Dlo ki ka sòti an zyé a-w ni valè pou Jéova

1-2. Ki sitiyason pé fè-nou pléré ?

ADAN vi an nou, noutout ka pléré on jou. Délè sé paskè nou ni tchè-kontan kè nou ka pléré. Pétèt ou pléré lè on biten enpòwtan rivé-w, kon pa ègzanp lè timoun a-w fèt, lè ou sonjé on bon biten ou viv oben lè ou wouvwè on zanmi ou pa té vwè dépi lontan.

² Malérèzman, pli souvan ki rarman, nou ka pléré pas tchè an nou an bobo. Pa ègzanp sé pé lè on moun désèvwa-nou onlo, lè on maladi ka fè-nou soufè bon soufè-la oben lè nou pèd on moun nou té enmé. Adan dé moman konsa, pétèt nou ka rèsanti menm biten ki Jérémi lè sé Babilonyen-la détwi Jérizalèm. Mi sa i di : « Ti rivyè ka koulé an zyé an mwen […]. Zyé an mwen pa’a las pléré, akontinyé » (Lam. 3:48, 49).

3. Lè Jéova ka vwè sèwvitè a-y ka soufè, ka i ka rèsanti ? (Izayi 63:9).

³ Jéova sav jan dlo ka koulé an zyé an nou akòz dè éprèv nou ka jwenn. Labib ka ban-nou lagaranti kè i okouran a tousa ki ka fè sèwvitè a-y soufè é kè i ka tann-yo lè yo ka kriyé-y pou i édé-yo (Sòm 34:15). Jéova ka vwè-nou é i ka tann-nou, men i ka fè plis ki sa. Kon on papa ki plen lanmou, lè timoun a-y ka pléré sa ka touché-y an plen tchè é onsèl biten i anvi fè sé édé-y (li Izayi 63:9).

4. Ka sé ègzanp-la nou kay vwè la ké aprann-nou asi Jéova ?

⁴ Adan Pawòl a-y, Jéova ka di-nou kijan i réyaji an tan lontan lè sèwvitè a-y té ka pléré. Sé sa nou ka vwè èvè ègzanp a Àn, David é wa Ézékyas. Poukwa yo pléré ? Kijan Jéova édé-yo ? É kijan ègzanp a yo ka ban-nou fòs lèwvwè dlo ka sòti an zyé an nou pas nou anpenn, pas yo trayi-nou oben pas nou pa ni pon èspwa ?

LÈ DLO KA SÒTI AN ZYÉ A-W PAS OU ANPENN

5. Ka Àn ni lokazyon rèsanti ?

⁵ Àn jwenn tèlman difikilté ki fè-y lapenn kè sa té ka fè-y pléré. On difikilté i té ka jwenn sé kè mari a-y té ni on dézyèm madanm, Pénina, ki té méchan èvè-y. É ondòt difikilté i té ka jwenn, sé kè Pénina té ni plizyè timoun alòskè li i pa té ni ponyonn (1 Sam. 1:1, 2). Pénina té ka fè jé èvè Àn toulongalé pas i pa té pé ni timoun. Ka ou té’é rèsanti adan on sitiyasyon konsa ? Àn, li, ‘a pa ti tris i té tris’ kifè i « té ka pléré gwodlo é i pa té ka manjé » (1 Sam. 1:6, 7, 10).

6. Ka Àn fè pou i té trapé konsolasyon ?

⁶ Ka Àn fè pou i santi-y myé ? Sa ki fè-y dibyen sé ay adan tabèwnak-la, koté-la ki pi enpòwtan-la pou adoré Jéova. Pétèt i té toupré antré a lakou a tabèwnak-la lè « i mété-y ka priyé Jéova é i pa té ka rivé arété pléré ». I té ka sipliyé Jéova é i té ka di : ‘Gadé kijan an ka soufè, sonjé-mwen, sèwvitè a-w’ (1 Sam. 1:10b, 11). Àn priyé Jéova é i wouvè tchè a-y ba-y. Sa dwèt touché Jéova onlo lè i vwè fi a-y kè i enmé ka pléré !

7. Lè Àn wouvè tchè a-y pou Jéova kijan sa konsolé-y ?

⁷ Apré i wouvè tchè a-y pou Jéova, é kè Éli gran prèt-la rasiré-y, ka Àn rèsanti ? Mi sa nou ka li : « I ay fè chimen a-y, i manjé é figi a-y pa té tris ankò » (1 Sam. 1:17, 18). Menmsi sitiyasyon a-y poto’o chanjé, Àn té soulajé. Tout tristès i té ni an tchè a-y, i ba Jéova li. Jéova vwè sa i té ka rèsanti, i tann lè i té ka pléré é plita i béni-y lè i pèwmèt-li ni on timoun (1 Sam. 1:19, 20 ; 2:21).

