An-nou montré nou ni rèkonésans pou sé nonm-la Jéova é Jézi ka itilizé la adan lasanblé-la

1. Ki kado Jézi fè-nou ?

PA NI ponmoun asi latè ki pi donan ki Jézi. Lè i té asi latè, i fè onlo mirak pou édé moun (Lik 9:12-17). Pli bèl kado i fè-nou, sé lèwvwè i bay vi a-y pou nou (Jan 15:13). É dépi i résisité, i ka kontinyé pòté mannèv pou i édé-nou. Jézi fè sa i pwomèt. I mandé Jéova ban-nou lèspri sen a-y pou anségné-nou é pou konsolé-nou (Jan 14:16, 17, nòt an fransé ; 16:13). Anplisdisa, i ka sèvi èvè réinyon an nou pou kontinyé ban-nou sa nou bizwen pou nou fè disip asi tout latè (Mat. 28:18-20).

2. Éfézyen 4:7, 8 ka palé dè ‘nonm Jézi ban-nou konm kado’. Kimoun ésa ?

² An-nou palé dè ondòt kado Jéova fè-nou. Lapòt Pòl maké kè apré Jézi ay an syèl-la, « i bay dé nonm konm kado » (li Éfézyen 4:7, 8). I èspliké kè Jézi ban-nou sé nonm-lasa pou édé lasanblé-la diféran mannyè (Éféz. 1:22, 23 ; 4:11-13). Jòdijou, pawmi sé nonm-lasa ki sé dé kado ou ka touvé sé asistan-la, sé ansyen-la, é sé rèsponsab a siwkonskripsyon laa. Nou ka tou konprann kè tout sé nonm-lasa enpawfè é yo ka fè érè (Jak 3:2). Men Jézi, Ségnè an nou, ka sèvi èvè sé nonm-lasa pou édé-nou.

3. Kijan nou pé soutyenn ‘sé nonm-la Jézi ban-nou konm kado’ ? Bay on ègzanp.

³ Jézi ba ‘sé nonm-la i ban-nou konm kado’ on travay ki enpòwtan toubònman. Fò yo konsolidé sé lasanblé-la (Éféz. 4:12). Men noutout pé édé-yo pou yo rivé fè sa yo ni a fè. An-nou pran on ègzanp : Sèwten frè é sè ka pòté mannèv pou konstwi sal di Wayòm. Men ni dòt frè é sè ki pa ka fè travay-lasa men ki ka soutyenn-yo. Kijansa ? Ében, yo ka prévwa a manjé ba yo, yo ka prévwa a dòt biten yo ké bizwen oben yo ka fè dòt biten itil pou édé-yo. Menmjan-la, ki sé adan sa nou ka di, ki sé adan sa nou ka fè, noutout pé édé sé asistan-la, sé ansyen-la, é sé rèsponsab a siwkonskripsyon la adan travay-la yo ni a fè la pou konsolidé lasanblé-la. Sé frè-lasa ka travay rèd é sé dé kado Jézi fè-nou. An-nou vwè ki byenfé sa yo ka fè la ka pwokiré-nou é an-nou vwè kijan nou pé montré, ki yo ki Jézi, jan nou enmé-yo.

SÉ ASISTAN-LA KA FÈ DÉ BITEN KI ITIL ADAN LASANBLÉ-LA

4. O 1^é syèk, ki travay sé asistan-la té ka fè ?

⁴ O 1^é syèk, yo té ka chwazi sèwten frè pou yo té vin asistan (1 Tim. 3:8). I ka sanmsa kè lèwvwè lapòt Pòl té ka palé dè sèwten moun ki té ka édé lézòt, sé dè sé asistan-la i té ka palé (1 Kor. 12:28). Travay-la yo té ka fè la té itil é sa té enpòwtan. Grasa sa, sé ansyen-la té pé konsantré-yo asi sa yo té ka fè pou anségné lasanblé-la é yo té pé pran swen a chakmoun adan lasanblé-la pibyen. Pa ègzanp, pétèt kè lèwvwè moun té ka kopyé Lézékriti, sé asistan-la té ka bay on pal adan travay-lasa oben yo té ka prévwa a tousa sé moun-la ki té ka fè travay-lasa té’é bizwen pou fè-y.

