AWTIK POU ÉTIDYÉ 15
KANTIK 30 Mon Ami, mon Dieu, mon Père
Vin pi bon zanmi èvè Bondyé, sa bon pou nou !
« Pou mwen, vin bon zanmi èvè Bondyé, sa bon pou mwen »(SÒM 73:28).
ON TI LIDÉ ASI SA NOU KAY VWÈ
Nou ké vwè kijan nou pé vin pi bon zanmi èvè Jéova é ki byenfé sa ka pwokiré-nou.
1-2. a) Ka pou nou fè lè nou bizwen vin bon zanmi èvè on moun ? b) Ka nou ké vwè adan awtik-lasa ?
ÈS OU ni on bon zanmi ? Kijan ou fè vin zanmi èvè-y ? Sèten sé afòs zò pasé tan ansanm, ou vin sav ki problèm i ja jwenn, ka i enmé é ka i pa enmé. Ou vwè osi sé bèl kalité-la i ni la é sa ba-w anvi imité-y. É piti-a-piti ou touvé-w enmé-y.
2 Men pou-w pé sa vin bon zanmi èvè on moun, sa ka mandé tan é sa ka mandé kè ou fè éfò osi. Sé menm biten lè nou bizwen vin bon bon zanmi èvè Jéova. Adan awtik-lasa, nou ké vwè kijan nou pé vin pi bon zanmi èvè Jéova. Men alèla, an-nou vwè ki byenfé sa ka pwokiré-nou lè nou ka vin pi bon zanmi èvè Jéova.
3. Poukwa fò nou pran tan réfléchi asi byenfé nou ni lè nou bon zanmi èvè Jéova ? Bay on ègzanp.
3 Sé on bon biten lè nou ka vin pi bon zanmi èvè Bondyé é sa enpòwtan kè nou pran tan réfléchi asi sa (Sòm 63:6-8). Pou ki biten ? An-nou pran on ègzanp pou nou konprann sa. Noutout sav kè fò nou manjé dé biten ki bon pou santé an nou, fò nou fè ispò, fò nou ni kont a dòmi an nou é fò nou bwè kont a dlo an nou pannan jouné-la. Si noutout té ka fè sa, nou té ké pi anfòm. Men ni onlo moun ki pa’a pran sa oséryé alò santé a yo ka pran on kou. Men lè on moun ka pran labitid réfléchi asi jan sa bon pou santé a-y, sa ka ba-y plis balan pou i fè-y. Menmjan-la, nou sav kè lè nou zanmi èvè Bondyé sé on bon biten pou nou, men lè nou ka pran tan gadé pou ki rézon sé on bon biten, sa ka ban-nou plis balan ankò pou nou vin bon zanmi èvè-y (Sòm 119:27-30).
4. Ka moun-la ki maké Sòm 73:28 di ?
4 (Li Sòm 73:28.) Nonm-la ki maké Sòm 73 la sé té on Lévit é i té ka jouwé mizik adan tanp a Jéova. A moman-lasa, pétèt sa té ja ka fè onpakèt lanné kè i té fidèl a Jéova. Men i té sav kè sa té enpòwtan kè i sonjé kè ‘vin bon zanmi èvè Bondyé, sa té bon pou-y’ é i té vé kè dòtmoun konprann kè sa té bon pou-yo osi. Lè nou ka vin bon zanmi èvè Bondyé, ki byenfé sa ka pwokiré-nou ?
‘LÈWVWÈ NOU BON ZANMI ÈVÈ BONDYÉ’, NOU KA NI TCHÈ-KONTAN
5. a) Poukwa lè nou ka vin pi bon zanmi èvè Jéova sa ka ban-nou tchè-kontan ? b) Adan ki domenn ou konstaté kè konsèy a Bondyé ki plen sajès té bon pou-w é kè yo pwotéjé-w ? (Pwovèb 2:6-16).
5 Pi nou ka vin bon zanmi èvè Jéova pi nou ni tchè-kontan (Sòm 65:4). Ni plizyè rézon ki ka fè-nou di sa. Pa ègzanp, adan Labib nou ka touvé konsèy ki plen sajès é lè nou ka mèt sé konsèy-lasa an pratik, nou ka vwè kè sa bon pou nou. Sa Jéova ka di-nou ka pwotéjé-nou pou nou pa fè pon biten ki pé fè-nou ditò é pou nou pa fè pon péché ki grav (li Pwovèb 2:6-16). Sé pousa Labib ka di : « Tchè-kontan pou moun-la ki ka touvé sajès, é pou moun-la ki vin ni on bon jijman » (Pwov. 3:13).
