Rwayonm-an la !

1. Di kisa nou sir, é poukisa ?

LÒ TO ka wè annan ki léta monn-an fika jòdla, ès sa rèd pou to krè ki bagaj-ya ké ranjé ? Moun menm fanmi pa kontan yé konpanyen. Pi sa ka alé pi moun-yan vyolan, pi yé ka gadé pou yé douvan lèstomak é pi yé ka vin mové. Anplis di sa, roun patché moun pa ka fè sa-ya ki gen otorité konfyans. Mé, sa ki ka pasé jòdla pouvé fè to sir ki bagaj-ya ké ranjé titalò. Poukisa ? Paské roun profési asou « dèrnyé jou-ya » té di kouman moun-yan té ké aji. É a konsa moun-yan ka aji jòdla (2 Tim. 3:1-5) Sa profési-a ka fèt, é pyès moun ki sensèr pa pouvé di ki a pa vré. É sa ka montré ki Jézi byen divini Rwa rwayonm Bondjé-a. Mé a pa sa profési-a sèlman ki ka palé di sa rwayonm-an. Pou nou fè nou lafwa vin pi fò, sa ké bon pou nou rouwè ròt profési ki ka fèt jòdla.

2. Kisa nou ké wè annan sa artik-a é poukisa ? (di sa to ka wè asou zimaj-a anlè prémyé paj-a).

² Annan sa artik-a nou ké wè 1) roun profési ki ka pèrmèt nou savé kitan Bondjé mété so rwayonm annan syèl-a, 2) plizyèr profési ki ka pèrmèt nou wè ki Jézi divini Rwa sa rwayonm-an é 3) plizyèr profési ki ka montré kouman lèlmi sa rwayonm-an ké mouri. Nou ké wè ki sa profési-ya ka alé ansanm kou roun puzzle é yé ka montré nou ki koté nou fika annan kalandriyé Jéova-a.

KOUMAN NOU POUVÉ SAVÉ KITAN BONDJÉ MÉTÉ SO RWAYONM ANNAN SYÈL-A

3. Di kisa profési-a nou ka jwenn annan Daniel 7:13, 14 ka pèrmèt nou sir asou Rwa rwayonm Bondjé-a ?

³ Profési nou ka jwenn annan Daniel 7:13, 14 ka pèrmèt nou sir ki Jéova chwazi pi bon moun i pouvé gen pou dirijé so rwayonm : Jézi. Moun tout nasyon ka « obéyi l’ » ké tchò kontan, é pyès moun pa ké janmen ranplasé l’. Rounòt profési annan liv Daniel té di ki Jézi té ké rousouvwè Rwayonm-an apré sèt tan. Ès nou pouvé rivé savé kitan Jézi divini rwa ?

4. Èspliké kouman Daniel 4:10-17 ka pèrmèt nou savé ki lannen Jézi divini Rwa (gadé nòt-a osi).

⁴ (Li Daniel 4:10-17.) « Sèt tan »-yan ka fè 2 520 lannen. Sa sèt tan-yan koumansé an 607 anvan nou lépòk, lò Babilonyen-yan tiré dèrnyé rwa Jérizalèm ki té asou tronn Jéova-a. É yé fini an 1914, lò Jéova fè Jézi, « sa-la ki gen drwa-a », divini Rwa di so rwayonmb (Ézéch. 21:25-27).

5. Poukisa profési-a asou « sèt tan »-yan ka rasiré nou ?

⁵ Poukisa sa profési-a ka rasiré nou ? Profési-a asou « sèt tan »-yan ka rasiré nou paské i ka montré nou ki Jéova toujou ka fè so promès fèt jiskont lò i prévwè fè l’. Menm fason i té prévwè roun moman pou mété so rwayonm, i ké fè sa ki fo pou tout ròt profési-ya fèt lò yé ké gen pou fèt. Jou Jéova-a « pa ké an rétar » (Hab. 2:3).

