Pa oubliyé priyé pou lézòt

1. Kijan nou fè sav kè Jéova ka ba priyè an nou onlo valè ?

LAPRIYÈ sé on bèl kado Jéova fè-nou. Ou ka imajiné ! Jéova ka ba sé zanj-la fè onlo biten (Sòm 91:11). I ba Gason a-y osi diféran rèsponsabilité ki enpòwtan toubònman (Mat. 28:18). Men kimoun i bay okipé dè sé priyè-la ? I pa lésé sa ba ponmoun. Sé-y tousèl « ki ka tann priyè-la » (Sòm 65:2).

2. Lapòt Pòl té ka priyé pou lézòt. Poukwa nou pé di kè sé on bon ègzanp ban nou ?

² Nou pé wouvè tchè an nou ba Jéova é palé-y dè sa ki ka trakasé-nou, men fò nou priyé osi ba lézòt. Sé sa lapòt Pòl té ka fè. Pa ègzanp, mi sa i maké ba lasanblé Éfèz : « An ka kontinyé sonjé-zòt adan priyè an mwen » (Éféz. 1:16). Men a pa enki ba dé gwoupmoun i té ka priyé. Lè fò i té priyé ba on moun i té ka fè-y osi. Pa ègzanp, mi sa i di Timoté : « An ka di Bondyé mèsi […]. An toujou ka sonjé-w lè an ka sipliyé-y lajouné kon lannuit » (2 Tim. 1:3). Pòl té ni pwoblèm a-y ki ta-y é i té ka palé Jéova dè sa (2 Kor. 11:23 ; 12:7, 8). Men sa pa té ka anpéché-y priyé pou lézòt.

3. Poukwa nou pé oubliyé priyé ba lézòt ?

³ Délè nou pé oubliyé priyé ba lézòt. Poukwasa ? On sè non a-y sé Sabrinaa ka èspliké pou ki rézon. Mi sa i ka di : « Adan mond-lasa, nou toujou ka kouri. Anplisdisa, nou pé ni tèlman pwoblèm kè nou pa’a sonjé priyé ba lézòt. » Ès sa ka rivé-w ? Si sé sa, awtik-lasa ké pé édé-w. 1) I ké montré-nou poukwa sa enpòwtan kè nou priyé pou lézòt é 2) nou ké vwè kijan nou pé fè sa.

POUKWA FÒ NOU PRIYÉ POU LÉZÒT ?

4-5. Kijan priyè an nou pé « ni on éfé ki fò toubònman » ? (Jak 5:16).

⁴ Priyé pou lézòt « ni on éfé ki fò toubònman » (li Jak 5:16). Lè nou ka priyé pou lézòt, ès sa ka chanjé on biten adan sitiyasyon a yo ? Wi. Pa ègzanp, Jézi té sav kè lapòt Pyè té’é trayi-y, alò mi sa i di-y : « An sipliyé Bondyé ba-w, pou fwa a-w pa fébli » (Lik 22:32). Pòl té sav osi kè lè on moun ka priyé pou ondòt moun, sa pé édé lòt moun-la. Lè yo mété Pòl lajòl a Wòm alòskè i té inosan, mi sa i di Filémon : « An ka èspéré kè grasa priyè a zòt, yo ké lagé-mwen » (Filém. 22). É sé sa ki pasé. Déotwa tan apré, yo lagé Pòl é i té pé woukoumansé préché.

⁵ Sa vé pa di kè pas nou ka priyé Jéova, nou ka mèt présyon si-y. I ka vwè lè on moun anvi on biten é délè i pé ba-y li. Lèfètkè nou sav sa, sa ka édé-nou pou nou kontinyé priyé Jéova kèlkèswa sitiyasyon-la é lésé tout biten-la an men a-y. (Sòm 37:5 ; 2 Kor. 1:11).

