AWTIK POU ÉTIDYÉ 28
KANTIK 88 Fè-mwen konnèt chimen a-w
Poukwa nou bizwen mandé lézòt konsèy ?
« Moun ki ka mandé konsèy ni sajès » (PWOV. 13:10).
ON TI LIDÉ ASI SA NOU KAY VWÈ
Nou ké vwè ka pou nou fè pou sé konsèy-la yo ka ban-nou la fè-nou dibyen.
1. Kijan nou pé pran dé bon désizyon ki ka menné bon biten ban nou ? (Pwovèb 13:10 ; 15:22).
NOUTOUT nou vé pran dé bon désizyon ki ka menné bon biten ban nou. Pawòl a Bondyé ka montré-nou kè pou nou rivé fè sa, fò nou mandé konsèy (li Pwovèb 13:10 ; 15:22).
2. Ka Jéova pwomèt i ké fè ban nou ?
2 Moun-la ki pibyen plasé pou ban-nou sajès é pou ban-nou konsèy, sé Pap’an nou Jéova. Kifè, fò nou priyé-y é fò nou mandé-y sajès a-y. I ka pwomèt i ké édé-nou. Mi sa i ka di : « Toupannan an ka voyé zyé asi-w, an ké ba-w konsèy » (Sòm 32:8). Jéova ka pwomèt i ké ban-nou ègzaktèman konsèy-la nou bizwen la é i ké édé-nou mété-y an pratik.
3. Ka nou ké vwè adan awtik-lasa ?
3 Adan awtik-lasa, nou ké sèvi èvè Bib-la pou nou réponn a 4 kèsyon : 1) Si an vé kè on konsèy fè-mwen dibyen, ki kalité pou an pé sa ni ? 2) Kimoun ki pé ban-mwen on bon konsèy ? 3) Kijan an pé montré kè an toujou paré a kouté lè yo ka ban-mwen on konsèy ? é 4) Poukwa fò pa an mandé lézòt pran on désizyon an plas an mwen ?
KI KALITÉ FÒ MWEN NI ?
4. Ki kalité fò nou ni si nou vlé kè sé konsèy-la ki an Bib-la fè-nou dibyen ?
4 Si nou vlé kè on konsèy fè-nou dibyen, fò nou ni imilité é fò nou rèkonnèt limit an nou. Si sé prèmyé fwa nou ka touvé-nou adan on sitiyasyon, fò nou admèt kè nou bizwen on moun édé-nou pou nou pran on bon désizyon. Fò nou admèt osi kè nou pa konnèt tout biten. Si nou pa ni imilité é si nou pa ka rèkonnèt limit an nou, Jéova pé ké édé-nou. É menmsi nou ka li sé konsèy-la ki an Bib-la, nou pé’é vlé mèt-yo an pratik (Mich. 6:8 ; 1 Pyè 5:5). Men si nou ni imilité é si nou ka rèkonnèt limit an nou, nou ké aksèpté tout konsèy ki bazé asi Labib é nou pé’é tadé pou nou mété-yo an pratik.
5. Poukwa David té’é pé vin on moun ki ni òwgèy ?
5 An-nou vwè ka ègzanp a wa David ka aprann-nou. Èvè tousa bèl biten David fè, i té’é pé ni òwgèy. Plizyè lanné avan i vin wa, toutmoun té sav kè David té on mèt a mannyòk adan zafè a mizik. Yo jous mandé-y jouwé mizik pou wa-la. Jéova chwazi David pou i vin wa é i ba-y lèsprisen a-y. Grasa sa, i fè dé biten ki té èstraòwdinè (1 Sam. 16:11-13). Tout pèp-la té sav osi kè David té ka fè sé lènmi-la fè pach, kon i fè-y èvè Golyat, on kalté gran boug ki té filisten (1 Sam. 17:37, 50 ; 18:7). Davwa i fè tout sé bèl biten-lasa, ès i vin ni òwgèy é ès i di an tchè a-y kè i pa té bizwen moun ba-y konsèy ? Awa ! I kontinyé ni imilité.
6. Lèwvwè yo té ka ba David konsèy, kijan i té ka pran sa ? (gadé imaj-la osi).
6 Apré David vin wa, i kontinyé ni zanmi ki té pé bay konsèy (1 Kron. 27:32-34). Menm avan David té vin wa, i toujou té paré a kouté lèwvwè lézòt té ka bay dé bon konsèy. A pa enki konsèy a misyé i kouté, i kouté konsèy a on madanm non a-y sé Abigayil osi. David pa té kon mari a Abigayil, ki té ka dérèspèkté moun, ki té engra é ki té égoyis. Li David, i té ni imilité é i tchenn kont dè konsèy a Abigayil. Sa anpéché-y fè on érè ki té grav toubònman (1 Sam. 25:2, 3, 21-25, 32-34).
