Ou pé viv pou touttan : kijan sa posib ?

1. Poukwa onlo moun pa’a kwè sa posib viv pou touttan ?

ONLO moun ka fè atansyon a sa yo ka manjé é yo ka fè ispò pou yo pé sa rété anfòm é viv lontan. Men yo sav byen apapousa yo ké viv pou touttan. Yo pa’a gè kwè sa posib, é dayè, a pa sa yo vlé nonplis lè yo ka vwè tout dézagréman lavyéyès ka menné. Poutan an Jan 3:16 é 5:24, Jézi di sa posib pou on moun ni « lavi étèwnèl ».

2. Ka Jan chapit 6 ka di asi lavi étèwnèl ? (Jan 6:39, 40).

² On jou Jézi fè on mirak, i ba plizyè milyé moun pen é pwason pou yo manjéa. Sa té fò toubòlman, men sa Jézi di lèlandèmen té pi fò ankò. Foulmoun-la suiv-li Kafawnaòm, toupré bòdlanmè a Galilé, é la i di yo kè i té ké résisité moun ki mò é i té ké ba-yo lavi étèwnèl (li Jan 6:39, 40). Imajiné ka sa té’é vlé di pou zanmi a-w é pou bon moun a-w ki ja mò. Pawòl a Jézi ka montré kè onlo moun ké résisité é, ki vou ki bon moun a-w ké pé viv pou touttan ! Men Jézi di dòt pawòl osi adan sé vèwsé-la ki ka suiv la kè onlo moun té ni dimal a konprann. An-nou pran tan ègzaminé sa Jézi di.

3. Ka Jézi aprann sé moun-la asi limenm dapré Jan 6:51 ?

³ Apré mirak-la Jézi fè la lè i ba foulmoun-la pen pou yo manjé, sa fè-yo sonjé lamàn Jéova té ba sé Israélit-la lè yo té adan dézè-la. An réyalité, Lézékriti ka kriyé lamàn « pen ki sòti an syèl-la » (Sòm 105:40 ; Jan 6:31). Jézi sèvi èvè ègzanp a lamàn pou anségné foulmoun-la on biten enpòwtan toubònman. Menmsi sé on mirak Jéova fè lè i bay lamàn, touséla ki manjé-y la fin pa mò (Jan 6:49). Pawkont Jézi di kè i sé « pen-la ki sòti an syèl-la », « pen a Bondyé », « pen-la ki ka bay lavi » (Jan 6:32, 33, 35). Aprésa i montré té ni on gwo diférans antrè lamàn é limenm. Mi sa i di : « An sé pen vivan la ki sòti an syèl-la. Si on moun ka manjé pen-lasa, i ké viv pou touttan » (li Jan 6:51). Sé Juif-la touvé-yo sézi. Kijanfè Jézi té pé di i sé on ‘pen ki sòti an syèl-la’ é ki ni plis valè ki lamàn kè Bondyé té ba zansèt a yo grasa on mirak ? Alò Jézi di-yo konsa : « Pen-la kè an ké bay la, sé chè an mwen ». Ka i té vé di pa la ? Sa enpòwtan kè nou konprann sans a pawòl a Jézi, pas sa ké édé-nou konprann osi kijan nou é moun nou enmé pé ni lavi étèwnèl. An-nou pwofondé sa i di.

PEN VIVAN LA É CHÈ A-Y

4. Poukwa sa Jézi di choké sèwten adan sé Juif-la ki té ka kouté-y la ?

⁴ Sèwten moun ki té ka kouté Jézi touvé-yo choké lè yo tann-li di kè i té ké bay « chè a-y pou sé moun-la ki an mond-la ni lavi ». Pétèt yo pansé kè Jézi té vlé yo manjé chè a-y poudèbon (Jan 6:52). Men aprésa, Jézi di-yo ondòt biten ki dwèt choké-yo piplis ankò. I di : « Si zò pa’a manjé chè a Gason a lòm, é si zò pa’a bwè san a-y, zò pé’é ni lavi » (Jan 6:53).