8-9. Dapré Ébré 10:24, 25, poukwa fò-nou fè tousa nou pé pou ay adan sé réinyon-la ? (gadé imaj-la osi).

⁸ Ka sa ka aprann-nou ? Ès ou adan on sitiyasyon ki rèd toubònman é ki ka fè-w pléré gwodlo pas ou anpenn ? Pétèt ou ka pléré pas on moun an fanmi a-w oben on zanmi a-w mò. Adan dé moman kon séla, sa nòwmal kè ou vlé rété tousèl a-w. Men menmjan sa konsolé Àn é sa ankourajé-y lè i ay an tabèwnak-la, menmjan-la osi, lè ou ké ay adan sé réinyon-la sa ké konsolé-w, menmsi ou las oben kè ou pa ni pon fòs ankò (li Ébré 10:24, 25). Pannan sé réinyon-lasa nou ka tann vèwsé a Labib ki konsolé-nou. Jéova pé sèvi èvè-yo pou édé-nou ranplasé lidé ki négatif èvè lidé ki pozitif. Menmsi sitiyasyon an nou pa’a vin méyè onfwamenm, sé vèwsé-lasa pé édé-nou santi-nou myé.

⁹ Anplisdisa, pannan réinyon an nou, nou èvè frè é sè an nou ki ni konpasyon, ki ka entérésé-yo a nou, é ki enmé-nou. Tousa pé fè-nou dibyen (1 Tés. 5:11, 14). On pyonyé èspésyal ki pèd madanm a-y ka di : « An ka pléré onlo toujou. Délè, sa an vlé sé rété tousèl an mwen pou pléré. Men sé réinyon-la ka ankourajé-mwen toubònman. Pawòl a sé frè é sè la ki plen bonté é komantè a yo ka trankilizé-mwen onlo. Kèlkèswa angwas an ni, dépi an rivé réinyon, an ka santi mwen plibyen. » Sa frè-la di la montré kè, lè nou adan réinyon an nou Jéova pé itilizé frè é sè an nou pou soulajé penn an nou.

10. Lèwvwè nou ka soufè pas moral an nou a zéro, kijan nou pé imité Àn ?

¹⁰ Àn touvé konsolasyon osi lè i wouvè tchè a-y ba Jéova. Vou osi, ou pé ‘lagé tousa ki ka trakasé-w asi Jéova’ é ou pé sèten i ké kouté-w (1 Pyè 5:7). Vòlè tchouyé mari a on sè. Mi sa sè-la ka sonjé : « Sé konsi tchè an mwen té fann an toupititi mòso ki pa té’é jen kolé ankò. Lè an té ka priyé Jéova, Pap’an mwen ki an syèl-la é ki plen lanmou, sa té ka trankilizé-mwen é sa té ka soulajé-mwen. Délè, an pa té ka touvé ka pou an di, men Jéova té ka konprann-mwen. Lè an té ka santi kè an té anba dlo, an té ka priyé pou i trankilizé-mwen. Aprésa, an té ka santi-mwen myé é an té ka woupran doubout an mwen. » Wi sé vré, lè ou ka di Jéova tout soufrans a-w é kè ou ka pléré pas ou anpenn, sa ka touché-y onlo é i ka konprann doulè-la ki an tchè a-w la. Menmsi sitiyasyon-la pa chanjé, i pé trankilizé lèspri a-w é pèwmèt-vou santi-w anpé (Sòm 94:19 ; Filip. 4:6, 7). Anplisdisa, i ké rékonpansé-w pas ou ka andiré fidèlman (Ébr. 11:6).

LÈ OU KA PLÉRÉ PAS YO TRAYI-W

11. Lè moun vin lènmi èvè-y, ka David rèsanti ?

¹¹ Pannan vi a-y, David andiré sitiyasyon ki fè-y pléré. Yo té hay-li toubònman é fanmi a-y menm trayi-y (1 Sam. 19:10, 11 ; 2 Sam. 15:10-14, 30). Anmitan on éprèv, mi sa i maké : « Tèlman an té ka plenn an té las. Tout lannuit-la, kouch an mwen ka mougné afòs dlo sòti an zyé an mwen ». Akòz dè kibiten David té chouboulé ? Mi sa i èspliké : « Akòz dè moun ki ka tigonné-mwen » (Sòm 6:6, 7). Méchansté-lasa té ka fè-y tèlman mal kè i té ka pléré onlo.

