Liv a Jòb pé édé-w pou ba on moun on konsèy

1-2. Zanmi a Jòb é Éliyou vin pou konsolé Jòb. Men poukwa sa pa té fasil ?

LÈ JÒB pèd tousa i té ni, adan on ti moman, onlo moun tann palé dè sa. Lè Élifaz, Bildad, é Zofa tann sa ki rivé Jòb, yo òwganizé-yo pou yo ay Ouz pou ba zanmi a yo on fòs. Men lè yo vwè an 2 zyé a yo sa ki rivé Jòb, yo rété èstèbèkwè.

² An-nou imajiné sa ki rivé Jòb. Jòb pèd près tousa i té ni. I té ni onpakèt zannimo : mouton, bèf, chamo, boukèt. Ni sa vòlè pati èvè yo é ni sa ki mò. Yo tchouyé lamajorité a sé moun-la ki té ka travay ba-y. Tout timoun a-y mò pas kaz-la yo té adan-y la enn tonbé asi yo. Aprésa, konsi i poto’o ni asé asi kont a-y, limenm a-y touvé-y malad. I té ni bobo asi tout kò a-y é sa té ka fè-y mal toubònman. Lè Élifaz, Bildad, é Zofa rivé owa Jòb, i té sizé an sann-la é moral a-y té a zéwo. Kijan yo réyaji lè yo vwè-y ? Yo rété sizé owa Jòb pannan 7 jou, é yo pa di pon mo magré yo té ka vwè-y ka soufè (Jòb 2:12, 13). Aprésa, on jennboug non a-y sé Éliyou rivé é i sizé toupré la yo té yé la. Rivé onlè, Jòb koumansé palé. I di kè i té préféré mò é i té préféré yo pa té mété-y si tè (Jòb 3:1-3, 11). Ou ka santi Jòb té bizwen zanmi a-y ankourajé-y. Yo té’é pé fè sa é montré Jòb kè yo sé dé vré zanmi é kè yo ka pran penn a-y vréman. Men an-nou vwè si sé konsa yo aji.

3. Ka nou ké vwè adan awtik-lasa ?

³ Jéova fè Moyiz maké sa zanmi a Jòb é Éliyou di é sa yo fè osi. Pétèt ou ka sonjé kè sa Éliyou té di Jòb té ka vin dè Jéova men kè sa Élifaz di Jòb té ka vin dè on démon (Jòb 4:12-16 ; 33:24, 25). Sé pousa adan liv a Jòb, ou ka touvé onlo bon konsèy yo ba Jòb é onlo mové konsèy yo ba-y osi. Adan awtik-lasa nou ké vwè kijan liv a Jòb pé édé-nou lè nou bizwen ba on zanmi on konsèy. Men pou koumansé, an-nou vwè ègzanp a 3 zanmi a Jòb é ka pou nou fè pou nou pa aji kon yo. Aprésa nou ké vwè ègzanp a Éliyou é kijan nou pé imité-y. Nou ké vwè osi ka istwa a Jòb té pé aprann sé Israélit-la é ka i ka aprann-nou jòdijou.

JAN SÉ 3 ZANMI A JÒB LA BA JÒB KONSÈY

4. Poukwa 3 zanmi a Jòb pa réyisi konsolé-y ? (gadé imaj-la osi).

⁴ Labib ka di kè lè 3 zanmi a Jòb tann palé dè tousa ki té rivé-y, yo vin owa a-y pou yo té ba-y fòs (Jòb 2:11). Men yo pa ba Jòb pon ankourajman. Poukisa ? Prèmyèwman, sé pas yo pa pran tan kouté Jòb é yo pa menm éséyé konprann sa i té ka viv. Olyé dè sa, yo enki mèt an tèt a yo kè sé Jéova ki té ka pini Jòb pas i té fè on mové bitena (Jòb 4:7 ; 11:14). Dézyèmman, lamajorité a sé konsèy-la yo ba Jòb la pa té itil, é yo pa té janti. Yo di-y osi dé biten ki fè-y mal. Sa sé 3 boug-la té ka di té ka sanm sa sa té vré, men anréyalité pa té ni pon sajès adan sa (Jòb 13:12). Bildad di Jòb kè i té ka palé twòp é i fè sa 2 fwa (Jòb 8:2 ; 18:2). Onlè Zofa di Jòb on biten ki té rèd toubònman. I di-y kè i kon tèbè ki pa konnèt ayen (Jòb 11:12). Twazyèmman, menmsi yo pa hélé asi Jòb, sa yo di Jòb é jan-la yo palé ba-y la té ka montré kè yo pa té ka rèspèkté-y é kè yo pa té enmé-y vréman (Jòb 15:7-11). Anfinaldikont, olyé yo té éséyé ba-y fòs é kè yo té konsolé-y, yo té ka éséyé fè-y konprann kè i té fè on péché.

