Édé étidyan a-w sèvi Jéova

1-2. a) Poukwa sèwten étidyan a Labib ki vlé vin Témwen a Jéova an 2 lidé ? b) Ka nou ké vwè adan awtik-lasa ?

ÈS AVAN ou vin Témwen a Jéova ou té an 2 lidé ? Pétèt ou té pè kè kolèg-travay a-w, fanmi a-w é zanmi a-w fè kòlè si ou vin Témwen a Jéova. Oben pétèt kè ou té ni dimal a fè sa Jéova ka mandé. Si sa rivé-w, alò ou pé konprann sa sé étidyan-la ka rèsanti lèwvwè yo anvi pran lèbatèm men anmenmditan yo ka ézité.

² Jézi té sav kè tout sé biten-lasa té pé anpéché on moun sèvi Jéova (Mat. 13:20-22). Men i pa lagé sé moun-la ki té ka ézité la. Okontrè, 1) i édé-yo konprann ka ki té ka frenné-yo, 2) i édé-yo enmé Jéova plis ankò, 3) i édé-yo vwè sa ki pli enpòwtan, é 4) i édé-yo vwè kijan pou yo réyaji lè moun bizwen anpéché-yo sèvi Jéova. An-nou vwè kijan nou pé imité ègzanp a Jézi lè nou ka anségné on moun èvè liv-la Ou pé ni tchè-kontan pou touttan !

ÉDÉ ÉTIDYAN A-W VWÈ KA KI KA ANPÉCHÉ-Y PWOGRÉSÉ

3. Nikodèm té anvi vin disip a Jézi. Men ka ki dwèt frenné-y ?

³ Nikodèm té on gran chèf pawmi sé Juif-la é i té anvi vin disip a Jézi men ni on biten ki té ka frenné-y. Apépré 6 mwa apré Jézi koumansé préché asi latè, Nikodèm vin sèten kè i té Mési-la (Jan 3:1, 2). Men konm i « té pè sé Juif-la », i vin vwè Jézi pannan lannuit pou ponmoun pa suiv sa (Jan 7:13 ; 12:42). Pétèt kè i té pè pèd plas a-y é richès a-y si i té ka vin disip a Jézia.

4. Kijan Jézi édé Nikodèm konprann ka Jéova té vlé i fè ?

⁴ Nikodèm té konnèt Lwa-la byen, men i té bizwen yo édé-y konprann ka Jéova té ka atann dè-y. Kijan Jézi édé-y fè sa ? Jézi pran tan a-y pou i palé èvè-y menmsi sé té lannuit. I èspliké-y ka pou i té fè pou vin disip a-y. Fò Nikodèm té rèpanti-y pou péché a-y, fò i té batizé an dlo é fò i té montré kè i té ni fwa adan Gason a Bondyé (Jan 3:5, 14-21).

5. Kijan nou pé édé on étidyan vwè ka ki ka anpéché-y pwogrésé ?

⁵ Menmsi on étidyan a Labib ka konprann sé vérité-la byen, i bizwen nou édé-y vwè ka ki ka anpéché-y pwogrésé. Sé pé travay-la ki ka manjé tout tan a-y, oben fanmi a-y ki vé pa i vin Témwen a Jéova. Alò kon Jézi, pasé tibwen tan èvè étidyan a-w. Ay on koté pou manjé on ti biten èvè-y oben fè on ti chap èvè-y. Dé ti moman konsa ké pèwmèt-li palé ba-w pli fasilman. Konsa i ké pé di-w ki difikilté i ka jwenn. Aprésa, édé-y vwè kijan i pé fè sèwten chanjman. Men fè-y sonjé kè si i ka fè sé chanjman-lasa sé pou fè Jéova plézi é a pa pou fè-w plézi.