12. Dapré Sòm 56:8, dè kibiten David té sèten ?

¹² Menmsi moun té lènmi èvè-y, David té sèten kè Jéova té enmé-y. Mi sa i maké : « Jéova ké tann lè an ké pléré » (Sòm 6:8). Ondòt lè, i di on biten ki té entérésan nou ka touvé adan Sòm 56:8 (li-y). Sé pawòl-lasa ka montré jan Jéova ka pran swen an nou èvè tandrès. Pou David, sé té konsi Jéova té ka mèt tout dlo ki sòti an zyé a-y adan on ti boutèy oben kè i té ka maké sa adan on liv. I té sèten Jéova té ka vwè doulè a-y é kè i té ka gadé sa an lèspri a-y. Pou-y sa té klè, Pap’a-y ki an syèl-la é ki plen lanmou té ka vwè non sèlman éprèv i té ka viv, men osi jan yo té ka fè-y soufè.

13. Lè on moun an fanmi an nou ka désèvwa-nou oben ka trayi-nou, ka ki pé konsolé-nou ? (gadé imaj-la osi).

¹³ Ka sa ka aprann-nou ? Ès ou ka soufè konnyéla la pas on moun an fanmi a-w désèvwa-w oben trayi-w ? Pétèt moun-la ou té ka frékanté-la pou mayé èvè-y kasé èvè-w, pétèt kè moun-la ou mayé èvè-y la kité-w oben kè on moun an fanmi a-w arété sèvi Jéova. Mi sa on frè madanm a-y twonpé-y é kité-y di : « Tchè an mwen manké arété, an pa té ka rivé kwè sa menm ! An té ka santi-mwen kon zéro douvan on chif. Non sèlman an té tris men an té kòlè. » Si ou ka soufè pas yo désèvwa-w oben pas yo trayi-w, fò-w sèten kè li Jéova pé ké jen abandoné-w. Menm frè-lasa ka di ankò : « An konprann kè rèlasyon ou ni èvè on moun pé kasé, men li Jéova sé Gwo wòch an nou. Kèlkèswa sa ki pé rivé, i ké toujou la. I pé’é jen abandoné moun ki fidèl a-y » (Sòm 37:28). Fò-w sonjé osi kè lanmou a Jéova pli fò ki lanmou a nenpòt kimoun. Menmsi lè yo ka trayi-w sa ka fè-w mal toubònman, lanmou-la Jéova ni pou-w la ké toujou pli fò (Wom. 8:38, 39). Mi sa pou-w woutyenn : kèlkèswa jan-la on moun ka aji èvè-w, Pap’a-w ki an syèl-la enmé-w.

14. Dapré Sòm 34:18, dè kibiten nou pé sèten ?

¹⁴ Si on moun trayi-nou, sa David di an Sòm 34:18 pé konsolé-nou (li-y). Dapré on liv ki ka palé dè Labib, lè yo ka sèvi èvè èksprésyon-la « moun ki dékourajé », sé pé pou palé dè « moun ki pa ni pon èspwa ankò ». Lè on moun adan on détrès konsa, kijan Jéova ka aji èvè-y ? Menmjan on papa ki enmé timoun a-y ka pran-y an dé bra a-y pou konsolé-y, lèwvwè on moun trayi-nou é kè sa ka fann tchè an nou, Jéova « toupré » an nou, i toujou ni konpasyon pou nou é i ka rasiré-nou. Sa i vlé sé pasé on ti krèm asi bobo an nou é ban-nou plis fòs. Anplisdisa, i ka ban-nou on bèl èspwa pou dèmen, sa ki ka édé-nou andiré éprèv nou ka jwenn jòdila (Iz. 65:17).

LÈ OU KA PLÉRÉ PAS OU PA NI PON ÈSPWA ANKÒ

15. Ka ki fè Ézékyas pléré onlo ?

¹⁵ Lè i té ni 39 an, Ézékyas, wa a Jida, aprann kè i té ni on maladi ki té grav. Jéova sèvi èvè pwofèt Izayi pou di-y kè akòz dè maladi-lasa i té kay mò adan on titak tan (2 Wa 20:1). I té ka sanmsa pa té ni pon èspwa pou Ézékyas ankò. Nouvèl-lasa kasé 2 bra a-y. Ézékyas pléré gwodlo é i priyé Jéova èvè tout tchè a-y (2 Wa 20:2, 3).

