Kijan pou nou ba on moun on konsèy

1. Kimoun ki dwètèt ba lézòt konsèy ? Bay on ti èsplikasyon.

ÈS OU ka rivé ba moun konsèy fasilman ? Pou sèwten moun sé on biten ki fasil, men dòt moun on ti jan pè ba lézòt konsèy oben yo pa ka santi-yo alèz pou yo fè sa. Men ki nou vé ki nou vé pa, dè tanzantan fò nou ba lézòt konsèy. Poukwa fò nou fè sa ? Pas lè nou ka fè sa, nou ka montré frè é sè an nou kè nou enmé-yo. É Jézi di kè si nou vé vin disip a-y, fò nou montré lézòt kè nou enmé-yo (Jan 13:35). Anplisdisa, Labib ka di kè lè nou ‘ka ba on moun on konsèy é kè nou sensè, nou ka vin pi bon zanmi èvè-y’ (Pwov. 27:9).

2. Ka fò sé ansyen-la kapab fè é poukwa ? (gadé ti karé-la osi « Konsèy yo ka bay pannan réinyon a simenn-la »).

² Fò sé ansyen-la sav kijan pou yo ba lézòt on bon konsèy. Jéova é Jézi mandé sé nonm-lasa pran swen a lasanblé-la (1 Pyè 5:2, 3). Pa ègzanp, yo pé fè sa lèwvwè yo ka ba sé frè é sè la konsèy ki bazé asi Pawòl a Bondyé adan diskou a yo. Men yo ka ba moun konsèy osi lèwvwè yo bizwen sa, é yo ka édé moun ki lagé Jéova pou yo viré adan lasanblé-la. Kijan sé ansyen-la é noutout pé ba lézòt on konsèy ?

3. a) Kijan nou pé aprann ba lézòt dé bon konsèy ? (Izayi 9:6 ; gadé ti karé-la osi « Imité Jézi lè ou ka bay on konsèy »). b) Ka nou ké vwè adan awtik-lasa ?

³ Lè nou ka gadé ègzanp a sèwten moun adan Labib, sa ka aprann-nou kijan pou nou ba on moun on konsèy. Adan domenn-lasa Jézi té on zouti-filé. Labib ka kriyé-y « Konséyé èstraòwdinè » (li Izayi 9:6). Adan awtik-lasa, nou ké vwè ka nou pé fè lè on moun ka vin mandé-nou on konsèy. Nou ké vwè osi kijan nou pé ba on moun on konsèy alòskè i pa mandé-nou ayen. Nou ké vwè osi jan sa enpòwtan kè nou ba on moun on konsèy a bon moman-la é nou ké vwè kijan pou nou fè sa.

LÈ YO KA MANDÉ-NOU ON KONSÈY

4-5. Lè on moun ka mandé-nou on konsèy, ki prèmyé biten pou nou fè ? Bay on ègzanp.

⁴ Lè yo ka mandé-nou on konsèy, sèten nou kontan vwè kè moun-la ka fè-nou konfyans. Kifè, pétèt nou anvi édé-y tousuit. Men prèmyé biten pou nou mandé-nou sé : « Ès an ni asé èkspéryans adan domenn-lasa pou an pé sa ba moun-la on konsèy ? » Délè, méyè biten nou pé fè, sé édé moun-la touvé on moun ki pli filé adan domenn-lasa.

⁵ An-nou pran on ègzanp. Imajiné kè on bonmoun a-w malad bon malad la. I ka di-w kè i ja fè rèchèwch pou vwè ki diféran trètman yo pé rivé a ba-y. Aprésa i ka mandé-w kilès ou ka pansé ki méyè. Pétèt ni on trètman ou préféré, men ou pa dòktè é ou pa fè pon fòwmasyon adan domenn-lasa nonplis. Kifè méyè biten ou pé fè pou édé moun-la ki mandé-w konsèy-la, sé édé-y touvé on moun ki fè on fòwmasyon adan domenn-lasa é ki pé ba moun-la on trètman.

6. Poukwa sé on bon biten lè nou ka atann avan nou bay on konsèy ?

⁶ Menmsi nou ni èkspéryans adan on domenn, pétèt nou ké préféré atann tibwen avan nou réponn moun-la ki mandé-nou konsèy-la. Pou ki rézon ? Pwovèb 15:28 ka di : « On moun ki jis ka pran tan réfléchi avan i réponn. » Kifè, menmsi nou ka pansé nou konnèt répons-la, préféré nou pran on tan pou nou fè rèchèwch, pou nou priyé é pou nou médité. Konsa, nou ké sèten kè répons an nou ké annakò èvè sa Jéova ka pansé. An-nou vwè ègzanp a pwofèt Natan.