5. Jòdijou, ki biten ki itil sé asistan-la ka fè adan lasanblé-la ?

⁵ An-nou vwè sèwten biten kè sé asistan-la ka fè jòdijou ki itil (1 Pyè 4:10). Souvantfwa, yo ka konté lajan a sé ofrann-la, yo ka okipé-yo dè sé téritwa-la, é yo ka komandé sé piblikasyon-la pou ba sé pwoklamatè-la. Yo ka okipé-yo dè sono-la é dè sé vidéo-la pannan sé réinyon-la. Yo la pou akéyi lézòt adan sé réinyon-la é lèwvwè ni travo adan sal di Wayòm la, yo ka bay on pal osi. Tout sé biten-lasa nésésè é yo ka pèwmèt kè tout biten pasé byen adan lasanblé-la (1 Kor. 14:40). Anplisdisa, sèwten adan yo ka fè diskou adan réinyon Vi é Ministè, yo ka fè diskou adan réinyon a wikenn-la, é on rèsponsab a gwoup a prédikasyon pé mandé on asistan okipé dè gwoup a prédikasyon la èvè-y osi. É délè, on ansyen pé mandé on asistan vin èvè-y pou ankourajé on moun an lasanblé-la.

6. Asistan an nou sé dé moun ki ka travay rèd. Poukwa nou ka aprésyé sa yo ka fè ?

⁶ Ki byenfé travay-la sé asistan-la ka fè la ka menné ba lasanblé-la ? Mi sa Beberlyb, on sè ki ka rété an Bolivi ka di : « Grasa asistan an nou, an pé pwofité dè ti réinyon an mwen. An pé chanté, an pé bay on ti komantè, an pé kouté sé diskou-la, an pé gadé sé vidéo-la é sé imaj-la pou sa anségné-mwen. Sé asistan-la ka fè ansòt pou nou ansékirité, é grasa yo, sèwten frè é sè pé pran réinyon a yo pa vidéokonférans. Apré chak réinyon, yo ka òwganizé nétwayaj a sal-la é yo ka pawtisipé adan, yo ka konté lajan a sé ofrann-la, é yo ka fè ansòt pou nou ni piblikasyon nou bizwen. A pa ti rèkonésans an ni pou sé asistan-la é pou sa yo ka fè pou nou ! » Lesli, sé on sè mari a-y ansyen é yo ka viv an Kolonbi. Mi sa i ka di : « Mari an mwen ni sèwten rèsponsabilité adan lasanblé-la, é pou i rivé fè tousa i ni a fè, i bizwen sé asistan-la édé-y. Si yo pa té la, a pa ti biten i té’é ni a fè ! An kontan vwè jan sé asistan-la ni balan é jan yo toujou paré pou édé lézòt. » É vou, lè ou ka vwè tout travay-la sé asistan-la ka fè la, sèten ou dwèt ni onlo rèkonésans pou yo (1 Tim. 3:13).

7. Kijan nou pé montré sé asistan-la kè nou ni rèkonésans pou yo ? (gadé imaj-la osi).

⁷ Lè nou ni rèkonésans an tchè an nou sa bèl, men mi konsèy-la Labib ka ban-nou : « Montré kè zò ni rèkonésans » (Kol. 3:15). On ansyen ki ka rété an Fenland, non a-y sé Kristofer, ka èspliké kijan i ka montré rèkonésans a-y. Mi i sa i ka di : « An ka maké on kat oben on ti mésaj ba sé asistan-la, èvè an ka mèt on ti vèwsé adan é an ka di-yo ègzaktèman ka yo di oben ka yo fè ki ankourajé-mwen. Oben an ka di-yo poukwa an ka aprésyé travay-la yo ka fè la. » Pascal é Jael, ki ka rété an Nouvèl-Kalédoni, ka priyé souvan pou sé asistan-la. Mi sa Pascal ka di : « Alè, nou ka di Jéova mèsi pou sé asistan-la ki adan lasanblé an nou, nou ka mandé pou i la èvè yo é pou i édé-yo. » Jéova ka tann lè nou ka fè dé priyè konsa, é lèwvwè nou ka fè sa, sé tout lasanblé-la ki ka trapé bénédisyon (2 Kor. 1:11).

