Ka mirak a sé pen-la ka aprann-nou ?

1. Poukwa nou pé di kè pen-la té enpòwtan an tan a Labib ?

AN TAN a Labib, sa sé moun-la té ka manjé plis, sé té pen (Jén. 14:18 ; Lik 4:4). Manjé-lasa té tèlman enpòwtan kè délè Labib ka sèvi èvè lèmo « pen » pou i palé dè manjé (Mat. 6:11 ; Akt 20:7, gadé osi nòt-la adan Bib-la ki fèt pou étidyé la an fransé). Jézi itillizé pen adan 2 mirak i fè é kè onlo moun konnèt (Mat. 16:9, 10). Nou ka touvé yonn adan yo adan Jan chapit 6. Nou ké étidyé istwa-lasa é nou ké vwè ka sa ka aprann-nou.

2. Adan ki sitiyasyon onpakèt moun vin touvé-yo ?

² Apré yo préché bon préché la, sé apòt-la las toubònman, kifè yo ka santi yo bizwen pozé kò-la tibwen. Yo ka pran on bato èvè Jézi, yo ka travèsé lanmè Galilé pou ay lòt koté-la (Mawk 6:7, 30-32 ; Lik 9:10). Yo ka rivé Bètsayid, é yo ka touvé on ti koté apa. Men, moun tann-di kè Jézi té la. Alò, adan on ti moman, onpakèt moun vin pou vwè-y. Olyé i fè konsi yo pa té la, èvè onlo bonté, Jézi ka pran tan a-y pou anségné-yo dé biten asi Wayòm-la é pou géri moun ki malad. Konm i té ja ta, sé disip-la ka mandé-yo kijan tout sé moun-la ki la la ké touvé on biten pou yo manjé. Pétèt sèwten adan sé moun-la té ni on ti dèkwa, men lamajorité adan yo ké oblijé pati pou ay chèché manjé. Ka Jézi ké fè ?

JÉZI KA FÈ ON MIRAK POU BA MOUN PEN

3. Ka Jézi di disip a-y fè pou édé on foulmoun ? (gadé osi imaj-la).

³ Jézi ka di apòt a-y: « Yo pa bizwen déplasé. Zò pé ba-yo manjé zòmenm a zòt » (Mat. 14:16). Men pwoblèm-la sé kè té ni 5 000 misyé. Men a pa misyé tousèl ki té ni, té ni madanm é té timoun osi, kivédi yo té ni apépré 15 000 bouch a nouri (Mat. 14:21). Mi sa André di : « Ni on tigason ki ni 5 pen ki fèt èvè òwj é 2 ti pwason. Men sa pa ayen pou tousa moun ! » (Jan 6:9). Sé vré kè sé moun-la té abityé manjé pen ki fèt èvè on séréal yo ka kriyé òwj é yo té abityé manjé pwason salé kè yo té ka mèt séché. Men sé té on ti krazi manjé é pa té’é ni asé pou tousa moun manjé.

4. Ka nou pé aprann dè sa nou ka li adan Jan 6:11-13 ? (gadé imaj-la osi).

⁴ Èvè onlo jantiyès, Jézi ka mandé sé moun-la fè dé ti gwoup é sizé an zèb-la (Mawk 6:39, 40 ; li Jan 6:11-13). Aprésa i ka di Bondyé mèsi pou pen-la é sé pwason-la. Konm manjé-la ka vin dè Bondyé sa toutafè nòwmal kè i fè sa. Mi on bèl ègzanp ban-nou mi ! An-nou pa jen oubliyé di Bondyé mèsi avan nou pran on rèpa, ki nou tousèl ki ni moun alatou an nou. Aprésa, Jézi ka mandé sé disip-la distribiyé manjé-la ba sé moun-la é yo ka manjé vant a yo plen. Manjé jous ka rété atè. Konm Jézi vé pa sa gaspiyé, i ka mandé sé disip-la ranmasé sa ki ka rété. Fwa-lasa ankò, i ka ban-nou on bèl ègzanp. An-nou sèvi èvè sa nou tini èvè sajès. Si ou ni timoun, ka ou ka pansé si ou té ka ègzaminé istwa-lasa èvè yo ? Aprésa, zò té’é pé vwè ki lèson sa ka aprann-yo.

