A ki moman Bondyé ka konsidéré kè on moun pwòp ?

Lè on manman ka préparé tigason a-y pou voyé-y lékòl, i ka bengné-y pwòp é i ka mèt on lenj pwòp asi-y osi pas i sav kè sa bon pou santé a-y. Konm timoun-la byen pwòp, sa ka montré kè fanmi a-y ka pran swen a-y byen menm. Menmjan-la, Pap’an nou ki an syèl-la vlé kè kò an nou pwòp, kè lèspri an nou pwòp, kè pawòl an nou pwòp é kè nou ni on konduit ki pwòp. Lè nou pwòp adan tout sé domenn-lasa, nou ka santi-nou pibyen an po an nou, é nou ka ba Pap’an nou ki an syèl-la glwa.

1. Lè on moun pwòp, ka i ka fè ?

Jéova ka ban-nou lòd-lasa : « Fò-zòt sé dé moun ki sen » (1 Pyè 1:16). Lè on moun sen, lèspri a-y pwòp men kò a-y pwòp osi. É lè on moun pwòp, i ni labitid bengné kò a-y, i ka mèt lenj pwòp anlè-y, é i ka nétwayé kaz a-y, vwati a-y é jaden a-y. Anplisdisa, nouchak pé bay on ti pal pou nétwayé sal di Wayòm an nou. Si nou sé dé moun ki pwòp, nou ké ba Jéova glwa (2 Korentyen 6:3, 4).

2. Ki vyé mès fò-nou mèt akoté pou nou pwòp adan tout kalté domenn ?

Labib ka di-nou on mannyè ki klè kè fò-nou « pwòpté-nou parapòt a tousa ki ka sali kò an nou é lèspri an nou » (2 Korentyen 7:1). Sa vlé di kè fò-nou évité tousa ki té’é pé sali kò an nou é lèspri an nou. Si nou vlé kè sa ki ka pasé an tèt an nou fè Jéova plézi, fò-nou woté tout lidé ki pa bon an lèspri an nou (Sòm 104:34). Fò-nou fè atansyon a jan nou ka palé osi (li Kolosyen 3:8).

Ki dòt biten ki té’é pé sali kò an nou é lèspri an nou ? Taba é dwòg sé 2 biten ki ka détwi kò an nou. Kifè, fò-nou ba sé biten-lasa gran lè a yo. Lè on moun pa’a fimé é lè i pa’a dwogé, santé a-y ka pi bon é i ka montré kè i ka rèspèkté lavi, bèl kado-la Jéova fè-nou la. Si on moun vlé ni on konduit ki pwòp, fò i fè éfò pou i pa batdous oben pou i pa gadé biten pòwno (Sòm 119:37 ; Éfézyen 5:5). Pou nou pé sa mèt sé vyé labitid-lasa dè koté, sé on konba, men nou pé fèfon asi Jéova pou i pé sa édé-nou (li Izayi 41:13).

AN-NOU FOUYÉ PI FON

3. Lè nou pwòp, nou ka ba Jéova glwa

Lè nou ka li sé lwa-la Jéova té ba sé Izraélit-la, nou ka vwè kè i té vlé kè pèp a-y pwòp. Sé on biten ki enpòwtan pou-y. Li Ègzòd 19:10 é 30:17-19, é fè on ti kozé asi sé kèsyon-lasa :

• Dapré sé vèwsé-lasa, ki enpòwtans Jéova ka ba lapwòpté ?

• Ki bon labitid on moun dwètèt tini pou i rété pwòp ?

Pou on moun pwòpté kò a-y é pou i nétwayé zéfé a-y, sa ka mandé onlo tan é onlo éfò. Men sé on biten nou pé fè kèlkèswa kantité lajan nou ka gangné é kèlkèswa koté-la nou ka rété la. Gadé VIDÉO-la é fè on ti kozé asi kèsyon-la ki ka vin la.

VIDÉO : Bondyé enmé moun ki pwòp (4:10)

• Si nou pwòp é si biten an nou byen ranjé, sé moun-la nou ka préché ba yo la pé rivé a rèspèkté Jéova pi fasilman. Poukwa nou ka di sa ?

4. Ka nou pé fè pou nou lagé on mové labitid

Si ou ka fimé oben si ou ka dwogé, sèten ou sav kè sé dé biten moun pa’a lagé konsa. Ka ki pé édé-w arété ? Réfléchi tibwen pou vwè ki mové biten sa ka menné ba-w. Li Matyé 22:37-39 é fè on ti kozé asi kèsyon-lasa : Si on moun ka fimé oben i ka dwogé, kijan sa ka aji...

