« Kriyé sé ansyen-la pou yo vin owa a-w »

1. Kijan Jéova montré kè ti mouton a-y ni onlo valè ba-y ?

TI MOUTON a Jéova ni onlo valè ba-y. I bay vi a Gason a-y pou yo é i chwazi sé ansyen-la pou pran swen a yo (Akt 20:28). Bondyé vé sé ansyen-la aji èvè dousè èvè sèwvitè a-y. Sé ansyen-la ka lésé Jézi gidé-yo, kifè yo ka ankourajé frè é sè a yo é yo ka édé-yo pou yo rété fidèl a Jéova (Iz. 32:1, 2).

2. Dapré Ézékyèl 34:15, 16, kimoun Jéova anvi édé ?

² Jéova enmé tout sèwvitè a-y, men moun i anvi édé menm, sé moun ki ka soufè pas yo fè on érè. Pou i édé-yo, i ka sèvi èvè sé ansyen-la (li Ézékyèl 34:15, 16). Dépi nou bizwen, Jéova la pou édé-nou. Nonsèlman i vlé nou priyé-y pou i édé-nou, men i vlé osi kè nou mandé séla ki « bèwjé é anségnan » la édé-nou (Éféz. 4:11, 12).

3. Ka nou ké vwè adan awtik-lasa é ki byenfé sa ké pwokiré-nou ?

³ Adan awtik-lasa, nou ké vwè on dispozisyon Jéova pran pou édé séla ki bizwen yo édé-yo pas fwa a yo fébli. Mi déotwa kèsyon nou kay réponn : A ki moman pou nou mandé sé ansyen-la édé-nou ? Poukwa fò nou fè sa ? É kijan sé ansyen-la pé édé-nou ? Pétèt kè konnyéla nou pa anba pon éprèv, men grasa awtik-lasa, nou ké ni plis rèkonésans pou Jéova davwa i ka sèvi èvè sé ansyen-la pou édé-nou. Nou ké vwè osi ka nou pé fè lè nou bizwen sé ansyen-la édé-nou.

A KI MOMAN POU NOU ‘KRIYÉ SÉ ANSYEN-LA’ ?

4. Poukwa nou pé di kè adan Jak 5:14-16, 19, 20, yo ka palé dè on moun fwa a-y fébli ? (gadé sé imaj-la osi).

⁴ Jak, disip a Jézi, èspliké kijan Jéova ka sèvi èvè sé ansyen-la pou i édé-nou. Mi sa i maké : « Ès ni yonn adan zòt ki malad ? Fò i kriyé sé ansyen a lasanblé-la pou yo vin owa a-y » (li Jak 5:14-16, 19, 20). Lè nou ka gadé sé vèwsé-la ki alantou a sé vèwsé-lasa, nou ka rann-nou kont kè Jak té ka palé dè on moun fwa a-y fébli. Jak pa di moun-lasa ay vwè on dòktè, men i di-y ay vwè sé ansyen-la. Anplisdisa, Jak ka èspliké kè lèwvwè Jéova ké padonné péché a moun-lasa, moun-la ké santi-y pibyen. Pou on moun ki malad woufè kò a-y, fò i ay vwè on dòktè, fò i èspliké-y kijan a kò-la é si dòktè-la ka mandé-y fè on biten, fò i fè-y. Menmjan-la pou on moun wouvin bon bon zanmi èvè Jéova, fò i ay vwè sé ansyen-la, fò i di-yo ki pwoblèm i ka jwenn é fò i suiv sé konsèy-la yo ka ba-y la ki bazé asi Labib.

