LÉSON 6

Ki èspwar i gen pou sé moun mouri-ya ?

1. Ki bon nouvèl i gen pou sé moun mouri-ya ?

Lazar résisité, so sò Mart ké Mari ka akéyi l’

Jézi té gen roun zanmi, Lazar, ki té ka rété Bétani, bò Jérizalèm. Roun jou, so zanmi mouri, mé lò Jézi rivé Bétani, kat jou té ja pasé. I alé koté tonm-an té fika ké Mart ké Mari, sò Lazar. Annan roun ti moman, roun patché moun rasanblé. É a sa moman-an, Jézi résisité Lazar. Ou ka imajiné kouman Mart ké Mari té kontan ! — Li Jean 11:21-24, 38-44.

Mart té ja konnèt bon nouvèl asou sé moun mouri-ya. I té savé ki Jéova té ké résisité sé moun-mouri-ya pou yé rouviv asou latè-a. — Li Job 14:14, 15.

2. Kisa ki ka pasé apré lanmò ?

Kréasyon Adan épi apré lò i mouri — Bondjé di Adan : « To sa lapousyè é to ké viré lapousyè » (GENÈSE 3:19).

Nou fèt ké lapousyè (Genèse 2:7 ; 3:19). Nou sa moun fèt ké lachè. Nou pa sa dé lèspri annan roun kò fèt ké lachè. A pou sa lò nou mouri, i pa gen anyen di nou ki ka kontinyé viv. Lò roun moun mouri, so sèrvo mouri osi. I pa ka réfléchi ni rousanti anyen ankò. Sé moun mouri-ya pa savé anyen. Li menm Lazar ki mouri é ki résisité pa janmen di anyen asou roun lavi apré lanmò. — Li Ecclésiaste 9:5, 6, 10.

Ès Bondjé ka fè moun soufri annan difé apré yé mouri ? Labib-a ka anprann nou ki sé moun mouri-ya pa savé anyen. Atò, ansèyman lanfè-a sa roun manti ki ka jouré Bondjé. Sèl lidé di fè moun-yan soufri annan difé ka dégouté l’. — Li Deutéronome 12:31.

Gadé vidéyo Kisa ki ka pasé lò nou ka mouri ?

3. Ès sé moun mouri-ya pouvé palé ké nou ?

Sé moun mouri-ya pa ka palé é yé pa ka tandé (Psaume 115:17). Mé, i gen zanj mové ki ka palé ké sé moun-yan é yé ka fè moun-yan krè ki yé sa moun mouri (2 Pierre 2:4). Jéova ka entèrdi nou chaché palé ké sé moun mouri-ya. — Li Deutéronome 18:10, 11.

4. Kimoun ki ké résisité ?

Roun mouché ki résisité annan Paradi-a ka anprann konnèt Bondjé. Épi apré li menm ka ansényé dòt moun ki résisité.

Milyon moun ki mouri ké rouviv asou latè-a. Menm sèrten moun ki pa té konnèt Bondjé é ki té fè mové bagaj ké résisité. — Li Luc 23:43 ; Actes 24:15.

Sa-ya ki ké résisité ké pouvé anprann lavérité asou Bondjé é obéyi Jézi pou montré ki yé gen lafwa annan li (Révélation 20:11-13). Sa-ya ki ké fè bon bagaj ké pouvé viv pou tout-tan asou latè-a. — Li Jean 5:28, 29.

5. Kisa larézirèksyon ka anprann nou asou Jéova ?

Bondjé voyé so Pitit asou latè-a pou i mouri pou nou. Atò, a gras a Bondjé i gen roun èspwar pou moun mouri-ya. Larézirèksyon ka montré nou ki Bondjé kontan nou é i janti ké nou menm si nou pa mérité l’. Kimoun ou anvi wè annan sa-ya ki ké résisité ? — Li Jean 3:16 ; Romains 6:23.

Pou anprann plis bagaj asou sa, gadé liv Kisa Labib-a ka anprann nou ?, chapit 6, 7 ké 10.