6. Poukwa moun-la ki maké Sòm 73 la pa té ni tchè-kontan kon avan ?
6 Sa pé rivé kè on moun ki zanmi èvè Jéova ka santi-y tris. Sé sa ki rivé moun-la ki maké Sòm 73 la. I vin tris lè i koumansé sonjé dé biten kè i pa té ka touvé nòwmal. Pou-y, sé méchan-la té ka bwè dlo a yo alòskè yo pa té ka rèspèkté ni Bondyé ni prensip a-y. Kifè sa fè-y fè kòlè é i touvé-y anvi bwè dlo a-y osi. Pou-y, moun ki té méchan é moun ki té ka akwè-yo, té alèz a yo é yo té pé ni tousa yo té vlé. Yo pa té jen ka tonbé malad é yo pa té menm sav ka sa yé lè on moun ka soufè (Sòm 73:3-7, 12). Tèlman sa té ka chouboulé-y, onlè i mandé-y si sa té vo lapenn sèvi Jéova é fè tousa éfò. Tèlman i té tris, mi sa i di : « Vréman, sé pou ayen an té ka fè éfò pou tchè an mwen rété pwòp é pou an pa sali men an mwen adan sa ki pa bon » (Sòm 73:13).
7. Lè nou ka santi-nou tris, ka pou nou fè ? (gadé imaj-la osi).
7 Menmsi moun-la ki maké Sòm 73 la té tris toubònman, i fè on biten pou i pa rété konsa. I « rantré adan tanp a Bondyé ki èstraòwdinè », é i aksèpté kè Jéova korijé jan-la i té ka rézonné la (Sòm 73:17-19). Jéova sé méyè zanmi an nou, é lè nou tris i sav sa byen. Lè nou tris, nou pé priyé Jéova é nou pé mandé-y édé-nou sav ka pou nou fè. Grasa konsèy ki adan Pawòl a-y é grasa ankourajman frè é sè an nou ka ban-nou, nou ké ni fòs-la nou bizwen la pou nou andiré. Menm lè nou enkyèt bon enkyèt la, Jéova pé konsolé-nou é i pé mèt lapé an tchè an noua (Sòm 94:19).
On Lévit doubout « adan tanp a Bondyé ki èstraòwdinè » (gadé paragraf 7 la).
‘LÈWVWÈ NOU BON ZANMI ÈVÈ BONDYÉ’, VI AN NOU PI BÈL DÉPI KONNYÉLA É NOU NI ON ÈSPWA POU DÈMEN
8. Pou ki dòt rézon vin bon zanmi èvè Bondyé sé on bon biten pou nou ?
8 Ni 2 biten ankò ki ka fè-nou di kè lè nou bon zanmi a Bondyé sé on bon biten pou nou : sa ka ba vi an nou on sans é nou ni on èspwa ki sèten (Jér. 29:11). An-nou vwè plis biten asi sa.
9. Poukwa nou ka di kè lè nou bon zanmi èvè Bondyé, sa ka ba vi an nou on sans ?
9 Lè Jéova sé bon zanmi an nou, vi an nou pli bèl. Onlo moun pa’a kwè an Bondyé é yo pa sav pou ki rézon nou asi latè. Yo jous ka pansé kè lézimen ké fin pa disparèt. Men grasa sa nou étidyé adan Labib, nou sav kè Bondyé ka ègzisté é kè tousa nou ka fè ba-y sa ni onlo valè pou-y, pas i sé « sila ki ka rékonpansé moun ki ka chèché-y vréman » (Ébr. 11:6). Anplisdisa, konm Jéova té kréyé-nou pou nou té adoré-y, lè nou ka sèvi-y nou kontan poudèbon (Dét. 10:12, 13).
10. Ka Jéova pwomèt moun ki ka fè-y konfyans ? (Sòm 37:29).
10 Ni onlo moun ki pa ni pon èspwa pou dèmen. Vi a yo sé travay, mayé, fè timoun, é préparé rètrèt a yo. Yo pa sav ka Bondyé prévwa pou dèmen. Men nou, nou sav kè Jéova ka pran swen a sèwvitè a-y (Sòm 25:3-5 ; 1 Tim. 6:17). Bondyé sé bon zanmi an nou é nou ka fè-y konfyans. Nou sav i ké réyalizé sa i pwomèt-nou. A pa ti bèl biten nou ké pé fè dèmen ! Men pi bèl-la, sé lè nou ké adoré Bondyé pou touttan adan paradi-la (li Sòm 37:29).