SÉ ANSYEN-LA KA « TRAVAY RÈD OWA ZÒT »

8. Poukwa Pòl maké kè sé ansyen-la ‘té ka travay rèd’ o 1^é syèk ? (1 Tésalonisyen 5:12, 13).

⁸ O 1^é syèk, sé ansyen-la té ka travay rèd adan lasanblé-la (li 1 Tésalonisyen 5:12, 13 ; 1 Tim. 5:17). Yo té ka ‘gidé’ lasanblé-la. Sa vé di kè yo té ka dirijé sé réinyon-la é yo té ka pran désizyon anrapò èvè lasanblé-la. Yo té ka avèti frè é sè a yo. Sa vé di kè yo té ka ba-yo konsèy èvè onlo lanmou pou konsolidé fwa a yo (1 Tés. 2:11, 12 ; 2 Tim. 4:2). Nou ka tou konprann kè yo té ka travay rèd osi pou pran swen a fanmi a yo é pou yomenm a yo té toujou byen chouké adan lavérité (1 Tim. 3:2, 4 ; Tit 1:6-9).

9. Sé ansyen-la ka fè onlo biten pou lasanblé-la. Bay déotwa adan yo ?

⁹ Sé ansyen-la ni onlo biten a fè. Yo toujou ka préché bon nouvèl-la (2 Tim. 4:5). Yo ka òwganizé travay a prédikasyon-la adan téritwa a lasanblé a yo. Yo ka ban-nou lègzanp lèwvwè yo ka préché èvè onlo balan é yo ka édé-nou pou nou vin pli filé adan prédikasyon-la é pou nou anségné plibyen. Anplisdisa, lè yo ka jijé on afè adan lasanblé-la, yo ka aji èvè mizérikòd é yo pa’a fè préférans. Lèwvwè on frè oben on sè ka fè on péché ki grav, yo ka édé-y ni on bèl lanmityé èvè Jéova kon avan é anmenmditan yo ka fè ansòt pou lasanblé-la rété pwòp (1 Kor. 5:12, 13 ; Gal. 6:1). Men pi gwo rèsponsabilité-la yo ni la, sé kè yo sé dé bèwjé (1 Pyè 5:1-3). Yo ka fè diskou ki bazé asi Labib é pou sa, yo ka préparé-yo byen. Yo ka fè onlo éfò pou yo aprann konnèt tout sé frè é sè a lasanblé-la é yo k’ay vwè sé frè é sè-la akaz a yo pou yo ankourajé-yo. Anplisdisa, ni sèwten ansyen ki ka pawtisipé adan konstriksyon a sal di Wayòm oben ki ka réparé-yo. Ni sa ki ka òwganizé sé lasanblé réjyonal la é ni dòt ankò ki ka fè pawti a komité pou fè lyannaj èvè sé lopital-la oben ki adan gwoup ki k’ay vwè sé malad-la. Sé ansyen-la ka travay rèd toubònman pou nou !

10. Pou ki rézon nou pé ni rèkonésans pou ansyen a lasanblé an nou ?

¹⁰ Jéova té ja anonsé kè té’é ni bèwjé ki té’é pran swen an nou kifè, nou ‘pa té’é pè ankò é ayen pa té’é fè-nou trapé lafrous’ (Jér. 23:4). É sé sa Johanna, on sè ki ka rété an Fenland ni lokazyon viv. Manman-y touvé-y malad bon malad la é mi sa i ka rakonté : « An ni dimal a di lézòt sa an ka rèsanti, men on ansyen kouté-mwen èvè onlo pasyans lèwvwè an té paré pou mwen té di sa ki té ka trakasé-mwen. Poutan a pa té on moun an té abityé èvè-y. I priyé èvè mwen é i fè-mwen sonjé kè Jéova enmé-mwen onlo. An pa’a sonjé tousa i di-mwen, men sa an ka sonjé sé kè an santi-mwen ansékirité a moman-lasa. An sèten kè sé Jéova ki voyé-y koté an mwen a moman-la ki fo la. » Kijan ansyen a lasanblé a-w ja ni lokazyon édé-w ?

