ARTIK POU ÉTIDYÉ 15
KANTIK 30 Mon Ami, mon Dieu, mon Père
« Vin pròch di Bondjé, a roun bon bagaj pou nou ! »
« Pou mo menm, vin pròch di Bondjé, a roun bon bagaj pou mo » (PS. 73:28).
SA NOU KÉ ANPRANN
Nou ké wè kouman nou pouvé vin pi pròch di Jéova é ki bénédiksyon nou ka trapé lò nou ka fè sa.
1-2. a) Ki éfòr nou divèt fè pou nou gen roun bon zanmi ? b) Kisa nou ké wè annan sa artik-a ?
ÈS TO gen roun bon zanmi ? Kouman to fè vin so zanmi ? Zòt dèt pasé tan ansanm é to anprann konnèt li, to vin savé ki problèm i jwenn, sa i kontan ké sa i pa kontan. To wè ki i gen bèl kalité to té ké lé imité. A konsa to vin kontan to zanmi.
2 Pou divini bon zanmi ké roun moun, sa ka pran tan é to divèt fè éfòr. A menm bagaj-a ké Jéova. Sa ka pran tan pou nou rivé byen konnèt li é pou nou lanmou pou li vin pi fò. Annan sa artik-a, nou ké wè kouman nou pouvé vin pi pròch di nou Bondjé é ki bénédiksyon nou ka trapé lò nou ka fè sa. Mé pou koumansé, annou gadé poukisa a roun bon bagaj si nou ka kontinyé vin pi pròch di Jéova, nou pi bon Zanmi.
3. Poukisa nou divèt pran tan réfléchi asou bénédiksyon nou ka jwenn lò nou ka vin pi pròch di Jéova ?
3 To dèt dakò pou di ki « vin pròch di Bondjé » bon pou to. Mé si to ka sonjé kouman sa bon pou to, sa pouvé bay to anvi kontinyé fè l’ (Ps. 63:6-8). Annou pran roun èkzanp : Nou savé ki lò nou ka manjé byen, nou ka fè èspòr, nou ka dronmi asé é nou ka bwè asé dlo, tousa bon pou nou. Magré sa, i gen roun patché moun ki pa ka gadé pou tout sa bagaj-ya é ki ka néglijé yé lasanté. Mé, pi nou ka réfléchi asou ki bénéfis nou ka jwenn lò nou ka okipé di nou lasanté, pi sa fasil pou nou fè l’. Menm fason-an, menmsi nou savé ki vin pròch di Bondjé bon pou nou, si nou ka pran tan réfléchi asou bénédiksyon sa ka mennen pou nou, sa ké bay nou anvi kontinyé fè l’ ankò plis (Ps. 119:27-30).
4. Kisa moun-an ki ékri Psaume 73:28 di ?
4 (Li Psaume 73:28.) Moun-an ki ékri Psaume 73-a té sa roun Lévit é i té ka jwé lanmizik annan tanp Jéova-a. Lò i ékri sa psaume-an, sa té ka fè roun ti moman i té ka adoré Jéova. Mé i té savé ki i té divèt kontinyé sonjé ki « vin pròch di Bondjé » bon é i té lé idé ròt-ya sonjé sa osi. Ki bénédiksyon nou ka trapé lò nou ka vin pròch di Bondjé ?
« VIN PRÒCH DI BONDJÉ » KA FÈ NOU TCHÒ KONTAN
5. a) Poukisa vini òbò Jéova ka fè nou tchò kontan ? b) Annan ki sitiasyon sajès Jéova-a idé to, é kont kisa i ja protéjé to ? (Proverbes 2:6-16).
5 Pi nou ké vin pròch di Jéova, pi nou tchò ké kontan (Ps. 65:4). Poukisa nou pouvé di sa ? Parèkzanp, lò nou ka li sa i ka di nou annan Labib é nou ka obéyi l’, nou ka vin gen sajès. Sa ka protéjé nou kont bagaj ki mové pou nou é sa ka anpéché nou fè péché ki grav (li Proverbes 2:6-16). A pou sa Labib ka di : « Byennéré moun-an ki ka trouvé sajès-a ké moun-an ki ka rivé fè diférans ant sa ki bon ké sa ki mové » (Prov. 3:13).
