AWTIK POU ÉTIDYÉ 30
KANTIK 97 La Parole de Dieu, essentielle à ta vie
Sé vérité-la ki fondal la pé kontinyé aprann-nou onlo biten
« An toujou paré pou fè-zòt sonjé sé biten-lasa, menmsi sé biten zò ja konnèt, é menmsi zò ja byen sizé adan vérité-la » (2 PYÈ 1:12).
ON TI LIDÉ ASI SA NOU KAY VWÈ
Lè nou koumansé étidyé Labib, nou dékouvè sèwten vérité ki fondal. Nou ké vwè kè sé vérité-lasa pé kontinyé aprann-nou onlo biten.
1. Lè nou koumansé aprann sé vérité-la ki an Bib-la, kijan sa aji asi vi an nou ?
SA NOU aprann lè nou koumansé étidyé Labib chanjé vi an nou. Pa ègzanp, lè nou vin sav kè non a Bondyé sé Jéova nou koumansé vin zanmi èvè-y (Iz. 42:8). Lè nou aprann sa ki ka pasé lè on moun ka mò, nou arété mandé-nou si bonmoun an nou ki ja mò ka soufè (Ékl. 9:10). É lè nou vin dékouvè kè Bondyé ka pwomèt kè latè ké vin on paradi, nou pa té enkyèt pou dèmen ankò. Nou konprann kè a pa enki 70 oben 80 lanné tousèl nou pé viv, men nou pé viv pou touttan (Sòm 37:29 ; 90:10).
2. Menmsi sèwten krétyen ja mati, poukwa fò yo kontinyé kabéché asi sé vérité-la ki fondal la ? (2 Pyè 1:12, 13).
2 Fò pa nou jen oubliyé jan sé vérité-la ki fondal la ni valè. Lapòt Pyè maké dézyèm lèt a-y ba dé krétyen ki té « ja byen sizé adan vérité-la » (li 2 Pyè 1:12, 13). Men a moman-lasa té ni dé moun ki té méchan adan lasanblé-la é ki té vlé fè sé frè é sè la lagé lavérité (2 Pyè 2:1-3). Pyè té vlé ba sé frè é sè la fòs pou yo kenbé solid menmsi sé moun-lasa té ka simé manti adan lasanblé-la. Pou sé frè é sè la té rivé fè sa, Pyè fè-yo sonjé déotwa vérité fondal kè yo té ja konnèt. É sé vérité-lasa édé-yo rété fidèl a Jéova.
3. Poukwa fò noutout médité asi sé vérité-la ki fondal la ? Bay on ègzanp.
3 Menmsi sa ja ka fè on bon moman nou konnèt lavérité, sé vérité-la ki fondal la pé aprann-nou onlo dòt biten ankò. An-nou pran on ègzanp. Imajiné kè 2 moun ka sèvi èvè sé menm engrédyan-la pou yo fè manjé. Prèmyé-la, sé on moun ki sav fè manjé byen é lòt-la sé on moun ki toufré aprann fè manjé. Sèten kè li moun-la ki sav fè manjé byen ké pé fè diféran kalté manjé èvè sé engrédyan-lasa, é chakfwa, sé ké tété dwèt. Menmjan-la, pétèt kè on moun ki ka sèvi Jéova dépi onpakèt lanné ké pé apliké on vèwsé adan diféran domenn, alòskè pétèt kè on moun ki toufré koumansé étidyé Labib pé’é pé fè menm biten-la. Dépi nou pran batèm, pétèt kè sitiyasyon an nou ja chanjé é kè nou ka fè plis biten pou Jéova. Lè nou ka sonjé sa nou ni lokazyon aprann adan Labib, nou ka vwè ki dòt jan nou pé mèt sé biten-lasa an pratik adan sitiyasyon an nou konnyéla. An-nou vwè 3 vérité fondal ki an Bib-la é an-nou vwè ki dòt biten sé 3 vérité-lasa pé aprann on moun ki ka sèvi Jéova dépi lontan.
