Kijan pou nou réyaji lè nou ka sibi enjistis

1-2. Kimoun ki pé rivé a fè-nou on biten ki pa bon ?

ON JOU, Jézi bay on ègzanp. I palé dè on vèv ki pa té las ay vwè on jij pou mandé-y jijé afè a-y èvè jistis. Disip a Jézi té pé konprann byen sa madanm-lasa té ka rèsanti pas an tan a yo, té ni onlo moun ki té ka sibi enjistis (Lik 18:1-5). Nou osi nou pé konprann sa madanm-lasa té ka rèsanti, pas sa ja rivé-noutout kè on moun fè-nou on biten ki pa bon.

² Jòdijou nou lantouré èvè moun ki ja ka fè-yo on mové lidé asi lézòt avan menm yo konnèt-yo. Ni moun osi yo méchan, é ni dòt ankò yo toujou bizwen ni plis ki lézòt. Kifè délè yo pé rivé maltrété-nou é sa pa’a siwprann-nou (Ékl. 5:8). Men, si sé on frè oben on sè adan lasanblé-la ki fè-nou on méchansté, sa pé désèvwa-nou toubònman. Nou ka tou konprann kè frè é sè an nou pa kon sé moun-la ki ka pèwsékité-nou la oben kon séla ki kont nou la. Apa pa èspré, yo ka fè-nou ditò. Sa pé rivé tou senplèman pas yo pa pawfè. Nou pé aprann onlo biten asi jan Jézi réyaji douvan tout méchansté lènmi a-y fè-y. Si nou ka rivé montré-nou pasyan lèwvwè lènmi an nou ka fè nou méchansté, a pa èvè frè é sè an nou nou pé’é pran pasyans ! Ka Jéova ka rèsanti lè on frè oben on sè adan lasanblé-la oben ondòt moun ka maltrété-nou ? Ès i ka okipé-y dè sa ?

3. Lè Jéova ka vwè sèwvitè a-y ka soufè akòz dè méchansté yo ka fè-yo, ka sa ka fè-y ? Kijan nou fè sav sa ?

³ Jéova ka vwè jan moun ka aji èvè sèwvitè a-y, é i ka ba sa onlo enpòwtans. I « enmé lajistis » (Sòm 37:28). Jézi pwomèt kè lè bon moman-la ké rivé, Papa-y ké ‘fè ansòt pou yo aji èvè jistis épi sèwvitè a-y […] vitman’ (Lik 18:7, 8). É talè, Jéova ké woté tout soufrans an nou é i pé’é lésé ponmoun sibi pon kalté enjistis ankò (Sòm 72:1, 2).

4. Jòdijou, kijan Jéova ka édé-nou lèwvwè nou ka sibi enjistis ?

⁴ Ni on lè Jéova ké rézoud tout sé pwoblèm-la. Fò nou atann moman-lasa. Men, dépi konnyéla, i ka édé-nou tchenbé lèwvwè nou ka sibi enjistis (2 Pyè 3:13). Pa ègzanp, i ka aprann-nou réyaji pou nou pa fè on biten ki ké pwokiré plis bab ankò lè nou ka sibi on enjistis. Pou édé-nou, Jéova ka montré-nou adan Labib kijan Gason a-y té ka réyaji lèwvwè yo té ka maltrété-y. Anplisdisa, Jéova ka ban-nou konsèy pou nou sav ka pou nou fè lè nou adan on sitiyasyon konsa.

FÈ ATANSYON A JAN OU KA RÉYAJI LÈWVWÈ YO KA FÈ-W ON MÉCHANSTÉ

5. Poukwa fò-nou fè atansyon a jan nou ka réyaji lèwvwè yo ka fè-nou on méchansté ?

⁵ Lèwvwè on moun ka fè-nou on méchansté sa pé fè-nou mal é nou pé kòlè toubònman (Ékl. 7:7). Sé sa dé nonm fidèl kon Jòb é Abakik rèsanti (Jòb 6:2, 3 ; Abak. 1:1-3). Menmsi sa nòwmal kè nou rèsanti sa, fò-nou fè atansyon pou nou pa fè ayen kè nou ké règrété.

