On ti zouti adan Tradiksyon a nouvo mond-la ki pé édé-w

Adan Labib Tradiksyon a nouvo mond-la, (pa ègzanp an anglé oben an fransé), ni dé ti lèt owa sèwten mo ki ka voyé-w gadé dòt vèwsé. Sé vèwsé-lasa ka palé dè menm sijé-la men yo ka ba-w plis enfòwmasyon. Sa ka montré kijan on pawti a Labib annakò èvè ondòt pawti a Labib. Si ou ka sèvi èvè on bib papyé, chèché lèt-la ki owa mo-la adan kolòn-la ki anmitan paj-la. Asi jw.org oben adan JW Library^®, enki pijé asi ti lèt-la, é i ké voyé-w gadé dòt vèwsé ki lyanné èvè vèwsé-lasa.

Sé ti lèt-la ka voyé-w gadé dòt vèwsé ki pé ba-w diféran enfòwmasyon :

Menm istwa-la : yo ka voyé-w gadé menm istwa-la adan ondòt pawti a Labib. Pa ègzanp ou pé konparé 2 Samiyèl 24:1 èvè 1 Kronik 21:1.

Ola on èksprésyon sòti : yo ka voyé-w gadé ola èksprésyon a on vèwsé sòti. Pa ègzanp ou pé konparé Matyé 4:4 èvè Détéwonòm 8:3.

On pwofési : yo ka montré-w kijan 2 vèwsé lyanné : tala ki ka anonsé pwofési-la, é tala ki ka montré jan i réyalizé. Pa ègzanp ou pé konparé Matyé 21:5 èvè Zakari 9:9.