JÉOVA SÉ KRÉYATÈ-LA
4. Lèfètkè nou sav kè Jéova sé Kréyatè an nou, kijan sa aji anlè vi an nou ?
4 Nou sav kè sé on Kréyatè ki puisan é ki ni onlo sajès ki fè latè é tousa ki asi-y. Labib ka di : « Moun-la ki fè tout biten sé Bondyé » (Ébr. 3:4). Men vérité-lasa pé aprann-nou onlo dòt biten ankò. Konm sé Jéova ki kréyé-nou, pa ni ayen i pa konnèt asi nou. Anplisdisa, i enmé-nou é i sav sa ki plibon ban nou. Lèfètkè nou sav kè Jéova sé Kréyatè an nou, sa chanjé onlo biten adan vi an nou é sa ba vi an nou on sans.
5. Ki vérité ki pé édé-nou ni imilité ? (Izayi 45:9-12).
5 Lèfètkè nou sav kè Jéova sé Kréyatè an nou, sa ka aprann-nou jan sa enpòwtan kè nou ni imilité. An-nou palé dè Jòb. Onlè, i té ka konsantré-y enki asi-y é asi sa dòt moun té ka di asi-y. Alò Jéova fè-y sonjé kè i sé Kréyatè-la é kè i toupuisan (Jòb 38:1-4). Sa édé Jòb vwè kè tousa Jéova ka fè toujou bon. Sa pwofèt Izayi ni lokazyon maké plita annakò èvè lidé-lasa. Mi sa i di : « Ès awjil-la ké di Awtizan-la ki ka ba-y on fòwm : “Ka ou ka fè ?” » (li Izayi 45:9-12).
6. A ki moman sa enpòwtan kè nou sonjé jan Kréyatè an nou ni sajès é jan i ni puisans ? (gadé sé imaj-la osi).
6 Lèwvwè on moun ka sèvi Jéova dépi onpakèt lanné, i pé koumansé fèfon asi sa i ka pansé olyé i fèfon asi konsèy Jéova ka ban-nou adan Pawòl a-y (Jòb 37:23, 24). Men si i ka pran tan réfléchi asi jan Kréyatè-la ni sajès é jan i ni puisans, ka sa ké pousé-y fè ? (Iz. 40:22 ; 55:8, 9). I ké montré-y toupiti é i ké ba sa Jéova ka pansé plis enpòwtans ki sa li i ka pansé.
Ka ki pé édé-nou sonjé kè sa nou ka pansé pa pibon ki sa Jéova ka pansé ? (gadé paragraf 6 la).d
7. Ka Rahela fè pou i aksèpté on chanjman òwganizasyon a Jéova fè ?
7 Rahela sé on sè ka rété an Slovéni. Sa ki édé-y aksèpté on chanjman adan òwganizasyon a Jéova, sé lè i sonjé kè Jéova sé Kréyatè-la. Mi sa i ka admèt : « Délè an ni dimal a aksèpté sèwten désizyon sé frè-la ki ka dirijé-nou la ka pran. Pa ègzanp, menmsi an té ja vwè émisyon-la Komité santral la ka ban-nou nouvèl no8 ki sòti an 2023, prèmyé fwa an vwè on frè fè on diskou èvè bab an figi a-y, sa choké-mwen. Alò an priyé Jéova pou an pé sa aksèpté chanjman-lasa. » Rahela byen konprann kè konm Jéova sé Kréyatè-la, i ka ba òwganizasyon a-y méyè dirèksyon ki tini. Si vou osi ou ni dimal a aksèpté on chanjman, pran on tan pou réfléchi asi sajès a Kréyatè an nou é asi puisans a-y (Wom. 11:33-36).
POUKWA BONDYÉ KA PÈWMÈT KÈ MOUN SOUFÈ
8. Lèfètkè nou sav poukwa Jéova ka pèwmèt kè moun soufè, ki bon biten sa pòté ban nou ?
8 Sèwten moun éséyé konprann poukwa Bondyé ka pèwmèt kè moun soufè, men yo pa touvé. Kifè, yo kòlè èvè Bondyé oben yo ka pansé kè i pa ka ègzisté (Pwov. 19:3). Men vou, ou aprann kè si on moun ka soufè, a pa akòz dè Jéova men sé akòz dè péché-la prèmyé paran an nou lésé ban nou. Ou aprann osi kè lèfètkè Jéova ni pasyans, sa ba onlo moun tan pou yo konnèt-li é pou yo konprann kè i kay mèt on milyé adan zafè a soufrans-la (2 Pyè 3:9, 15). Tout sé vérité-lasa konsolé-w é fè-w vin pli bon zanmi èvè Jéova.
