ARTIK POU ÉTIDYÉ 16
KANTIK 87 Annou ankourajé nou konpanyen annan réinyon-yan
Vin pi pròch di nou frè ké sò bon pou nou !
« Sa vréman bon é sa vréman agréyab lò frè-ya ka rété ansanm ansanm ! » (PS. 133:1).
SA NOU KÉ ANPRANN
Nou ké wè kouman nou pouvé vin pi pròch di nou frè ké sò é ki bénédiksyon nou ka jwenn grasa nou lanmityé ké yé.
1-2. Kisa ki enpòrtan toubonnman pou Jéova, é kisa i ka doumandé nou fè ?
POU Jéova, fason nou ka fè ké ròt-ya enpòrtan toubonnman. É Jézi di ki nou divèt kontan nou konpanyen kou nou menm (Mat. 22:37-39). Sa lé di ki nou divèt janti osi ké sa-ya ki pa ka adoré Jéova. Lò nou ka fè sa, nou ka imité Jéova « ki ka fè solèy-a lévé asou sa-ya ki méchan ké asou sa-ya ki bon, é ki ka fè lapli tonbé asou sa-ya ki jis ké asou sa-ya ki pa jis » (Mat. 5:45).
2 Menmsi Jéova kontan tout moun, i kontan èspésyalman sa-ya ki ka obéyi l’ (Jean 14:21). É i lé nou imité l’. A pou sa i ka doumandé nou gen « bokou lanmou » pou nou frè ké sò é i lé nou montré yé ki nou ‘kontan yé ké tout nou tchò’ (1 Pierre 4:8 ; Rom. 12:10). A sa menm kalité lanmou nou gen pou moun nou fanmi nou kontan ouben pou nou bon zanmi.
3. Kisa nou divèt fè pou nou lanmou vin pi fò ?
3 Menm fason nou divèt pran swen di roun plant si nou lé i pousé, nou divèt travay rèd si nou lé nou lanmou pou nou frè ké sò vin pi fò. A pou sa apot Pòl di krétyen-yan : « Kontinyé kontan zòt frè ké sò » (Héb. 13:1). Jéova lé nou fè tousa nou pouvé pou nou kontinyé kontan ròt-ya. Annan sa artik-a, nou ké wè poukisa nou divèt vin pi pròch di nou frè ké sò, é kouman nou pouvé kontinyé fè l’.
POUKISA NOU DIVÈT VIN PI PRÒCH DI NOU FRÈ KÉ SÒ
4. Kisa nou pouvé fè pou nou pa janmen bliyé kouman sa bèl di rété ansanm ansanm ké nou frè ké sò ? (Psaumes 133:1 ; gadé zimaj-ya osi).
4 (Li Psaume 133:1.) Nou byen dakò ké moun-an ki ékri sa psaume-an. I di ki sa « bon » é ki sa « agréyab » lò nou zanmi ké sa-ya ki kontan Jéova. Mé i gen roun bagaj nou divèt panga. Imajiné roun moun ka pasé douvan roun bèl pyébwa touléjou. Ké tan-an, afòrs i pasé douvan sa pyébwa-a, i pa menm ka wè kouman i bèl ankò. Menm fason-an, nou ka wè nou frè ké sò souvan, pitèt nou jis ka wè yé plizyèr fwa annan simenn-an. Kouman nou pouvé kontinyé kontan lanmityé nou gen ké yé ? Nou ké kontan yé ankò plis si nou ka pran tan réfléchi asou sa yé chak ka fè pou asanblé-a é asou sa yé ka fè pou nou.
Annou pa janmen bliyé kouman sa bèl di rété ansanm ansanm ké nou frè ké sò (gadé paragraf 4).