Wa David aksèpté konsèy a Abigayil é i suiv konsèy-la (gadé paragraf 6 la).
7. Ka ègzanp a David ka aprann-nou ? (Éklézyas 4:13 ; gadé sé imaj-la osi).
7 Ègzanp a David ka aprann-nou onlo biten. Pa ègzanp, si kò an nou bon adan on domenn oben si ni moun anba rèsponsabilité an nou, fò pa nou konpranndèdi kè nou konnèt tout biten é kè nou pa bizwen yo ban-nou on konsèy. É menmjan ki David, lè yo ka ban-nou on bon konsèy, fò nou paré a kouté kèlkèswa moun-la ki ka ban-nou konsèy-la (li Éklézyas 4:13). Konsa, sa ké édé-nou pou nou pa fè pon biten ki grav ki té’é pé fè-nou ditò oben ki té’é pé fè lézòt ditò.
Lè yo ka ban-nou on bon konsèy, fò nou toujou paré a kouté kèlkèswa moun-la ki ban-nou-y la (gadé paragraf 7 la).c
KIMOUN KI PÉ BAN-MWEN ON BON KONSÈY ?
8. Poukwa Jonatan té pé ba David on bon konsèy ?
8 Kidòt biten ègzanp a David pé aprann-nou ? I té ka chèché konsèy owa moun ki té ni on bèl lanmityé èvè Jéova men ki té ka konprann sitiyasyon a-y byen osi. Pa ègzanp, lè David té ka chèché a sav si wa Sayil té paré a wouvin byen èvè-y, i kouté konsèy a Jonatan, gason a Sayil. Poukwa Jonatan té kapab ba David on bon konsèy ? Sé pas nonsèlman Jonatan té bon zanmi èvè Jéova men i té konnèt Sayil byen osi (1 Sam. 20:9-13). Ka sa ka aprann-nou ?
9. Owa kimoun pou nou ay lèwvwè nou bizwen on konsèy ? Bay on ti èsplikasyon (Pwovèb 13:20).
9 Lè nou bizwen on konsèy, sa té’é byen si nou té k’ay vwè on moun ki bon zanmi èvè Jéova men ki ni èkspéryans osi adan sa nou ka chèché laa (li Pwovèb 13:20). Pa ègzanp, pétèt on jennfrè bizwen touvé on moun pou i mayé. Kimoun ki ké pé ba-y on bon konsèy adan domenn-lasa ? Si i k’ay owa on moun ki sélibatè, moun-lasa ké pé ba-y on bon konsèy siwvwè i ka bazé-y asi Labib. Men pétèt kè adan domenn-lasa on frè é madanm a-y ki ka sèvi Jéova ansanm dépi bon enpé lanné é ki konnèt-li byen, ké pé ba-y dé konsèy ki pi prési é ki pi itil.
10. Ka nou k’ay vwè konnyéla ?
10 Nou vwè 2 kalité pou nou travay é nou vwè osi kimoun ki pé ban-nou dé bon konsèy. Konnyéla, an-nou vwè kijan nou pé montré kè nou vréman anvi yo ban-nou on konsèy. Nou k’ay vwè osi ès fò nou mandé lézòt pran désizyon an plas an nou.
KIJAN AN PÉ MONTRÉ KÈ AN TOUJOU PARÉ A KOUTÉ KONSÈY YO KA BAN-MWEN ?
11-12. a) Ki biten pou nou pa fè ? b) Lè fò wa Roboam té pran on désizyon ki té enpòwtan, ka i fè ?
11 Délè on moun pé ka sanm sa i ka chèché on konsèy, men an réyalité, ni lontan moun-lasa ja pran désizyon a-y. Sa i vlé sé kè yo di-y kè i pran bon désizyon-la. On moun konsa pa vréman anvi yo ba-y on konsèy. An-nou vwè ka ègzanp a wa Roboam ka aprann-nou.