11. Kijan nou pé montré sé ansyen-la kè nou ni rèkonésans pou yo ? (gadé imaj-la osi).

¹¹ Jéova vlé kè nou montré sé ansyen-la rèkonésans an nou « parapòt a travay-la yo ka fè la » (1 Tés. 5:12, 13). Mi sa Henrietta, ki ka rété an Fenland, ka di : « Sé ansyen-la ka édé-nou é yo ka fè sa èvè plézi. Sa vé pa di kè yo ni plis tan oben plis fòs ki sélézòt frè é sè la oben kè yo pa ni pwoblèm. Délè, an k’ay vwè on ansyen é an ka di-y : “Ou sav on biten ? Ou sé on bon ansyen toubònman ! An ka èspéré ou sav sa !” » Kant a Sera, on sè Tiwki, mi sa i ka di : « Sé ansyen-la bizwen yo ba-yo fòs-la pou yo kontinyé fè travay-la yo ka fè la. Nou pé maké on lèt ba yo, nou pé envité-yo manjé akaz an nou oben nou pé préché èvè yo. » Pétèt kè ni on ansyen ki ka travay rèd adan lasanblé-la é lè ou ka sonjé-y ou ni onlo rèkonésans pou-y ? Alò mandé-w kijan ou pé montré-y jan ou ni rèkonésans pou-y (1 Kor. 16:18).

SÉ RÈSPONSAB A SIWKONSKRIPSYON LA KA BA SÉ LASANBLÉ-LA BON FÒS

12. O 1^é syèk, ki dòt moun Jézi chwazi pou ba sé lasanblé-la fòs ? (1 Tésalonisyen 2:7, 8).

¹² Jézikris ban-nou dé nonm konm kado pou édé lasanblé-la ondòt jan ankò. I sèvi èvè sé ansyen a Jérizalèm la pou voyé Pòl, Bawnabé é dòt frè ankò fè travay-la on rèsponsab a siwkonskripsyon ka fè jòdijou (Akt 11:22). Poukwa Jézi fè sa ? Sé pou sé frè-lasa té ba sé lasanblé-la bon fòs kon sé ansyen-la é sé asistan-la (Akt 15:40, 41). Sé frè-lasa fè onlo sakrifis pou yo té fè travay-lasa. Délè, yo jous manké pèd vi a yo pou ay anségné é pou ankourajé lézòt (li 1 Tésalonisyen 2:7, 8).

13. Sé rèsponsab a siwkonskripsyon la ka fè onlo biten. Bay déotwa adan yo ?

¹³ Sé rèsponsab a siwkonskripsyon la ka vwayajé onlo. Sèwten adan yo ka fè plizyè santenn kilomèt pou yo rivé adan sé lasanblé-la. Chak simenn, on rèsponsab a siwkonskripsyon ka fè plizyè diskou, i k’ay aka sé frè é sè la pou ankourajé-yo, i ka fè on réinyon èvè sé pyonyé-la é ondòt réinyon èvè sé ansyen-la, é i ka fè sé sòwti a prédikasyon la. I ka préparé sé diskou-la i kay fè la, é i ka òwganizé sé lasanblé a siwkonskripsyon-la é sé lasanblé réjyonal la. Anplisdisa, sé-y ki ka fòwmé sé frè é sè la pannan lékòl a sé pyonyé-la, i ka òwganizé on réinyon èspésyal èvè sé pyonyé a siwkonskripsyon la é lè Bétèl-la ni on biten a fè onfwa-onfwa, yo pé mandé-y okipé dè sa.

14. Poukwa nou ni rèkonésans pou rèsponsab a siwkonskripsyon an nou ?

¹⁴ Sé rèsponsab a siwkonskripsyon la ka fè on bèl travay adan sé lasanblé-la. Ki byenfé sa ka pwokiré sé frè é sè la ? Mi sa on frè ki ka rété an Tiwki ka di anrapò èvè sa : « Chakfwa yo ka vin vwè-nou adan lasanblé-la, sa ka ban-mwen anvi pasé plis tan èvè frè é sè an mwen pou édé-yo. An ja ni lokazyon jwenn onlo rèsponsab a siwkonskripsyon é an rann-mwen kont kè yo sé moun a toutmoun é ou pé palé alèz a-w èvè yo. Menmsi yo ni onlo biten a fè, yo toujou paré pou kouté-w. » An-nou wouvin asi ègzanp a Johanna, sè-la nou palé dè-y talè la. On jou, i préché èvè on rèsponsab a siwkonskripsyon, lèwgadé yo pa touvé ponmoun adan téritwa-la. Men mi sa i ka di : « An pé’é jen oubliyé jou-lasa. An té tris toubònman, pas 2 sè an mwen té pati pou ay rété ondòt koté é yo té ka manké-mwen onlo toubònman. Men frè-la ankourajé-mwen onlo. I édé-mwen konprann kè délè, lèwvwè nou ka sèvi Jéova, nou pé touvé-nou ka rété lwen a fanmi an nou é a zanmi an nou. Men adan paradi-la, nou ké ni enpé lokazyon pou nou vwè-nou é pasé dé bèl ti moman ansanm. » Ni onlo frè é sè ki touvé-yo enmé rèsponsab a siwkonskripsyon a yo kon Johanna (Akt 20:37 – 21:1).