5. Kijan nou pé sav si lanmityé an nou èvè Jéova andanjé ?

⁵ Adan Jak chapit 5, Jak ka ankourajé-nou ay vwè sé ansyen-la lèwvwè nou ka santi kè fwa an nou ka fébli. Men a pa lè nou ké ja fè on mové biten pou nou fè sa ! Lèwvwè nou ka chèché a vwè ki pwen fèb nou ni, fò pa nou chèché pon èskiz. Labib ka di kè si nou pa fè atansyon, nou pé pansé kè nou ka fè Jéova plézi alòskè anréyalité nou pa adan sa menm (Jak 1:22). Sé sa ki rivé sèwten krétyen a lasanblé a Sawd. Jézi di-yo kè yo pa té ka fè Jéova plézi (Rév. 3:1, 2). Pou nou sav si nou bon bon zanmi èvè Jéova toujou, nou pé konparé jan nou té enmé Jéova lè nou vin konnèt lavérité, é jan nou enmé-y konnyéla (Rév. 2:4, 5). Nou pé mandé-nou : « Ès an enmé li bib an mwen é médité asi-y kon avan ? Ès an kay adan tout sé réinyon-la é ès an ka préparé réinyon an mwen ? Ès an ni balan pou ay préché kon avan, oben ès an pisimé pasé tan an mwen ka fè dòt biten ? Ès alèla sa ki pli enpòwtan pou mwen sé ni onpakèt lajan ? » Si nou ka réponn wi a yonn adan sé kèsyon-lasa, pétèt sa vé di kè fwa an nou fébli é si nou pa fè ayen, a pa pibon sitiyasyon-la ké vin pibon. Si nou pa’a santi kè nou ké pé wouvin bon bon zanmi èvè Jéova tousèl an nou, oben si nou ja fè on biten ki pa’a fè Jéova plézi, fò nou mandé sé ansyen-la édé-nou.

6. Dépi on moun fè on péché ki grav, ka pou i fè ?

⁶ Nou ka tou konprann kè si on moun fè on péché ki grav, kivédi si i fè on biten ki pé fè kè yo woté-y adan lasanblé-la, fò moun-lasa ay vwè sé ansyen-la pou palé ba yo (1 Kor. 5:11-13). Moun-lasa pé pa wouvin bon bon zanmi èvè Jéova tousèl a-y. Pou Jéova pé sa padonné-y, ‘fò i fè dé biten ki ka montré kè i ka rèpanti-y’ (Akt 26:20). É on biten i pé fè pou montré sa, sé lèwvwè i k’ay palé ba sé ansyen-la.

7. Ki dòt moun ki bizwen sé ansyen-la édé-yo ?

⁷ A pa moun ki fè on péché grav tousèl sé ansyen-la ka édé, men yo ka édé osi moun fwa a yo fébli (Akt 20:35). Pétèt kè ou ka goumé èvè on mové lanvi é ou ka santi kè sa k’ay pran lanmen asi-w. Pétèt ou ni dimal a goumé èvè sa pas avan ou vin krétyen, ou té ka pran dwòg é ou pa té ka rivé arété, ou té ka gadé pòwnografi oben ou té ka fè péché sèksyèl. Men ou pa oblijé goumé tousèl a-w. Ou pé palé ba on ansyen ou alèz èvè-y é kè ou ka fè konfyans. Frè-la ké kouté-w byen, i ké ba-w dé bon ti konsèy é i ké fè-w sonjé jan Jéova ké vréman kontan-w si ou ka kontinyé obéyi-y (Ékl. 4:12). Pétèt ou las pas ou ka vwè kè ou pa’a fin goumé èvè sé mové lanvi-la menm. A moman-lasa, sé ansyen-la ké fè-w sonjé kè Jéova kontan vwè kè ou ka mandé-y édé-w, pas sa ka montré kè ou ni imilité é kè ou vlé fè-y plézi (1 Kor. 10:12).

8. Ès dépi nou fè on érè, fò nou ay owa sé ansyen-la ? Bay on ti èsplikasyon.

