Ka ki pé édé-w wouvè tchè a-w ba Jéova ?

1-2. a) Ka ki pé anpéché-nou wouvè tchè an nou ba Jéova ? b) Kijan nou fè sav kè Jéova ka pran tan kouté priyè an nou ?

ÈS DÉLÈ ou ni lenprésyon kè lè ou ka priyé ou toujou ka répété menm biten-la é kè ou pa’a rivé di Jéova sa ki an fon a tchè a-w ? Si sé sa, a pa vou tousèl ki adan sitiyasyon-lasa. Konm nou toujou alakous, délè nou ka enn fè dé ti priyè présé-présé. Pétèt osi nou ni dimal a wouvè tchè an nou ba Jéova pas pou nou nou pa ni asé valè pou nou priyé Bondyé.

² Labib ka di kè pou Jéova, sa ki enpòwtan lè nou ka priyé, a pa fè gran fraz men sé palé èvè on tchè ki sensè é èvè imilité. I ka kouté « priyè a moun ki ni imilité » (Sòm 10:17). I ka pran tan kouté chak ti mo nou ka di pas nou ni valè ba-y (Sòm 139:1-3).

3. Ka nou ké vwè adan awtik-lasa ?

³ Adan awtik-lasa nou ké réponn a sé kèsyon-lasa : Poukwa fò pa nou pè di Jéova tousa nou ka rèsanti ? Ka nou pé fè pou priyè an nou édé-nou vin pi bon zanmi èvè Jéova ? Ka sé priyè-la ki maké an Bib-la ka aprann-nou é kijan yo pé édé-nou priyé Jéova pibyen ? É ka pou nou fè si nou tèlman angwasé kè nou pa sav ka pou nou di Jéova ?

PA PÈ PRIYÉ JÉOVA

4. Ka ki pé édé-nou pou nou pa janmé pè priyé Jéova ? (Sòm 119:145).

⁴ Si nou sèten kè Jéova sé on zanmi ki fidèl é ki vlé sa ki méyè ban nou, nou ké pi alèz pou nou priyé-y. Moun-la ki maké Sòm 119 la fè tousa i té pé pou ni on bèl lanmityé èvè Jéova. Apapoudi i pa té ni pwoblèm : Onlo moun té ka éséyé fè-y ditò (Sòm 119:23, 69, 78). Anplisdisa, sé érè-la i té ka fè la té ka dékourajé-y (Sòm 119:5). Magrésa, i pa té pè wouvè tchè a-y ba Jéova (li Sòm 119:145).

5. Poukwa fò pa nou lésé ayen anpéché-nou priyé Bondyé ? Bay on ègzanp.

⁵ Menm moun ki fè on péché ki grav Jéova ka di-yo priyé-y (Iz. 55:6, 7). Kifè fò pa nou lésé ayen anpéché-nou priyé-y. An-nou pran on ègzanp. On pilòt sav kè si i pèd i pé kriyé touw dè kontwòl la. Men ès pas i wont oben pas i fè on érè, fò i pè kriyé touw-la pou yo édé-y ? Anponjan ! Menmjan-la lè nou pa sav ki désizyon pou nou pran oben si nou péché, fò pa nou pè priyé Jéova (Sòm 119:25, 176).

KA NOU PÉ FÈ POU PRIYÈ AN NOU ÉDÉ-NOU VIN PI BON ZANMI ÈVÈ JÉOVA

6-7. Lè nou ka réfléchi asi bèl kalité a Jéova, kijan sa ka édé-nou priyé plibyen ? Bay on ègzanp (gadé nòt-la osi).

⁶ Lè nou ka di Jéova sa nou ka pansé é sa nou ka rèsanti, nou ka vin pi bon zanmi èvè-y. Men ka ki pé édé-nou fè dé priyè konsa ?