6. Ka ègzanp a Absalon ka aprann-nou ? (gadé imaj-la osi).

⁶ Lèwvwè on moun ka maltrété-nou oben lè i ka maltrété on moun nou enmé, sa pé ban-nou anvi réglé kont a-y. Men siwvwè nou fè sa, sa pé pwokiré-nou plis pwoblèm ankò. Gadé sa ki rivé Absalon, gason a Wa David. Absalon té ni on sè, non a-y sé té Tama é on dèmi-frè, non a-y sé té Amnòn. On jou, Amnòn vyolé Tama. Absalon pa pran sa ! Dapré sa Lwa a Moyiz té ka di, Amnòn té mérité mò pou sa i té fè la (Lév. 20:17). Absalon té ni rézon santi-y kòlè. Men a pa-y ki té andwa tchouyé Amnòn (2 Sam. 13:20-23, 28, 29).

7. Odépa, ka moun-la ki maké Sòm 73 la rèsanti douvan enjistis i té ka vwè ?

⁷ Délè, ou pé ni lenprésyon yo pa jen ka pini moun ki ka fè lézòt méchansté. Alò ou pé koumansé kwè apa lapenn fè sa ki byen. On sèwvitè a Jéova té ka vwè jan zafè a moun ki méchan té ka maché é jan sé bon moun-la té ka pran fè adan sa. I di : « Mi konsa sé méchan-la yé, toutlè yo ka viv trankil-trankil » (Sòm 73:12). Tèlman sa té ka chouboulé-y, i manké fin pa di sa pa vo lapenn sèvi Jéova. I di : « Lèwvwè an té ka éséyé konprann sa, sa té ka tèwbolizé lèspri an mwen » (Sòm 73:14, 16). I avoué : « Kantan mwenmenm, an manké pèd chimen ; tibwen ankò, pyé an mwen té’é glinsé » (Sòm 73:2). Sé on biten konsa ki rivé on frè nou ké kriyé Albèwto.

8. Ni on frè ki viv on enjistis, kijan sa aji anlè-y ?

⁸ Ni déotwa frè ki akizé Albèwto alòskè a pa té vré : yo ay di i té ka volé adan lajan a lasanblé-la. Kifè, i pèd rèsponsabilité i té ni adan lasanblé-la. Anplisdisa, ni plizyè moun an lasanblé-la, lèwvwè yo tann sa yo té ka di asi-y, yo enn chanjé èvè-y, yo pa té ka konsidéré-y ankò. Lè i ka sonjé sa, mi sa i ka di : « An té égri, an té kòlè é sa désèvwa-mwen toubònman ». Tèlman sa malpasé-y, i arété ay réinyon é i rété 5 lanné i pa’a préché ankò. Ègzanp-lasa ka montré-nou ka ki pé rivé si nou ka lésé kòlè-la pran lanmen asi nou lè nou ka sibi on enjistis.

AN-NOU PRAN ÈGZANP ASI JÉZI

9. Ki kalté enjistis Jézi sibi ? (gadé imaj-la osi).

⁹ Si ni on moun nou pé pran ègzanp asi-y pou sav ègzaktèman kijan pou nou réaji lèwvwè yo ka fè-nou méchansté, sé Jézi. Enki réfléchi asi tousa yo fè-y sibi. Adan pwòp fanmi a-y, ni sa ki té ka di tèt a-y pati. Moun ki té chèf an rèlijyon-la akizé-y, yo di i ka travay èvè sé démon-la. Sé sòlda women la fè jé èvè-y, yo simé kou asi-y, aprésa yo tchouyé-y (Mawk 3:21, 22 ; 14:55 ; 15:16-20, 35-37). Magré tousa i sibi, Jézi pa jen éséyé vanjé-y. Ka ègzanp a-y pé aprann-nou ?

