Kouman adoré Bondjé kou i lé ?

1. Kimoun ki pouvé di nou kouman pou nou adoré Bondjé kou i lé ?

PRÈS tout rélijyon-yan ka di ki yé ka fè moun-yan konnèt lavérité asou Bondjé. Mé sa pa posib paské tout rélijyon-yan ka anprann moun-yan bagaj ki trè diféran asou Bondjé é asou fason pou nou adoré l’. Kouman nou pouvé savé fason pou nou adoré l’ kou i lé ? A Jéova rounso ki pouvé di nou sa.

2. Kouman nou pouvé savé fason pou nou adoré Bondjé kou i lé ?

² Jéova bay nou Labib-a. Labib-a ka idé nou anprann fason pou nou adoré Bondjé kou i lé. Atò, pran tan étidyé l’. Jéova ké idé ou konprann ké apliké so ansèyman paské i kontan ou (Isaïe 48:17).

3. Kisa Bondjé lé nou fè ?

³ Dapré sa roun ran moun ka di, Bondjé ka asèpté tout rélijyon-yan. Mé a pa sa Jézi anprann nou. I di : « A pa tout sa ki ka di mo : “Sényèr, Sényèr”, ki ké antré annan rwayonm-an ki annan syèl-a, mé a sa-la ki ka fè volonté mo Papa rounso. » A pou sa nou divèt savé kisa Bondjé lé, é fè sa i lé. Sa trè enpòrtan paské Jézi di ki sa-ya ki pa ka obéyi Bondjé, yé kou bandi, moun ki « ka méprizé lalwa » (Matthieu 7:21-23).

4. Kisa Jézi di asou fason pou nou adoré Bondjé ?

⁴ Jézi té di so disip-ya ki sa pa té ké toujou fasil di fè sa Bondjé lé. I di : « Pran piti lapòt-a. Paské chimen lanmò-a gran é so lapòt larj, é bokou moun ka pran l’ ; mé chimen lavi-a piti, é so lapòt piti, é i pa gen bokou moun ka trapé l’ » (Matthieu 7:13, 14). Lò ou ka adoré Bondjé kou i lé, ou ka pran piti chimen-an ki ka mennen lavi pou tout-tan. Lò ou pa ka adoré Bondjé kou i lé, ou ka pran gran chimen-an ki ka mennen lanmò. Mé Jéova pa lé pyès moun mouri. A pou sa i ka bay tout moun chans pou anprann konnèt li (2 Pierre 3:9).

KOUMAN ADORÉ BONDJÉ KOU I LÉ ?

5. Kouman ou pouvé roukonnèt sa-ya ki ka adoré Bondjé kou i lé ?

⁵ Jézi di ki nou pouvé roukonnèt sa-ya ki ka adoré Bondjé kou i lé asou sa yé ka krè é sa yé ka fè. I di ki a asou yé konpòrtman nou té ké roukonnèt yé. Épi i di ankò : « Tout bèl pyébwa ka bay bèl frwi » (Matthieu 7:16, 17). Sa pa lé di ki vré adoratèr Bondjé parfè. Mé yé toujou ka éséyé fè sa ki byen. Annou wè kouman nou pouvé roukonnèt yé.

6, 7. a) Poukisa vré ladorasyon-an ka apiyé asou Labib-a ? b) Kisa èkzanp Jézi ka anprann nou ?

⁶ Nou ladorasyon divèt apiyé asou Labib-a. Labib-a ka di : « Tousa ki marké annan Ékritir-a enspiré di Bondjé épi i itil pou anprann, pou korijé, pou roudrésé tout bagaj, pou maché drèt annan lajistis, pou sèrvitèr Bondjé-a kalifyé toubonnman, pou i pouvé gen tousa i bézwen pou fè tout bagaj ki bon » (2 Timothée 3:16, 17). Apot Pòl di krétyen-yan : « Lò zòt rousouvwè paròl Bondjé nou té ka di zòt-a, zòt pa asèpté l’ kou paròl wonm-yan, mé vréman kou paròl Bondjé-a » (1 Thessaloniciens 2:13). Vré ladorasyon-an ka apiyé asou Paròl Bondjé-a rounso, Labib-a. I pa ka apiyé asou lidé moun ni asou tradisyon, ni asou ròt bagaj.

⁷ Tousa Jézi té ka ansényé té ka vini di Paròl Bondjé-a (li Jean 17:17). Lò i té ka palé, a té souvan sa ki té annan Ékritir-ya i té ka di (Matthieu 4:4, 7, 10). Vré adoratèr Bondjé ka swiv so èkzanp : tousa yé ka ansényé ka vini di Labib-a.