9. A ki moman sa enpòwtan toubònman kè nou sonjé pou ki rézon Jéova ka pèwmèt kè moun soufè ?
9 Toupannan nou ka atann kè Jéova fè soufrans disparèt, fò nou ni pasyans. Men délè nou pé pèd on moun nou enmé, sé pé on moun an fanmi an nou oben noumenm an nou ki pé ka jwenn difikilté oben ki ka sibi on enjistis. Kifè, nou pé rivé a di-nou kè Jéova ka tadé (Abak. 1:2, 3). A moman-lasa, sa byen kè nou sonjé pou ki rézon Jéova ka pèwmèt kè moun soufèa (Sòm 34:19). Nou pé sonjé osi kè i ké fè ansòt pou tout soufrans disparèt é nou pé médité anlè sa.
10. Anne pèd manman-y. Ka ki ka ba-y fòs ?
10 Lèfètkè nou konnèt pou ki biten nou ka soufè, sa pé édé-nou andiré éprèv nou ka jwenn. Anne sé on sè ki ka viv a Mayòt, on ti lilèt ki adan loséan Endyen. Mi sa i ka di : « Ja ni kèlkè lanné an pèd manman-mwen é an ka vwè mank a-y toubònman. Men souvantfwa, an ka sonjé kè a pa Jéova ki dèyè do a soufrans an nou. I présé fè tout kalité soufrans disparèt é i présé résisité moun nou enmé é ki mò. Lè an ka pran tan réfléchi asi sé biten-lasa, an ka santi-mwen anpé é mwenmenm ka touvé sa fò. »
11. Pou ki rézon Jéova ka pèwmèt moun soufè, é kijan sa pé édé-nou pou nou kontinyé préché ?
11 Lèfètkè nou konnèt pou ki biten nou ka soufè, sa pé édé-nou pou nou kontinyé préché. Pyè èspliké kè si lafen po’o rivé, sé pas Jéova vlé sé moun-la rèpanti-yo pou yo pé sa sové. Aprésa, Pyè èspliké ka pou nou fè annatandan : « Réfléchi a ki kalté moun pou zò yé, dé moun ki ni on konpòwtèman ki sen é ki ka aji on mannyè ka montré kè yo enmé Bondyé » (2 Pyè 3:11). Adan sé biten-la ki ‘ka montré kè nou enmé Bondyé’, ou ka touvé travay a prédikasyon la. Kon Pap’an nou, nou enmé sé moun-la. Nou vlé kè yo viv adan paradi-la pas a moman-lasa pé’é ni enjistis asi latè ankò. Èvè onlo pasyans, Jéova ka pèwmèt moun an téritwa a-w adoré-y. Vou osi, ou pé travay ansanm èvè-y pou édé on maksimòm dè moun aprann konnèt-li avan lafen rivé. Mi on bèl lonnè, mi ! (1 Kor. 3:9).
NOU KA VIV PANNAN « SÉ DÈNYÉ JOU-LA »
12. Lè nou ka vwè kè sa Labib ka di asi « sé dènyé jou-la » ka réyalizé, dè ki biten nou pé sèten anrapò èvè Labib ?
12 Labib ka èspliké kijan sé moun-la té’é yé pannan « sé dènyé jou-la », é sa i ka di la vré toubònman (2 Tim. 3:1-5). Lè nou ka gadé alantou an nou, nou ka konstaté kè sa i ka di la ka réyalizé. Pli nou ka vwè konpòwtasyon a sé moun-la ka vin mové, pli nou sèten kè Pawòl a Bondyé toujou ka di lavérité (2 Tim. 3:13-15).
