-la’ (Wom. 6:14, 18, 22 ; Jan 8:32). Sé pousa, èvè onlo kouraj, Jézi té paré a sibi bon abominasyon é a mò pou sové-nou (Jan 10:17, 18).

13. Kijan Jézi mò, é ka sa ka aprann-nou asi Jéova ? (gadé imaj-la osi).

¹³ Yo trayi Jézi, yo arété-y, yo di bétiz anlè-y, yo di kè i fè dé biten kè i pa jen fè é yo fè-y bon atrosité. É pou fin, ni sòlda ki kloué Jézi asi on poto pou tchouyé-y. Mésyé, pannan yo té ka fè Jézi bon abominasyon é pannan i té ka soufè, ni on moun ki té ka soufè plis ankò. Sé té Jéova. Puisans a-y pa ni pon limit, é i té’é pé fè on biten pou anpéché Gason a-y soufè, men i pa fè-y. Jéova té enmé Gason a-y toubònman, alò poukwa i aji konsa ? Sé pas Jéova enmé-nou. Mi sa Jézi di : « Tèlman Bondyé té enmé lèmond, i bay sèl Gason a-y, pou tout moun ki ka montré yo ni lafwa adan-y pa détwi men ni lavi étèwnèl » (Jan 3:16).

14. Ka sakrifis a Jézi ka aprann-nou ?

¹⁴ Jéova enmé désandan a Adan é Èv, é lanmou-lasa fò toubònman. Pi bèl mannyè i montré lanmou-lasa, sé lèwvwè i sakrifyé vi a Jézi. Kifè sa Jéova fè la ka montré kè i enmé-w onlo onlo onlo. I té sav kè sa té’é fè-y soufè bon soufè la men magrésa i jous sakrifyé Gason a-y pou woté-nou anba jouk a péché-la é anba jouk a lanmò ! (1 Jan 4:9, 10). Wi, sa Jéova vlé sé édé-nouchak goumé èvè péché-la é gangné konba-la !

15. Jéova sakrifyé sèl Gason a-y pou nou. Ka pou nou fè pou nou bénéfisyé dè bèl kado-lasa ?

¹⁵ Grasa kado-la Jéova ban-nou la, kivédi sakrifis a sèl Gason-la i té ni la, Jéova pé padonné péché an nou. Men pou Bondyé pé sa padonné-nou, nou dè koté an nou, nou ni on biten a fè. Ki biten ésa ? Jan Lèbatis é Jézi palé dè sa. Mi sa yo di : « Rèpanti-zòt, pas wayòm-la ki an syèl-la pi pré » (Mat. 3:1, 2 ; 4:17). Si nou bizwen goumé pou nou pa fè pon péché é si nou bizwen vin pi bon zanmi èvè Pap’an-nou ki enmé-nou, sa enpòwtan kè nou rèpanti-nou. Men lè on moun ka rèpanti-y, ka i ka fè ojis ? É kijan sa pé édé-nou fè Jéova plézi magré nou enpawfè ? Sé sa awtik-la ki ka vin la ké montré-nou.