⁸ Men a pa chakfwa nou fè on érè pou nou ay owa sé ansyen-la. Pa ègzanp, imajiné kè ou di on frè oben on sè on biten ki fè-y mal oben kè ou fè kòlè asi-y. Olyé ou ay palé sé ansyen-la dè sa, vométan ou suiv konsèy a Jézi é kè ou ay vwè frè-la oben sè-la pou zò wouvin byen (Mat. 5:23, 24). Ou pé fè rèchèch osi asi kalité pou on krétyen ni, kon dousè, pasyans é métriz. Konsa pwochen kou, ou pé ké réyaji menmjan-la. Nou ka tou konprann kè si ou ka santi kè ou pé’é rivé about a sa, ou pé ay owa on ansyen pou mandé-y édé-w. Lè Évodi é Sentich té trapé bab é kè yonn pa té byen èvè lòt, Pòl mandé on frè adan lasanblé-la édé-yo. Vou osi, on ansyen a lasanblé a-w pé édé-w (Filip. 4:2, 3).

POUKWA FÒ NOU ‘KRIYÉ SÉ ANSYEN-LA’ ?

9. Menmsi nou wont pas nou fè on péché, poukwa fò nou mandé sé ansyen-la édé-nou ? (Pwovèb 28:13).

⁹ Lèwvwè nou fè on péché ki grav oben kè nou ka santi kè sé mové lanvi-la ka pran lanmen asi nou, fò nou ni fwa é fò nou ni kouraj pou nou ay mandé sé ansyen-la édé-nou. Menmsi nou wont, fò pa nou lésé sa anpéché-nou ay palé ba sé ansyen-la. Pou ki rézon ? Sé pas sé Jéova ki ban-nou sé ansyen-la pou édé-nou ni on lanmityé ki solid èvè-y. Kifè lè nou k’ay vwè-yo, nou ka montré nou ka fè Jéova konfyans é kè nou ka obéyi-y. Nou ka rèkonnèt kè nou bizwen i édé-nou pou nou kontinyé fè sa ki byen (Sòm 94:18). É si nou fè on péché, nou pé sèten kè Jéova ké padonné-nou si nou ka di sé ansyen-la sa nou fè é si nou arété fè mové biten (li Pwovèb 28:13).

10. Si nou ka éséyé kaché péché an nou, ka ki pé rivé ?

¹⁰ Lè nou k’ay vwè sé ansyen-la pou yo édé-nou, sa ka pwokiré-nou onlo byenfé. Pawkont, lè nou ka éséyé kaché péché an nou, sitiyasyon an nou ka vin pi mové. Lè wa David éséyé kaché péché a-y, i té tris toubònman é sa jous rann-li malad pas i té sav Jéova pa té dakò èvè sa i té fè la (Sòm 32:3-5). Lè nou malad oben lè nou ni on blès, pi nou ka pran tan pou nou swangné-y, pi sa ka vin mové. Menmjan-la, lè nou fè on péché ki grav, pi nou ka tadé pou nou ay vwè sé ansyen-la, pi lanmityé an nou èvè Jéova andanjé. Konm Jéova sav sa, i ka di-nou : « An-nou woumèt zafè an nou annòd » (Iz. 1:5, 6, 18). Pou nou fè sa, i ban-nou sé ansyen-la.

11. Si nou pa ka palé sé ansyen-la dè on péché ki grav, ka ki pé rivé ?

¹¹ Si nou fè on péché ki grav é kè nou ka kaché sa, onlo moun pé pran plon adan sa. A moman-lasa, nou pé anpéché lèsprisen a Bondyé aji asi lasanblé-la, é sé frè é sè la pé pran bon gaz (Éféz. 4:30). Ondòt biten ankò, sé kè si nou ka vin sav kè on moun adan lasanblé-la fè on péché ki grav, fò nou ankourajé-y ay vwè sé ansyen-la. Si nou pa’a di ayen, nou koupab ansanm èvè-y (Lév. 5:1). Nou ké ba-y déotwa jou pou ay vwè sé ansyen-la, men si i pa ka fè sa, nou ké ay vwè-yo noumenm an nou. Nou ké fè sa pas nou enmé Jéova é kè nou fidèl a-y. Lè nou ka aji konsa nou ka pwotéjé frè é sè an nou ki adan lasanblé-la. Sa ka édé osi moun-la ki fè péché-la wouvin an 2 bra a Jéova.