5. Poukwa nou pé sèten Jézi pa mandé sé moun-la bwè san a-y poubon ?

⁵ An tan a Noé, Jéova défandi lézimen manjé san (Jén. 9:3, 4). Pita, anba Lwa-la, Jéova mandé pèp a Israèl pa manjé san nonplis. Fò yo té tchouyé sila ki té ka dézobéyi komandman-lasa (Lév. 7:27). Jézi té ka anségné sé Juif-la obéyi tousa ki té maké adan Lwa a Moyiz (Mat. 5:17-19). Donk nou ka tou konprann Jézi pa té’é jen mandé on foul Juif manjé chè a-y oben bwè san a-y poubon. An réyalité, lè i di sa, sé té pou anségné sé moun-la sa pou yo fè pou yo ni lavi, « lavi étèwnèl » (Jan 6:54).

6. Kijan nou fè sav sa Jézi di an Jan 6:53, sé té on pawòl senbolik ?

⁶ Adan ki sans Jézi di sé pawòl-lasa ? Sa klè kè i té ka palé on mannyè ki senbolik, menmjan lè i palé ba on madanm Samari é i di-y : « Sila ki ké bwè dlo-la an ké ba-y la pé’é jen swèf ankò, men dlo-la an ké ba-y la ké vin on sous dlo andidan a-y, ki ka koulé fò pou bay lavi étèwnèl » (Jan 4:7, 14b). Jézi pa té vlé di fò Samaritèn-la té bwè dlo a on pui an pawtikilyé pou i té pé sa ni lavi étèwnèl. Menmjan-la Jézi pa té vlé di kè foulmoun-la, ki té ka kouté-y Kafawnaòm, té dwèt manjé chè a-y é bwè san a-y poudèbon pou yo té pé sa ni lavi étèwnèl.

DIFÉRANS ANTRÈ 2 PAWÒL JÉZI DI

7. Ka moun ka di anrapò èvè pawòl a Jézi ki maké an Jan 6:53 ?

⁷ Adan sèwten rèlijyon, ni moun ka di kè pawòl a Jézi ki maké an Jan 6:53, konmkwa fò yo manjé chè a-y é fò yo bwè san a-y, ka sèvi modèl pou Rèpa a Ségnè-la. Yo ka di sa pas lè Jézi mèt anplas Rèpa-lasa, i sèvi èvè menm jan dè pawòl la (Mat. 26:26-28). Dapré yo, lè yo ka fè pasé pen-la é diven-la pannan Rèpa a Ségnè-la, fò toutmoun manjé an pen-la é fò toutmoun bwè an diven-la. Men ès sé sa menm ? Sa enpòwtan nou chèché a sav si sa vré, pas chak lanné, adan lèmondantyé, milyon moun ka sélébré évènman-lasa èvè nou. An-nou vwè détwa diférans antrè sa Jézi di an Jan 6:53 é sa i di pannan Rèpa a Ségnè-la.

8. Ni 2 biten ki diféran adan sé 2 évènman-la nou ka palé la. Ki biten ésa ? (gadé sé imaj-la osi).

⁸ Mi 2 biten ki diféran. Prèmyé biten, kitan é ola Jézi di sa ki maké an Jan 6:53-56 ? Sa fèt an Galilé an lan 32 a épòk an nou douvan plizyè milyé Juif ki té la, é sé té apépré on lanné avan Jézi té mèt anplas Rèpa a Ségnè-la a Jérizalèm. Dézyèm biten, ba kimoun Jézi té ka palé ? Ba moun ki té pisimé Jézi ba-yo on dèkwa pou yo manjé, olyé yo chèché konnèt plis biten anlè Jéova oben anlè wayòm a Bondyé (Jan 6:26). Dayè pou yonn, lè Jézi di-yo on pawòl yo té ni dimal a konprann, yo arété kwè adan-y lamenm. Menm déotwa disip a-y ba-y do (Jan 6:14, 36, 42, 60, 64, 66). Ou ka byen vwè sé moun-lasa pa ni ayen a vwè èvè sé 11 apòt fidèl la ki té ansanm èvè Jézi pannan Rèpa a Ségnè-la on lanné apré, an lan 33. Menmsi yo pa byen konprann sa Jézi té ka anségné, yo té la èvè-y jouswa-lasa. A ladiférans dè lamajorité a sé moun-la ki té Galilé, yo té sèten Jézi té Gason a Bondyé ki té sòti an syèl-la (Mat. 16:16). Jézi félisité-yo, i di-yo : « Sé zòt ki toujou rété èvè mwen adan éprèv an mwen » (Lik 22:28). Sé 2 diférans-lasa tousèl ka montré kè lè Jézi di pawòl-la nou ka touvé an Jan 6:53, a pa té pou éséyé èspliké kijan léchòz té’é pasé pannan Rèpa a Ségnè-la. Men ni dòt biten ki diféran ankò adan sé 2 évènman-lasa.

