LÈSON 52
Jan-la nou ka abiyé la é jan-la nou ka pengné la enpòwtan toubònman !
Lè sé pou chwazi ki lenj nou ké mèt oben kijan nou ké pengné, nouchak ni ti gou an nou. Si nou ka suiv déotwa prensip tou senp ki an Bib-la, nou ké pé abiyé é pengné agou a tchè an nou é anmenmditan, nou ké pé fè Jéova plézi. An-nou gadé déotwa adan sé prensip-lasa.
1. Ka ki pé édé-nou vwè kijan pou nou abiyé é kijan pou nou pengné ?
Fò-nou chwazi ‘lenj ki korèk, é fò-nou fè sa èvè modèsti é bon jijman’. Anplisdisa, fò-nou pwòp. Konsa lézòt ké vwè kè nou « enmé Bondyé » (1 Timoté 2:9, 10). An-nou vwè ki prensip ki adan sé vèwsé-lasa : 1) Fò-nou abiyé é fò-nou pengné on mannyè ki « korèk ». Sèten ou ja konstaté kè adan pèp a Jéova, toutmoun pa ni menm gou-la. Men lenj an nou é pengné an nou ka montré kè nou ka onoré Dyé-la nou ka adoré la. 2) Lè nou ka abiyé « èvè modèsti », nou pa ka mèt lenj ki pé mèt lidé ki pa pwòp an tèt a moun. Anplis, nou pa ka mèt lenj ki pé fè moun rèmawké-nou lè nou ka pasé. 3) Lè nou ni « bon jijman », nou pa ka enki suiv tout kalité istil oben tout kalité mòd ki toufré sòti. 4) Anlè istil an nou, fò toutmoun vwè kè nou « enmé Bondyé », kivédi kè nou ka adoré vré Dyé-la (1 Korentyen 10:31).
2. Lè nou ka chwazi lenj an nou, poukwa fò-nou sonjé frè é sè an nou ?
Nou andwa chwazi jan nou vlé abiyé, men fò-nou éséyé vwè kijan sa nou ké mèt asi nou ké aji asi lézòt. Fò-nou fè tousa nou pé pou ponmoun pa di : « Mésyé ! Ki kalté lenj i mèt anlè-y la ! ». Anplisdisa, fò-nou « fè sa ki agou a pwochen [an nou] pou byen a-y, pou nou pé sa fè-y pwogrésé » (li Women 15:1, 2).
3. Jan nou ka abiyé é jan nou ka pengné pé ba sé moun-la anvi konnèt Jéova pibyen. Kijansa ?
Nou toujou ka fè éfò pou abiyé-nou byen, siwtou lè nou k’ay réinyon é lè nou k’ay préché. Nou ka fè tousa ki fo pou sé moun-la pa rété gadé yenki lenj an nou oben jan-la nou pengné la, olyé yo kouté mésaj-la nou ka préché la. Okontrè, sa nou té’é swété sé kè abiyé an nou é pengné an nou ba sé moun-la anvi kouté lavérité é kè ‘sa rann ansègnman a Bondyé pli bèl’ (Tit 2:10).
AN-NOU FOUYÉ PI FON
An-nou gadé ka nou pé fè pou abiyé an nou é pengné an nou montré kè nou sé disip a Jézi.
Jan nou ka abiyé é jan nou ka pengné pé montré si nou ka rèspèkté moun ki ni otorité. Menmsi Jéova ka vwè andidan tchè an nou, abiyé an nou dwèt montré kè nou ka rèspèkté-y.
4. Lè ou byen abiyé, sa ka montré kè ou ka rèspèkté Jéova
Ni on rézon enpòwtan toubònman ki fè si nou ka pengné-nou byen é si nou ka abiyé-nou byen. Ki rézon ésa ? Li Sòm 47:2 é fè on ti kozé asi sé kèsyon-lasa :
Sé Jéova nou ka rèprézanté. Alò ki désizyon sa dwèt pousé-nou pran anrapò èvè abiyé an nou ?
Ès ou ka di fò-nou byen abiyé lè nou k’ay réinyon é lè nou k’ay préché ? Poukwa ou ka di sa ?
5. Déotwa prensip ki ké édé-w abiyé-w é pengné-w byen konm i fo
Lenj an nou pa oblijé chè. Dépi yo pwòp é yo ka korèsponn èvè aktivité-la nou ka fè la, sé sa ki ka konté. Li 1 Korentyen 10:24 é 1 Timoté 2:9, 10. Aprésa, fè on ti kozé pou vwè poukwa fò pa nou mèt lenj ki...
two anchengteng oben ki pé fè-w pasé pou on moun ankouyonnad.
two séré, two kout, oben ki pé mèt lidé ki pa pwòp an tèt a moun.
Sé krétyen-la pa oblijé suiv Lwa a Moyiz, men lwa-lasa ka aprann-yo onlo biten asi sa Jéova ka pansé. Li Détéwonòm 22:5 é fè on ti kozé asi kèsyon-lasa :
Poukwa fò pa on misyé abiyé é pengné kon on madanm é poukwa fò pa on madanm abiyé é pengné kon on misyé ?
Li 1 Korentyen 10:32, 33 é 1 Jan 2:15, 16, é fè on ti kozé asi sé kèsyon-lasa :
Poukwa fò-nou fè atansyon pou abiyé an nou é pengné an nou pa choké vwazen an nou é sé frè é sè a lasanblé-la nonplis ?
La ou ka rété la, ki kalité lenj sé moun-la ka mèt é kijan yo ka pengné ?
Pawmi tout sé istil-lasa, ès ni sa adan yo on krétyen pa dwèt suiv ? Poukwa ?
Ni onlo modèl pengné é onlo modèl lenj ki ka fè Jéova plézi.
MI SA MOUN KA DI : « An ni dwa abiyé kon an vlé ! »
Ka ou ka pansé dè sa ?
ON TI RÉZIMÉ
Lè nou byen abiyé é nou byen pengné, nou ka montré kè nou ka onoré Jéova é kè nou ka rèspèkté pwochen an nou.
Ka ou woutyenn
Poukwa jan nou ka abiyé é jan nou ka pengné ni onlo enpòwtans pou Jéova ?
Bay déotwa prensip ki pé édé-nou sav kijan pou nou abiyé é kijan pou nou pengné.
Silon jan nou abiyé é silon jan nou pengné, ki valè sé moun-la ké ba vré adorasyon-la ?
AY GADÉ SA OSI
Lè sé moun-la ka vwè abiyé a-w, ka yo ka pansé dè-w ?
« Lè sé moun-la ka gadé jan an abiyé, ka sa ka aprann-yo asi mwen ? » (on awtik ki asi jw.org)
Poukwa fò-nou réfléchi byen avan nou fè on tatouaj ?
« Tatouaj : ka Labib ka di asi sa ? » (on awtik ki asi jw.org)
Dòt prensip ki pé édé-nou pran bon désizyon.
« Ton habillement honore-t-il Dieu ? » (Tou dè Gad a sèptanm 2016 an fransé)
On madanm ki té vlé fè Bondyé plézi fin pa konprann kè lézòt andwa abiyé ondòt jan ki-y.
« Je croyais que la coquetterie était condamnable » (Réveillez-vous ! a 22 désanm 2003)