Ès sé soufrans-ya ké fini roun jou ?

SA LABIB-A KA DI

« Bondjé... ké swiyé tout dlo di yé wéy, é i pa ké gen lanmò ankò ; i pa ké gen ni dèy, ni rélé, ni doulèr ankò » (Révélation 21:3, 4).

SANS SA POUVÉ GEN POU OU

Garanti ki Bondjé pa sa sours di nou problèm (Jacques 1:13),

Konsolasyon di savé sa Bondjé ka rousanti pou nou lò nou ka soufri (Zekaria 2:8),

Èspwar ki tout soufrans ké fini (Psaume 37:9-11).

ÈS NOU VRÉMAN POUVÉ KRÈ SA LABIB-A KA DI ?

Wi, pou omwens dé rézon :

• Bondjé rayi soufrans ké enjistis. Gadé kisa Jéova rousanti lò, annan sé tan biblik-ya, yé té ka fè so pèp patché méchansté. Labib-a ka di ki Jéova té gen lapenn paské ‘yé té ka fè yé wè mizè’ (Juges 2:18).

  Bondjé pa dakòr menm ké moun ka fè lézòt soufri. Parèkzanp Labib-a ka di ki Jéova rayi « lanmen ki ka tchwé moun ki pa fè anyen » (Proverbes 6:16, 17).

• Bondjé ka sousyé di chak moun. Chak moun konnèt « ki doulò i gen é kisa ka fè l’ soufri », mé Jéova konnèt yé osi ! (2 Chroniques 6:29, 30).

  Toutalò gras a so Rwayonm, Jéova ké fè soufrans chak moun disparèt (Matthieu 6:9, 10). Pannan sa tan-an, i ka konsolé ké tandrès moun ki ka chaché l’ ké sensérité (Actes 17:27 ; 2 Corinthiens 1:3, 4).