Léfrè, ès zò ka travay pou vin ansyen ?

1-2. Ki « bon biten » on ansyen ka fè ?

SI OU ka sèvi antankè asistan, sèten ou ka travay rèd pou-w pé sa ni sé kalité-la ki fo la pou sèvi antankè ansyen. Ès ou té’é anvi fè ‘bon biten-lasa’ ? (1 Tim. 3:1).

² Ka ki travay a on ansyen ? On ansyen ka pòté bon mannèv adan prédikasyon-la, i ka pran swen a sé frè é sè la é i ka anségné-yo. É grasa bèl ègzanp a-y, i ka édé-yo ni on fwa pli solid. Sé pousa Labib ka kriyé-yo « dé nonm konm kado » (Éféz. 4:8).

3. Kijan on frè pé ranpli sé kondisyon-la pou vin ansyen ? (1 Timoté 3:1-7 ; Tit 1:5-9).

³ Kijan ou pé ranpli sé kondisyon-la pou sèvi antankè ansyen ? Ni on gran gran diférans ant ranpli sé kondisyon-la pou vin ansyen é ranpli sé kondisyon-la pou touvé on travay. Souvantfwa, adan domenn a travay-la, dépi ou ni sé kapasité-la patron-la ka chèché la, i ka ba-w travay-la. Pawkont, pou vin ansyen, apatoudi ni balan adan prédikasyon-la é anségné lézòt byen. Fò ou ni sé kalité-la on ansyen dwètèt tini la. Nou ka touvé-yo adan 1 Timoté 3:1-7 é Tit 1:5-9 (li-yo). Adan awtik-lasa, nou ké vwè ka yo ka atann dè on ansyen adan 3 domenn diféran : fò i ni on bon répitasyon andidan é andéwò a lasanblé-la, fò i sé on bon chèf a fanmi é fò i anvi sèvi adan lasanblé-la.

FÒ OU NI ON BON RÉPITASYON

4. Ka sa vlé di ‘fò pa yo ni ayen a rèpwoché-w’ ?

⁴ Pou ou pé sa vin ansyen, ‘fò pa yo ni ayen a rèpwoché-w’. Sa vlé di, ou ni on bon répitasyon andidan lasanblé-la pas sé frè é sè la pa ni pon rézon pou akizé-w konmkwa ou ka fè mové biten. Anplisdisa, ‘fò sé moun-la ki andèwò a lasanblé-la ka palé dè-w anbyen’. Moun ki pa Témwen a Jéova pé kritiké kwayans an nou, men fò pa yo ni pon bon rézon dè douté kè ou sé on moun onèt é kè ou ni on bon konduit (Dan. 6:4, 5). Ou pé mandé-w : « Ès an ni on bon répitasyon andidan é andèwò a lasanblé-la ? »

5. Kijan ou pé montré kè ou « sé on zanmi a sa ki byen » ?

⁵ Si ou « sé on zanmi a sa ki byen », ou ké gadé sa ki bon aka lézòt é ou ké di-yo jan ou enmé kalité a yo. Ou ké kontan osi fè dé biten ki ké fè-yo dibyen, menmsi ou ka fè plis ki sa on ansyen ni labitid fè (1 Tés. 2:8). Poukwa on ansyen dwètèt tini kalité-lasa ? Sé pas on ansyen ka pasé onlo tan ka pran swen a sé frè é sè la adan lasanblé-la, é onlo tan osi ka asimé rèsponsabilité kè i ni (1 Pyè 5:1-3). Menmsi édé lézòt ka mandé onlo sakrifis, i ké ni onlo jwa (Akt 20:35).