KOUMAN NOU SAVÉ KI JÉZI DIVINI RWA

6. a) Kisa ki ka byen montré ki Jézi Rwa annan syèl-a ? b) Kisa Jézi di apot Jan ? (Révélation 6:2-8).

⁶ Lò i té près fini so lavi asou latè-a, Jézi di ki roun patché bagaj té ké fèt asou tout latè-a ki té ké pèrmèt so disip wè ki i té divini Rwa annan syèl-a. I palé di lagèr, lafamin, tranblémandétèr. I di osi ki i té ké gen épidémi « roun koté apré ròt » é a sa nou wè ké pandémi Covid-19-a parèkzanp. Tout sa bagaj-ya ka fè parti di sa Labib-a ka aplé « sign »-an ki ka montré ki Jézi divini rwa (Mat. 24:3, 7 ; Luc 21:7, 10, 11). Pasé 60 lannen apré i mouri épi i routounen annan syèl-a, Jézi di apot Jan ki sa bagaj-ya té ké fèt vré (li Révélation 6:2-8). É tout sa bagaj-ya ka fèt vré dipi 1914. A sa lannen-an Jézi divini Rwa.

7. Poukisa moun-yan ka wè malò dèyè malò dipi Jézi Rwa annan syèl-a ?

⁷ Poukisa sitiasyon-an asou latè-a vin pi mové dipi Jézi divini Rwa ? Révélation 6:2 ka anprann nou roun bagaj enpòrtan : prémyé bagaj Jézi té gen pou fè lò i divini Rwa, a té briga. Ké kimoun ? Ké Djab-a ké so démon. Dapré Révélation chapit 12, Satan pédi sa lagèr-a é Jézi jité l’, li ké so démon asou latè-a. Afòrs i anrajé, i ka pasé tout so raj asou nou tout ki asou latè-a. A pou sa i gen roun patché « malò » asou latè-a (Rév. 12:7-12).

8. Poukisa sa ka rasiré nou lò nou ka wè ki profési-ya asou Rwayonm-an ka fèt ?

⁸ Poukisa sa profési-ya ka rasiré nou ? Fason moun-yan ka aji aprézan ké tousa ki ka pasé asou latè-a ka pèrmèt nou wè ki Jézi divini Rwa. Donk, pasé nou kòlè paské nou ka wè ki moun-yan mové é ki yé ka gadé pou yé douvan lèstomak, nou ka sonjé ki a roun profési di Labib-a ki ka réyalizé. Rwayonm-an la ! (Ps. 37:1). Épi, pi Armagédon ké proché, pi sitiasyon-an asou latè-a ké vin pi mové (Marc 13:8 ; 2 Tim. 3:13). Ès to pa anvi di nou Papa ki annan syèl-a é ki kontan nou, mèrsi paské i ka idé nou konprann poukisa monn-an mové jòdla ?

KOUMAN LÈLMI RWAYONM BONDJÉ-A KÉ MOURI ?

9. Kouman profési-a ki annan Daniel 2:28, 31-35 ka palé di dèrnyé pwisans mondyal-a é kitan sa pwisans-a koumansé dirijé ?

⁹ (Li Daniel 2:28, 31-35.) Nou ka wè ki sa profési-a ka fèt jòdla osi. Nabikodonozòr té fè roun rèv, é sa rèv-a té ka montré sa ki té ké fèt « annan lépòk dèrnyé jou-ya », sa lé di apré Jézi koumansé dirijé. A sa lépòk-a, Jézi té ké gen plizyèr lèlmi asou latè-a. Annan yé, i té ké gen dèrnyé pwisans mondyal-a sa profési-a ka palé. A li pyé èstati-a ki « fèt ké fè ké latè gra » ka réprézanté. Sa pwisans mondyal-a ja la dipi roun ti moman. I koumansé dirijé pannan Prémyé Lagèr mondyal-a, lò Anglétèr ké Étazini koumansé travay ansanm roun fason èspésyal, a sa yé ka aplé alliance anglo-américaine. Mé rèv Nabikodonozòr-a té ka di osi ki sa pwisans mondyal-a té ké diféran di ròt rwayonm-yan parapòrta dé bagaj.