SA JÉZI DI KA KONSÈWNÉ-W

9. Sa Jézi di pannan Rèpa a Ségnè-la ka konsèwné on gwoup-moun an pawtikilyé. Ki gwoup-moun ésa ?

⁹ Pannan Rèpa a Ségnè-la, Jézi ba apòt a-y pen ki pa té ni lèven adan-y, é i di kè pen-lasa té ka rèprézanté kò a-y. Aprésa i fè-yo bwè on koup diven é i di diven-lasa té ka rèprézanté « san a alyans-la » (Mawk 14:22-25 ; Lik 22:20 ; 1 Kor. 11:24). Sa i di anrapò èvè alyans-lasa enpòwtan toubòlman. I kriyé-y nouvo alyans-la, é sé on alyans ki fèt yenki antrè Jéova é « pèp a Israèl », Israèl èspirityèl la, kivédi séla ki ké régné èvè Jézi adan « wayòm a Bondyé » (Éb. 8:6, 10 ; 9:15). A pa tout biten sé apòt-la konprann asi sa jou-lasa, men pita yo touvé-yo wen èvè lèspri sen é yo rantré adan nouvo alyans-la pou Jézi pé sa fè on plas an syèl-la ba yo (Jan 14: 2, 3).

10. Ki diférans ki ni antrè sa Jézi di pannan Rèpa a Ségnè-la é sa i di on foulmoun ki té Galilé ? (gadé imaj-la osi).

¹⁰ Pannan Rèpa a Ségnè-la, ou ka byen vwè kè pawòl a Jézi té ka vizé « ti twoupo-la ». Sé apòt-la ki té ansanm èvè-y jouswa-lasa, sé yo prèmyé ki fè pati a ti gwoup-moun-lasa (Lik 12:32). Sé ba yo Jézi palé lè i mandé-yo manjé pen-la é bwè diven-la. Touséla ki plita té’é fè pati a gwoup-lasa, yo osi té’é ni pou pran sé anblèm-la, kivédi manjé pen-la é bwè diven-la. Sé ba gwoup-moun-lasa tousèl Jézi té’é préparé on plas an syèl-la. Donk ni ondòt diférans antrè Rèpa a Ségnè-la é sa ki fèt Galilé. Sa Jézi di sé apòt-la pannan Rèpa a Ségnè-la té ka konsèwné on ti gwoup-moun, alòskè sa i di lè i té Galilé té ka konsèwné lontan plis moun.

11. Adan sa Jézi di lè i té Galilé, ka ki ka montré a pa pou on ti gwoup-moun tousèl i té ka palé ?

¹¹ An lan 32, lè Jézi palé ba foulmoun-la ki té Galilé, pou lamajorité sé yenki pen ki té ka entérésé-yo. Kanmenmsa Jézi palé-yo dè on biten ki té lontan pli enpòwtan ki manjé, on biten ki té ké pèwmèt-yo ni lavi étèwnèl. É Jézi jous di moun-mò té’é résisité é ni lavi étèwnèl osi. Sa Jézi di an Jan chapit 6, a pa té on pwomès pou déotwa moun tousèl, kon sa i di pannan Rèpa a Ségnè-la é ki té ka konsèwné on ti gwoup-moun sèlman. An réyalité, jou-lasa an Galilé, Jézi palé dè on bénédisyon kè toutmoun té’é pé rèsèvwa. Mi sa i pwomèt : « Si on moun ka manjé pen-lasa, i ké viv pou touttan ; […] pen-la an ké bay la, sé chè an mwen pou moun ki an mond-la ni lavi » (Jan 6:51c).