12 Apré Salomon, sé Roboam ki vin wa asi Israèl. A moman-lasa, pèp a Israèl sé té on pèp ki té rich, men yo té ka touvé kè wa Salomon té fè-yo travay twòp. Alò yo ay owa Roboam é yo mandé-y si i té pé ba-yo mwens travay. Roboam mandé-yo tibwen tan pou i té pran désizyon a-y. Prèmyé biten i fè, sé ay koté moun ki té ni on bèl laj é ki édé Salomon. I mandé-yo on konsèy é sé té on bon biten toubònman (1 Wa 12:2-7). Men aprésa, i mèt konsèy-lasa akoté. Poukwa i aji konsa ? Pétèt kè an tèt a-y i té ja désidé ka i té k’ay fè é i té ka èspéré kè sé grannonm-la té’é dakò èvè-y. Aprésa, i ay vwè dé jenntiboug ki té zanmi èvè-y pou i mandé-yo konsèy é yo tonbé dakò èvè-y. I té préféré sa sé zanmi a-y la di-y (1 Wa 12:8-14). Sa Roboam di pèp-la sé ègzaktèman sa zanmi a-y té di-y. É ola sa menné ? Onlo moun adan pèp-la lévé cho é yo chwazi ondòt wa pou gouvèné-yo. Dépi jou-lasa, Roboam jwenn pwoblèm si pwoblèm (1 Wa 12:16-19).
13. Kijan nou pé sav si nou toujou paré a kouté konsèy yo ka ban-nou ?
13 Ka ègzanp a Roboam ka aprann-nou ? A pa lè nou ja pran désizyon an nou pou nou ay mandé konsèy. Fò nou paré a kouté sa lézòt ka di-nou. Alò mi sa nou pé mandé-nou : « Lè an ka mandé on konsèy, si an ka vwè kè konsèy-la yo ka ban-mwen la pa agou an mwen, ès an ka mété-y akoté ? »
14. Lè yo ka ban-nou on konsèy, ka pou nou sonjé ? Bay on ègzanp (gadé imaj-la osi).
14 Imajiné kè yo pwopozé on frè on travay ki ka pèwmèt-li touché onlo lajan. Avan i aksèpté travay-lasa, i k’ay vwè on ansyen pou mandé-y on konsèy. I ka èspliké frè-la kè si i ka aksèpté travay-lasa, chakfwa i ké oblijé pati lwen a fanmi a-y é i ké oblijé pati pou on bon moman. Alò ansyen-la ka fè-y sonjé kè Labib ka di kè pi gwo rèsponsabilité i ni, sé édé fanmi a-y pou yo rété bon zanmi èvè Jéova (Éféz. 6:4 ; 1 Tim. 5:8). Frè-la pa dakò èvè sa ansyen-la di-y é i k’ay vwè dòt moun adan lasanblé-la joustan i touvé on moun ki ka di-y kè i pé aksèpté travay-la. Ès nou pé di kè frè-la té vréman anvi yo ba-y on konsèy ? Oben ès i té ja désidé ka i té kay fè é i té ka chèché on moun ki té’é dakò èvè-y ? An-nou sonjé kè tchè an nou trèt (Jér. 17:9). Délè sa nou pa anvi tann la, sé sa ki bon ban nou.
Ès nou vréman anvi yo ban-nou on konsèy oben ès nou ka chèché on moun ki ka tonbé dakò èvè nou ? (gadé paragraf 14 la).
ÈS FÒ AN MANDÉ ON MOUN PRAN ON DÉSIZYON AN PLAS AN MWEN ?
15. Ki biten pou nou fè atansyon é poukwa ?
15 Fò nouchak pran désizyon an nou pas sé on rèsponsabilité Jéova ban-nou (Gal. 6:4, 5). Adan awtik-lasa, nou vwè kè on moun ki ni sajès k’ay chèché konsèy adan Pawòl a Bondyé. I k’ay mandé osi moun ki byen doubout adan lavérité konsèy avan i chwazi fè on biten. Men fò nou fè atansyon pou nou pa mandé lézòt pran on désizyon an plas an nou. Ni sèwten moun ki k’ay owa on moun yo ka rèspèkté é yo ka enki di-y : « Si ou té an plas an mwen, ka ou té’é fè ? » Ni dòt ki ka enki fè sa lézòt ka fè san menm yo pran tan réfléchi pou vwè si sa bon ba yo.
16. Ki désizyon fò sé krétyen Korent la té pran anrapò èvè vyann ki té sèvi adan sakrifis pou idòl ? (1 Korentyen 8:7 ; 10:25, 26).