6. Kijan ou pé édé étidyan a-w ni fòs pou i mèt sa i ka aprann an pratik ? (1 Korentyen 16:13).

⁶ Lè on étidyan sèten kè Jéova ké édé-y fè sa ki byen, sa ka ba-y fòs pou i mèt sa i ka aprann an pratik (li 1 Korentyen 16:13). Travay-la ou ka fè la èvè-y ka sanm ta on pwofésè. Lè ou ka viré sonjé lè ou té lékòl, ki pwofésè ou té pi enmé ? Sèten sé té on pwofésè ki té ka pran pasyans èvè-w é ki té ka édé-w vwè kè ou té kapab fè plis ki sa ou té ka pansé. Menmjan-la, lè on moun ka anségné Labib byen, i pa ka enki fè étidyan-la konnèt sa Bondyé ka mandé, men i ka édé moun-la pou i sèten kè Jéova ké édé-y fè sa i ka mandé. Kidòt biten ou pé fè pou édé étidyan a-w ?

ÉDÉ ÉTIDYAN A-W ENMÉ JÉOVA PLIS ANKÒ

7. Kijan Jézi té ka édé sé moun-la enmé Jéova plis ankò ?

⁷ Jézi té sav kè si on moun enmé Bondyé, i ké vlé fè sa i ka mandé. Plizyè fwa, i anségné dé biten pou sé disip-la vin enmé Pap’a yo pli fò ankò. Pa ègzanp, Jézi anségné kè Jéova kon on misyé ki ka ba timoun a-y bon biten (Mat. 7:9-11). Pawmi sé moun-la ki té ka kouté Jézi, té ni sa pap’a-yo pa jen ba-yo lanmou. Alò imajiné sa yo dwèt rèsanti lè Jézi pran ègzanp a on papa ki ka akéyi gason a-y bra gran wouvè alòskè avan sa i té fè dé biten ki pa bon. Jézi té ka édé sé moun-la konprann kè Jéova enmé-yo onlo é kè i vlé édé-yo (Lik 15:20-24).

8. Kijan ou pé édé on étidyan a Labib enmé Jéova plis ankò ?

⁸ Vou osi, ou pé édé on étidyan enmé Jéova si ou ka pran labitid palé-y dè bèl kalité a Jéova. Chakfwa ou ka fè étid-la, édé-y vwè kijan sa i ka aprann la ka montré kè Jéova enmé-nou. Pa ègzanp, si zò ka palé dè ranson-la, ou pé èspliké-y kè Jéova pa voyé Gason a-y mò pou limanité tousèl, men pou-y osi (Wom. 5:8 ; 1 Jan 4:10). Lè on étidyan ka konprann jan Jéova enmé-y pèwsonèlman, sa pé édé-y enmé Jéova pli fò (Gal. 2:20).

9. Ka ki édé Michael chanjé ?

⁹ An-nou vwè ègzanp a Michael ki ka viv an Endonézi. I aprann konnèt Jéova dépi toupiti men i pa jen pran lèbatèm. Lè i trapé 18 an a-y, i ay adan ondòt péyi pou i vin chofè a kamiyon. Aprésa i viré an Endonézi pou i mayé, men i lésé fanmi a-y pou ay travay adan ondòt péyi. Pannansitan, madanm a-y é fi a-y koumansé étidyé Labib é yo pwogrésé. Lè manman Michael mò, i wouviré o péyi pou okipé dè pap’a-y é i aksèpté étidyé Labib. Lè i rivé adan lèson 27 a liv-la Ou pé ni tchè-kontan pou touttan ! é kè i vwè pawti-la non a-y sé « An-nou fouyé pi fon », sa touché-y toubònman. Lè i réfléchi asi sa Jéova dwèt rèsanti lè i vwè Gason a-y soufè, dlo sòti an zyé a-y. Lè i konprann jan Jéova é Jézi enmé-y, i vin ni onlo rèkonésans pou yo, é sa pousé-y fè chanjman an vi a-y é pran lèbatèm.