6. Lè nou ka priyé ba lézòt ka nou pé rèsanti ? (1 Pyè 3:8).

⁶ Priyé pou lézòt ka édé-nou ni « on konpasyon ki plen tandrès » pou yo (li 1 Pyè 3:8). Lèwvwè on moun ni konpasyon, non sèlman i ka vwè lè ondòt moun ka soufè men i anvi fè on biten pou édé-y (Mawk 1:40, 41). Mi sa on ansyen non a-y sé Michael ka di : « Lè an ka priyé pou mandé Jéova édé on moun, an ka konprann difikilté moun-lasa ka jwenn pibyen, é an ka enmé moun-lasa pi fò ankò. » Richard, ondòt ansyen ka èspliké ki bon biten sa ka pòté lè ou ka priyé pou ondòt moun. Mi sa i ka di : « Lè nou ka priyé pou on moun, sa ka ban-nou plis balan pou nou édé-y. » Mi sa i ka di ankò : « Lè nou ka fè on biten pou édé moun-la nou ka priyé ba-y la, sé konsidiré nou ka aji annakò èvè priyè an nou.

7. Lè nou ka priyé ba lézòt kijan sa ka édé-nou pou nou pa konsantré-nou enki asi pwoblèm an nou ? (Filipyen 2:3, 4 ; gadé imaj-la osi).

⁷ Priyé ba lézòt ka édé-nou vwè pwoblèm an nou ondòt jan (li Filipyen 2:3, 4). Konm nou ka viv adan mond a Dyab-la, noutout ka jwenn pwoblèm (1 Jan 5:19 ; Rév. 12:12). Lè nou ka priyé ba lézòt, sa ka fè-nou sonjé kè ‘tout frè an nou asi latè ka jwenn menm kalité soufrans ki nou’ (1 Pyè 5:9). Katherine sé on sè ki pyonyé. Mi sa i ka di : « Lè an ka priyé ba lézòt sa ka fè-mwen sonjé kè a pa mwen tousèl ki ni pwoblèm. A moman-lasa an pa’a konsantré-mwen enki asi pwoblèm an mwen. »

MOUN NOU PÉ SONJÉ ADAN PRIYÈ AN NOU

8. Ba kimoun nou pé priyé ?

⁸ Kimoun nou pé sonjé adan priyè an nou ? Nou pé priyé ba diféran gwoupmoun kon sé moun-la santé a yo pa two flanbo oben sé jenn-la ki ka jwen pwoblèm lékòl. Nou pé priyé osi pou frè é sè ki ja ni on bèl laj. Onlo adan frè é sè an nou ka pran fè pas fanmi a yo oben gouvènman-la ka pèwsékité-yo (Mat. 10:18, 36 ; Akt 12:5). Ni dòt ki té oblijé chapé kò a yo é kité kaz a yo pas té ni vyolans la yo té ka rété la. Ni dòt ankò, sé on katastwòf natirèl ki fèt la yo ka rété la. Nou pa oblijé konnèt sé frè é sè lasa. Men lè nou ka priyé pou yo, nou ka montré kè « yonn enmé lòt » kon Jézi mandé-nou fè (Jan 13:34).

9. Poukwa fò nou priyé ba sé frè-la ki ka pòté mannèv adan òwganizasyon-la é ba madanm a yo ?

⁹ Nou pé priyé osi ba moun ki an tèt a òwganizasyon-la. Sé pé pou sé frè a Komité santral la é asistan a yo, sé frè-la ki rèsponsab a sé sèwvis-la an Bétèl-la, sé rèsponsab a siwkonskripsyon la, sé ansyen-la é sé asistan-la. Onlo adan yo ni pwoblèm a yo, men magrésa yo ka kontinyé édé-nou (2 Kor. 12:15). Pa ègzanp, mi sa on rèsponsab a siwkonskripsyon non a-y sé Mark ka di : « On biten ki rèd toubònman ban mwen sé viv lwen a fanmi an mwen. Yo ja ni on ti laj é santé-la pa bon. Menmsi sè an mwen é mari a-y ka okipé dè yo, lè an ka sonjé kè an pa la pou ba yo on pal, sa ka fan’an lapenn. » Frè an nou ka travay rèd é menmsi nou pa sav ki pwoblèm yo ka jwenn, nou pé priyé ba yo (1 Tés. 5:12, 13). Nou pé priyé osi pou madanm a sé frè-lasa pas konm yo ka soutyenn mari a yo, mari-la pé kontinyé travay pou lasanblé-la.