5. Apré Jézi ba on foulmoun manjé, ka sé moun-la té vlé fè, men kijan Jézi réyaji ?

⁵ Lèwvwè yo tann kijan Jézi ka anségné é lè yo vwè mirak i fè, sé moun-la rété èstèbèkwè. Moyiz anonsé kè Bondyé té’é ba pèp-la on gran pwofèt, alò pétèt yo di-yo kè Jézi té pwofèt-lasa (Dét. 18:15-18). Pétèt yo té ka pansé kè Jézi té ké on bon chèf toubònman ki té kapab ba tout pèp-la manjé ! Kifè foulmoun-la té bizwen « tchenbé-y pou mété-y wa » (Jan 6:14, 15). Si Jézi té lésé-yo fè sa, i té’é mélé-y adan politik a sé Juif-la ki té anba dominasyon a sé Women-la a moman-lasa. Men a pa sa i fè. Nou ka li kè Jézi pa fè ni yonn ni dé, i pati adan montangn-la. Magré yo mèt présyon asi-y, Jézi pa jen mélanjé-y adan politik. Mi ondòt bèl lèson pou nou mi !

6. Jézi lésé on bèl ègzanp ban nou. Kijan nou pé imité-y ? (gadé imaj-la osi).

⁶ Sé vré kè ponmoun pé’é mandé-nou fè on mirak pou ba-yo onpakèt pen oben pou géri-yo é yo pé’é mandé-nou vin chèf a péyi-la. Men ni sa ki pé éséyé pran tèt an nou pou nou soutyenn on moun adan lapolitik oben pou fè-nou voté ba on moun, pas pou yo moun-lasa ké gouvèné byen. Men li Jézi té karé asi sa. I pa jen mélanjé-y adan zafè a politik. Limenm ni lokazyon di : « Wayòm an mwen pa adan mond-lasa » (Jan 17:14 ; 18:36). Jòdijou, nou ka imité jan Jézi té ka rézonné é jan i té ka aji : nou ka soutyenn Wayòm-la, nou ka préché Wayòm-la é nou ka priyé pou i pé sa vini (Mat. 6:10). Talè-la nou vwè kè Jézi fè on mirak pou ba moun pen. Alè, an-nou wouvin asi sa nou aprann anrapò èvè sa.

KA MIRAK A SÉ PEN-LA TÉ VÉ DI

7. Ka Jézi fè é kijan sé apòt-la réyaji ? (Jan 6:16-20).

⁷ Apré i fin ba foul-la manjé, Jézi lésé sé disip-la rètouné Kafawnaòm èvè bato-la é li i pati an montangn-la pou foul-la pa té fè-y vin wa (li Jan 6:16-20). Pannan yo té ka travèsé lanmè-la, on gwo tanpèt lévé é té ni dé manman vag. Lèwgadé Jézi maché asi dlo-la pou i vin owa yo é i pèwmèt lapòt Pyè fè menm biten (Mat. 14:22-31). Lèwvwè Jézi rivé an bato-la, van-la arété onsèl kou. Sé disip-la rété èstèbèkwè é yo di-y : « Ou sé Gason a Bondyé menm !a » (Mat. 14:33). Sé disip-la po’o té konprann kè Jéova té ba Jézi pouvwa pou i té fè plis ki on mirak pou ba moun pen. Dayè Mawk ka di : « Lè [sé apòt-la] vwè sa, yo rété sézi pas yo pa té konprann ka mirak-la i té fè èvè sé pen-la té vlé di. A pa tout biten yo té ka rivé konprann » (Mawk 6:50-52). Kon nou sòti vwè-y, sé apòt-la po’o té konprann kantité puisans Jéova té ba Jézi pou i té fè mirak. Men déotwa tan apré, Jézi woupalé-yo dè mirak-la i fè la èvè sé pen-la pou anségné-yo ondòt biten ankò.

8-9. Poukwa foulmoun-la ay jwenn Jézi ? (Jan 6:26, 27).

⁸ Sé moun-la Jézi té ba-yo manjé la té ka sonjé enki sa yo té bizwen é sa yo té anvi. Ka ki ka montré sa ? Lèlandèmen-la, sé moun-la konstaté kè Jézi é apòt a-y té pati. Konm té ni bato ki té sòti Tibéryad, sé moun-la monté adan sé bato-la pou yo ay jwenn Jézi Kafawnaòm (Jan 6:22-24). Ès yo té k’ay pou yo té aprann plis biten asi Wayòm-la ? Awa ! Sa ki té ka entérésé-yo sé té vant a yo. Kijan nou fè say sa ?