ÉDÉ ÉTIDYAN A-W VWÈ KA KI PLI ENPÒWTAN

10. Ka Jézi fè pou édé sé disip-la mèt Jéova prèmyé douvan adan vi a yo ? (Lik 5:5-11 ; gadé imaj-la osi).

¹⁰ Sé prèmyé disip-la vwè tousuit kè Jézi sé té Mési-la, men yo té bizwen Jézi édé-yo konprann kè pou yo té sèvi Jéova, fò yo té pòté bon mannèv adan prédikasyon-la. Pyè é André té ja disip a Jézi lè Jézi pwopozé-yo préché èvè-y aplentan (Mat. 4:18, 19). Yo té maren-péchè é zafè a yo té ka maché toubònman. I ka sanm sa yo té ka travay èvè Jak é Jan (Mawk 1:16-20). Lè Pyè é André lagé tout biten pou yo suiv Jézi, yo dwèt té òwganizé-yo pou fanmi a yo ni on dèkwa toupannan yo té ka suiv Jézi. Men poukwa yo té paré a lagé travay a yo pou yo té préché ? Jézi fè on mirak pou montré-yo kè Jéova té’é toujou pran swen a yo kèlkèswa sa ki té’é pasé. Kifè, yo té sèten kè Jéova té’é toujou ba-yo sa yo bizwen si yo té ka mété-y prèmyé douvan adan vi a yo (li Lik 5:5-11).

11. Kijan ou pé sèvi èvè èkspéryans a-w pou fè fwa a étidyan a-w vin pi fò ?

¹¹ Nou pé pa fè mirak kon Jézi men nou pé palé dè èkspéryans an nou èvè lézòt. Nou pé di-yo kijan Jéova soutyenn-nou lè nou mété-y prèmyé douvan adan vi an nou. Pa ègzanp, ès ou ka sonjé kijan Jéova édé-w lè ou koumansé ay réinyon ? Pétèt fò ou té ay vwè patwon a-w pou èspliké-y kè alèla ou pé’é pé fè plis lè adan travay-la sé jou-la ou ni réinyon la. Lè ou ka pawtajé èkspéryans a-w èvè étidyan a-w, èspliké-y jan fwa a-w vin pi fò lè ou vwè Jéova soutyenn-vou pas ou té anvi mété-y prèmyé douvan adan vi a-w.

12. a) Lè ou ka menné diféran frè é sè adan on étid a-w, poukwa sé on bon biten ? b) Èvè ki biten ou pé sèvi pou édé étidyan a-w mèt Jéova prèmyé douvan an vi a yo ? Bay on ègzanp.

¹² Sé on bon biten osi lèwvwè étidyan a-w ka tann dòt frè é sè rakonté kijan yo fè chanjman pou mèt Jéova prèmyé douvan an vi a yo. Sé pousa envité diféran frè é sè pou yo akonpagné-w adan étid-la. Mandé-yo rakonté kijan yo vin konnèt lavérité é kijan yo òwganizé-yo pou fè sé chanjman-la yo fè la. Anplisdisa, lè ou ka étidyé liv-la Ou pé ni tchè-kontan pou touttan ! èvè étidyan a-w, pran tan gadé vidéo ki adan pawti-la « An-nou fouyé pi fon », é lè sa nésésè zò pé gadé osi vidéo ki adan pawti-la « Ay gadé sa osi ». Pa ègzanp, lè zò ka étidyé lèson 37 la, zò pé gadé vidéo-la Jéova ké ban-nou sa nou bizwen. Zò pé palé dè vidéo-la é aprésa ou pé édé-y vwè kijan Jéova ké soutyenn-li é ka ki ké édé-y mèt Jéova prèmyé douvan an vi a-y.

ÉDÉ ÉTIDYAN A-W ANDIRÉ LÈ MOUN KA LÉVÉ KONT LI

13. Kijan Jézi préparé disip a-y pou lèwvwè moun té’é lévé kont yo ?

¹³ Jézi di disip a-y a plizyè rèpriz kè moun té’é éséyé mèt baton an wou a yo é kè pétèt adan sé moun-lasa té’é ni fanmi a yo (Mat. 5:11 ; 10:22, 36). Lè i té toupré fin travay a prédikasyon a-y, i di-yo kè moun té pé rivé a tchouyé-yo pas yo ka adoré Jéova (Mat. 24:9 ; Jan 15:20 ; 16:2). I di-yo osi kè fò yo té’é pran prékosyon a yo lè yo té’é ay préché. I di-yo pa rantré an lagè èvè moun ki kont yo, é fè atansyon a sa yo ké di é a sa yo ké fè pou yo kontinyé préché.