16. Lèwvwè Ézékyas pléré gwodlo, kijan Jéova réyaji ?

¹⁶ Sa touché Jéova lè Ézékyas mété-y ka sipliyé-y é ka pléré kifè i réponn-li èvè bonté : « An tann priyè a-w. An vwè dlo-la ki té ka sòti an zyé a-w la. Alò, an kay géri-w ». Èvè onlo mizérikòd, Jéova sèvi èvè Izayi pou pwomèt Ézékyas kè i té’é fè-y viv pli lontan é kè i té’é délivré Jérizalèm anba men a sé Asiriyen-la (2 Wa 20:4-6).

17. Lè nou ni on maladi ki grav, kijan Jéova ka soutyenn-nou ? (Sòm 41:3 ; gadé imaj-la osi).

¹⁷ Ka sa ka aprann-nou ? Ka ou pé fè si ou ni on maladi é i ka sanmsa pa ni pon rimèd pou géri-y ? Priyé Jéova é pa pè pléré. Labib ka pwomèt-nou kè « Papa-la ki ka pran penn an nou èvè tandrès é Dyé a tout konsolasyon la » ké konsolé-nou adan tout éprèv an nou (2 Kor. 1:3, 4). Sé vré, fò pa nou mèt an tèt an nou kè Jéova ké woté tout difikilté an nou jòdijou, men nou pé konté asi-y (li Sòm 41:3). Grasa lèspri sen a-y, i ka ban-nou fòs-la, sajès-la é i ka trankilizé-nou pou nou pé sa rété doubout-pikan (Pwov. 18:14 ; Filip. 4:13). I ka pwomèt-nou kè on jou tout kalté maladi ké disparèt (Iz. 33:24).

18. Lè ou adan on sitiyasyon ki rèd toubònman, ki vèwsé a Labib ka ba-w fòs ? (gadé ti karé-la « Déotwa vèwsé ki pé konsolé-w lè ou ka pléré. »)

¹⁸ Sa Jéova di Ézékyas konsolé-y. Sé konsa Pawòl a Bondyé pé konsolé-nou osi. Adan Labib, Jéova fè-yo maké dé pawòl ki pé trankilizé-nou lè nou ka jwenn éprèv é ki pé wouban-nou fòs (Wom. 15:4). Lè i aprann i té ni on kansè, on sè ki ka rété an Afrik dè Lwès té ka pléré onlo. Mi sa i ka rakonté : « On vèwsé an ka touvé ki rasiré-mwen sé Izayi 26:3. Menmsi nou pé pa métrizé tout éprèv nou ka jwenn, vèwsé-lasa ka montré-mwen kè Jéova pé édé-mwen santi-mwen anpé é sé sa ki ka édé-nou métrizé jan nou ka réyaji douvan sé éprèv-lasa. » É vou, lè ou adan on sitiyasyon ki rèd toubònman, on sitiyasyon ki ka sanmsa pa ni pon èspwa, ès ni on vèwsé an pawtikilyé ki ka trankilizé lèspri a-w ?

19. Ki bèl landèmen ka atann-nou ?

¹⁹ Alòskè vyé mond-lasa près bout, fò-nou sav kè malérèzman nou ké pléré dèplizanplis. Men kon istwa a Àn, David é wa Ézékyas montré-nou, Jéova ka vwè lè nou ka pléré é sa ka fè-y lapenn toubònman. Dlo ki ka sòti an zyé an nou ni onlo valè pou-y. Sé pousa, lè nou ka jwenn on éprèv, fò-nou priyé Jéova é wouvè tchè an nou ba-y. Fò pa nou rété tousèl an nou men fò-nou rété owa frè é sè an nou adan lasanblé-la. É pou fin, an-nou kontinyé chèché konsolasyon adan sé pawòl-la ki an Bib-la é ki pé trankilizé-nou. Nou pé sèten kè si nou ka andiré, Jéova ké rékonpansé-nou. Dayè, i ka pwomèt kè on jou, i ké suiyé tout dlo an zyé an nou ki té’é pé koulé pas nou anpenn, pas yo trayi-nou oben pas nou pa ni pon èspwa (Rév. 21:4). Jou-lasa, dlo ké sòti an zyé an nou, men a pa akòz dè penn nou ni an tchè an nou men sé kontan nou ké kontan !