5. Lè Élifaz, Bildad é Zofa korijé Jòb kijan sa aji asi-y ?

⁵ Lè Élifaz, Bildad é Zofa fin palé, Jòb té ka santi-y pi dékourajé ankò (Jòb 19:2). Pi yo té ka di i té fè on mové biten, pi i té ka chèché a défann-li. Sa fè-y di nenpòt ki biten (Jòb 6:3, 26). Sa sé boug-la té ka di pa té annakò èvè sa Jéova ka pansé é yo pa aji èvè konpasyon èvè Jòb. Kifè, Satan sèvi èvè yo pou dékourajé Jòb (Jòb 2:4, 6). Kijan istwa-lasa té pé édé sé Israélit-la, é kijan sa pé édé-nou jòdijou ?

6. Kijan istwa a Jòb té pé édé sé nonm-la ki té ka jijé pèp-la ?

⁶ Ka ègzanp a sé 3 zanmi a Jòb la té pé aprann sé Israélit-la ? Lè Jéova ba sé Israélit-la lwa a-y, i chwazi dé nonm ki plen sajès é ki fyab pou vin ansyen. Yo té ka jijé pèp-la é yo té ka édé-y suiv sé lwa-la (Dét. 1:15-18 ; 27:1). Avan yo té ba on moun konsèy oben avan yo té jijé-y, fò sé nonm-lasa té kouté moun-la byen (2 Kron. 19:6). Olyé yo mèt an tèt a yo kè yo konnèt tousa ki pasé, fò yo té pozé moun-la déotwa kèsyon (Dét. 19:18). Fò pa yo té palé rèd ba on moun ki té ka vin mandé-yo on konsèy. Poukwa fò pa yo té fè sa ? Sé pou sa pa té frenné moun-lasa si i té anvi wouvè tchè a-y ba yo (Ègz. 22:22-24). Sé nonm-la ki té ka jijé pèp-la té pé aprann sé biten-lasa adan istwa a Jòb.

7. Ki dòt moun an Israël ki té pé ba lézòt on konsèy é kijan istwa a Jòb té pé édé-yo ? (Pwovèb 27:9).

⁷ Nou ka tou konprann kè a pa enki sé nonm-la ki té ka jijé pèp-la ki té pé ba on moun on konsèy. Dépi on moun an Israèl té ka vwè on moun ka fè chimen kochi, i té pé ba-y on konsèy (Sòm 141:5). É sé sa on vré zanmi ka fè (li Pwovèb 27:9). Si sé Israélit-la té réfléchi asi jan Élifaz, Bildad é Zofa té palé ba Jòb, sa té’é montré-yo ka pou yo pa di é ka pou yo pa fè lè yo bizwen ba on moun on konsèy.

8. Lè nou ka ba on moun on konsèy, ni 3 biten pou nou sonjé. Kilès ? (gadé sé imaj-la osi).

⁸ Ka ègzanp a sé 3 zanmi a Jòb la ka aprann-nou ? Lè frè é sè an nou ka jwenn éprèv, nou toujou anvi édé-yo. Men si nou ka palé oben nou ka aji kon sé zanmi a Jòb la, nou pé’é ni konsolé ni soutyenn frè é sè an nou. Kifè, prèmyèwman, fò nou sèten nou ni tout sé enfòwmasyon-la avan nou ba on moun on konsèy. Dézyèmman, fò nou bazé konsèy an nou asi Pawòl a Bondyé olyé nou bazé-nou asi pwòp lidé an nou kon Élifaz té ka fè (Jòb 4:8 ; 5:3, 27). Twazyèmman, fò pa nou jen palé rèd ba on moun. Ni dé biten Élifaz é zanmi a-y di ki té vré. Lapòt Pòl jous répété on biten yo di (konparé Jòb 5:13 èvè 1 Korentyen 3:19). Men près tousa yo di asi Jéova pa té vré é yo fè Jòb lapenn. Sé pousa Jéova di kè yo pa di lavérité (Jòb 42:7, 8). Lè nou ka ba on moun on konsèy, fò pa nou jen ba-y lenprésyon kè Jéova sé on Bondyé ki rèd é kè nou pé’é jen pé fè-y plézi. Alè an-nou vwè ka ègzanp a Éliyou ka aprann-nou ?