8. Dapré Jézi, kimoun nou divèt adoré ?

⁸ A Jéova rounso nou divèt adoré. Psaume 83:18 ka di : « To ki ka poté non Jéova, a to rounso ki Pi-Rot asou tout latè-a ! » Jézi té lé ki moun-yan anprann konnèt a kimoun ki vré Bondjé-a, é i fè yé konnèt so non (li Jean 17:6). I di : « A Jéova to Bondjé to divèt adoré, é a li rounso to divèt bay roun sèrvis sakré » (Matthieu 4:10). Vré adoratèr Bondjé-ya ka swiv èkzanp Jézi. A Jéova rounso yé ka adoré. Yé ka itilizé so non é yé ka fè moun-yan konnèt sa non-an. Yé ka ansényé sa Bondjé ké fè pou moun-yan.

9, 10. Kouman nou ka montré moun-yan ki nou kontan yé ?

⁹ Nou divèt kontan moun-yan ké tout nou tchò. Jézi anprann so disip kontan yé konpanyen (li Jean 13:35). Nou divèt kontan nou konpanyen. Nou pa pou gadé koté nou soti, ni nou lédikasyon, ni si nou rich ouben maléré. Nou lanmou divèt fè nou viv byen ansanm é nou divèt divini kou frè ké sò (Colossiens 3:14). A pou sa nou pa ka fè lagèr é nou pa ka tchwé pésonn. Labib-a ka di ki nou pouvé roukonnèt « pitit Bondjé ké pitit Djab-a » konsa : « sa-la ki pa ka fè sa ki drèt pa ka vini di Bondjé, sa-la ki pa kontan so frè non plis ». I ka di osi ki « nou divèt kontan nou konpanyen ; pa kou Kayen, ki té ka vini di méchan-an é ki tchwé so frè » (1 Jean 3:10-12 ; 4:20, 21).

¹⁰ Nou ka pran annan nou tan, nou fòrs ké sa nou gen pou ankourajé ké idé nou konpanyen (Hébreux 10:24, 25). Nou ka « fè bon bagaj pou tout moun » (Galates 6:10).

11. Poukisa nou divèt asèpté ki a gras a Jézi rounso ki nou pouvé sové ?

¹¹ Nou divèt obéyi Jézi paské a gras a li rounso nou pouvé sové. Labib-a ka di : « I pa gen ròt moun ki pouvé sové nou, paské anba syèl-a i pa gen pyès ròt non [...] ki divèt sové nou » (Actes 4:12). Annan chapit 5-a, nou anprann ki Jéova voyé Jézi asou latè-a pou i bay so lavi pou péyé ranson-an pou moun ki ka obéyi (Matthieu 20:28). Jéova chwazi Jézi pou i Rwa asou latè-a. A pou sa Labib-a ka di ki, si nou lé viv pou tout-tan, nou divèt obéyi Jézi (li Jean 3:36).

12. Poukisa nou pa ka mélé annan lapolitik ?

¹² Nou pa divèt fè lapolitik. Jézi pa fè lapolitik. Lò Pilat chèf romen-an jijé l’ i di : « Mo rwayonm pa annan sa monn-an » (li Jean 18:36). Kou Jézi, nou ka rété fidèl. A Rwayonm Bondjé ki annan syèl-a rounso nou ka soutni. A pou sa, nenpòrt ki koté nou ka rété, nou pa ka mélé annan lapolitik. Mé, Labib-a ka di nou obéyi gouvèrnman-yan (Romains 13:1). Nou ka obéyi lalwa péyi koté nou ka viv-a. Mé lò roun lalwa pa ka alé annan menm sans ké lalwa Bondjé, nou ka imité apot-ya ki di : « Nou divèt obéyi Bondjé pasé nou obéyi moun-yan » (Actes 5:29 ; Marc 12:17).

13. Kisa nou ka préché asou Rwayonm Bondjé-a ?

¹³ Nou divèt krè ki a Rwayonm Bondjé-a rounso ki pouvé réglé problèm monn-an. Jézi di ki « bon nouvèl rwayonm-an » té ké préché asou tout latè-a (li Matthieu 24:14). Pyès gouvèrnman pa pouvé fè sa Rwayonm Bondjé-a ké fè pou moun-yan (Psaume 146:3). Jézi anprann nou priyè pou Rwayonm Bondjé-a konsa : « A pou to rwayonm vini. A pou to volonté fèt asou latè-a, kou annan syèl-a » (Matthieu 6:10). Labib-a ka di ki Rwayonm Bondjé-a ké détrwi tout gouvèrnman asou latè-a é i ké rété pou tout-tan (Daniel 2:44).