10. Kijan Jézi té ka rivé sipòté tousa yo té ka fè-y ? (1 Pyè 2:21-23).

¹⁰ (Li 1 Pyè 2:21-23a.) Jézi ban-nou on bèl ègzanp toubònman. Nou pé imité-y lèwvwè yo ka aji mal èvè nou. I té sav a ki moman pou i palé é a ki moman pou i pé (Mat. 26:62-64). Délè yo té ka di bétiz asi-y, men i pa té ka réponn (Mat. 11:19). Lè i té ka désidé palé, i pa té jen ka jiré sé moun-la ki té ka pèwsékité-y la, é i pa jen mennasé-yo nonplis. Jézi toujou rété kalm-kalm a-y pas « i té ka mèt tout biten an men a Sila ki ka jijé èvè jistis ». Jézi té sav kè sa ki té pi enpòwtan, sé kè Jéova té ka vwè méchansté yo té ka fè-y. É i té ka fè-y konfyans, i té sav Jéova té’é mèt on milyé adan sa, o bon moman.

11. Kijan nou pé rivé sav a ki moman pou nou palé é a ki moman pou nou pé ? (gadé sé imaj-la osi).

¹¹ Lèwvwè yo ka fè-nou on biten ki pa bon, an-nou pran ègzanp asi Jézi é an-nou véyé sa nou ka di. Délè sa yo fè-nou pa si grav ki sa, alò nou ka lésé sa tonbé. Oben nou pé désidé nou pa’a di ayen pou nou pa mèt luil asi difé (Ékl. 3:7 ; Jak 1:19, 20). Ni dòt lè, pétèt fò nou ké palé pou nou défann on moun yo ka mal aji èvè-y, oben pou nou èspliké kwayans an nou (Akt 6:1, 2). Men si nou désidé palé, nou ké éséyé fè-y kalmèman é èvè rèspé (1 Pyè 3:15)b.

12. Kijan nou ka montré kè nou ka lagé « tout biten an men a Sila ki ka jijé èvè jistis » ?

¹² Ondòt mannyè nou pé imité Jézi, sé lèwvwè nou ka lagé tout biten an men a « Sila ki ka jijé èvè jistis ». Lèwvwè lézòt ka kritiké-nou oben yo pa ka aji byen èvè nou, nou pé sèten Jéova ka vwè sa. Si nou sèten sa, nou ké pé sipòté tousa yo ka fè-nou sibi pas nou sav kè anfinaldikont sé-y ki ké mèt on milyé adan sa. Si nou ka lésé toutbiten an men a Jéova, sa ké anpéché-nou rété kòlè, oben lésé rankin pran rasin an fon a tchè an nou. Sé kalté santiman-lasa pé fè-nou fè on biten ki mové, pé fè-nou pèd jwa an nou, oben pé fè-nou mèt lanmityé an nou èvè Jéova an danjé (Sòm 37:8).

13. Ka ki pé édé-nou tchenbé anba enjistis ?

¹³ On biten ki sèten sé kè nou pé pa imité Jézi on mannyè ki pawfé, alò sa pé rivé nou ka di oben nou ka fè on biten nou ka règrété apré (Jak 3:2). É délè, on méchansté yo fè-nou pé lésé on soufrans an tchè an nou é menm on blès an kò an nou, tout rèstan a vi an nou. Si sé sa ou ka viv konnyéla, ou pé sèten Jéova sav sa ou ka viv. É Jézi osi ka konprann sa ou ka rèsanti pas limenm a-y soufè alòskè i pa té mérité sa (Ébr. 4:15, 16). Pou édé-nou lè nou douvan enjistis, anplis dè bèl ègzanp a Jézi, Jéova ka ban-nou onlo konsèy adan Labib. An-nou réfléchi asi 2 vèwsé ki adan liv a Women.

« LÉSÉ KÒLÈ A BONDYÉ AJI »

14. Ka sa vlé di « lésé kòlè a Bondyé aji » ? (Women 12:19).

¹⁴ (Li Women 12:19.) Lapòt Pòl ankourajé sé krétyen-la « lésé kòlè a Bondyé aji ». Lè ou ka lésé kòlè a Jéova aji, sa vlé di ou ka lésé-y aji èvè jistis pou mèt on milyé adan on sitiyasyon, a moman-la i chwazi la, é jan-la i chwazi la. John sé on frè ki sibi enjistis. Mi sa i ka admèt : « Fò an té métrizé kòlè an mwen pou an pa té fè pon mové biten, é sa pa té fasil. Men Women 12:19 édé-mwen atann Jéova. »