KIJAN SÉ ANSYEN-LA KA ÉDÉ-NOU ?

12. Kijan sé ansyen-la ka édé on moun fwa a-y fébli ?

¹² Labib ka mandé sé ansyen-la édé moun fwa a yo fébli (1 Tés. 5:14). Si ou fè on péché, sé ansyen-la pé pozé-w déotwa kèsyon pou konprann sa ou ka pansé é sa ou ka rèsanti (Pwov. 20:5). Pétèt ou ké ni dimal a palé ba sé ansyen-la. Sé pé pas ou timid oben ou wont palé dè sa ki fèt, men si ou ka di-yo ki difikilté ou ka jwenn, sa ka pèwmèt-yo konprann sitiyasyon-la. Ou pé rivé a « palé san réfléchi », men pa enkyété-w pou sa (Jòb 6:3). Sé ansyen-la pé ké jijé-w two vit parapòt a sa ou di. Olyé dè sa, yo ké pran tan kouté-w byen, konsa yo ké ni tout sé enfòwmasyon-la yo bizwen la pou ba-w konsèy ki bazé asi Labib (Pwov. 18:13). Sé ansyen-la sav kè sa ka pran tan pou édé on ti mouton a Jéova, kifè yo sav kè délè onsèl ti kozé pé’é sifi pou yo ba-w èd-la ou bizwen la.

13. Lè sé ansyen-la ka priyé ban nou é kè yo ka ban-nou konsèy ki bazé asi Labib, kijan sa ka édé-nou ? (gadé sé imaj-la osi).

¹³ Sé ansyen-la pa vlé ou santi-w pi koupab ankò, okontrè yo ké priyé pou vou. Jéova ké tann priyè a yo é sé priyè-lasa ké ni « on éfé ki fò toubònman ». Pa menm imajiné ou pé pa imajiné jan ou ké santi-w byen apré. Ondòt biten yo ké fè sé ‘pasé luil anlè-w an non a Jéova’ (Jak 5:14-16). « Luil »-lasa sé sé vérité-la ki adan Pawòl a Bondyé. Sa vé di kè sé ansyen-la ké pran vèwsé a Labib èvè-w. Sa ké ankourajé-w é sa ké édé-w wouvin bon bon zanmi èvè Jéova (Iz. 57:18). Yo ké ba-w konsèy ki bazé asi Labib é sa ké ba-w fòs pou-w kontinyé fè sa ki byen. Sé konsi Jéova té ka sèvi èvè sé ansyen-la pou di-w : « Mi la chimen-la yé. Suiv-li » (Iz. 30:21).

14. Dapré Galat 6:1, kijan sé ansyen-la pé édé on moun ki « fè on fo-pa » ? (gadé sé imaj-la osi).

¹⁴ (Li Galat 6:1.) Lè on krétyen ka « fè on fo-pa », i pa’a fè sa Jéova vlé i fè. Pétèt i pran on mové désizyon oben i fè on péché ki grav. Alò konm sé ansyen-la enmé-y, yo ka ‘éséyé korijé-y èvè onlo dousè’. Adan Labib, yo ka sèvi èvè mo grèk la yo tradui la é ki bay « korijé » pou palé dè jan on dòktè ka woumèt on zo ki kasé anplas pou i pé sa géri. On bon dòktè ké fè atansyon pou lè i ké woumèt zo a moun-la anplas, sa pa fè-y soufè twòp. Menmjan-la, lè sé ansyen-la ka éséyé korijé on moun ki bigidi, yo vé pa fè moun-la soufè. Alò yo ka fè tousa yo pé pou yo ba-y konsèy èvè dousè. Labib ka di kè fò sé ansyen-la fè atansyon a yomenm osi. Sa vé di kè lè yo ka ba on moun konsèy ki bazé asi Labib, fò sé ansyen-la sonjé kè yo osi yo pé fè érè. Alò yo ké fè atansyon pou yo pa fè moun-la santi kè yo pibon ki-y. Olyé dè sa, yo ké aji èvè imilité é konpasyon èvè moun-la (1 Pyè 3:8).