⁹ An-nou vwè ka ki pasé lèwvwè foulmoun-la jwenn Jézi ki té toupré Kafawnaòm. Jézi di-yo kè yo té ka vin owa a-y sèlman pas yo té anvi manjé. Men i di-yo osi kè menmsi manjé-la yo té manjé la té plen vant a yo, sé té on ‘manjé ki té ka gaté’. Alò, i di-yo kè fò yo té travay pou yo té ni ‘on manjé ki ka rété pou lavi étèwnèl’ (li Jan 6:26, 27). Aprésa, i di-yo kè manjé-lasa, sé Pap’a-y ki té’é ba-yo li. Lèwvwè sé moun-la tann kè ni on manjé ki ka rété pou lavi étèwnèl, tchè a yo dwèt soté. Yo dwèt té ka mandé-yo ki manjé ésa é ka pou yo té fè pou yo té ni-y.

10. Ka pou sé moun-la té fè pou « ni lavi étèwnèl » ?

¹⁰ I ka sanmsa sé Juif-la té ka kwè kè pou yo té trapé nouriti-lasa, fò yo té fè sèwten biten. Pétèt yo té ka sonjé dé biten ki té adan lwa a Moyiz. Men Jézi di-yo : « Mi sa Bondyé vlé zòt fè : i vlé zòt montré kè zò ni fwa adan sila i voyé la » (Jan 6:28, 29). Pou on moun té « ni lavi étèwnèl », fò i té ni fwa adan moun-la Bondyé té voyé la. A pa té 1^é fwa Jézi té ka èspliké sa (Jan 3:16-18, 36). Aprésa, i palé dè dòt biten pou on moun fè pou ni lavi étèwnèl (Jan 17:3).

11. Ka ki ka montré kè sèl biten ki té an tèt a sé Juif-la sé té manjé ? (Sòm 78:24, 25).

¹¹ Pou sé Juif-la, yo pa té bizwen ni fwa adan Jézi. Mi sa yo mandé-y : « Ki mirak ou ka fè douvan nou ki ké fè-nou kwè-w ? » (Jan 6:30). Yo di Jézi konsa kè a épòk a Moyiz, zansèt a yo té rèsèvwa lamàn, ki té kon jan dè pen (Néém. 9:15 ; li Sòm 78:24, 25). Sèl biten yo té ka sonjé sé té manjé. É lèwvwè Jézi di-yo kè « vré pen-la ki sòti an syèl-la » pé ba-yo lavi étèwnèl, yo pa menm mandé ka sa té vé di (Jan 6:32). Tèlman yo té konsantré asi zafè a manjé, yo pa kouté sa Jézi té ka éséyé anségné-yo alòskè sa té’é pé ba-yo lavi étèwnèl. Ka sa ka aprann-nou ?

ASI KI BITEN POU NOU KONSANTRÉ-NOU

12. Kijan Jézi montré sa ki dwètèt pi enpòwtan adan vi an nou ?

¹² Jan chapit 6 montré-nou on biten ki enpòwtan. Obéyi Bondyé é rété bon bon zanmi èvè-y, sé sé biten-lasa ki dwètèt pi enpòwtan pou nou. Sé sa Jézi fè-nou konprann lè i touvé-y douvan tantasyon a Dyab-la é kè i voyé-y alé (Mat. 4:3, 4). É asi Sèwmon-la i fè asi Montangn-la, i ni lokazyon montré jan sa enpòwtan kè nou rann-nou kont kè nou bizwen Bondyé gidé-nou (Mat. 5:3). Alò mi sa pou nou mandé-nou : « Ès jan-la an ka viv la ka montré kè sa ki pli enpòwtan ban mwen sé lésé Bondyé gidé-mwen oben ès sa ka montré kè an ka konsantré-mwen enki asi sa mwen anvi ? »

13. a) Poukwa lè on moun enmé manjé a pa on mové biten ? b) A ki biten pou nou fè atansyon ? (1 Kor. 10:6, 7, 11).