6. Ka sa vlé di « akéyi lézòt byen » ? (Ébré 13:2, 16 ; gadé imaj-la osi).

⁶ Ou ka montré ou ka « akéyi lézòt byen » lè ou ka aji èvè bonté èvè moun ki pa bon zanmi a-w (1 Pyè 4:9). Mi sa on diksyonnè a Labib té ka di parapòt a moun ki ka akéyi lézòt byen : « Fò i wouvè pòt a kaz a-y é pòt a tchè a-y ba sé étranjé-la ». Ou pé mandé-w : « Ès an ka akéyi sé moun-la ki ka vizité lasanblé an mwen byen ? » (li Ébré 13:2, 16). On nonm ki ka akéyi lézòt byen ka pawtajé sa i ni èvè moun i pa konnèt. Pa ègzanp, èvè séla ki maléré la, èvè sé frè-la ki ka vin fè diskou adan lasanblé a-y, oben èvè séla ki ka travay rèd pou ankourajé sé frè é sè la, kon sé rèsponsab a siwkonskripsyon la (Jén. 18:2-8 ; Pwov. 3:27 ; Lik 14:13, 14 ; Akt 16:15 ; Wom. 12:13).

7. Kijan on ansyen pé montré kè i pa ‘enmé lajan’ ?

⁷ ‘Fò pa ou enmé lajan’. Ki ou rich ki ou maléré, ou ka mèt Wayòm-la an prèmyé adan vi a-w (Mat. 6:33). Ou ka sèvi èvè tan a-w, fòs a-w é tousa ou ni pou adoré Jéova, pou pran swen a fanmi a-w é pou sèvi lasanblé-la (Mat. 6:24 ; 1 Jan 2:15-17). Ou pé mandé-w : « Kijan an ka vwè lajan ? Ès an ka kontanté-mwen dè sa ki nésésè ? Oben ès sa ki pli enpòwtan pou mwen, sé gangné plis lajan é toujou ni plis biten matéryèl ? (1 Tim. 6:6, 17-19).

8. Kijan ou pé montré kè ou pa ‘two radikal adan labitid a-w’ é kè ou ‘kapab métrizé-w’ ?

⁸ Si ou pa ‘two radikal adan labitid a-w’ é kè ou ‘kapab métrizé-w’, sa vlé di kè ou ka montré-w rézonab adan tout domenn a vi a-w. Pa ègzanp, ou pa’a manjé twòp, ou pa’a bwè twòp, ou ka abiyé-w é ou ka pengné-w èvè bon jijman, é ou ka pran bon désizyon parapòt a jan ou ka anmizé-w. Ou pa èsklav a sa ki lanmòd nonplis (Lik 21:34 ; Jak 4:4). Ou sav métrizé-w osi lè ou ka rété kalm alòskè moun-la ki anfas èvè-w la pa’a palé byen ba-w. Anplisdisa, ou pa « bwasonnè » é ou pa on moun ka bwè twòp nonplis. Ou pé mandé-w : « Ès jan-la an ka viv la ka montré kè an pa radikal adan labitid an mwen é kè an kapab métrizé-mwen ? »

9. Kijan ou pé fè pou « pran tan réfléchi » é pou ‘zafè a-w annòd’ ?

⁹ Si ou ka « pran tan réfléchi », sa vlé di kè ou toujou ka chèché a sav ka Labib ka di parapòt a on sitiyasyon. Ou ka médité asi sé prensip biblik la é sa ka ba-w sajès é bon jijman. Ou pa présé nonplis pou di kè tèl biten fèt tèl ou tèl mannyè. Okontrè, ou ka fè ansòt pou ou sèten sav tousa ki fèt avan (Pwov. 18:13). Sé konsa ou ka pran désizyon ki rézonab é ki annakò èvè sa Jéova ka pansé. Si ‘zafè a-w annòd’, sa vlé di ou sé on moun òwganizé é kè ou pa’a fè rèta. Lézòt ka touvé kè ou sé on nonm fyab, é ki ka suiv sé enstriksyon-la. Si ou ka fè ansòt pou travay tout sé kalité-la nou vwè la, sa ké édé-w ni on bon répitasyon. An-nou vwè aprézan ki kalité Labib ka di on ansyen dwètèt ni pou vin on bon ègzanp antankè chèf a fanmi.

FÒ OU SÉ ON BON CHÈF A FANMI

10. Kijan on nonm ka « dirijé fanmi a-y on bèl mannyè » ?

¹⁰ Si ou mayé é kè ou anvi vin ansyen, fanmi a-w dwètèt ni on bon répitasyon osi. Ou dwèt ka ‘dirijé fanmi a-w on bèl mannyè’. Sa vlé di kè fò ou ba fanmi a-w lanmou é fò ou pran bon désizyon ba-y. Donk ou ka fè adorasyon an fanmi la, ou ka fè ansòt pou fanmi a-w ay réinyon é ou ka fè tousa ou pé pou édé-yo adan prédikasyon-la. Poukwa sa enpòwtan konsa ? Lapòt Pòl di konsa : « Si on nonm pa sav kijan pou i dirijé pwòp fanmi a-y, kijan i ké fè pou i pran swen a lasanblé a Bondyé ? » (1 Tim. 3:5).