6. Poukisa moun-an ki ékri Psaume 73-a té tris ?
6 Détan, menm zanmi Jéova pouvé tris. Moun-an ki ékri Psaume 73-a té tris lò i koumansé sonjé bagaj ki pa té jis dapré li. Pou li, moun ki té vyolan é ki té ka fè ròklò té gen tousa yé té lé : yé té rich, yé té gen roun bon lasanté é yé lavi té bèl. I té kòlè é i koumansé anvi gen sa sa moun-yan té gen. I té ka pansé ki moun ki té ka fè ròklò é ki té méchan té ka trapé tousa yé té lé. Yé té gen roun bon lasanté é yé pa té ka soufri pyès (Ps. 73:3-7, 12). Roun jou, tèlman so tèt té cho, i jis doumandé so kò si tousa i té ka fè pou adoré Jéova té vo lapenn. So tchò té gro, i di : « A pou bon tchò vré mo té ka briga pou mo tchò rété pròp é a pou bon tchò mo pa sali mo lanmen ké pyès bagaj ki pa bon » (Ps. 73:13).
7. Lò nou tris, kisa nou pouvé fè ? (gadé zimaj-a).
7 Menmsi moun-an ki ékri Psaume 73-a té tris, i fè roun bagaj pou chanjé sa i té ka rousanti. I « antré annan bèl tanp Bondjé-a » é i asèpté Jéova korijé l’ (Ps. 73:17-19). Jéova, nou pi bon Zanmi, ka wè lò nou tris. Konsèy nou ka jwenn annan so Paròl ké ankourajman nou ka trapé òbò nou frè ké sò-ya ké bay nou fòrs pou nou kontinyé adoré l’ menm lò nou tris. Menm lò nou enkyèt pou mouri, Jéova pouvé konsolé nou é kalmé nou tchòa (Ps. 94:19).
Lévit-a ki ékri Psaume 73-a dibout annan « bèl tanp Bondjé-a » (gadé paragraf 7).
« VIN PRÒCH DI BONDJÉ » KA BAY NOU LAVI ROUN SANS KÉ ROUN ÈSPWAR
8. Bay dé ròt bénédiksyon nou ka jwenn lò nou ka « vin pròch di Bondjé ».
8 « Vin pròch di Bondjé » ka pèrmèt nou jwenn dé ròt bénédiksyon : nou lavi gen roun sans é nou sir ki sa Bondjé promèt nou pou dimen ké fèt (Jér. 29:11). Annou wè plis bagaj asou sa bénédiksyon-yan.
9. Poukisa nou pouvé di ki lò nou ka vin pi pròch di Jéova, sa ka bay nou lavi roun sans ?
9 Lò nou ka vin pi pròch di Jéova, sa ka bay nou lavi roun sans. Roun patché moun ki pa ka krè annan Bondjé ka pansé ki lavi pa gen sans é ki roun jou, i pa ké gen pyès moun asou latè-a ankò. Mé grasa sa nou anprann annan Labib, nou sir ki Bondjé ka « èkzisté é ki i ka divini sa-la ki ka rékonpansé moun-yan ki ka chaché l’ ké tout yé tchò » (Héb. 11:6). Anplis di sa, Jéova fè nou pou nou adoré l’. Donk, lò nou ka adoré l’, nou tchò kontan toubonnman (Deut. 10:12, 13).
10. Dapré Psaume 37:29, kisa Jéova ka promèt sa-ya ki ka fè l’ konfyans ?
10 Roun patché moun ka pansé ki apré sa lavi-a, i pa gen anyen ankò. Pou yé, lavi, a travay, maryé, fè timoun épi mété soumaké asou koté pou yé rétrèt. I pa gen plas pou Bondjé annan yé lavi. Mé nou savé ki Jéova ka pran swen di sa-ya ki ka adoré l’ (Ps. 25:3-5 ; 1 Tim. 6:17). Nou ka fè Bondjé ki sa nou Zanmi konfyans é nou savé ki i ké fè tousa i promèt nou. Parèkzanp, nou savé ki nou ké pouvé adoré l’ pou tout-tan annan paradi-a (li Psaume 37:29).
