LÉSON 10
Kouman ou pouvé rékonnèt vré rélijyon-an ?
1. Ès i gen roun sèl vré rélijyon ?
« Véyé sé fo profèt-ya » (MATTHIEU 7:15).
Jézi ansényé so disip roun sèl rélijyon, sa-la ki vré-a. I di ki vré rélijyon-an kou roun chimen ki ka fè nou jwenn lavi pou tout-tan é i « pa gen bokou moun ka trapé l’ » (Matthieu 7:14). Bondjé ka asèpté sèlman rélijyon-an ki apiyé asou so Paròl ki vré. Tout sé vré adoratèr Bondjé ka krè menm bagaj-ya é yé ka adoré Bondjé ansanm annan menm rélijyon-an. — Li Jean 4:23, 24 ; 14:6 ; Éphésiens 4:4, 5.
Gadé vidéyo Ès Bondjé ka asèpté tout sé rélijyon-yan ?
2. Kisa Jézi di asou sé fo krétyen-yan ?
« Yé ka di douvan tout moun ki yé konnèt Bondjé, mé sa yé ka fè ka montré ki yé ka rijété l’ » (TITE 1:16).
Jézi avèrti so disip ki i té ké gen fo profèt ki té ké gaté vré rélijyon ki i té anprann yé. Sa fo profèt-ya ka sanblé ké vré adoratèr Bondjé. É yé légliz ka di yé sa krétyen. Mé nou pouvé rékonnèt sa fo krétyen-yan. A vré rélijyon-an rounso ki ka fè vré krétyen. É nou pouvé rékonnèt sé vré krétyen-yan asou yé kalité ké sa yé ka fè. — Li Matthieu 7:13-23.
3. Kouman ou pouvé rékonnèt vré adoratèr Bondjé ?
Gadé senk bagaj ki ka pèrmèt rékonnèt yé :
Sé vré adoratèr-ya ka rèspèkté Labib-a. Pou yé, i sa Paròl Bondjé-a. Yé ka travay rèd pou swiv prensip-ya ki annan Labib-a. A pou sa vré rélijyon-an diféran di rélijyon ki ka apiyé asou lidé sé imen-yan (Matthieu 15:7-9). Vré adoratèr Bondjé pa ka préché roun bagaj pou alé fè rounòt apré. — Li Jean 17:17 ; 2 Timothée 3:16, 17.
Vré disip Jézi ka onoré non Bondjé, Jéova. Jézi fè moun-yan konnèt non Bondjé. A konsa i onoré sa non-an. I édé sé moun-yan konnèt Bondjé é i anprann yé priyè pou so non sanktifyé (Matthieu 6:9). Koté ou ka rété-a, ki rélijyon ka fè moun-yan konnèt non Bondjé ? — Li Jean 17:26 ; Romains 10:13, 14.
Sé vré krétyen-yan ka préché rwayonm Bondjé-a. Bondjé voyé Jézi asou latè-a pou préché bon nouvèl Rwayonm-an. Sa rwayonm-an, a li ki sèl èspwar pou moun-yan. Jézi palé di sa jistan i mouri (Luc 4:43 ; 8:1 ; 23:42, 43). I di ki so disip té ké préché sa rwayonm-an osi. Ès roun moun ja vini palé ou di rwayonm Bondjé-a ? Dapré ou, annan ki rélijyon ou té ké di i fika ? — Li Matthieu 24:14.
Kouman ou pouvé rékonnèt yé ? Yé pa ka fè lapolitik é yé pa ka partisipé annan ajitasyon lasosyété (Jean 17:16 ; 18:36). Anplis, yé pa ka swiv mantalité ké mové pratik sa monn-an. — Li Jacques 4:4.
Sé vré krétyen-yan gen roun lanmou èspésyal roun pou ròt. Gras a Paròl Bondjé-a, yé ka anprann rèspèkté moun di tout péyi. Souvan, sé fo rélijyon-yan ka ankourajé lagèr, mé sé vré adoratèr Bondjé pa ka asèpté fè sa (Michée 4:1-3). Yé préféré bay yé tan ké yé soumaké san konté pou édé ké ankourajé sé lézòt-ya. — Li Jean 13:34, 35 ; 1 Jean 4:20.
4. Sa ou ka pansé, kilès ki vré rélijyon-an ?
Ki rélijyon ka apiyé tout so ansèyman asou Paròl Bondjé-a ? Ki rélijyon ka onoré non Bondjé ? Ki rélijyon ka préché ki rwayonm Bondjé-a sa sèl èspwar pou moun-yan ? Annan ki rélijyon moun-yan vréman kontan yé konpanyen é pa ka partisipé annan lagèr ? Kisa ou ka pansé di sa ? — Li 1 Jean 3:10-12.