16 An-nou sonjé adan ki sitiyasyon sé krétyen Korent la touvé-yo. Fò yo té pran on désizyon pou sav si yo ké manjé on vyann kè pétèt on moun té itilizé pou fè on sakrifis pou on idòl. Mi sa Pòl té maké ba sé krétyen-la : « Nou sav on idòl pa ayen é kè sé onsèl Bondyé ki tini » (1 Kor. 8:4). Parapòt a sa Pòl di, ni sèwten adan lasanblé-la ki désidé kè yo té pé manjé vyann-lasa pas yo té achté-y adan on mawché. Menmsi on moun ki té ka vann asi mawché-la té fè on sakrifis ba bondyé a-y èvè vyann-lasa avan i té vann-li, sé krétyen-lasa pa té ka vwè ayen adan sa. Men ni dòt krétyen aprézan ki pa té vlé manjé vyann-lasa pas konsyans a yo pa té ka pèwmèt-yo fè sa (li 1 Korentyen 8:7 ; 10:25, 26). Sé chakmoun ki té ka pran désizyon a-y. Pòl pa jen mandé sé Korentyen-la pran désizyon an plas a moun é i pa di-yo fè sa lézòt ka fè nonplis. ‘Yochak té’é ni a pasé douvan Bondyé pou sa yo fè’ (Wom. 14:10-12).
17. Ka ki té’é pé rivé si nou ka enki fè sa lézòt ka fè ? Bay on ègzanp (gadé sé imaj-la osi).
17 Douvan ki sitiyasyon nou pé touvé-nou jòdijou ki ka sanm tala nou sòti vwè la ? An-nou palé dè san-la. Sé chakmoun ki dwèt désidé pou limenm si i ka aksèpté sé fraksyon a san-la oben si pa ka aksèpté-yob. Pétèt kè nou ni dimal a konprann sèwten biten anrapò èvè san-la. Men fò nou pran pwòp désizyon an nou adan domenn-lasa, pas chakmoun ké pòté pwòp chaj a-y (Wom. 14:4). Si nou ka enn fè sa lézòt ka fè, nou pé’é jen vin on moun ki saj. Nou ké pé vin on moun ki saj enki si nou ka bazé désizyon an nou asi sa Labib ka di (Ébr. 5:14). Men a ki moman pou nou mandé on frè oben on sè ki byen doubout adan lavérité on konsèy ? Nou ké fè sa enki lèwvwè nou ké ja fè pwòp rèchèwch an nou é kè magrésa, nou bizwen on pal pou sav kijan pou nou apliké sé prensip-la ki an Bib-la.
Sé lè nou ja fè pwòp rèchèch an nou pou nou ay mandé on moun on konsèy (gadé paragraf 17 la).
KONTINYÉ MANDÉ MOUN KONSÈY
18. Ka Jéova fè pou nou ?
18 Jéova montré i ka fè-nou konfyans toubònman pas i ka pèwmèt-nou pran désizyon an nou noumenm an nou. I ban-nou Pawòl a-y Labib. I ban-nou osi zanmi ki plen sajès é sé zanmi-lasa pé édé-nou konprann kijan pou nou mèt sé prensip-la ki an Bib-la an pratik. Lèfètkè Jéova ban-nou tousa, i aji kon on papa ki enmé pitit a-y (Pwov. 3:21-23). Kijan nou pé montré Jéova jan nou ni rèkonésans ba-y ?
19. Kijan nou pé fè Jéova plézi ?
19 Sé paran-la kontan lèwvwè timoun a yo ka grandi é kè yo ka kontinyé sèvi Jéova. Menmjan-la, Jéova kontan lè i ka vwè kè nou ka vin on moun ki byen doubout adan lavérité é ki ka chèché konsèy pou pran bon désizyon é pou fè-y plézi.
KANTIK 127 Quel genre de personne je dois être !
a Délè, on krétyen pé ay vwè on moun ki pa ka sèvi Jéova si i bizwen konsèy anrapò èvè lajan, pou santé a-y oben pou dòt rézon ankò.
b Pou ni plis enfòwmasyon asi sa, ay adan liv-la Ou pé ni tchè-kontan pou touttan ! é gadé pwen 5 la é pawti-la « Ay gadé sa osi » ki adan lèson 39 la.
c SA NOU KA VWÈ ASI IMAJ-LA : On ansyen èvè ondòt ansyen ki lontan pli gran ki-y. I ka ba-y on konsèy parapòt a jan-la i palé la lè yo té adan réinyon a sé ansyen-la.