⁷ Réfléchi asi bèl kalité a Jéovaa. Lè nou ka sonjé bèl kalité a Jéova, sa pli fasil pou wouvè tchè an nou ba-y (Sòm 145:8, 9, 18). An-nou vwè ègzanp a Kristine, on sè pap’a-y té ni bon vyolans an kò a-y. Mi sa i ka èspliké : « Akòz dè sa, an té i dimal a kwè kè Jéova sé on papa ki plen lanmou é an té ni dimal a palé ba-y. An té ka pansé kè Jéova té’é lagé-mwen akòz dè défo an mwen. » Ka ki édé-y ? Mi sa i ka di : « An réfléchi onlo asi lanmou fidèl a Jéova é sa édé-mwen konprann kè Jéova enmé-mwen. Alè an sav i ké toujou la pou mwen. Menmsi an fè on érè, apapousa i ké arété enmé-mwen é édé-mwen. Lè an ka sonjé sa, sa ka édé-mwen di-y tousa ki an fon a tchè an mwen, ki sé sa ki ka mèt jwa an tchè an mwen ki sé sa ki ka rann-mwen tris. »

8-9. Poukwa sé on bon biten lè ou ka réfléchi pou vwè ka ou ké di Jéova ou ké di avan ou priyé ? Bay on ègzanp.

⁸ Réfléchi pou vwè sa ou ké di Jéova. Avan ou priyé, ou pé pozé-w déotwa kèsyon. Pa ègzanp : « Ki pwoblèm an ka jwenn sé jou-lasa ? Ès ni on moun fò an padonné ? Ès an bizwen Jéova édé-mwen pou an fè kò èvè on chanjman ? » (2 Wa 19:15-19). Nou pé sonjé priyè-la Jézi té ba disip a-y é sa pé ban-nou on lidé asi sa nou pé di adan priyè an nou. Nou pé priyé pou non a Jéova, pou wayòm a-y é pou volonté a-y fèt (Mat. 6:9, 10).

⁹ On sè non a-y sé Aliska aprann kè mari a-y té ni on kansè an tèt é kè pa té ka rété-y onlo tan a viv. Mi sa i ka di : « An té tèlman chouboulé ! Lè an té ka priyé an pa té menm ka touvé ka pou an té di Jéova. » Ka ki édé-y ? Mi sa i ka èspliké : « Avan an priyé, an ka mandé-mwen ka an ké di Jéova, konsa an pa ka konsantré-mwen enki asi mwen é asi maladi a mari an mwen. Lè an ka fè sa, an pi kalm é an pé palé Jéova dè diféran biten. »

10. Poukwa fò nou pran tan an nou lèwvwè nou ka priyé ? (gadé sé imaj-la osi).

¹⁰ Pran tan a-w lè ou ka priyé. Menmsi lè nou ka fè priyè ki kout sa pa ka anpéché-nou vin bon zanmi èvè Jéova, lè nou ka pran tan an nou pou nou priyé, nou pé di Jéova plis biten asi sa nou ka rèsantib. Mi sa Elijah, mari a Aliska ka di : « An ka éséyé priyé plizyè fwa an jouné-la é an ka rété on bon moman ka palé ba Jéova. Sa ka édé-mwen santi kè an bon zanmi èvè-y. Alò an ka pran ti tan an mwen mwen palé ba Jéova pas an sav i ka kouté-mwen é i pa présé. » Éséyé sa : chwazi on moman pou palé ba Jéova, touvé on ti koté ponmoun pé’é jenné-w é pran tan a-w pou priyé. Éséyé pran labitid fè sa.

RÉFLÉCHI POU VWÈ KA SÉ PRIYÈ-LA KI AN BIB-LA KA APRANN-VOU

11. Lè nou ka réfléchi asi priyè ki maké an Bib-la, ki byenfé sa ka pwokiré-nou ? (gadé osi ti karé-la « Ès sitiyasyon a yo ka sanm ta-w ? »).

¹¹ Adan Labib, nou ka touvé sa sèwvitè a Jéova di adan priyè a yo é adan sé chanté-la yo fè pou Jéova. Si nou ka pran tan réfléchi asi sé pawòl-lasa, sa pé itil ban nou. Adan sé priyè-lasa é sé chanté-lasa, sèwvitè a Jéova wouvè tchè a yo ba-y. Lè ou ka étidyé pawòl a yo, sa ka ba-w gou pou fè menm biten. Adan priyè a yo, ou ké pé touvé dòt èksprésyon ou ké pé itilizé adan priyè a-w. É pétèt ou ké dékouvè kè sèwvitè a Jéova di dé biten é sé ègzaktèman sa ou ka viv é sa ou ka rèsanti.

12. Ki kèsyon nou pé pozé-nou toupannan nou ka li on priyè ki an Bib-la ?

¹² Lè ou ka pran tan réfléchi asi on priyè ki adan Labib ou pé mandé-w : « Kimoun ki fè priyè-lasa é adan ki sitiyasyon i té yé a moman-lasa ? Èskè sitiyasyon a-y ka sanm tan mwen ? Ka sa ka aprann-mwen ? » Pétèt fò-w ké fè déotwa rèchèch pou réponn sé kèsyon-lasa men sé ké on bon biten. An-nou vwè déotwa ègzanp.