14. Ka nou pé fè pou édé on étidyan préparé-y pou lèwvwè moun ké lévé kont li ? (2 Timoté 3:12).

¹⁴ Kon Jézi, nou pé èspliké on étidyan sa kolèg-travay a-y, zanmi a-y oben fanmi a-y pé rivé a di-y oben a fè-y, pas i ka étidyé Labib (li 2 Timoté 3:12). Pétèt sèwten kolèg ké fè jé èvè-y pas i ka mèt sa Labib ka di an pratik. Ni dòt ki pé kritiké kwayans a-y é délè sé pé fanmi a-y ki ka fè sa. Préféré nou palé dè sé biten-lasa èvè étidyan-la granbonnè. Konsa, lè sa ké rivé, sa pé ké siwprann-li é i ké sav kijan pou i réyaji.

15. Ka ki pé édé étidyan a-w lèwvwè fanmi a-y ka lévé kont li ?

¹⁵ Lè fanmi a on étidyan ka lévé cho pas i ka étidyé Labib, édé étidyan-la sonjé pou ki rézon fanmi a-y kòlè. Pétèt kè pou yo, Témwen a Jéova pran tèt a-y. Pétèt osi yo ka pansé kè sa Témwen a Jéova ka anségné sé manti oben yo ka pansé kè yo sé dé mové moun. Menm Jézi touvé-y adan on sitiyasyon konsa èvè fanmi a-y (Mawk 3:21 ; Jan 7:5). Aprann étidyan-la pran pasyans èvè fanmi a-y é èvè lézòt é montré-y kijan pou i palé ba yo jantiman.

16. Kijan nou pé édé on étidyan aji èvè sajès lè i ka palé dè kwayans a-y ?

¹⁶ Menmsi on étidyan ni moun an fanmi a-y ki byen anvi konnèt plis biten asi Labib, vométan i pa chèché a èspliké-yo twòp biten onsèl kou. Sinon, i ka riské néyé fanmi a-y èvè twòp enfòwmasyon é yo pé enn di-y kè yo vé pa tann ayen ankò. Ankourajé étidyan a-w fè dé ti kozé asi Labib ki tou kout èvè yo. Konsa pwochen kou, yo ké vlé kouté-y ankò (Kol. 4:6). Pétèt i pé pwopozé fanmi a-y gadé sit an nou jw.org. Sa pé pèwmèt-yo aprann plis biten asi Témwen a Jéova é yo ké pé fè-y atètipo.

17. Kijan ou pé édé étidyan a-w pou i réponn kèsyon yo pé pozé-y asi Témwen a Jéova ? (gadé imaj-la osi).

¹⁷ Édé étidyan a-w préparé dé ti répons ki tou senp lèwvwè moun alantou a-y ka pozé-y kèsyon. Pou sa, ou pé sèvi èvè ribrik-la « Kèsyon onlo moun ka pozé-yo asi sé Témwen a Jéova la » ki asi jw.org (2 Tim. 2:24, 25). Lè zò ka rivé an bout a chak lèson adan liv-la Ou pé ni tchè-kontan pou touttan !, gadé pawti-la « Mi sa moun ka di ». Fè dé ti ègzèwsis èvè étidyan-la pou i réponn a sé kèsyon-la ki adan pawti-lasa. Si ou ka vwè i pé réponn ondòt jan, pa ézité ba-y dé ti konsèy. Sé ti ègzèwsis-lasa ké ba-y plis fòs pou i èspliké kwayans a-y.

