A kisa ki Rwayonm Bondjé-a ?

SA LABIB-A KA DI

« Bondjé-a ki annan syèl-a ké mété roun rwayonm ki pa ké janmen détrwi » (Daniel 2:44, Traduction du monde nouveau).

« Yé bay nou roun fis, é gouvèrnman-an ké anlè so zépol » (Isaïe 9:6, Bible de Darby).

SANS SA POUVÉ GEN POU OU

• Roun gouvèrnman jist ki pouvé mennen bon bagaj pou ou (Isaïe 48:17, 18).

• Annan monn nouvo ki gen pou vini-a, viv annan lajwa ké roun santé parfè (Révélation 21:3, 4).

ÈS NOU VRÉMAN POUVÉ KRÈ SA LABIB-A KA DI ?

Wi, pou omwens dé rézon :

• Jézi té montré kisa Rwayonm Bondjé-a ké fè. Jézi té anprann so disip priyè pou Rwayonm Bondjé-a vini é pou volonté Bondjé fèt anlè latè-a (Matthieu 6:9, 10). Jézi té montré yé kouman sa lapriyè-a ké réyalizé.

  Lò i té anlè latè-a, Jézi bay moun ki té fen manjé, géri moun ki té malad é roubay moun ki té mouri lavi ! (Matthieu 15:29-38 ; Jean 11:38-44). Paské i sa fitir Rwa di Rwayonm Bondjé-a, Jézi montré dézoutrwa bèl bagaj Rwayonm-an ké poté pou so sijé (Révélation 11:15).

• Léta monn-an ka konfirmé ki Rwayonm Bondjé-a tou pròch rivé. Jézi té di ki anvan Rwayonm–an mennen lapè anlè latè-a, nou monn té ké plen ké lagèr, lafamin ké tranbléman-dé-tèr (Matthieu 24:3, 7).

  A tout sa bagaj-ya nou ka wè jòdla. Nou pouvé gen konfyans annan Rwayonm Bondjé-a ki ké éliminé tout problèm titalò.