JAN ÉLIYOU BA JÒB KONSÈY

9. Apré zanmi a Jòb arété palé, poukwa i té bizwen yo ankourajé-y, é kimoun Jéova itilizé pou fè sa ?

⁹ Jòb é sé 3 zanmi a-y la rété onlo tan ka palé. Yonn té ka réponn lòt chou pou chou. Tèlman yo palé, sa yo di ka plen 28 chapit a Labib. Près tousa yo di ka montré kè yo té kòlè. Nou ka konprann poukwa Jòb té dékourajé konsa ! Dépi tan-la, yo po’o té jen ankourajé Jòb é yo po’o té jen korijé-y. Ka Jéova fè pou édé Jòb ? I sèvi èvè Éliyou pou ba-y déotwa konsèy. Poukwa Éliyou atann tousa tan avan i té palé ? Mi sa i di : « An jenn, é zòt zò ja ni on bèl laj. Sé pousa, konm an ni rèspé ba zòt, an pé bouch an mwen » (Jòb 32:6, 7). Éliyou té sav kè lè on moun ni on bèl laj, i ni plis sajès ki sé jenn-la pas i pli gran ki yo é kè i ja vwè onlo biten adan vi a-y. Éliyou pran tan kouté Jòb é sé zanmi a-y la, men aprésa i pa té pé kenbé ankò. Mi sa i di : « A pa laj-la tousèl ki ka fè si on moun ni sajès, é a pa enki sé nonm-la ki ja ni on bèl laj ki ka rivé konprann sa ki dwèt » (Jòb 32:9). Ka Éliyou di apré, é poukwa i di sa ?

10. Ka Éliyou fè avan i ba Jòb konsèy ? (Jòb 33:6, 7).

¹⁰ Avan Éliyou ba Jòb konsèy, i fè ansòt pou i té ni on bon anbyans pou Jòb kouté sa i té ni a di. Kijan Éliyou fè sa ? Konm sa Éliyou té tann té énèwvé-y, i kalmé-y avan i palé ba Jòb (Jòb 32:2-5). Konsa i pa di Jòb pon mové pawòl é i pa palé rèd ba-y. Okontrè Éliyou palé ba Jòb èvè imilité é i palé ba-y kon’on vré zanmi. Pa ègzanp, i di Jòb : « Gay sa ! An menm biten ki-w douvan vré Bondyé-la » (li Jòb 33:6, 7). Aprésa Éliyou montré Jòb kè i té kouté byen sa i té di. Avan i ba Jòb konsèy, i répété déotwa biten enpòwtan Jòb té di (Jòb 32:11 ; 33:8-11). É Éliyou kontinyé fè sa toupannan i té ka palé ba Jòb (Jòb 34:5, 6, 9 ; 35:1-4).

11. Lè Éliyou ba Jòb konsèy, kijan i fè sa ? (Jòb 33:1).

¹¹ Lè Éliyou palé ba Jòb pou korijé-y, i pa fè-y santi kè i pa ni pon valè. Olyé i fè sa, i montré kè i té ka rèspèkté-y. Pa ègzanp, Éliyou kriyé Jòb pa non a-y, alòskè i ka sanm sa ponyonn adan sé zanmi a-y la pa fè sa (li Jòb 33:1). Éliyou sonjé kè lèwvwè Jòb é sé zanmi a-y la té ka palé, a pa ti anvi i té anvi palé, men i pé bouch a-y. Alò lè i ba Jòb konsèy i di Jòb kè si i ni on biten a di i pé palé (Jòb 32:4 ; 33:32). Éliyou montré Jòb kè sèwten biten i té di pa té bon. I fè-y sonjé kè Jéova sé on Bondyé ki saj, ki puisan, ki jis é kè i ni on lanmou ki fidèl é i fè sa èvè onlo jantiyès (Jòb 36:18, 21-26 ; 37:23, 24). Sèten sé konsèy-la Éliyou ba Jòb la préparé-y pou i kouté sé konsèy-la Jéova té kay ba-y la (Jòb 38:1-3). Kijan ègzanp a Éliyou édé moun ki viv an tan a Labib, é kijan yo pé édé-nou jòdijou ?