11. Ki bénédiksyon nou ka jwenn lò nou ka vin pi pròch di Jéova, é kisa i ka rousanti ?
11 Lò nou ka vin pròch di Jéova, nou ka jwenn roun patché ròt bénédiksyon. Parèkzanp, i ka promèt ki i ké pardonnen péché sa-ya ki pròch di li é ki ka répanti (Is. 1:18). Donk, nou konsyans pa bézwen bat nou akoz di péché nou fè anvan (Ps. 32:1-5). Anplis di sa, nou tchò kontan pas nou ka fè Jéova plézi (Prov. 23:15). Pitèt to ka sonjé ròt bénédiksyon nou gen pas nou zanmi ké Bondjé. Mé kouman nou pouvé kontinyé vin pi pròch di li ?
KOUMAN NOU POUVÉ KONTINYÉ « VIN PRÒCH DI BONDJÉ »
12. Kisa to ja fè pou to vin pi pròch di Bondjé ?
12 Anvan to batizé Témwen Jéova, to fè roun patché bagaj pou to divini zanmi Jéova. To anprann roun patché bagaj asou li ké Jézi, to répanti di péché to fè anvan, to montré to lafwa annan li é to fè tousa to té pouvé pou obéyi l’. Mé, pou to kontinyé vin pi pròch di li, to divèt kontinyé fè sa bagaj-ya (Col. 2:6).
13. Bay trwa bagaj ki ké idé nou kontinyé vin pi pròch di Jéova ?
13 Kisa ki ké idé nou kontinyé vin pi pròch di Jéova ? 1) Nou divèt kontinyé li ké étidyé Labib. Lò nou ka li Labib, nou divèt fè plis ki anprann bagaj asou Bondjé. Nou divèt chaché konprann fason Bondjé ka wè bagaj-ya, sa i lé nou fè épi fè sa i ka doumandé nou (Éph. 5:15-17). 2) A pou nou fè nou lafwa vin pi fò. Pou fè sa, nou divèt pran tan réfléchi asou tousa ki ka montré ki i kontan nou. 3) Nou divèt kontinyé rayi sa i rayi épi pa maché ké moun ki ka fè sa bagaj-ya (Ps. 1:1 ; 101:3).
14. Dapré sa ki marké annan 1 Corinthiens 10:31, kouman nou pouvé fè Jéova plézi annan tousa nou ka fè ? (gadé zimaj-ya osi).
14 (Li 1 Corinthiens 10:31.) Nou divèt byen désidé fè Jéova plézi, sa enpòrtan toubonnman. Pou nou fè sa, a pa loutou préché ké alé annan réinyon-yan. Tousa nou ka fè touléjou divèt fè Jéova plézi osi. Parèkzanp, lò nou onèt annan tout bagaj é lò nou ka partajé sa nou gen ké ròt-ya, nou ka fè Jéova plézi (2 Cor. 8:21 ; 9:7). I lé nou montré nou gen rékonésans pou lavi i bay nou-a osi. Donk, nou ka panga sa nou ka manjé, nou pa ka bwè tròp alkòl é nou ka fè ròt bagaj ki bon pou nou lasanté. Lò Jéova ka wè ki nou ka fè tousa nou pouvé pou fè l’ plézi annan tousa nou ka fè, i kontan nou ankò plis (Luc 16:10).
I gen plizyèr bagaj nou pouvé fè pou nou fè Jéova plézi : fè atansyon lò nou ka roulé nou loto, fè èspòr, véyé sa nou ka manjé pou nou pran swen di nou lasanté épi partajé sa nou gen ké ròt-ya (gadé paragraf 14).