11-12. Poukwa nou pé di kè konduit a timoun a on frè enpòwtan si i anvi vin ansyen ? (gadé imaj-la osi).

¹¹ Si ou sé on papa, fò ou ‘lévé timoun a-w dwèt é aprann-yo obéyi’. Fò ou anségné-yo é édiké-yo èvè lanmou. Kon tout timoun, sèten yo enmé ri é jouwé, men fò ou aprann-yo osi obéyi, rèspèkté lézòt é ni on bon konduit. Anplisdisa ou dwètèt fè tousa ou pé pou édé timoun a-w ni on bèl lanmityé èvè Jéova, pou yo aprann viv annakò èvè prensip a Labib é pou yo pwogrésé jistan yo batizé.

¹² ‘I ni timoun ki ka kwè an Bondyé é kè yo pa ka akizé pawtisipé adan pon manjé-kochon ni aji kon moun-rèbèl’. Si on timoun ki ka kwè an Bondyé é ki ka viv akaz a fanmi-la ka fè on péché ki grav, ki konsékans sa pé ni asi papa-la ? Si i montré-y tibwen two mòl adan jan-la i lévé timoun a-y é kè i pa korijé-y kon i té dwètèt, pétèt i pa’a ranpli sé kondisyon-la ki fo la pou vin ansyen (gadé niméwo a 15 òktòb 1996 a La Tour de Garde, p. 21, § 6-7).

PRAN SWEN A LASANBLÉ-LA

13. Kijan ou pé montré kè ou « rézonab » é kè ou pa « wòs » ?

¹³ Sé frè-la ki ka manifèsté sé kalité-la tout sé krétyen-la dwètèt tini la, kon on bénédisyon pou lasanblé-la. On nonm ki « rézonab » ka travay pou lapé. Si ou anvi yo vwè-w kon on moun rézonab, kouté lézòt é éséyé konprann jan yo ka vwè léchòz. Pa ègzanp, adan on réinyon a ansyen, ès ou ké paré pou soutyenn désizyon-la lamajorité a sé frè-la préféré la, si i k’ay an menm sans ki sé prensip biblik la ? Ou pa « wòs », vlé di kè ou pa ka ensisté pou yo fè tout biten jan ou vlé yo fèt. Ou sav kijan kouté lidé a lézòt enpòwtan (Jén. 13: 8, 9 ; Pwov. 15:22). Ou pa ka « chèché moun tren » oben ou pa ka « fè kòlè fasil » vlé di kè ou pa rèd oben ou pa ka babyé èvè lézòt. Okontrè, ou janti, ou ka aji é ou ka palé on jan pou pa blésé-yo. Antankè nonm ki enmé lapé, ou ka pran douvan pou fè lapé èvè lézòt menmsi sa pa fasil (Jak 3:17, 18). Konm ou ka palé ba lézòt èvè jantiyès, sa ka édé-yo vin pi kalm, menm lèwvwè sé moun ki pa dakò ditou ditou èvè kwayans a-w (Jij 8:1-3 ; Pwov. 20:3 ; 25:15 ; Mat. 5:23, 24).

14. Ka sa vlé di « toufré vin disip » é « fidèl » ?

¹⁴ On frè ki ka ranpli sé kondisyon-la pou vin ansyen, pa « on nonm ki toufré vin disip ». Menmsi ou pa oblijé batizé dépi onlo lanné pou yo nonmé-w ansyen, ou bizwen tan pou ou pé sa vin on krétyen ki byen doubout adan lavérité. Avan yo nonmé-w antankè ansyen, ou dwètèt montré kè kon Jézi, ou sé on nonm ki ni imilité, é kè ou ka atann kè Jéova ba-w plis rèsponsabilité adan lasanblé-la, a moman-la i ké désidé la (Mat. 20:23 ; Filip. 2:5-8). Ou pé montré kè ou « fidèl » lè ou ka viv on mannyè ki ka fè Jéova plézi, é lè ou ka suiv dirèksyon-la i ka ban-nou la grasa òwganizasyon a-y (1 Tim. 4:15).