12. Kijan Jéova sèvi èvè sé pwofèt-la pou édé pèp a-y, é kijan bèl ègzanp a Éliyou té pé édé sé Israélit-la ?

¹² Ka ègzanp a Éliyou té pé aprann sé Israélit-la ? An tan lontan Jéova té ka sèvi èvè pwofèt pou anségné sé Israélit-la é pou korijé-yo. Pa ègzanp pannan péryòd a sé jij-la, Jéova sèvi èvè on madanm ki té pwofèt non a-y sé té Débora, pou gidé pèp-la. Jéova sèvi osi èvè Samiyèl pou ba pèp-la on dirèksyon, é i fè sa magré i té jenn toujou (Jij 4:4-7 ; 5:7 ; 1 Sam. 3:19, 20). Aprésa, an tan a sé wa-la, Jéova voyé sé pwofèt-la yonn dèyè lòt pou édé sé Israélit-la pou yo kontinyé adoré-y kon i ka mandé. É lè pèp-la té ka dézobéyi, i té ka voyé pwofèt pou korijé-y (2 Sam. 12:1-4 ; Akt 3:24). Bèl ègzanp a Éliyou kè nou ka touvé adan liv a Jòb té pé édé on Israélit. Konsa, lè fò i té ba on moun on konsèy i té’é sav ka pou i di moun-la é kijan pou i fè sa.

13. Kijan nou pé ankourajé frè é sè an nou ?

¹³ Ka ègzanp a Éliyou ka aprann-nou ? Kon sé pwofèt-la, nou osi nou ka sèvi èvè Bib-la pou fè moun konnèt Bondyé. É kon sé pwofèt-la, nou ka sèvi èvè dé pawòl ki ka ankourajé frè é sè an nou é ki ka konsolé-yo (1 Kor. 14:3). Fò sé ansyen-la fè atansyon pou yo « palé on jan pou pé sa konsolé » frè é sè a yo menm lèwvwè sé frè é sè lasa chouboulé oben kè yo ka « palé san réfléchi » (1 Tés. 5:14 ; Jòb 6:3).

14-15. Kijan sé ansyen-la pé imité Éliyou lè fò yo ba on moun on konsèy ?

¹⁴ Imajiné on ansyen ka vin sav kè on sè adan lasanblé-la dékourajé. Alò frè-la k’ay aka sè-la èvè ondòt ansyen pou ankourajé-y. Sè-la ka di-yo kè menmsi i ka kontinyé préché é ay réinyon, tchè a-y pa kontan kon avan. Ka sé ansyen-la ké fè ?

¹⁵ Prèmyé biten sé frè-la ké fè, sé éséyé konprann pou ki rézon sè-la ka santi-y konsa. Pou yo rivé fè sa, fò yo ké pozé sè-la déotwa kèsyon é fò yo ké kouté-y byen. Ès i konsa pas i ka pansé kè i pa mérité lanmou a Jéova ? Ès sé « traka a lavi » ki ka pran tèt a-y ? (Lik 21:34). Aprésa, sé ansyen-la ké chèché a félisité sè-la pou bon biten i ka fè. Pa ègzanp yo ké félisité-y pas i ka préché é i ka vin réinyon magré sa pa fasil ba-y. Lèwvwè sé ansyen-la ké byen konprann sitiyasyon a sè-la é poukwa i ka santi-y konsa, a moman-lasa yo ké pé sèvi èvè Bib-la pou montré sè-la jan Jéova enmé-y (Gal. 2:20).

KONTINYÉ GADÉ KIJAN LIV A JÒB PÉ ÉDÉ-W

16. Ka nou pé fè pou liv a Jòb kontinyé édé-nou ?

¹⁶ Liv a Jòb pé aprann-nou onlo biten ankò. Adan awtik a simenn pasé, nou vwè kè liv a Jòb ka montré pou ki rézon Bondyé pa ka anpéché-nou soufè, é kijan nou pé andiré magré nou ka soufè. Adan awtik a simenn-lasa, nou vwè kijan nou pé imité Éliyou lè nou ka ba on moun on konsèy olyé nou imité Élifaz, Bildad é Zofa. Lèwvwè ou ké ni a ba on moun on konsèy pétèt ou té’é pé viré gadé sa liv a Jòb aprann-vou. É si ja ni lontan ou pa li liv a Jòb, ou té’é pé wouli-y ankò. Ka ou di ? Ou ké rann-vou kont kè ou ké aprann onlo biten ankò.