10-11. Ès Jéova kontan lè nou ka priyé pou on gwoupmoun ?

¹⁰ Kon nou sòti vwè-y, souvantfwa nou ka priyé ba diféran gwoupmoun. Pa ègzanp, nou pé priyé pou frè é sè an nou ki lajòl oben frè é sè an nou ki pèd on moun yo enmé menmsi nou pa konnèt-yo. Mi sa on ansyen non a-y sé Donald ka di : « Alèla ni tèlman frè é sè ki ka soufè ! Konm nou pé pa nonmé non a yotout, nou ka di Jéova soutyenn tout frè é sè ki ka soufè. »

¹¹ Ès sé priyè-lasa ka fè Jéova plézi ? Ou pé di-y ! Lè ou byen gadé, nou pé pa konnèt sa chak frè é sè an nou bizwen ègzaktèman. Kifè a pa on mové biten si nou ka priyé pou on gwoupmoun (Jan 17:20 ; Éféz. 6:18). Sé priyè-lasa ka montré kè ‘nou enmé tout frè é sè an nou’ (1 Pyè 2:17).

LÈ OU KA PRIYÉ POU SÈWTEN MOUN

12. Si nou ka pran tan gadé byen alantou an nou, kijan sa pé édé-nou priyé ba lézòt pibyen ?

¹² Pran tan òbsèwvé. Sé on bon biten lè nou ka priyé ba dé gwoupmoun men sé on bon biten osi lèwvwè nou ka priyé pou on frè oben on sè é kè nou ka nonmé non a-y. Pétèt on moun adan lasanblé a-w ka goumé èvè on maladi ki grav, oben pétèt kè on jenn dékourajé pas ni bon présyon lékòl. Pétèt osi on manman oben on papa ka goumé pou lévé timoun a-y tousèl a-y « sèlon édikasyon é avèwtisman a Jéova » (Éféz. 6:4). Si ou ka pran tan gadé byen alantou a-w, ou ké vwè sa frè é sè a-w ka viv, sa ké touché-w é sa ké ba-w anvi priyé ba yob (Wom. 12:15).

13. Kijan nou pé priyé ba frè é sè nou po’o jen vwè ?

¹³ Nonmé non a frè é sè a-w adan priyè a-w. Ou pé fè sa menmsi ou po’o jen vwè-yo. Pa ègzanp, sonjé sé frè é é sè la ki lajòl an Krimé, an Éritré, an Risi é a Sengapouw. Asi jw.org, ou pé touvé non a sèwten adan yoc. Brian sé on rèsponsab a siwkonskripsyon. Mi sa i ka di : « An rann-mwen kont kè lè an ka maké non a on moun ki lajòl, é lè an ka répété non-la, sa ka édé-mwen sonjé-y é nonmé non a-y adan priyè an mwen. »

14-15. Ka ki ké édé-nou di dé biten byen prési pou frè é sè an nou adan priyè an nou ?

¹⁴ Mandé on biten byen prési. Mi sa Michael, nou palé dè-y talèla ka di : « Lè an k’ay asi jw.org é kè an ka li istwa a sèwten frè ki lajòl, an ka éséyé imajiné sa an té’é rèsanti si an té adan sitiyasyon a yo. An sav an té ké enkyèt pou madanm an mwen, é an té’é vlé yo okipé byen dè-y. Kifè sa ka pèwmèt-mwen mandé dé biten byen prési adan priyè an mwen pou sé frè-la ki lajòl é ki mayé » (Ébr. 13:3 ; gadé nòt-la an fwansé).