11. Lè nou bon zanmi èvè Jéova, ki byenfé sa ka pwokiré-nou é ka i ka rèsanti ?
11 Lè nou ka vin bon zanmi èvè Jéova, sa ka pwokiré-nou dòt byenfé ankò. Pa ègzanp, i pwomèt i ké padonné-nou si nou ka rèpanti-nou (Iz. 1:18). Kifè, nou pa bizwen enkyété-nou ankò parapòt a sé péché-la nou ni lokazyon fè la (Sòm 32:1-5). Anplisdisa, nou kontan pas Jéova kontan-nou (Pwov. 23:15). Ni onlo dòt byenfé nou ka pwokiré-nou davwa nou bon zanmi èvè-y. Men kijan ou pé kontinyé vin pi bon zanmi èvè-y ?
KIJAN NOU PÉ KONTINYÉ ‘VIN BON ZANMI ÈVÈ BONDYÉ’
12. Ki biten ou fè pou-w té vin bon zanmi èvè Bondyé ?
12 Avan nou té pran lèbatèm pou vin Témwen a Jéova, nou pòté onlo mannèv pou nou té vin zanmi èvè Jéova. Nou aprann lavérité asi-y é Jézikri, nou rèpanti-nou pou péché an nou, nou montré nou té ni fwa adan Bondyé é nou fè tousa nou té pé pou nou obéyi-y. Men pou nou vin pi bon zanmi èvè Bondyé, fò nou kontinyé fè sé biten-lasa (Kol. 2:6).
13. Bay 3 biten ki ké édé-nou rété bon zanmi èvè Bondyé.
13 Ka ki ké édé-nou vin pi bon zanmi èvè Jéova ? 1) Fò nou kontinyé li Bib an nou é étidyé tousèl an nou. Sé vré, nou ka li pou nou aprann dé biten asi Bondyé. Men a pa sa tousèl pou nou fè. Fò nou éséyé konprann kijan Jéova ka rézonné, fò nou gadé pou vwè ka i vé nou fè é fò nou fè sa i ka mandé-nou adan vi an nou (Éféz. 5:15-17). 2) Nou ké fè ansòt pou konsolidé fwa an nou. Pou nou fè sa, nou ké pran tan réfléchi asi tousa Jéova ja fè pou montré-nou pèwsonèlman jan i enmé-nou. 3) Fò nou kontinyé hay sa ki pa’a fè Jéova plézi é nou pa ka chwazi moun ki ka fè sé biten-lasa pou vin zanmi an nou (Sòm 1:1 ; 101:3).
14. Ka nou pé fè touléjou pou nou fè Jéova plézi ? (1 Korentyen 10:31 ; gadé sé imaj-la osi).
14 (Li 1 Korentyen 10:31.) Sa enpòwtan toubònman kè nou fè dé biten ki ka fè Jéova plézi. Pou nou fè sa, a pa préché pou nou préché tousèl oben ay réinyon. Sé touléjou pou nou fè Jéova plézi. Pa ègzanp, si nou pa jen ka chèché a kouyonné moun é si nou ka pawtajé sa nou ni èvè lézòt, Jéova ka kontan (2 Kor. 8:21 ; 9:7). Anplisdisa, konm lavi sé on kado Jéova fè-nou, i anvi nou ba kado-lasa onlo valè. Nou ké vin pi bon zanmi ankò èvè Moun-la ki ban-nou lavi si nou ka fè atansyon a kantité biten nou ka manjé, a kantité biten nou ka bwè é si nou ka fè dòt biten pou santé an nou. Lè Jéova ka vwè nou ka éséyé fè-y plézi adan tousa nou ka fè, i enmé-nou pi fò ankò (Lik 16:10).
Lè nou ka fè atansyon lè nou ka kondui, lè nou ka fè tibwen ispò, lè nou ka manjé biten ki bon pou santé an nou, é lè nou ka pawtajé èvè lézòt, sé dé biten ki ka fè Jéova plézi (gadé paragraf 14 la).