14. Dapré ou, kimoun ki ka adoré Bondjé kou i lé ?

¹⁴ Aprézan, pozé ou kò sa késyon-yan : « Kimoun ki ka apiyé so ansèyman asou Labib-a ? Kimoun ki ka fè moun-yan konnèt non Bondjé-a ? Annan kilès rélijyon moun-yan vréman kontan yé konpanyen ? Kimoun ki ka krè ki Bondjé voyé Jézi asou latè-a pou sové nou ? Kimoun ki pa ka fè lapolitik ? Kimoun ki ka préché ki a Rwayonm Bondjé-a rounso ki pouvé réglé problèm moun-yan ? » A Témwen Jéova-ya rounso (Isaïe 43:10-12).

KISA OU KÉ FÈ ?

15. Kisa nou divèt fè pou Bondjé asèpté nou ladorasyon ?

¹⁵ A pa loutou di krè ki Bondjé ka èkzisté. Démon-yan osi ka krè ki Bondjé ka èkzisté, mé yé pa ka obéyi l’ (Jacques 2:19). Pou Bondjé asèpté nou ladorasyon, a pou nou fè osi sa i ka di.

16. Poukisa nou divèt rijété fo rélijyon-an ?

¹⁶ Pou Bondjé asèpté nou ladorasyon, nou divèt rijété fo rélijyon-an. Profèt Izayi ékri : « Soti annan l’, fè tousa ou pouvé pou rété sen » (Isaïe 52:11 ; 2 Corinthiens 6:17). A pou sa nou divèt rijété tousa ki mélé ké fo rélijyon-an.

17, 18. a) A kisa ki « Gran Babilòn-an » ? b) Poukisa nou divèt soti di fo rélijyon-an ké ti kouri ?

¹⁷ A kisa ki fo rélijyon-an ? A tout rélijyon-yan ki ka anprann moun-yan adoré Bondjé di roun fason ki pa ékri annan Paròl Bondjé-a. Labib-a ka aplé fo rélijyon-an « Gran Babilòn-an » (Révélation 17:5). Poukisa ? Paské apré Délij-a, a annan vil Babilòn ki bokou fo ansèyman parèt. Apré sa, moun-yan simen sa ansèyman-yan asou tout latè-a. Parèkzanp, moun ki té ka rété Babilòn té ka adoré roun patché bondjé ki té ka maché pa trwa. É jòdla, roun patché rélijyon ka ansényé ki Bondjé sa roun trinité. Mé Labib-a klè asou sa : a roun sèl vré Bondjé i gen, Jéova, é Jézi a so Pitit (Jean 17:3). Moun Babilòn té ka krè osi ki lò roun moun té ka mouri, roun bagaj annan li té ka kontinyé viv, détan annan lanfè. Mé sa pa vré menm (gadé nòt n^os 14, 17 ké 18, paj 213, 214 ké 215).

¹⁸ Bondjé di ki fo rélijyon-an ké détrwi titalò (Révélation 18:8). Ès ou ka konprann poukisa ou divèt soti annan fo rélijyon-an ké ti kouri ? Jéova ka doumandé ou fè sa anvan i tro ta (Révélation 18:4).

19. Si ou ka désidé adoré Jéova, kouman i ké pran swen di ou ?

¹⁹ Si ou ka désidé soti di fo rélijyon-an épi adoré Jéova, pitèt ou zanmi ké moun annan ou fanmi pa ké konprann poukisa ou ka fè sa. Pitèt yé ké éséyé baré ou chimen, fè ou ronté ouben yé pa ké lé wè ou ankò. Mé Jéova pa ké janmen lésé ou tonbé. Ou ké annan roun fanmi ki toupatou asou latè-a. A milyon moun ki vréman kontan yé konpanyen. Ou ké gen èspwar viv pou tout-tan annan monn nouvo-a (Marc 10:28-30). É pitèt roun jou, ou zanmi ké moun annan ou fanmi ki ka chaché baré ou chimen ké étidyé Labib-a.

20. Poukisa sa trè enpòrtan di adoré Bondjé kou i lé ?

²⁰ Titalò, Bondjé ké fè méchansté-a disparèt, é so Rwayonm ké dirijé latè-a (2 Pierre 3:9, 13). Sa ké bèl toubonnman ! Tout moun ké adoré Jéova kou i lé. Atò, fè tout chanjman ou bézwen fè pou adoré Bondjé kou i lé dipi aprézan.