10. a) Profési Danyèl palé di roun bagaj nou ka wè jòdla annan pwisans anglé ké amériken-an, ki bagaj ? b) Annan ki trap nou pa divèt tonbé ? (gadé karé-a « Annou pa lésé “latè gra-a” détenn anlè nou ! »).

¹⁰ Prémyèrman, pou tout ròt pwisans mondyal-ya, a rounsèl bagaj ki té ka réprézanté yé. Parèkzanp, lò ouben larjan. Mé pou sa-la, a roun mélanj fèt ké fè ké latè gra ki ka réprézanté l’. Latè gra ka réprézanté « pèp-a » (Dan. 2:43). Jòdla, nou ka byen wè ki moun-yan ka anpéché chèf sa pwisans mondyal-a fè sa yé lé. Parèkzanp ké vòt yé ka fè pannan élèksyon-yan, lò yé ka plen lari-ya pou défann yé drwa ouben ké sa sendika-ya ka fè.

11. Kou a pwisans anglé ké amériken-an ki ka dirijé, poukisa sa ka pèrmèt nou plis sir ankò ki nou ka viv lépòk dèrnyé jou-ya ?

¹¹ Dézyèmman, kou pyé èstati-a ka réprézanté pwisans anglé ké amériken-an, sa lé di ki a li ki sa dèrnyé pwisans profési-a ka palé. Pyès ròt gouvèrnman pa ké ranplasé l’. Non, Bondjé ké krazé l’ ansanm ké tout ròt gouvèrnman-yan pannan Armagédonc (Rév. 16:13, 14, 16 ; 19:19, 20).

12. Ki ròt enfòrmasyon annan profési Danyèl ka rasiré nou é ka bay nou roun èspwar ?

¹² Poukisa sa profési-a ka rasiré nou ? Paské i ka bay nou ròt enfòrmasyon ki ka pèrmèt nou sir ki nou annan lépòk dèrnyé jou-ya. I ja gen pasé 2 500 lannen, Danyèl té di ki apré Babilòn, i té ké gen kat ròt pwisans mondyal ki té ké dirijé sèrvitèr Bondjé-ya. Anplis di sa, i di ki a té ké pwisans anglé ké amériken-an ki té ké sa dèrnyé pwisans-a. Sa ka ankourajé nou é sa ka pèrmèt nou sir ki titalò rwayonm Bondjé-a ké krazé tout gouvèrnman-yan é i ké dirijé tout latè-a (Dan. 2:44).

13. a) Kisa « wityèm rwa »-a yé ka palé annan Révélation 17:9-12 ka réprézanté ? b) Kisa « dis rwa »-ya ka réprézanté ? c) Kouman sa profési-a fèt ?

¹³ (Li Révélation 17:9-12.) Déga Prémyé Lagèr mondyal-a fè pèrmèt rounòt profési asou dèrnyé jou-ya fèt. Roun patché chèf politik té lé mété lapè asou latè-a. Donk an janvyé 1920, yé désidé fè sa yé aplé la Société des Nations, é apré sa, a Nations Unies-ya ki ranplasé l’ an òktòb 1945. Sa òrganizasyon-an, a roun « wityèm rwa ». Mé a pa roun pwisans mondyal paské a gouvèrnman-yan ki ka bay li pouvwar i gen-an. Labib-a ka di ki sa gouvèrnman-yan, a « dis rwa ».

14-15. a) Kisa Révélation 17:3-5 ka di nou asou « Gran Babilòn-an » ? b) Kisa ki ka rivé fo rélijyon-yan jòdla ?