¹⁵ Lè nou ka éséyé imajiné kijan sa ka pasé pou frè é sè an nou adan lajòl-la, sa ka édé-nou sav ka pou nou mandé Jéova adan priyè an nou. Pa ègzanp, nou pé mandé Jéova pou sé gad a lajòl la janti èvè frè é sè an nou é pou sé rèsponsab-la lésé-yo adoré Jéova (1 Tim. 2:1, 2). Nou pé priyé osi pou ègzanp a yo ankourajé frè é sè a lasanblé a yo é pou bèl konduit a yo touché moun ki an lajòl-la é ki pa Témwen, pou sa ba-yo anvi kouté Pawòl a Bondyé (1 Pyè 2:12). Nou pé fè menm biten pou frè é sè ki ka jwenn dòt kalté pwoblèm. Lè nou ka pran tan gadé alantou an nou, lè nou ka nonmé non a lézòt adan priyè an nou, é lè nou ka mandé Jéova dé biten byen prési ba yo, nou ka montré « yonn enmé lòt fò fò fò menm » (1 Tés. 3:12).

SONJÉ SÉ BONDYÉ KI KONNÈT KIJAN I KÉ RÉPONN PRIYÈ A-W

16. Menmsi nou sav kè lè nou ka priyé ba on moun sa pé édé-y, ka pou nou sonjé ? (Matyé 6:8).

¹⁶ Sé vré kè lè nou ka sonjé on moun adan priyè an nou sa pé édé-y. Men lè nou ka priyé Jéova apapoudi nou ka ba-y on enfòwmasyon i po’o konnèt. Nou pa ka priyé nonplis pou nou di-y kijan pou i réglé on sitiyasyon. Avan menm nou mandé Jéova on biten ban nou oben ba ondòt moun, i ja sav ka nou bizwen é ka lòt moun-la bizwen (li Matyé 6:8). Alò pou ki rézon fò nou priyé kanmenm ? Anplis dè sé rézon-la nou ja palé adan awtik-lasa, nou ka priyé ba lézòt pas sa ka montré lézòt ni valè pou nou. Sé lanmou ki ka fè-nou priyé pou lézòt. Lè Jéova ka vwè nou ka aji èvè lanmou menmjan ki-y, i ka kontan toubònman.

17-18. Bay on ègzanp ki ka montré jan sa enpòwtan kè nou priyé pou lézòt.

¹⁷ Menmsi i ka sanm sa priyè an nou pa ka chanjé ayen adan on sitiyasyon, antouka yo ka montré kè nou enmé frè é sè an nou é Jéova ka vwè sa. An-nou pran on ègzanp. On fanmi ni 2 timoun, on tigason é on tifi. Tigason-la ka tonbé malad. Tifi-la k’ay vwè papa-la é i ka di-y : « Souplé papa, fè on biten pou frè an mwen ! I malad ! » Papa-la ja ka fè on biten pou tigason-la pas i enmé tigason a-y é i ka pran swen a-y. Men a pa ti kontan i dwèt kontan lè i ka vwè kè tifi a-y enmé frè a-y é kè i vé kè papa-la fè on biten pou édé-y !

¹⁸ Jéova vé kè yonn enmé lòt é kè yonn priyé ba lòt. Lè nou ka fè sa, nou ka montré kè frè é sè an nou ni valè pou nou, é lè Jéova ka vwè sa, sa ka fè-y plézi (2 Tés. 1:3 ; Ébr. 6:10). Anplisdisa, lè nou ka priyé pou on moun, sa pé menm chanjé sitiyasyon-la. Alò an-nou kontinyé priyé ba lézòt.