15. Ès on ansyen dwètèt on zouti-filé pou fè diskou ? Bay on ti èsplikasyon.

¹⁵ Lézékriti ka di on mannyè ki klè kè on rèsponsab dwètèt « kapab anségné ». Ès sa vlé di kè fò ou sé on zouti-filé pou fè diskou ? Awa. A pa tout sé ansyen-la ki sav fè bèl diskou, men yo sé dé zouti-filé lè yo ka préché é lè yo ka pran swen a sé frè é sè la (konparé sa ki maké an 1 Korentyen 12:28, 29 èvè Éfézyen 4:11). Antouka, pa jen arété fè éfò pou ou vin pli filé adan mannyè ou ka anségné. Kijan ou pé fè sa ?

16. Kijan ou pé vin on méyè anségnan ? (gadé imaj-la osi).

¹⁶ « On moun ki ka rété byen kolé asi pawòl-la ». Pou ansègnman a-w éfikas, bazé sa ou ka anségné é konsèy ou ka bay asi Pawòl a Bondyé. Pousa fò ou étidyé Labib é piblikasyon an nou byen menm (Pwov. 15:28 ; 16:23). Lè ou ka étidyé, gadé byen pou vwè kijan piblikasyon an nou ka èspliké sé vèwsé-la pou-w pé sa apliké-yo byen konm i fo. É lè ou ka anségné, fè tousa ou pé pou touché tchè a sé moun-la ki ka kouté-w la. Ou ké pé amélyoré jan ou ka anségné si ou ka mandé sé ansyen-la ki ni plis èkspéryans la konsèy, é si ou ka mèt sé konsèy-lasa an pratik (1 Tim. 5:17). On ansyen dwètèt ‘kapab ankourajé’ frè é sè a-y, men dépawfwa, fò i ba-yo konsèy oben délè ‘korijé-yo’. Kèlkèswa sitiyasyon-la, on ansyen dwèt toujou aji èvè bonté. Si ou ka aji èvè dousè, lanmou, é kè sa ou ka anségné bazé asi Pawòl a Bondyé, ou ké vin on bon anségnan menmjan ki Jézi (Mat. 11:28-30 ; 2 Tim. 2:24).

KONTINYÉ FÈ ÉFÒ

17. a) Ka ki pé édé on asistan kontinyé pwogrésé ? b) Ka sé ansyen-la dwètèt sonjé lè yo ka analizé sitiyasyon a on frè yo anvi nonmé ? (gadé ti karé-la « Montré-zòt rézonab lè zò ka analizé si on frè pé sèvi antankè ansyen »).

¹⁷ Apré nou wouvwè tout sé kondisyon-la on ansyen dwètèt ranpli la, pétèt on asistan ké pansé kè i pé ké jen rivé vin ansyen. Men sonjé kè Jéova é òwganizasyon a-y pa ka atann kè ou ranpli sé kondisyon-lasa on mannyè ki pawfè (1 Pyè 2:21). Anplisdisa fòs a Jéova ké édé-w adan sé éfò-la ou ka fè la (Filip. 2:13). Ès ou vwè fò ou pwogrésé adan on domenn èspésyal ? Priyé Jéova. Fè rèchèch asi sijé-lasa, é mandé on ansyen kijan ou pé pwogrésé.

18. Ka tout sé asistan-la dwètèt fè ?

¹⁸ Noutout, é séla ki ja ansyen la adan osi, dwètèt kontinyé manifèsté sé kalité-la nou vwè la adan awtik-lasa (Filip. 3:16). Ès ou ka sèvi antankè asistan ? Ében kontinyé pwogrésé ! Mandé Jéova fòwmé-w é aji asi-w, pou ou pé sa pli itil pou-y é pou lasanblé-la (Iz. 64:8). Nou ka mandé Jéova béni éfò ou ké fè pou ranpli sé kondisyon-la pou sèvi antankè ansyen !