¹⁴ (Li Révélation 17:3-5.) Annan roun vizyon, apot Jan wè roun pròstityé yé ka aplé « Gran Babilòn-an » é ki ka réprézanté tout fo rélijyon-yan yé tout ansanm. Kisa vizyon Jan wè-a ka anprann nou asou Gran Babilòn-an ? Dipi lontan, fo rélijyon-yan ka maché ké gouvèrnman-yan é yé ka béni yé. Mé titalò, Jéova ké mété annan tchò gouvèrnman-yan « anvi fè so volonté ». Kisa ki ké rivé atò ? Sa gouvèrnman-yan, sa lé di « dis rwa »-ya, ké ataké fo rélijyon-yan é yé ké krazé yé (Rév. 17:1, 2, 16, 17).

¹⁵ Kouman nou savé ki Gran Babilòn-an pròch mouri ? Pou nou réponn sa késyon-an, a pou nou sonjé ki tan-lontan, a té roun gran flèv ki té ka protéjé roun bò vil Babilòn. Sa flèv-a, a té flèv Éfrat. Liv Révélation-an ka di ki moun-yan ki ka soutni Gran Babilòn-an kou « dlo » ki ka protéjé l’ (Rév. 17:15). Mé i ka di osi ki sa dlo-ya té ké « vin sèk », sa lé di ki roun patché moun té ké arété soutni l’ (Rév. 16:12). É a sa nou ka wè jòdla : roun patché moun ka soti annan fo rélijyon-yan pou alé chaché yé répons rounòt koté.

16. Nou wè ki yé fè Nations Unies-ya é ki roun patché moun ka soti di fo rélijyon-yan. Kisa sa ka byen montré nou, é poukisa sa ka rasiré nou ?

¹⁶ Poukisa sa profési-ya ka rasiré nou ? Nou wè ki yé fè Nations Unies-ya é ki roun patché moun ka soti annan fo rélijyon-yan. Sa bagaj-ya ka byen montré ki nou ka viv annan lépòk dèrnyé jou-ya. Mé menm si dlo-ya ki ka soutni Babilòn ka vin sèk, a pa sa ki fè fo rélijyon-yan disparèt. Kou nou ja di l’, Jéova ké mété annan tchò « dis rwa »-ya, sa lé di gouvèrnman-yan ki ka soutni Nations Unies-ya, « anvi fè so volonté ». Gouvèrnman-yan ké yenki krazé fo rélijyon-yan rounsèl kou, é tout moun asou latè-a ké rété èstébékwéd (Rév. 18:8-10). A kousidiré latè-a ké tranblé é sa ké pitèt mennen roun patché problèm. Mé dé bagaj ké fè nou tchò kontan : roun lèlmi Jéova dipi lontan ké disparèt pou tout-tan, é nou pa ké gen pou antann lontan ankò pou Jéova délivré nou di sa monn méchan-an (Luc 21:28).

PA PÈ SA KI POU RIVÉ DIMEN

17-18. a) Kouman nou pouvé kontinyé fè nou lafwa vin pi fò ? b) Di kisa nou ké palé annan ròt artik-a ?

¹⁷ Danyèl té di ki ‘vré konésans-a té ké vini bokou’. É a sa ki fèt ! Jòdla nou ka konprann profési-ya ki ka palé di nou lépòk (Dan. 12:4, 9, 10). Sa profési-ya tèlman prési ki nou gen ankò plis rèspè pou Jéova ké pou so paròl (Is. 46:10 ; 55:11). Atò, kontinyé fè to lafwa vin pi fò. Pou fè sa, pran tan byen étidyé Labib-a é idé ròt-ya divini zanmi ké Jéova. I ké protéjé tout sa ki ka fè li konfyans é i ké « bay yé roun lapè ki pa ka fini » (Is. 26:3).

¹⁸ Annan ròt artik-a, nou ké wè plizyèr profési ki ka palé di asanblé krétyen-an pannan lépòk dèrnyé jou-ya. Kou nou ké wè l’, sa profési-ya ka montré osi ki nou ka viv lépòk dèrnyé jou-ya. Anplis di sa, nou ké wè kouman Jézi, nou Rwa, ka pran swen di so disip ki fidèl.