7. Ka ègzanp a Natan ka aprann-nou ?

⁷ Lè David di Natan kè i byen anvi konstwi on tanp pou Jéova, Natan di-y tousuit kè i pé fè sa pas sé on bon biten. Men sa pou Natan té fè avan, sé té mandé Jéova ka i ka pansé dè sa. Poukwa ? Pas a pa David Jéova té chwazi pou konstwi on tanp ba-y (1 Kron. 17:1-4). Istwa-lasa ka montré kè lè yo ka mandé-nou on konsèy fò nou ‘pran tan an nou avan nou palé’ (Jak 1:19).

8. Pou ki dòt rézon fò nou fè atansyon lè nou ka ba on moun on konsèy ?

⁸ An-nou vwè pou kidòt rézon fò nou fè atansyon avan nou ba on moun on konsèy. Si konsèy-la pa bon, nou ké rèsponsab ansanm èvè moun-la si on biten rivé. Kifè, sa vréman enpòwtan kè nou byen réfléchi avan nou palé.

LÈ NOU KA BA ON MOUN ON KONSÈY I PA MANDÉ

9. Avan sé ansyen-la ba on moun on konsèy, dè ki biten fò yo sèten ? (Galat 6:1).

⁹ Délè, fò sé ansyen-la ba on frè oben on sè on konsèy pas i fè « on fo-pa » (li Galat 6:1). Pétèt kè moun-lasa pa ka aji èvè sajès é i pé rivé a fè on péché ki grav. Sé ansyen-la anvi édé-y pou i kontinyé sèvi Jéova é pou i ni lavi pou touttan (Jak 5:19, 20). Men yo ka sonjé osi kè a pa paskè on moun pran on désizyon kè yo yo pa té’é pran, sa vé di kè moun-lasa fè on biten ki pa ka fè Jéova plézi (Wom. 14:1-4). Si sé ansyen-la ka vwè kè moun-lasa fè on biten ki pé aji asi lanmityé a-y èvè Jéova, kijan yo pé ba-y on konsèy ?

10-12. Ka sé ansyen-la pé fè lè fò yo ba on moun on konsèy alòskè moun-la pa mandé-yo ayen ? Bay on ègzanp (gadé sé imaj-la osi).

¹⁰ Lè fò sé ansyen-la ba on moun on konsèy alòskè i pa té mandé ayen, sa pa fasil pou yo. Lapòt Pòl ka èspliké kè délè, moun-la pa menm vwè i pran on mové chimen. Kifè, avan sé ansyen-la ba moun-la on konsèy, fò yo ké fè sèwten biten pou moun-la kouté pi fasilman.

¹¹ An-nou pran on ègzanp pou édé-nou konprann. Imajiné kè on agrikiltè bizwen fè on jaden on koté tè-la rèd. Avan i koumansé simé grenn, fò i travay tè-la pou tè-la vin mòl. Aprésa, i ka simé sé grenn-la. É on dènyé biten i ka fè sé wouzé sé grenn-la. Menmjan-la, avan on ansyen ba on moun on konsèy alòskè moun-la pa mandé-y ayen, ni sèwten biten ansyen-la pé fè pou édé moun-la kouté konsèy-la i ké ba-y la. Pa ègzanp, i pé atann bon moman-la pou i palé ba-y. I pé di frè-la kè i ka konsidéré-y é kè i bizwen palé dè on biten èvè-y. Lè on moun ki ka bay konsèy ni labitid aji èvè lanmou é bonté, yo ka aksèpté konsèy a-y pi fasilman.

¹² Pannan ti kozé-la, ansyen-la pé di moun-la kè toutmoun ka fè érè é kè noutout bizwen konsèy dè tanzantan. Si i ka fè sa, i ké édé moun-la aksèpté konsèy-la pli fasilman (Wom. 3:23). I ké sèvi èvè Bib-la pou montré moun-la kè i fè on fo-pa, men lè i ké fè sa, fò i ké palé èvè dousè é fò i ké montré moun-la kè i ka rèspèkté-y. Lèwvwè moun-la ké byen konprann kè i fè on érè, ansyen-la ké di-y franchman ka pou i fè pou i pé sa chanjé. Lè yo toupré fin ti kozé-la, ansyen-la pé félisité-y pou tout sé bon biten-la i ka fè la é i pé priyé èvè-y. Konsa moun-la ké aksèpté konsèy-la pli fasilman (Jak 5:15).