5. Lò sèrten moun ka wè kouman nou kontan nou konpanyen, kouman yé ka réyaji ?
5 Lò yé ka vini annan nou réinyon pou prémyé fwa-a, sèrten moun ka rété èstébékwé lò yé ka wè kouman nou kontan nou konpanyen. É détan, lò yé ka wè sa, sa asé pou yé di yé kò ki yé trapé lavérité. Jézi di : « A konsa tout moun ké savé ki zòt sa mo disip : si zòt gen lanmou pou zòt konpanyen » (Jean 13:35). Annou pran èkzanp Chaithra, ki té k’alé linivèrsité é ki té ka étidyé Labib ké Témwen Jéova-ya. I asèpté vini annan roun asanblé réjyonal. Lò prémyé jou-a té fini, men sa i di sò-a ki té ka étidyé Labib ké l’ : « Mo papa ké mo manman pa jen kroké mo. Mé annan zòt asanblé, annan rounsèl lajournen, 52 moun kroké mo ! Mo ka pansé ki Jéova sèrvi so pèp pou fè mo santi so lanmou. Mo lé fè parti di sa fanmi-a ! » Chaithra kontinyé fè progrè é i batizé an 2024. Lò sa-ya ki ka koumansé frékanté nou ka wè bèl bagaj nou ka fè é kouman nou kontan nou konpanyen, sa ka bay yé anvi adoré Jéova (Mat. 5:16).
6. Poukisa nou pouvé di ki lò nou pròch ké nou frè ké sò, sa pouvé protéjé nou ?
6 Lò nou pròch ké nou frè ké sò, sa pouvé protéjé nou. Pòl bay so konpanyen krétyen sa konsèy-a : « Kontinyé ankourajé zòt konpanyen chak jou […] pou pyès annan zòt pa lésé so tchò vin rèd akoz di pouvwar péché-a ki ka bloublou moun » (Héb. 3:13). Détan, tèlman nou dékourajé, sa rèd pou nou kontinyé fè sa ki drèt. Mé roun frè ouben roun sò pouvé rémarké sa é Jéova pouvé fè l’ idé nou (Ps. 73:2, 17, 23). Wi, lò ròt-ya ka ankourajé nou, a roun bon bagaj pou nou !
7. Kouman lanmou-a ka idé nou rété ansanm ansanm ? (Colossiens 3:13, 14).
7 Kou nou ka fè parti di roun group koté chak moun ka fè tousa i pouvé pou montré ki i kontan so konpanyen, nou ka jwenn roun patché bénédiksyon (1 Jean 4:11). Parèkzanp, kou nou kontan nou frè ké sò, nou anvi ‘kontinyé sipòrté nou konpanyen’ é sa ka idé nou rété ansanm ansanm (li Colossiens 3:13, 14 ; Éph. 4:2-6). Anbyans nou gen annan nou réinyon chwit toubonnman. I pa gen sa anbyans-a annan pyès ròt group asou latè-a.
ANNOU BAY NOU KONPANYEN LÒNÒ
8. Kouman Jéova ka idé nou rété ansanm ansanm ?
8 A grasa Jéova si nou ka rivé rété ansanm ansanm ké nou frè ké sò asou tout latè-a menmsi nou pa parfè (1 Cor. 12:25). Labib ka di ki a ‘Bondjé li menm ka anprann nou kontan nou konpanyen’ (1 Thess. 4:9). Sa lé di ki Jéova ka sèrvi so Paròl pou di nou sa nou divèt fè pou nou vin pi pròch di nou frè ké sò. Mé pou nou lésé Bondjé « anprann » nou sa nou divèt fè, nou divèt byen étidyé sa i ka di nou épi obéyi l’ (Héb. 4:12 ; Jacq. 1:25). A sa Témwen Jéova-ya ka éséyé fè.
9. Dapré Romains 12:9-13, kisa nou divèt fè si nou lé bay nou konpanyen lònò ?
9 Kouman Paròl Bondjé-a ka anprann nou vin pi pròch di nou frè ké sò ? Annou wè sa Pòl di asou sa annan Romains 12:9-13 (li). I di : « A pou zòt toujou pran douvan pou zòt bay zòt konpanyen lònò ». Kisa sa lé di ? Sa lé di ki nou divèt pran douvan pou montré ki nou ‘kontan nou konpanyen ké tout nou tchò’. Parèkzanp, nou ka pardonnen ròt-ya, nou ka byen rousouvwè yé é nou ka partajé sa nou gen ké yé (Éph. 4:32). Pa antann to frè ké sò fè sa pou to. To pouvé « pran douvan ». Konsa, to ké wè ki sa Jézi di vré : « Nou tchò pi kontan lò nou ka bay ki lò nou ka rousouvwè » (Actes 20:35).