13. Kijan ègzanp-la Jézi pran la adan Lik 12:15-21 ka édé-nou ?
13 Lèfètkè nou sav kè nou ka viv pannan « sé dènyé jou-la », sa ka édé-nou konsantré-nou asi sa ki pli enpòwtan. Ègzanp-la Jézi pran la an Lik 12:15-21 ka montré poukwa sa enpòwtan kè nou fè sa (li-y). Adan vèwsé-lasa, poukwa yo ka di kè nonm-lasa té « sòt » ? A pa pas i té ni onlo byen men sé pas i pa konsantré-y asi sa ki pli enpòwtan. I té ka ‘sanblé on trézò pou-y menm, men i pa té rich douvan Bondyé’. Érè-la i fè la, sé kè i pa sèvi èvè tan a-y èvè sajès. Adan on ti moman i té kay pèd vi a-y. Mi sa Bondyé di boug-lasa : « Oswè-la menm ou ké mò. » Kijan istwa-lasa pé sèvi-nou lèson jòdijou ? Pa ka rété onlo tan avan lafen rivé. Sé pousa, sa té’é byen si nou té ka mandé-nou : « Ès sé òbjèktif-la an ni la ka montré kè an ka konsantré-mwen asi sa ki pli enpòwtan ? Dèyè ki òbjèktif an ka pousé timoun an mwen kouri ? Ès an ka sèvi èvè fòs an mwen, èvè tan an mwen é èvè lajan an mwen pou an pé sa vin rich douvan Bondyé ? »
14. Kon ègzanp a Miki ka montré, poukwa sa enpòwtan kè nou sonjé kè nou ka viv pannan sé dènyé jou-la ?
14 Lè nou ka pran tan réfléchi asi lèfètkè nou ka viv pannan sé dènyé jou-la, sa pé édé-nou sav kijan pou nou sèvi èvè vi an nou. Sé sa ki rivé on sè non a-y sé Miki. Mi sa i ka di : « Lè an fin lisé-la, an té vréman anvi ni on travay ki té’é pèwmèt-mwen étidyé sé zannimo-la. Men an té vlé vin pyonyé osi é ay préché la yo té bizwen pwoklamatè. Déotwa frè é sè a lasanblé-la mandé-mwen si an té ka pansé kè an té’é pé fè travay-lasa é kè anmenmditan an té’é pé vin pyonyé oben kè an té’é pé ay la yo bizwen pwoklamatè. Yo fè-mwen sonjé kè mond-la toupré bout é kè adan paradi-la, an ké ni tout tan an mwen pou an pé sa konnèt tout kalté zannimo. Kifè, an désidé pa fè gran lékòl, men fè on fòwmasyon pou ni on travay an men an mwen. Sa pèwmèt-mwen touvé on travay é èvè travay-lasa an té ni asé lajan é an té ni asé tan pou vin pyonyé. Kèlkètan apré, an ay an Ékwatè pas yo té bizwen pwoklamatè koté-lasa. » Jòdijou, mari a Miki rèsponsab a siwkonskripsyon é yo k’ay vizité sé lasanblé-la ki adan péyi-lasa.
15. Kijan ègzanp a Jak ka montré kè fò pa nou dékourajé menmsi on moun po’o aksèpté lavérité ? (gadé sé imaj-la osi).
15 Lè sé moun-la pa’a kouté bon nouvèl-la, fò pa sa dékourajé-nou, pas sé moun-la pé chanjé. An-nou pran ègzanp a Jak, dèmi frè a Jézi. I vwè an 2 zyé a-y kè Mési-la sé pwofési-la té ka anonsé la sé té Jézi, é i vwè-y fè mirak. Jak vwè osi jan Jézi té ka anségné plibyen ki pondòt moun. Men apapousa i mété-y ka suiv Jézi. Sé enki apré Jézi résisité kè Jak vin disip a-y, é i té ni onlo balanb (Jan 7:5 ; Gal. 2:9). Sé pousa, nonsèlman fò nou kontinyé palé dè lavérité èvè fanmi an nou ki pa Témwen, men fò pa nou arété préché ba moun ki po’o ka kouté bon nouvèl-la. Fò nou sonjé kè nou ka viv sé dènyé jou-la kifè, fò nou pòté bon mannèv adan travay a prédikasyon la. Pétèt kè sé lontan apré nou préché ba on moun kè moun-lasa ké réyaji, é pétèt menm kè sa pé rivé apré gwo tribilasyon-la koumanséc.