15. a) Dapré sa 3 Jan 5-8 ka di, kijan nou pé montré rèsponsab a siwkonskripsyon la kè nou ka aprésyé-y ? (gadé imaj-la osi). b) Poukwa fò nou montré madanm a rèsponsab a siwkonskripsyon la kè nou ka aprésyé-y, é kijan nou pé fè sa ? (gadé karé-la « Fò pa nou oubliyé madanm a yo »).

¹⁵ Lapòt Jan ankourajé Gayis akéyi sé frè-la ki ka vin vwè-yo é i di-yo ‘lè yo ka lésé-yo pati, fè sa on mannyè ki ka fè Bondyé plézi’ (li 3 Jan 5-8). Nou osi nou pé soutyenn sé rèsponsab a siwkonskripsyon la lèwvwè nou ka envité-yo pou yo manjé akaz an nou oben lè nou ka soutyenn sé sòwti a prédikasyon la lèwvwè i ka vizité lasanblé an nou. Leslie, on sè nou palé dè-y talè la, ka montré rèkonésans a-y pou sé frè-la ondòt jan ankò. Mi sa i ka di : « An ka mandé Jéova pou i ba-yo sa yo bizwen. Mwen é mari an mwen, nou ka maké dé lèt ba yo pou di-yo kijan vizit a yo fè-nou dibyen. » Men sé rèsponsab a siwkonskripsyon la, sé dé moun kon toutmoun, fò nou sonjé sa. Sa ka rivé kè yo tonbé malad, kè yo santi-yo angwasé, oben kè dé bra a yo kasé. É ou pa jen konnèt ! Pétèt ou ké di rèsponsab a siwkonskripsyon la on ti pawòl janti oben ou ké fè-y on ti kado, é sé ègzaktèman sa i té ka mandé adan priyè a-y ! (Pwov. 12:25).

NOU BIZWEN ‘SÉ NONM-LA BONDYÉ FÈ-NOU KADO LA’

16. Ki kèsyon pou sé frè-la pozé-yo ? (Pwovèb 3:27).

¹⁶ Toupatou asi latè, nou bizwen plis frè ki anvi sèvi frè é sè a yo adan lasanblé-la. Si ou sé on frè, mi sa pou-w mandé-w : « Ès ni mwayen an édé lézòt ? » (li Pwovèb 3:27). Ès ou paré a travay pou-w vin asistan ? Si ou ja asistan, ès ou paré a travay plis ankò pou-w vin ansyen pou sèvi frè é sè a-wc ? Ès ou dakò pou fè sèwten chanjman adan vi a-w pou-w fè Lékòl pou évanjélizatè a Wayòm la ? Lékòl-lasa ké ba-w on bèl fòwmasyon. Konsa, kèlkèswa la Jézi bizwen-w, ou ké itil. Si ou ka santi kè ou pa kapab fè sé biten-lasa, palé Jéova dè sa adan priyè a-w. Mandé-y lèspri sen pou-w pé sa fè tousa yo ka ba-w fè la byen konm i fo (Lik 11:13 ; Akt 20:28).

17. Léfètkè ‘Jézikri, Wa an nou, ban-nou dé nonm konm kado’, ka sa ka montré ?

¹⁷ Léfètkè ‘Jézi ban-nou dé nonm konm kado’, sa ka byen montré kè i ka gidé-nou pannan sé dènyé jou-la (Mat. 28:20). Davwa Wa an nou ban-nou dé nonm konm kado ki ka pran swen an nou, a pa ti rèkonésans nou ni pou-y. Alò, an-nou chèché tout ti lokazyon nou ni pou nou montré sé nonm-lasa ki ka travay rèd jan nou ni rèkonésans pou tout travay-la yo ka fè la. É an-nou pa jen oubliyé di Jéova mèsi pas i sé Sila ki ka ban-nou « tout bèl don » é « tout kado pawfè » (Jak 1:17).