13. Ka priyè a Àn ka aprann-nou ? (1 Samiyèl 1:10, 11 ; gadé osi imaj-la ki anlè po a jounal-la).

¹³ (Li 1 Samiyèl 1:10, 11.) Lè Àn fè priyè-lasa i té ka jwenn 2 pwoblèm : i pa té pé fè timoun é mari a-y té ni ondòt madanm ki té ka fè-y vwè bon mizè (1 Sam. 1:4-7). Si vou osi, sa ja ka fè déotwa tan ou ka jwenn on pwoblèm é kè sa ka ba-w bon gaz, kijan priyè a Àn pé édé-w ? I pran tan a-y pou di Jéova tousa ki té ka pran tèt a-y é aprésa i santi-y pibyen (1 Sam. 1:12, 18). Nou osi nou ké santi-nou pibyen siwvwè ‘nou ka lagé sa ki two lou ban nou asi Jéova’, kivédi tout ti bobo nou ni an tchè an nou é tousa ki ka enkyété-nou (Sòm 55:22).

14. a) Ki dòt biten priyè a Àn ka aprann-nou ? b) Lè nou ka pran tan réfléchi asi sa ki maké an Bib-la, kijan sa pé édé-nou priyé pibyen ankò ? (gadé nòt-la).

¹⁴ Déotwa lanné apré Samiyèl fèt, Àn menné-y ba Éli gran prèt-la (1 Sam. 1:24-28). Adan on priyè, i di Jéova kè i té ni onlo rèkonésans pas i vwè jan i ka pwotéjé sèwvitè a-y é jan i ka pran swen a yoc (1 Sam. 2:1, 8, 9). Sé vré, pwoblèm a-y té la toujou, men olyé i konsantré-y enki asi sa, i té ka sonjé jan-la Jéova té béni-y. Ka sa ka aprann-nou ? Nou osi nou ké pé andiré difikilté nou ka jwenn siwvwè nou ka konsantré-nou asi sa Jéova ka fè konnyéla pou soutyenn-nou.

15. Ka priyè a Jérémi ka aprann-nou ? (Jérémi 12:1).

¹⁵ (Li Jérémi 12:1.) Afòs Jérémi vwè jan zafè a sé méchan-la té ka maché, rivé onlè sa kasé 2 bra a-y. Lè i té ka vwè osi jan konpatriyòt a-y té ka aji èvè-y, sa té ka dékourajé-y (Jér. 20:7, 8). Nou pé konprann sa i té ka rèsanti pas yo ja fè jé èvè tèt an nou é nou ka vwè moun ka fè mové biten é yo ka sòti bèl adan sa. Jérémi di Jéova kè i té kòlè akòz dè sa i té ka vwè la men i pa jen di kè Jéova pa ka aji èvè jistis. Lè i vwè jan Jéova korijé pèp a-y ki té wòs, sa édé-y ni plis konfyans adan jistis a Jéova ankò (Jér. 32:19). Nou osi nou pé wouvwè tchè an nou ba Jéova pou nou di-y jan sa ka fè-nou mal lè nou ka vwè moun ki ka mal aji. Nou pé di-y osi kè menmsi yo ka fè-nou on biten ki pa jis, nou sav kè i ké mèt on milyé adan sa a bon moman-la.

16. Ka priyè a on Lévit ka aprann-nou ? (Sòm 42:1-4 ; gadé sé imaj-la osi).

¹⁶ (Li Sòm 42:1-4.) Lévit-la ki maké Sòm-lasa pa té pé ay adan Tanp-la pou adoré Jéova èvè sélézòt Israélit-la. Adan Sòm-lasa i ka di sa i té ka rèsanti. Si yo mété-nou lajòl pas nou ka adoré Jéova, oben si nou oblijé rété akaz an nou pas nou malad, nou pé konprann sa i té ka rèsanti. Lè sé konsa, onlè nou byen é onlè nou dékourajé. Men kèlkèswa sa nou ka rèsanti, sé on bon biten si nou ka di Jéova sa. Sa pé édé-nou konprann sa nou ka rèsanti pibyen é sa pé édé-nou sonjé sa ki pi enpòwtan. Pa ègzanp, Lévit-la rann-li kont kè i té ni dòt lokazyon pou adoré Jéova (Sòm 42:5). I réfléchi osi asi jan-la Jéova té ka pran swen a-y (Sòm 42:8). Lè nou ka wouvè tchè an nou ba Jéova, sa ka édé-nou konprann pibyen sa nou ka rèsanti, sa ka trankilizé-nou é sa ka ban-nou fòs pou nou tchenbé.