• asi lanmityé a-y èvè Jéova ?

• asi fanmi a-y é lantouraj a-y ?

Préparé-w byen konm i fo pou ou gangné konbaa. Gadé VIDÉO-la.

VIDÉO : Fò-nou ni métriz toutlè. Kijan ? (2:47)

Li Filipyen 4:13 é fè on ti kozé asi kèsyon-lasa :

• Lè on moun ka goumé èvè on mové labitid, siwvwè i ka priyé, siwvwè i k’ay réinyon é siwvwè i ka étidyé Bib a-y, sa ké édé-y. Kijansa ?

5. Kijan nou pé goumé èvè tout mové lidé é èvè tout mové konduit ki tini

Li Kolosyen 3:5 é fè on ti kozé asi sé kèsyon-lasa :

• Jéova pa enmé lè moun ka gadé biten pòwno, lè yo ka voyé sèkstob oben lè yo ka batdous, paskè pou-y sé dé biten ki pa pwòp. Kijan nou fè sav sa ?

• Lè nou ka gadé sa Jéova ka mandé-nou pou nou pé sa ni on konduit ki pwòp, ès sa pa two rèd a fè ? Poukwa ou ka di sa ?

Lèwvwè on lidé ki pa pwòp bizwen rantré an lèspri an nou, ni mwayen nou fè-y vòlkannizé. Gadé VIDÉO-la.

VIDÉO : Pou rété pwòp, pòté mannèv (1:51)

Jézi sèvi èvè on ègzanp pou montré-nou ka pou nou fè pou nou ni on konduit ki pwòp. Li Matyé 5:29, 30 é fè on ti kozé asi kèsyon-lasa :

• Jézi pa té ka di kè fò-nou maltrété kò an nou men i té vlé di kè fò-nou sav sa nou vlé é kè fò-nou byen désidé a aji. Si on moun vlé woté mové lidé an tèt a-y, ki dispozisyon séryé i pé pranc ?

Si ou ka goumé pou ou rivé about a mové lidé ki ka pasé an lèspri a-w, mèt an tèt a-w kè Jéova ka vwè tout éfò a-w. Li Sòm 103:13, 14 é fè on ti kozé asi kèsyon-lasa :

• Si ou ka goumé pou ou lagé on mové labitid, kijan sé vèwsé-lasa pé ba-w fòs pou ou kontinyé konba-la ?

É si ou viré tonbé ankò, woupran doubout a-w, kontinyé goumé !

«Konm an pa’a rivé, ban’an arété èvè sa !» Sé sa on moun ki ka viré tonbé pé rivé a di. Men an-nou pran ègzanp a on moun ki ka kouri maraton. A pa paskè i tonbé, i oblijé pèd kous oben i oblijé viré pran dépa. Menmjan-la, a pa paskè ou viré fè menm érè-la, savédi ou pèd konba. É sa pa vé di kè tout sé pwogré-la ou ja fè la, sé biten initil. An réyalité, près tout kourè ka tonbé. Sa pé rivé nenpòt ki moun. Alò, pa dékourajé ! Papa Jéova la èvè-w pou sipòté-w é i ké édé-w rivé about a mové labitid-la ou ni la.

ON TI RÉZIMÉ

Lè kò an nou pwòp, lè lèspri an nou pwòp é lè konduit an nou pwòp, nou ka ba Jéova glwa.

Ka ou woutyenn

• Sa enpòwtan kè nou rété pwòp. Poukwa ?

• Lè nou pwòp, ka nou ka fè ?

• Ka nou pé fè pou lèspri an nou é konduit an nou rété pwòp ?

AY GADÉ SA OSI

Menmsi ou pa ni onlo lajan, mi déotwa ti biten tou senp ou pé fè pou ou rété pwòp.

Santé é pwòpté : Lavé men a-w (3:01)

Déotwa ti konsèy byen itil pou arété èvè sigarèt-la.

« Comment arrêter de fumer » (Réveillez-vous ! a mé 2010)

Biten pòwno ka fè onlo déga.

« La pornographie : inoffensive ou dangereuse ? » (Tou dè Gad a 1^é out 2013 an fransé)

Sa on misyé fè pou i té arété gadé biten pòwno.

« J’ai échoué bien des fois avant de réussir » (Tou dè Gad n^o 4 a 2016 an fransé)