10. Kouman nou pouvé montré ki nou ka bay nou konpanyen lònò ? (gadé zimaj-a osi).
10 Pòl di nou pran douvan pou bay nou konpanyen lònò. Apré sa, i di : « A pou zòt travay rèd, pa fè fenyan ». Roun moun ki ka travay rèd ka bay so kò balan é i gen kouraj. Lò moun ka bay li roun bagaj pou fè, i ka fè l’ byen. Proverbes 3:27, 28 ka di nou : « Si to pouvé idé yé, pa réfizé fè bon bagaj pou sa-ya ki bézwen. » Donk, lò nou ka wè ki roun moun bézwen nou idé l’, nou ka fè tousa nou pouvé pou idé l’. Nou pa ka di ki nou ké fè sa yé bay nou fè rounòt jou, é nou pa ka di ki rounòt moun ké fè l’ (1 Jean 3:17, 18).
Lò roun annan nou frè ouben nou sò bézwen yé idé l’, annou pran douvan pou idé l’ (gadé paragraf 10).
11. Kisa ki ké idé nou vin pi pròch di ròt-ya ?
11 Nou pouvé bay ròt-ya lònò osi lò nou ka pardonnen yé vitman lò yé ka fè nou roun bagaj. Éphésiens 4:26 ka di : « A pa pou zòt rété faché jiktan solèy-a kouché. » Poukisa nou pa divèt rété faché ? Paské dapré vèrsé 27-a, nou pa ké « bay Djab-a pyès chans ». Annan so Paròl, a toulong Jéova ka doumandé nou pardonnen nou konpanyen. Parèkzanp, Colossiens 3:13 ka di nou ‘kontinyé pardonnen nou konpanyen ké tout nou tchò’. Pi bon fason pou nou vin pi pròch ké ròt-ya, a pardonnen yé lò yé ka fè nou roun bagaj. Lò nou ka fè sa, nou ka fè noupa pou « kontinyé viv byen ansanm annan lapè » (Éph. 4:3). Donk, lò nou ka pardonnen ròt-ya, sa ka pèrmèt nou rété ansanm ansanm annan lapè.
12. Kouman Jéova ka idé nou pardonnen ?
12 A vré, détan, sa pouvé rèd pou nou pardonnen sa-ya ki fè nou lapenn. Mé lèspri sen Bondjé pouvé idé nou fè l’. Pòl di nou ‘kontan nou konpanyen ké tout nou tchò’ épi « travay rèd ». Apré sa, i di nou : « A pou lèspri-a limen difé an zòt tchò » (Romains 12:11). Donk, lèspri sen Bondjé pouvé idé nou montré ròt-ya ki nou kontan yé épi pardonnen yé ké tout nou tchò. Atò, annou pa bliyé sipliyé Jéova ké tout nou tchò pou i idé nou (Luc 11:13).
I PA DIVÈT GEN « PYÈS DÉZÒRD ANMITAN NOU »
13. Kisa ki pouvé mété dézòrd annan asanblé-a ?
13 Annan asanblé-a, i gen « tout kalité moun », sa lé di moun ki ka vini di koté ki diféran é ki pa lévé menm fason-an (1 Tim. 2:3, 4). Donk, nou pa ka ni abiyé, ni penyen, ni anmizé menm fason-an é nou pa ka okipé di nou lasanté menm fason-an. Si nou pa ka panga, sa pouvé mété dézòrd annan asanblé-a (Rom. 14:4 ; 1 Cor. 1:10). Mé kou Bondjé ka anprann nou kontan nou konpanyen, nou pa ka yenki dékrété ki désizyon nou ka pran pi bon pasé désizyon ròt-ya ka pran (Phil. 2:3).
