LÉSON 34
Kouman nou pouvé montré nou kontan Jéova ?
Ès ou ka santi ou pi pròch di Bondjé dipi ou koumansé étidyé Labib-a ? Ès ou lé fè ou lanmityé ké li vin pi fò ? Si a sa, sonjé ki pi Jéova ké wè ki ou lanmou pou li ka vin fò, pi i ké kontan pran swen di ou. Mé kouman ou pouvé montré ou kontan Jéova ?
1. Kouman nou pouvé montré nou kontan Jéova ?
Nou ka montré nou kontan Jéova lò nou ka obéyi l’ (li 1 Jean 5:3). Jéova pa ka fòrsé pyès moun obéyi l’ ; i ka lésé chak moun chwazi sa i lé fè. Poukisa ? Paské Jéova lé nou ‘obéyi l’ ké tout nou tchò’ (Romains 6:17). Sa lé di ki Jéova pa lé ou obéyi l’ paské yé blijé ou fè sa, mé i lé ou obéyi l’ paské ou kontan l’. Parti 3 ké 4 di sa liv-a ké idé ou montré ou kontan Jéova lò ou ka fè bagaj ki ka fè li plézi é pa fè sa i rayi.
2. Poukisa sa pouvé rèd montré nou kontan Jéova ?
« Moun-an ki jis gen patché éprèv » (Psaume 34:19). Kou nou pa parfè nou divèt briga kont nou pròp défo. É détan nou gen problèm soumaké, bagaj ki enjis ka rivé nou ouben nou gen ròt problèm ankò. Lò nou anba problèm sa pouvé rèd fè sa Jéova ka doumandé nou fè, é pa obéyi Jéova pouvé menm sanblé pi fasil. Mé si magré sa, ou ka obéyi Jéova, ou ka montré ou kontan l’ pasé pyès ròt bagaj. Anplis di sa, ou ka montré ki ou fidèl é a pou sa Jéova ké fidèl ké ou. I pa ké janmen anbandonnen ou (li Psaume 4:3).
ANNOU FOUYÉ ANNAN LABIB-A
Annou wè poukisa sa enpòrtan pou Jéova ou obéyi l’, é annou gadé sa ki pouvé idé ou rété fidèl.
3. Satan ka akizé ou
Annan Labib-a, annan liv Job, nou ka li ki Satan akizé Job ké tout moun-yan ki lé sèrvi Jéova. Li Job 1:1, 6 – 2:10, épi kozé asou sa késyon-yan :
Dapré Satan, poukisa Jòb té ka obéyi Jéova ? (gadé Job 1:9-11).
Kisa Satan di asou tout moun é osi asou ou menm ? (gadé Job 2:4).
Li Job 27:5b, épi kozé asou sa késyon-an :
Kouman Jòb montré ki i té vréman kontan Jéova ?
Jòb montré i té kontan Jéova lò i rété fidèl.
Nou ka montré nou kontan Jéova lò nou ka rété fidèl.
4. Fè tchò Jéova kontan
Li Proverbes 27:11, épi kozé asou sa késyon-an :
Kisa Jéova ka rousanti lò ou ka fè bon bagaj é lò ou ka obéyi l’ ? Poukisa ou ka di sa ?
5. Ou pouvé rété fidèl douvan Jéova
Nou kontan Jéova, é sa ka pousé nou palé pou ròt-ya di li. Kou nou lé rété fidèl douvan Jéova, nou lé obéyi l’ menm lò sa pa fasil. Gadé VIDÉYO-a, épi kozé asou sa késyon-yan :
Ès ou ka trouvé sa rèd palé di Jéova ké ròt-ya ?
Annan vidéyo-a, kisa ki idé Jean-Paul arété pè palé di Jéova ?
Sa pi fasil rété fidèl douvan Jéova lò nou kontan sa i kontan é lò nou rayi sa i rayi. Li Psaume 97:10, épi kozé asou sa késyon-yan :
Dapré sa ou anprann, ès ou pouvé bay déztrwa bagaj Bondjé kontan ? Ès ou pouvé bay déztrwa bagaj Bondjé rayi ?
Kouman ou pouvé anprann kontan sa ki bon é rayi sa ki mové ?
6. Ou ka trapé bénédiksyon lò ou ka obéyi Jéova
Obéyi Jéova, a toujou pi bon bagaj-a nou pouvé fè. Li Isaïe 48:17, 18, épi kozé asou sa késyon-yan :
Ès nou pouvé sir ki Jéova toujou savé sa ki miyò pou nou ? Poukisa ou ka pansé sa ?
Dipi ou koumansé étidyé Labib-a é anprann konnèt vré Bondjé-a, Jéova, ki bénédiksyon ou trapé ?
I GEN MOUN KA DI : « Bondjé pa mélé ké sa mo ka fè. »
Ki vèrsé annan Labib-a ou té ké itilizé pou montré ki sa nou ka fè pouvé fè tchò Jéova kontan ouben fè li lanpenn ?
SA NOU WÈ
Ou pouvé montré ou kontan Jéova lò ou ka obéyi l’ ké lò ou ka rété fidèl douvan li menm si ou anba problèm.
Kisa ou anprann
Kisa èkzanp Jòb anprann ou ?
Kouman ou pouvé montré ou kontan Jéova ?
Kisa ki ké idé ou rété fidèl douvan Jéova ?
SA OU POUVÉ TRAPÉ OSI
Gadé wè kouman ou pouvé rété fidèl ni ké Jéova ni ké asanblé-a.
Anprann plis bagaj asou kouman Satan akizé imen-yan.
« L’intégrité de Job » (La Bible : quel est son message ?, parti 6)
Gadé kouman timoun-yan pouvé montré yé kontan Jéova.
Kouman roun jennjan pouvé rété fidèl douvan Bondjé menm si yé ka fè présyon asou li ?