15. Kouman Jéova lé nou aji ké ròt-ya ?
15 Jéova janti ni ké sa-ya ki jis ni ké sa-ya ki pa jis (Mat. 5:45). É i lé nou menm osi nou janti ké tout moun. Parèkzanp, i ka di ki ‘a pa pou nou palé pyès moun mal, a pa pou nou chaché lévé blo, pasé nou fè sa, a pou nou […] rété dous ké tout moun’ (Tite 3:2). Kou nou savé sa, nou pa janmen divèt méprizé sa-ya ki pa ka krè annan Bondjé (2 Tim. 2:23-25). Nou ké vin pi pròch di Jéova si nou toujou janti é si nou ka fè bon bagaj pou tout moun.
ANNOU « VIN PRÒCH DI BONDJÉ » MENMSI NOU TRIBICHÉ
16. Kisa moun-an ki ékri Psaume 73-a rousanti lò i manké chibré ?
16 Kisa to pouvé fè si to ka pansé ki to pa mérité Jéova kontan to pas to fè roun péché ? A sa ki rivé moun-an ki ékri Psaume 73-a. Men sa i di : « Mo manké pran roun mové chimen ; mo manké chibré » (Ps. 73:2). Kou li menm ka di, i té divini « égri » ké « sòt » é douvan Jéova, i té « kou roun zannimo ki pa gen entélijans » (Ps. 73:21, 22). Ès i pansé ki akoz di péché i té fè, Jéova pa té kontan li ankò é ki i pa té ké pardonnen l’ ?
17. a) Kisa moun-an ki ékri Psaume 73-a fè lò i té anba dlo ? b) Kouman nou pouvé imité sa moun-an ? (gadé zimaj-ya osi).
17 Pitèt moun-an ki ékri psaume-an santi kousidiré Jéova té lésé l’ tonbé. Mé i pa dèt pansé sa lontan. Lò i té anba dlo, i di ki i té bézwen vin pi pròch di so Bondjé. I ékri : « Mé aprézan, mo la ké to toulong ; to tchenbé mo lanmen drèt. To ka bay mo konsèy pou gidé mo, épi to ké fè mo gen laglwar » (Ps. 73:23, 24). Nou menm osi, nou divèt priyè Jéova pou i bay nou fòrs lò nou ka santi ki nou lafwa fèb ouben lò nou dékourajé akoz di péché nou fè (Ps. 73:26 ; 94:18). Menmsi nou ka fè roun péché ki grav, nou pouvé rouvin òbò Jéova é nou pouvé sir ki i « paré pou pardonnen » (Ps. 86:5). Lò nou anba dlo, a la pou nou vin pi pròch di nou Bondjé (Ps. 103:13, 14).
Si nou ka santi ki nou lafwa fèb, nou divèt pasé plis tan ka priyè épi alé annan tout nou réinyon pou nou vin pi pròch di Jéova (gadé paragraf 17).
NOU KÉ POUVÉ KONTINYÉ « VIN PRÒCH DI BONDJÉ » POU TOUT-TAN
18. Poukisa nou ké pouvé kontinyé vin pi pròch di Jéova pou tout-tan ?
18 Nou ké pouvé vin pi pròch di Bondjé pou tout-tan é nou ké toujou gen bagaj pou anprann asou li. Poukisa ? Paské Labib ka di ki nou « pa pouvé byen konnèt » so chimen, so sajès ké so konésans (Rom. 11:33).
19. Di kisa Psaumes-yan ka pèrmèt nou sir ?
19 Men sa nou ka li annan Psaume 79:13 : « Nou ki sa to pèp, to mouton annan to savann, nou ké di to mèrsi pou tout-tan. É jénérasyon apré jénérasyon, nou ké louwé to. » To menm osi to pouvé sir ki to ké rousouvwè bénédiksyon pou tout-tan si to ka kontinyé vin pi pròch di Jéova. Donk, to pouvé di ké tout to tchò : « Bondjé ké fè mo tchò vin fò é i sa mo rékonpans pou tout-tan » (Ps. 73:26).
KANTIK 32 Soutni Jéova !
a Si roun moun ka wè ki sa ka fè roun bon moman i enkyèt ouben i tris pou mouri, pitèt i ké bézwen alé wè roun dòktèr. Pou anprann plis bagaj asou sa, gadé La Tour de Garde no 1 di lannen 2023.