¹³ Lè nou ka priyé Bondyé pou i ban-nou sé biten-la nou bizwen la é kè nou ka pwofité dè sé biten-lasa, pa ni ayen dè mal adan sa (Lik 11:3). Sé on bon biten lè nou ka ‘manjé, bwè é pran plézi adan travay rèd la nou ka fè la. Tousa, sé an men a vré Bondyé-la sa ka sòti’(Ékl. 2:24 ; 8:15 ; Jak 1:17). Men fò pa nou lésé biten matéryèl vin sa ki pi enpòwtan ban nou. Sé sa lapòt Pòl montré lè i ékri on lèt ba sé krétyen Korent la. I fè-yo sonjé sa ki pasé owa mòn Sinayi-la an tan a Israèl. I di-yo penga ‘zò anvi mové biten’ menmjan ki sé Israélit-la (li 1 Korentyen 10:6, 7, 11). Jéova té fè on mirak pou ba sé Israélit-la manjé. Men tèlman yo té voras, yo lésé sa vin on pyèj ba yo (Nonb 11:4-6, 31-34). É kanta lè sé Israélit-la mété-yo ka adoré ti bèf an lò la, yo montré kè yo té préféré bwè, manjé é anmizé kò a yo plito ki obéyi Jéova (Ègz. 32:4-6). Pòl sèvi èvè sé ègzanp-lasa pou sé krétyen-la pa té pri adan menm pyèj-la, siwtou kè adan on ti moman yo té kay détwi Jérizalèm é tanp-la. Konm nou osi, nou pa lwen fen a mond-lasa, fò-nou tchenn kont dè sé konsèy-la lapòt Pòl bay la.

14. Kijan Labib ka di kè manjé-la ké yé adan nouvo mond-la ?

¹⁴ Lèwvwè Jézi di-nou priyé pou « pen-la nou bizwen la pou jòdila », i di-nou osi kè fò-nou priyé pou ‘volonté a Bondyé fèt asi latè kon i ja ka fèt an syèl-la’ (Mat. 6:9-11). Ès ou ja imajiné kijan biten-la ké yé a épòk-lasa ? Labib ka montré kè lè yo ka palé dè volonté a Bondyé, sa ka konsèwné manjé osi. Dapré sa Izayi 25:6-8 ka di, sé moun-la ki ké anba dominasyon a Bondyé ké ni manjé pou tann-é-konprann é manjé-lasa ké bon pou santé a yo. Mi sa Sòm 72:16 ka di : « Ké ni manjé pou tann-é-konprann asi latè ; antèt a sé montangn-la, ké ni manjé agogo. » Ès ou présé fè dé bon ti manjé é pétèt préparé dé biten kè ou po’o jen fè avan ? Oben pétèt ou ké ni ti pyé-rézen a-w é ou ké pé pwofité dè ti diven a-w a gou a tchè a-w (Iz. 65:21, 22). An réyalité, sé toutmoun asi latè ki ké pé pwofité dè sé bèl biten-lasa alèz a yo.

15. Ka sé moun-la ki ké résisité la ké bizwen aprann ? (Jan 6:35).

¹⁵ (Li Jan 6:35.) Ou ka sonjé sé moun-la Jézi té ba-yo sé pen-la é sé pwason-la ? Lè tan a larézirèksyon ké rivé, pétèt ou ké jwenn déotwa adan yo pas menmsi ni sa ki pa té ni fwa adan Jézi, pétèt yo ké résisité (Jan 5:28, 29). Men fò yo ké konprann ka Jézi té vlé di ojis lè i di : « An sé pen-la ki ka bay lavi. Moun-la ki ka vin owa an mwen pé’é jen fen ankò » (Jan 6:35). Fò yo ké montré yo ni fwa adan sakrifis a Jézi. A épòk-lasa, nou ké aprann sé moun-la ki ké résisité la é sé timoun-la ki ké fèt adan nouvo mond-la lavérité asi Jéova é asi pwojé a-y. A pa ti bèl sa ké bèl ! Édé sé moun-la vin bon bon zanmi èvè Jéova ké ban-nou plis jwa ki nenpòt bon manjé nou ké pé manjé.

16. Ka nou ké vwè adan awtik-la ki ka vin la ?

¹⁶ Nou sòti vwè déotwa vèwsé adan chapit 6 la. Men Jézi té ni onlo dòt biten ankò a di asi « lavi étèwnèl ». An tan a Jézi, sé Juif-la té bizwen tann sé vérité-lasa, men nou osi nou bizwen tann-yo. Sé pousa, adan awtik-la ki ka vin la, nou ké vwè dòt vèwsé ankò ki adan Jan chapit 6.