LÉSON 14

Mété lidé ki pi enpòrtan-yan douvan

Hébreux 8:1

SA TO DIVÈT FÈ : Idé moun-yan byen swiv to diskour. Montré kouman chak lidé enpòrtan ka maché ké to tèm épi ké sa to lé fè yé konprann.

A pou to savé koté to lé alé. Doumandé to kò ès to diskour, a pou bay enfòrmasyon, bay prèv, ouben bay moun-yan anvi fè sa ki fo, épi sonjé sa lò to ka préparé diskour-a. Fè ki tout lidé enpòrtan alé annan sans di sa to lé rivé fè.

Doumandé to kò : « Ki késyon moun-yan pouvé pozé yé kò ? Kisa ki pouvé anpéché yé asèpté sa mo ka di ? É lò yé ké gen yé répons, ki ròt késyon yé ké pozé dèyè sa ? » A pou lidé enpòrtan to ké bay, réponn chak késyon roun dèyè ròt. Konsa moun-yan ké pouvé byen swiv, byen konprann ké asèpté sa to ka di.
Répété tèm to diskour souvan. Pannan to ka fè to diskour, sèrvi palò ki annan tèm-an, ouben sèrvi ròt palò ki lé di menm bagaj-a.
A pou lidé-ya ki pi enpòrtan byen klè. Chwézi yenki lidé enpòrtan ki k’alé ké to tèm, é ki to ké pouvé byen èspliké, toupannan to ka rèspèkté tan yé bay to-a. Pa bay tròp lidé enpòrtan. Palé di roun lidé, épi fè roun ti poz anvan to palé di lidé ki ka vin dèyè-a.

To pouvé palé di lidé enpòrtan-yan lò to ka koumansé diskour-a, konsa moun-yan ké pouvé byen swiv diskour-a. To pouvé répété lidé enpòrtan-yan osi lò to ka bout to diskour, konsa moun-yan ké pouvé byen tchenbé yé.