Ka ki pé édé-nou pou nou kontinyé palé dè lavérité èvè fanmi an nou ki pa’a sèvi Jéova ? (gadé paragraf 15 la).e
MONTRÉ OU NI RÈKONÉSANS POU SA JÉOVA KA FÈ-NOU SONJÉ
16. Pawmi sé biten-la Jéova ka fè-nou sonjé la, ès ni yonn ki ja fè-w dibyen ? (gadé ti karé-la « Sèvi èvè sé vérité-la ki an Bib-la pou édé lézòt »).
16 On pati a nouriti èspirityèl la òwganizasyon a Jéova ka ban-nou la fèt pou moun ki pa konnèt granzafè asi Labib. Pa ègzanp, adan nouriti-lasa ou ka touvé sé diskou-la ki ka fèt chak simenn, sèwten awtik é vidéo ki asi jw.org, é jounal nou ka ba moun an prédikasyon. Men nouriti-lasa itil ban nou osi. Grasa nouriti-lasa, Jéova ka fè-nou sonjé dé biten ki ka fè-nou enmé-y plis, ki ka konsolidé fwa an nou adan Pawòl a-y é ki ka édé-nou anségné pibyen (Sòm 19:7).
17. Adan ki sitiyasyon sa enpòwtan kè nou sonjé sé vérité-la ki fondal la ?
17 Menmsi nou ka sèvi Jéova dépi bon enpé lanné, lè lòwganizasyon ka fè on chanjman adan mannyè nou ka konprann on biten, a pa ti kontan nou kontan ! Men nou ni onlo rèkonésans osi pou sé vérité fondal la nou aprann la lè nou koumansé étidyé Labib. Siwvwè nou ka santi kè nou anvi fèfon asi sa nou ka pansé olyé nou lésé òwganizasyon a Jéova gidé-nou, èvè onlo imilité, an-nou sonjé kè sé Kréyatè an nou ki plen sajès é ki puisan toubònman ki antèt a òwganizasyon-lasa. Lè nou oben on moun an fanmi an nou ka andiré éprèv, an-nou aji èvè pasyans é an-nou sonjé pou ki biten Jéova ka pèwmèt kè moun soufè. É lè nou ka gadé pou vwè kijan nou ké sèvi èvè tan an nou é èvè sa nou ni, an-nou sonjé kè nou ka viv pannan sé dènyé jou-la é kè pa’a rété onlo tan avan lafen rivé. Si nou ka fè sa, Jéova ké kontinyé édé-nou aji èvè sajès é i ké kontinyé édé-nou rété fidèl a-y.
KANTIK 95 Limyè-la ka vin pli fò
a Gadé awtik-la « Pourquoi la souffrance disparaîtra bientôt » ki adan niméwo a 15 mé 2007 a La Tour de Garde, p. 21-25.
b Gadé lèson 8 a bwochi-la Aji èvè lanmou : Alé é fè disip.
c Gadé awtik-la « Ka nou sav anrapò èvè sa ki ké pasé lè Jéova ké jijé lézimen ? » ki adan Tou dè Gad a mé 2024 p. 8-13.
d SA NOU KA VWÈ ASI SÉ IMAJ-LA : Pannan i an réinyon èvè ansyen a lasanblé a-y, on ansyen ka pwopozé on biten, men sélézòt ansyen-la pa dakò èvè-y. Plita i ka gadé sé zétwal-la é i ka réfléchi asi sajès a Jéova é asi puisans a-y. I ka admèt kè sa Jéova vlé ni plis valè ki sa li i vlé.
e SA NOU KA VWÈ ASI IMAJ-LA : On sè ka étidyé tousèl a-y é i ka gadé déotwa prèv ki ka montré kè nou ka viv pannan sé dènyé jou-la. Sa ka bay balan pou i kriyé sè a-y ki pa témwen é pou préché ba-y.