15. Kijan Jéova vé nou aji èvè lézòt ?
15 Jéova ka aji èvè bonté èvè moun, ki yo ka sèvi-y ki yo pa’a sèvi-y (Mat. 5:45). I vé kè nou aji menmjan ki-y. Pa ègzanp, i ka di-nou kè ‘fò pa nou malpalé ponmoun, fò pa nou chèché moun tren, men fò-nou toujou rété dous èvè toutmoun’ (Tit 3:2). Alò, nou pé’é mèt an tèt an nou kè nou ni plis valè ki moun ki pa’a sèvi Jéova (2 Tim. 2:23-25). Nou ké pi bon zanmi èvè Jéova si nou toujou ka aji èvè bonté èvè toutmoun.
AN-NOU « VIN BON ZANMI ÈVÈ BONDYÉ » MENM APRÉ NOU FÈ ON ÉRÈ
16. Ka nonm-la ki maké Sòm 73 la té ka rèsanti ?
16 Imajiné kè ou fè on érè, é kè ou ni lenprésyon ou pa mérité lanmou a Jéova ankò. Ka pou-w fè ? An-nou sonjé ègzanp a nonm-la ki maké Sòm 73 la. Mi sa i di : « Kanta mwenmenm, an manké pèd chimen ; tibwen ankò, pyé an mwen té’é glinsé » (Sòm 73:2). Limenm ka admèt kè i té égri é i té « douvan [Jéova] kon on bèt, ki pa kapab réfléchi » (Sòm 73:21, 22). Ès sa té vlé di kè konm i pa té byen réyaji, pa té ni pon èspwa ba-y é kè i pa té mérité lanmou a Jéova ankò ?
17. a) Lèwvwè moun-la ki maké Sòm 73 la té dékourajé bon dékourajé la, ka i fè ? b) Ka sa ki rivé-y ka aprann-nou ? (gadé sé imaj-la osi).
17 Si moun-la ki maké Sòm 73 la té ni lenprésyon kè Jéova té lagé-y, sa pa diré onlo tan. Menmsi moral a-y té a zéro, i té sav kè i té bizwen vin pi bon zanmi èvè Jéova. Mi sa i maké : « Men aprézan, an èvè-w akontinyé ; ou tchenbé men dwat an mwen. Ou ka ban-mwen konsèy pou gidé-mwen é aprésa ou ké ban-mwen glwa » (Sòm 73:23, 24). Nou osi lèwvwè nou ka santi kè fwa an nou ka fébli oben kè nou dékourajé, an-nou pran fòs owa Jéova gwo wòch an nou (Sòm 73:26 ; 94:18). Menmsi délè nou ka pèd chimen, an-nou wouvin owa Jéova, pas nou sèten i ‘paré a padonné-nou’ (Sòm 86:5). É lèwvwè nou dékourajé bon dékourajé la, sé a moman-lasa pou nou rété toupré Bondyé an nou (Sòm 103:13, 14).
Lè nou ka santi kè fwa an nou ka fébli, fò nou vin pi bon zanmi èvè Jéova. Pousa, fò nou priyé plis é fò nou fè éfò pou pran tout réinyon an nou (gadé paragraf 17 la).
VIN BON ZANMI ÈVÈ BONDYÉ POU TOUTTAN
18. Poukwa nou toujou ké pé vin pi bon zanmi èvè Jéova ?
18 Nou toujou ké pé vin pi bon zanmi èvè Bondyé pas nou pé’é jen fin aprann dé biten asi-y. Labib ka di kè sajès a-y é konésans a-y tèlman gran kè « pa ni mwayen » konprann sa, sa two fò ban nou ! (Wom. 11:33).
19. Dapré sa sé Sòm-la ka di, dè ki biten nou pé sèten ?
19 Mi sa Sòm 79:13 ka di : « Alò nou ki sé pèp a-w é ki sé twoupo-la ki an savann a-w, nou ka di-w mèsi é nou vé fè sa pou touttan. Adan chak jénérasyon nou ké ba-w louwanj. » Vou osi ou pé sèten kè ou toujou ké pé vin pi bon zanmi èvè Jéova é kè bénédisyon a-y pé’é jen bout. Alò ou pé di èvè onlo konfyans : « Bondyé sé gwo wòch a tchè an mwen é i sé pa an mwen pou touttan » (Sòm 73:26).
KANTIK 32 Pran pozisyon pou Jéova !
a Si on moun ka santi-y tris oben angwasé é kè sa ka diré, pétèt i ké bizwen on dòktè édé-y. Pou ni plis enfòwmasyon, ay gadé La Tour de Garde no 1 a 2023.