13. Ka on ansyen pé fè pou vwè si on moun byen konprann on konsèy ?

¹³ Délè, sa moun-la ki ka bay konsèy-la ka di é sa moun-la ki ka rèsèvwa konsèy-la ka konprann, sé dé biten diféran. Ka on ansyen pé fè pou sa pa rivé ? Èvè onlo jantiyès, ansyen-la pé pozé moun-la déotwa kèsyon pou i vwè si moun-la byen konprann konsèy-la é si i sav ka pou i fè pou mété-y an pratik (Ékl. 12:11).

BA ON MOUN ON KONSÈY A BON MOMAN-LA É FÈ SA BYEN KONM I FO

14. Poukwa fò pa nou ba moun konsèy lèwvwè nou kòlè ?

¹⁴ Konm noutout enpawfè, sa pé rivé kè nou di oben kè nou fè on biten ki ka malpasé frè é sè an nou (Kol. 3:13). Labib ka di kè délè, sa pé rivé kè on moun fè oben di on biten ki ka fè-nou fè kòlè (Éféz. 4:26). Men lè nou kòlè, a pa a moman-lasa pou nou ba on moun on konsèy. Poukwa ? Sé pas « lè on nonm kòlè, i pa ka aji annakò èvè jistis a Bondyé » (Jak 1:20). Si nou ka ba on moun on konsèy tou kòlè, nou ké fè sitiyasyon-la vin pi mové. Sa pa vé di kè fò pa nou jen di moun-la sa nou ka pansé oben sa nou ka rèsanti. Men, fò nou atann kè nou wouvin kalm avan nou di moun-la on biten. An-nou vwè kijan Éliyou ba Jòb konsèy é ka sa ka aprann-nou.

15. Ka ègzanp a Éliyou ka aprann-nou ? (gadé imaj-la osi).

¹⁵ Pannan plizyè jou, Jòb éséyé défann-li pas yo té ka akizé-y. Éliyou rété ka kouté sa Jòb té ka di. I té ni onlo konpasyon pou Jòb. Men lè Jòb éséyé montré kè i té inosan é kè i di kè Jéova té ni tò, Éliyou touvé-y kòlè toubònman. Magrésa, i rété ka atann avan i palé é lè i ba Jòb konsèy i té kalm é i montré kè i té ka rèspèkté-y (Jòb 32:2 ; 33:1-7). Éliyou lésé on bèl ègzanp ban nou. Préféré nou ba on moun on konsèy lèwvwè nou kalm, é kè nou fè sa èvè onlo lanmou é onlo rèspé (Ékl. 3:1, 7).

KONTINYÉ BA MOUN KONSÈY É KONTINYÉ AKSÈPTÉ SÉLA YO KA BA-W LA

16. Ka Sòm 32:8 ka aprann-nou ?

¹⁶ Awtik-lasa bazé asi vèwsé-la ki ka di kè ‘toupannan Jéova ka voyé zyé asi nou, i ka ban-nou konsèy’ (li Sòm 32:8). Sa vlé di kè i toujou ka soutyenn-nou. Nonsèlman i ka ban-nou konsèy men i ka édé-nou osi pou nou mété-yo an pratik. Sé on bèl ègzanp ban nou ! Alò, lè fò nou ba on moun on konsèy, an-nou kontinyé ankourajé moun-la é an-nou édé-y pran bon désizyon.

17. Lè sé ansyen-la ka ban-nou konsèy ki bazé asi Labib, èvè ki biten nou pé konparé-yo ? (Izayi 32:1, 2).

¹⁷ Pi tan ka pasé é pi sa enpòwtan kè nou ba lézòt konsèy é kè yo ban-nou konsèy osi (2 Tim. 3:1). Lèwvwè sé ansyen-la ka ban-nou konsèy ki bazé asi Labib, sé pou ankourajé-nou é pou édé-nou kontinyé sèvi Jéova. A moman-lasa, sé ansyen-la « kon ti rivyè ki ka koulé adan on tè ki sèk » (li Izayi 32:1, 2). On zanmi ki ka vwè kè nou mérité on konsèy ka ban-nou-y menmsi i sav kè a pa sa nou té anvi tann. Lè i ka aji konsa, sé on bèl kado i ka fè-nou. Pawòl a-y kon « pòm an lò ki adan dékorasyon an awjan » (Pwov. 25:11). Alò, an-nou kontinyé aprann kijan pou nou ba lézòt bon konsèy é an-nou kontinyé aksèpté konsèy yo ka ban-nou osi.