15. Poukwa vométan nou atann Jéova réglé on pwoblèm ? Bay on ègzanp.

¹⁵ Nou ni lontan plis entéré lè nou ka atann Jéova réglé on pwoblèm. Lè nou ka fè sa, sa ka anpéché-nou rèsanti tout istrès-la é désèpsyon-la nou ka rèsanti la davwa nou ka chèché réglé noumenm an nou on pwoblèm ki two fò ban-nou. Jéova vé ban-nou on pal. Sé konsi i ka di-nou : « Lésé-mwen jéré enjistis-lasa ba-w ; an ka pwomèt-vou an ké réglé sa. » Si nou ka fè-y konfyans lè i ka pwomèt « sé mwen ki ka fè moun péyé pou sa yo fè », nou pa bizwen kontinyé fè kòlè, pas nou sav i ké fè sa ki jis. Sé sa ki édé John, frè-la nou sòti palé dè-y la. I di : « Si an ka fè fon asi Jéova pou i réglé pwoblèm-la, i ké fè sa lontan plibyen ki mwen. »

« KONTINYÉ FÈ SA KI BYEN POU GANGNÉ SA KI MAL »

16-17. Kijan lapriyè pé édé-nou « kontinyé fè sa ki byen pou gangné sa ki mal » ? (Women 12:21).

¹⁶ (Li Women 12:21.) Pòl ankourajé osi sé krétyen-la « kontinyé fè sa ki byen pou gangné sa ki mal ». Adan Sèwmon-la i fè asi montangn-la, Jézi di : « Kontinyé enmé lènmi a zòt é priyé pou moun ki ka pèwsékité-zòt » (Mat. 5:44). É sé ègzaktèman sa limenm fè. Pétèt nou ja éséyé imajiné doulè-la Jézi rèsanti la lè sé sòlda women la klouwé 2 men a-y é 2 pyé a-y asi poto-la. Yo fè Jézi vwè bon mizè, é nou pa menm pé konprann vréman tout soufrans-la i rèsanti la.

¹⁷ Magré tousa soufrans i sibi, Jézi kontinyé enmé lézòt é i rété fidèl a Jéova. Olyé i té mandé Bondyé pini sé sòlda-la, mi sa i mandé-y : « Padonné-yo, Papa, pas yo pa sav sa yo ka fè » (Lik 23:34). Lè nou ka priyé Jéova pou mandé-y édé moun ki fè-nou on méchansté, sa pé édé-nou rété kalm é sa pé fè kòlè-la é rankin-la nou ni la pasé tibwen. É sa pé jous fè-nou vwè sé moun-la ki maltrété-nou ondòt jan.

18. Kijan lapriyè édé Albèwto é John sipòté enjistis yo sibi ?

¹⁸ Lapriyè édé sé 2 frè-la nou sòti palé dè yo adan awtik-lasa, tchenbé douvan enjistis yo té ka sibi. Albèwto di konsa : « An priyé pou sé frè-la ki fè-mwen ditò. An mandé Jéova plizyè fwa pou i édé-mwen pa rété kòlè akòz dè sa ki pasé. » Érèzman, Albèwto woukoumansé sèvi Jéova fidèlman. Kanta John mi sa i èspliké : « Souvantfwa an mandé Jéova édé frè-la ki aji mal èvè mwen é an mandé-y osi édé-mwen padonné-y. Sé priyè-lasa édé-mwen pa rété kòlè kont frè-la é sa édé-mwen osi pa jijé-y. Men sé priyè-lasa édé-mwen osi santi-mwen pli kalm. »

19. Toupannan nou ka atann mond-lasa bout, ka pou nou fè ? (1 Pyè 3:8, 9).

¹⁹ Toutotan nou ké ka viv adan mond méchan lasa, nou pé rivé sibi on enjistis. Men kèlkèswa sa ki rivé, fò pa nou arété mandé Jéova édé-nou. Anplisdisa, fò-nou imité mannyè Jézi réyaji lè yo maltrété-y é fò nou kontinyé apliké sé konsèy-la ki an Bib-la. Si nou fè sa, nou pé sèten Jéova ké béni-nou (Li 1 Pyè 3:8, 9).