17. a) Ka priyè a Pwofèt Jonas ka aprann-nou ? (Jonas 2:1, 2). b) Lèwvwè nou ka woutyenn sèwten èksprésyon ki adan sé Sòm-la, ki bon biten sa pé pòté ban nou ? (gadé nòt-la osi).

¹⁷ (Li Jonas 2:1, 2.) Pwofèt Jonas fè priyè-lasa lè i té an vant a on gwo pwason. I té sèten kè menmsi i pa té obéyi Jéova, Jéova té’é tann priyè a-y. Adan priyè-lasa i sèvi èvè onlo èksprésyon nou ka touvé adan sé Sòm-lad. I dwèt té konnèt sé Sòm-la byen menm. Lèfètkè i sonjé sé vèwsé-lasa é kè i réfléchi asi yo, i té sèten kè Jéova té’é soutyenn-li. Nou osi nou pé fè éfò pou nou woutyenn sèwten vèwsé. Konsa lè nou ké ka jwenn bout-rèd é kè nou ké priyé Jéova, sé vèwsé-lasa ké wouvin an lèspri an nou é yo ké trankilizé-nou.

KONTINYÉ PRIYÉ JÉOVA POU-W RÉTÉ BON ZANMI ÈVÈ-Y

18-19. Lè nou pa sav ka pou nou di adan priyè an nou, kijan sa ki maké adan Women 8:26, 27 pé édé-nou ? Bay on ègzanp.

¹⁸ (Li Women 8:26, 27.) Délè nou pé santi-nou tèlman angwasé kè nou pa’a rivé di Jéova sa nou ka rèsanti. Men nou pa tousèl an nou. A moman-lasa lèspri sen a Bondyé « ka sipliyé » pou nou. Kijansa ? Jéova sèvi èvè lèspri sen a-y pou fè ansòt pou yo maké adan Labib plizyè priyè moun fè. Lè nou pa sav ka pou nou di, Jéova pé fè konsi sé nou ki té di sé priyè-la ki an Bib-la, é i pé réponn a sé priyè-lasa.

¹⁹ Lidé-lasa édé Yelena on sè ki ka rété an Risi. Yo arété-y pas i té ka priyé é i té ka étidyé Labib. Yelena té tèlman istrésé kè i té ni dimal a priyé. Mi sa i ka di : « An sonjé kè lè an ka santi kè biten-la two fò ban mwen, é kè an pa sav ka pou an di, Jéova ka pran sé priyè-la ki maké adan Labib, […] é i ka fè konsi sé mwen ki té ka di-yo […]. Sa édé-mwen onlo lè an té ka jwenn bout-rèd-lasa. »

20. Lè nou istrésé, ka ki pé édé-nou priyé ?

²⁰ Lè nou istrésé nou pé ni dimal a konsantré-nou asi sa nou ka di adan priyè an nou. Ka ki pé édé-nou ? Ében sé kouté sé Sòm-la avan nou priyé. Nou pé éséyé maké sa nou ka rèsanti asi on fèy, kon David fè-y (Sòm 18 ; 34 ; 142). Nou ka tou konprann kè pa ni onsèl mannyè pou nou préparé-nou avan nou priyé (Sòm 141:2). Fè sa ki pibon ba-w.

21. Poukwa nou pé priyé èvè tout tchè an nou ?

²¹ Jéova ka konprann sa nou ka rèsanti, avan menm nou koumansé palé ba-y, é sa ka rasiré-nou (Sòm 139:4). Men apapousa i pa enmé tann-nou di-y sa ki an tchè an nou, é kijan nou ka fè-y konfyans. Alò pa pè priyé Pap’a-w ki an syèl-la. Pa ézité sèvi èvè èksprésyon ki adan sé priyè-la ki maké an Bib-la. Priyé-y èvè tout tchè a-w. Wouvè tchè a-w ba-y, é di-y sa ki ka fè-w plézi é sa ki ka rann-vou tris. Jéova sé zanmi a-w, i ké toujou la pou vou !