15. Ka nou pé fè si nou ka jwenn on pwoblèm ?

¹⁵ Nou pé fè sé ansyen-la konfyans. Grasa fòwmasyon-la yo rèsèvwa la, yo sav kè fò pa yo rakonté dòt moun zafè an nou. Anplisdisa, yo ka ban-nou konsèy ki sòti an Bib-la, olyé yo di-nou sa yo ka pansé. É yo ka kontinyé édé-nou lèwvwè nou ka jwenn pwoblèm (Pwov. 11:13 ; Gal. 6:2). Chak sé ansyen-la ni kalité a yo é ni sa ki ansyen dépi pi lontan ki dòt. Men nou pé ay vwè nenpòt kilès adan yo siwvwè nou andifikilté. Pawkont, fò nou sonjé kè nou pa dwèt ay vwè plizyè ansyen yonn dèyè lòt pou mandé-yo konsèy pou yonn adan yo fin pa di-nou kè nou pé fè sa nou anvi fè. Si nou fè sa, a moman-lasa, sa nou ka chèché sé kè yo di-nou sa nou anvi tann, men a pa sa Jéova ka di adan Pawòl a-y nou ka chèché (2 Tim. 4:3). Lè nou ka palé èvè on ansyen dè pwoblèm an nou, i pé mandé-nou si nou ja vwè ondòt ansyen é ki konsèy i ja ban-nou. É i pé désidé ay vwè ondòt ansyen pou ansyen-la ba-y on pal (Pwov. 13:10).

RÈSPONSABILITÉ AN NOUCHAK

16. Ki rèsponsabilité nou ni ?

¹⁶ Konm nou sé ti mouton a Bondyé, sé ansyen-la ka voyé zyé asi nou, men yo pa ka di-nou ka pou nou fè. Nouchak dwèt montré èvè konduit an nou é pawòl an nou kè nou enmé Jéova é kè nou vlé fè-y plézi. É li Jéova, i ka édé-nou pran bon désizyon é rété fidèl a-y (Wom. 14:12). Kifè, olyé sé ansyen-la gouvèné-nou, yo ka sèvi èvè Labib pou montré-nou sa Jéova ka pansé, é yo ka lésé-nou pran pwòp désizyon an nou. Lè nou pran tan réfléchi asi konsèy a yo ki bazé asi Labib é lè nou ka suiv sé konsèy-lasa, nou ka pansé kon Jéova ka pansé é nou ka pran bon désizyon (Ébr. 5:14).

17. Ka Jéova vé nou fè ?

¹⁷ Nou sé ti mouton a Jéova é sé on lonnè pou nou ! Jéova voyé Jézi, « bon bèwjé-la » pou i bay vi a-y pou nou pé sa viv pou touttan (Jan 10:11). É kon Jéova té pwomèt, i ban-nou sé ansyen-la osi pou yo pran swen an nou adan lasanblé-la. I té di : « An ké ba-zòt bèwjé ki ka fè sa ki ka fè-mwen plézi, é yo ké ba-zòt manjé pou zò ni konésans é bon jijman » (Jér. 3:15). Alò lè nou ka santi kè fwa an nou ka fébli oben kè nou pa bon bon zanmi èvè Jéova ankò, fò pa nou pè ay vwè sé ansyen-la pou yo édé-nou. Si nou ka fè sa, nou ké vwè an 2 zyé an nou jan Jéova ka sèvi èvè yo pou édé-nou.