18. Kijan ou pé ankourajé on étidyan pou i vin pwoklamatè ? (Matyé 10:27).

¹⁸ Jézi mandé disip a-y préché bon nouvèl-la ba toutmoun (li Matyé 10:27). Lè on étidyan ka koumansé préché dè kaz-an-kaz, sa ka ba-y lokazyon vwè men a Jéova é sa ka aprann-li fè Jéova konfyans plis ankò. Kijan ou pé édé on étidyan vin pwoklamatè ? Lèwvwè yo ka òwganizé on prédikasyon èspésyal adan péyi a-w, édé étidyan a-w vwè ka i pé fè pou vin pwoklamatè. Di-y kè lè on moun ka koumansé préché pannan péryòd-lasa, an jénéral sa pli fasil. Ondòt biten ki pé édé-y vin pwoklamatè, sé si i ka koumansé fè sijé adan réinyon a simenn-la. Konsa, sa ké édé-y èspliké kwayans a-y plibyen.

MONTRÉ ÉTIDYAN A-W KÈ OU SÈTEN I VÉ FÈ JÉOVA PLÉZI

19. Kijan Jézi montré kè i té ka fè disip a-y konfyans é kijan nou pé imité-y ?

¹⁹ Avan Jézi mò é kè i monté an syèl-la, i di disip a-y kè on jou yo té’é ansanm kon avan. Sé disip-la pa konprann tousuit kè sé an syèl-la yo té’é jwenn Jézi. Menmsi yo pa té ka konprann tout biten, Jézi té sèten kè yo té anvi fè Jéova plézi (Jan 14:1-5, 8). I té sav kè yo té bizwen tan pou konprann sèwten biten, kon pa ègzanp lèfètkè yo té kay viv an syèl-la (Jan 16:12). Nou osi, kon Jézi, nou pé montré étidyan an nou kè nou sèten kè yo vlé fè Jéova plézi.

20. Kijan on sè Malawi montré kè i té sèten kè étidyant a-y té vlé fè sa ki byen ?

²⁰ An-nou toujou rété pozitif é an-nou di-nou kè étidyan an nou vlé fè sa ki byen. Sé sa ègzanp a on sè ka montré. Non a-y sé Chifundo é i ka rété Malawi. I koumansé on étid adan liv-la Ou pé ni tchè-kontan pou touttan ! èvè on madanm non a-y sé Alinafe. Madanm-lasa té katolik. Apré yo fin lèson 14 la, sè-la mandé madanm-la ès i ka pansé sé on bon biten lè on moun ka sèvi èvè idòl pou adoré Bondyé. Kèsyon-la malpasé Alinafe kifè i réponn-li : « An pé sèvi èvè imaj si an vlé ! Sé mwen ka chwazi. » Lè Chifundo tann sa, i konpranndèdi étid-la mò. Men èvè pasyans, i kontinyé fè étid-la, é i di an tchè a-y kè madanm-la ké fin pa konprann sa Jéova ka pansé dè sa. Déotwa mwa apré, i pozé-y kèsyon-lasa ki adan lèson 34 la : « Ja ni kèlkètan ou koumansé étidyé Labib é kè ou koumansé konnèt kimoun ki Jéova, vré Dyé-la. Dépi sa, ki bon biten sa ja pwokiré-w ? » Ka Alinafe réponn ? Mi sa Chifundo ka di : « I palé dè onlo bon biten, é i di kè Témwen a Jéova pa’a fè sa ki pa annakò èvè Labib ». Kèlkètan apré, Alinafe arété adoré idòl, é i pran lèbatèm.

21. Kijan nou pé édé étidyan an nou pou i sèvi Jéova ?

²¹ Menmsi sé Jéova ki ‘ka fè on grenn a lavérité grandi’ adan tchè a on moun, nou pé édé on étidyan pwogrésé (1 Kor. 3:7). Nou ka aprann on étidyan konnèt sa Bondyé ka mandé-y fè, men a pa sa tousèl. Nou vlé édé-y osi pou i enmé Jéova fò. Nou ka ankourajé-y mèt Jéova prèmyé douvan an vi a-y pou montré-y kè i enmé-y. Nou vlé édé-y pou i sèten kè Jéova ké toujou soutyenn-li lèwvwè moun ké lévé kont li. Si nou ka montré étidyan an nou kè nou sèten i anvi fè Jéova plézi, nou ké ba-y balan pou i sèvi Jéova.