LÉSON 56
Idé asanblé-a rété ansanm ansanm
Lò nou ansanm ké nou frè ké sò-ya, nou ka rousanti menm bagaj-a ki David : « Sa vréman bon é sa vréman agréyab lò frè-ya ka rété ansanm ansanm ! » (Psaume 133:1). Mé si nou ka rivé rété konsa, a pa roun bagaj ki ka fèt toubonnman konsa. Pou nou rété ansanm ansanm, nou tout gen roun bagaj pou fè.
1. Kisa ki fò annan pèp Jéova-a ?
Si ou ka alé annan roun réinyon annan rounòt péyi, pitèt ou pa ké konprann sa yé ka di, mé ou ké santi ou kò kousidiré ou té annan ou koté. Poukisa ? Paské asou tout latè-a, nou ka itilizé menm piblikasyon-yan pou étidyé Labib-a é nou ka montré nou konpanyen nou kontan yé. Kèlkanswa koté nou ka rété, ‘nou tout ka louwé non Jéova-a é nou ka adoré l’ ansanm ansanm’ (Sophonie 3:9).
2. Kisa ou pouvé fè pou asanblé-a rété ansanm ansanm ?
« A pou zòt gen roun lanmou ki fò roun pou ròt, ké tout zòt tchò » (1 Pierre 1:22). Kouman ou pouvé fè sa ? Pasé ou rété asou défo ròt-ya gen, chaché konnèt ki bèl kalité yé gen. Pa rété sèlman ké sa-ya ki kontan menm bagaj ki ou, mé éséyé osi anprann konnèt frè ké sò-ya ki gen rounòt kiltir. Fè tousa ou pouvé pou ou pa pézé moun ké wéya (gadé nòt 1) (li 1 Pierre 2:17).
3. Kisa ou ké fè lò ou ké gen roun problèm ké roun frè ouben roun sò ?
Nou ka viv ansanm ansanm, mé nou pa parfè. Nou tout ka di ouben ka fè bagaj ki ka fè ròt-ya lapenn. Paròl Bondjé-a ka di nou : « Kontinyé [...] pardonnen zòt konpanyen ké tout zòt tchò », épi i ka di dèyè sa : « Menm fason Jéova pardonnen zòt ké tout so tchò, zòt divèt pardonnen zòt konpanyen ké tout zòt tchò » (li Colossiens 3:13). Nou ka fè Jéova lapenn souvan é pourtan i ka pardonnen nou. Donk i lé nou pardonnen nou frè ké sò-ya. É si ou ka randé ou kò kont ki ou fè roun moun lapenn, pran douvan pou alé ranjé sitiasyon-anb (gadé nòt 2) (li Matthieu 5:23, 24).
ANNOU FOUYÉ ANNAN LABIB-A
Annou wè sa nou pouvé fè pou asanblé-a kontinyé rété ansanm ansanm annan lapè.
Kisa ou ké fè pou fè lapè ?
4. Pa pézé moun ké wéy
Nou lé kontan tout nou frè ké sò-ya. Mé a pa tout tan sa fasil pou nou asèpté roun moun ki pa kou nou menm. Kisa ki pouvé idé nou asèpté tout moun ? Li Actes 10:34, 35, épi kozé asou sa késyon-yan :
Jéova ka asèpté tout kalité moun adoré l’. Kou ou savé sa, kouman sa divèt aji asou fason ou ka wè sa-ya ki pa kou ou menm ?
Koté ou ka rété-a, ki kalité lidé moun gen asou sa-ya ki gen rounòt kiltir ? Poukisa ou pa lé gen sa menm kalité lidé-ya ?
Li 2 Corinthiens 6:11-13, épi kozé asou sa késyon-an :
Dapré ou, kouman ou pouvé divini pi pròch ké frè ké sò-ya ki pa kou ou menm ?
5. Pardonnen ké tout ou tchò épi fè lapè
Nou pa ké janmen gen pou pardonnen Jéova, magré sa, i ka pardonnen nou ké tout so tchò. Li Psaume 86:5, épi kozé asou sa késyon-yan :
Kisa sa vèrsé-a ka anprann nou asou pardon Jéova-a ?
Poukisa ou kontan Jéova ka pardonnen ou ?
Annan ki sitiasyon sa pouvé rèd pou nou tonbé dakò ké ròt-ya ?
Kouman nou pouvé imité Jéova pou nou rété byen ké nou frè ké sò-ya ? Li Proverbes 19:11, épi kozé asou sa késyon-an :
Si roun moun ka nèrvé ou ouben ka fè ou lapenn, kisa ou pouvé fè pou ranjé sitiasyon-an ?
Détan, a nou ka fè ròt-ya lapenn. Annan sa sitiasyon-an, kisa nou divèt fè ? Gadé VIDÉYO-a, épi kozé asou sa késyon-an :
Kouman sò-a fè lapè ?
6. Chaché ki bèl kalité ou frè ké sò-ya gen
Lò nou ka anprann konnèt nou frè ké sò-ya, nou ka wè ki bèl kalité yé gen é ki défo yé gen. Kisa nou pouvé fè pou nou rété asou yé bèl kalité ? Gadé VIDÉYO-a, épi kozé asou sa késyon-an.
Kisa ki ké idé ou wè ki bèl kalité ou frè ké sò-ya gen ?
Jéova ka rété asou bèl kalité nou gen. Li 2 Chroniques 16:9a, épi kozé asou sa késyon-an :
Kisa sa ka fè ou lò ou savé ki Jéova ka rété asou bèl kalité nou gen ?
Roun bèl djanman gen défo, mé i gen bokou valò. A menm bagaj-a pou nou frè ké sò-ya, yé pa parfè, mé yé tout gen valò pou Jéova.
I GEN MOUN KA DI : « Pou mo pardonnen roun moun, a pou i mérité l’. »
Poukisa nou divèt pardonnen ròt-ya ké tout nou tchò ?
SA NOU WÈ
Ou pouvé idé asanblé-a rété ansanm ansanm lò ou ka pardonnen é lò ou ka montré ou frè ké sò-ya ki ou kontan yé.
Kisa ou anprann
Kouman ou pouvé arété pézé moun ké wéy ?
Kisa ou ké fè si ou ka trapé roun problèm ké roun frè ouben roun sò ?
Poukisa ou lé imité Jéova annan zafè pardonnen ?
SA OU POUVÉ TRAPÉ OSI
Roun èkzanp Jézi pran ki pouvé idé nou pa jijé ròt-ya.
Ès nou divèt doumandé pardon menm si nou ka pansé ki a pa nou fòt ?
« Les excuses contribuent à la paix » (La Tour de Garde, 1é novanm 2002)
Gadé kouman sèrten frè ké sò anprann aji ké ròt-ya san yé pa fè préférans.
Kouman nou pouvé réglé roun problèm ké roun frè ouben ké roun sò anvan sa mété dézòrd annan asanblé-a ?
« Règle les désaccords avec amour » (La Tour de Garde, mé 2016)
a Nòt 1 : Gadé parti-a « Pou byen konprann » no 6 ki ka èspliké kisa roun krétyen ki kontan so frè ké sò-ya pouvé fè pou i pa bay yé pyès maladi.
b Nòt 2 : Gadé parti-a « Pou byen konprann » no 7 ki ka èspliké kisa nou pouvé fè si nou gen roun problèm soumaké ouben roun problèm douvan lalwa ké roun frè ouben ké roun sò.