12. Ka ki nésésè pou ni lavi étèwnèl ?

¹² Ès Jézi té vé di kè tout moun ki ja viv asi latè té’é ni lavi étèwnèl ? Awa. Sé yenki séla ki ka « manjé pen-la », kivédi séla ki ka montré yo ni fwa an Jézi, ki ké ni lavi étèwnèl. Dapré onlo swadizan krétyen, yo ké sové pas yo ka kwè an Jézi é yo ka konsidéré i sé sovè a yo. Men sa pa’a sifi (Jan 6:29). Onlo moun Galilé ki té an foul-la té ka kwè an Jézi odépa, men aprésa yo ba-y do. Poukwa yo fè sa ?

13. Ka nou dwèt fè pou vin on vré disip a Jézi ?

¹³ Lamajorité a sé moun-la ki té an foul-la té ka suiv Jézi pas i té ka ba-yo sa yo té vlé. Yo té vé i géri-yo, i ba-yo manjé é i di-yo sa yo té vé tann. Men Jézi fè-yo konprann byen kè i pa té vin si latè pou ba sé moun-la sa yo té vlé. I té vin pou anségné-yo kijan pou yo té suiv-li byen konm i fo é vin disip a-y. Pousa fò yo té ‘vin owa Jézi’, kivédi aksèpté é obéyi tousa Jézi té anségné (Jan 5:40 ; 6:44).

14. Ka fò nou fè pou nou bénéfisyé dè chè a Jézi é dè san a-y ?

¹⁴ Jézi èspliké foulmoun-la, difètkè i té ké bay chè a-y é san a-y an sakrifis, sa té ké ba-yo la posibilité viv pou touttan. É fò yo té ni fwa adan vérité-lasa. Sé menm biten pou nou jòdijou (Jan 6:40). Donk, annakò èvè sa Jan 6:53 ka di, pou nou pé sa ni lavi étèwnèl grasa chè a Jézi é grasa san a-y, fò nou ni fwa adan ranson-la. Onlo moun ni laposibilité rèsèvwa bénédisyon-lasa (Éféz. 1:7).

15-16. Ki biten enpòwtan nou aprann adan Jan chapit 6 ?

¹⁵ Sa ki maké an Jan chapit 6 aprann-nou onlo biten ki vréman enpòwtan é ki ka ankourajé-noutout. Nou konstaté kè Jézi té enmé sé moun-la é i té ka pran swen a yo. Pannan i té an Galilé, i géri moun ki té malad, i anségné sé moun-la sèwten vérité asi Wayòm-la, é i fè ansòt pou ba-yo manjé lè yo té bizwen (Lik 9:11 ; Jan 6:2, 11, 12). Men sa ki pi enpòwtan, i anségné-yo kè i sé « pen-la ki ka bay lavi » (Jan 6:35, 48).

¹⁶ Chak lanné, lè yo ka sélébré Rèpa a Ségnè-la, séla Jézi kriyé ‘sélézòt mouton-la’ pa ka manjé pen-la é pa ka bwè diven-la. Yo pa andwa fè sa (Jan 10:16). Kanmenmsa yo ka manjé « pen-la ki ka bay lavi ». Yo ka fè sa lè yo ka montré yo ni fwa adan sakrifis a Jézi é adan tout sé bon biten-la ranson-la ké pwokiré-yo (Jan 6:53). Pawkont séla ki pou manjé pen-la é bwè diven-la poudèbon pannan Mémoryal-la, ka montré kè yo ka fè pawti a nouvo alyans-la é yo ni lèspérans dè régné èvè Jézi an syèl-la. Donk, ki nou sé yonn adan sé wen-la oben yonn adan sélézòt mouton-la, sa nou ka touvé an Jan chapit 6 enpòwtan toubònman. Sa ka aprann-nou kè fò nou montré nou ni fwa adan ranson-la pou nou ni lavi étèwnèl.