14. Kisa nou toujou divèt éséyé fè pou ròt-ya, é poukisa ?
14 Nou pa ké mété dézòrd annan asanblé-a non plis si nou ka fè éfòr pou nou toujou di bagaj pou ankourajé ròt-ya (1 Thess. 5:11). Sa ka fè roun ti moman roun patché frè ké sò ki arété préché ka roukoumansé vini lasal épi roun patché moun yé té tiré annan asanblé-a ka rouvini òbò Jéova. Nou ka rousouvwè yé ké tout nou tchò ! (2 Cor. 2:8). Gadé sa ki rivé roun sò ki té arété préché pannan 10 lannen é ki rouvini annan sal di Rwayonm-an. I ka di : « Frè ké sò-ya souri pou mo é yé bay mo lanmen » (Actes 3:19). Kou yé té janti ké li, sa fè l’ plézi. Men sa i ka di : « A té kousidiré Jéova té ka idé mo pou mo tchò viré kontan. » Si nou ka fè tousa nou pouvé pou nou toujou di bagaj ki ka ankourajé ròt-ya, Jézi ké itilizé nou pou konsolé sa-ya « ki las é ki ka poté roun charj ki lou » (Mat. 11:28, 29).
15. Ki ròt bagaj nou pouvé fè pou nou rété ansanm ansanm ? (gadé zimaj-a osi).
15 Rounòt bagaj nou pouvé fè pou rété ansanm ansanm ké nou konpanyen, a panga sa nou ka di. Job 12:11 ka di : « Ès zorè-a pa ka tèsté paròl-ya, kou lang-a ka gouté manjé-a ? » Menm fason roun moun ki konnèt fè manjé toujou ka gouté so manjé pou savé si i chwit anvan i bay ròt moun manjé l’, nou ka pran tan byen réfléchi anvan nou palé (Ps. 141:3). Annou toujou gadé pou wè si sa nou ké di ké idé ké ankourajé ròt-ya, é ké « bay sa-ya ki ka tandé sa paròl-ya roun bon bagaj » (Éph. 4:29).
Pran tan réfléchi anvan to palé (gadé paragraf 15).
16. Kimoun èspésyalman divèt di bagaj ki ka ankourajé ròt-ya ?
16 Mari-ya ké paran-yan èspésyalman divèt panga pou yé toujou di bagaj ki ka ankourajé yé madanm ké yé timoun (Col. 3:19, 21 ; Tite 2:4). Ansyen-yan osi divèt ankourajé ké konsolé ròt-ya pas a yé Jéova mété pou yé véyé asou so troupo (Is. 32:1, 2 ; Gal. 6:1). Labib ka di : « Lò roun moun ka di roun bon paròl o bon moman, a pa ti chwit sa chwit ! » (Prov. 15:23).
« A POU NOU FÈ BAGAJ POU MONTRÉ KI NOU KONTAN RÒT-YA KÉ TOUT NOU TCHÒ »
17. Kisa nou pouvé fè pou nou kontan nou frè ké sò ké tout nou tchò ?
17 Men sa apot Jan ka ankourajé nou fè : « A pa ké bouch ouben paròl rounso nou divèt kontan ròt-ya, a pou nou fè bagaj pou montré ki nou kontan yé ké tout nou tchò » (1 Jean 3:18). Nou lé kontan nou frè ké sò ké tout nou tchò. Kouman nou pouvé fè sa ? Pi nou ké pasé tan ké yé, pi nou ké pròch di yé é pi nou lanmou pou yé ké fò. Atò, annou fè sa ki fo pou nou pasé tan ké yé, parèkzanp, annan réinyon-yan ouben lò nou ka préché. Annou pran tan alé wè yé a yé kaz osi. Konsa, nou ké montré ki ‘Bondjé li menm ka anprann nou kontan nou konpanyen’ (1 Thess. 4:9). É nou chak ké kontinyé wè kouman sa « bon é sa vréman agréyab lò frè-ya ka rété ansanm ansanm ! » (Ps. 133:1).
KANTIK 90 Encourageons-nous les uns les autres